ꓡꓲꓽ ꓒꓰꓼ ꓘꓴꓽ ꓗꓪ ꓙꓵꓻ ꓠꓲꓹ ꓟ ꓮ ꓡꓰ ꓫꓵ ꓟꓬꓱꓽ ꓬꓰ ꓡ꓾

ꓡꓲꓽ ꓒꓰꓼ ꓘꓴꓽ ꓗꓪ ꓙꓵꓻ ꓠꓲꓹ ꓟ ꓮ ꓡꓰ ꓫꓵ ꓟꓬꓱꓽ ꓬꓰ ꓡ꓾ ꓐꓯ_ ꓟ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ= ꓙꓵꓻ ꓠꓲꓹ ꓐꓯ_ ꓟ ꓮ ꓫꓵ ꓥ ꓡ? ꓙꓵꓻ ꓠꓲꓹ ꓐꓯ_ ꓟ ꓠꓬ꓾ ꓢ ꓣꓳ ꓕꓲ ꓖꓳ ꓓꓱ ꓪꓴ-ꓢ ꓔꓯ ꓣꓳ ꓙꓵꓻ_ ꓟ꓾ ꓪꓴ-ꓢ ꓠꓬ ꓚꓵ ꓚꓵ ꓔꓬ ꓡꓳ꓾ ꓐꓯ ꓟ ꓔꓯ ꓣꓳ ꓙꓵꓻ_ ꓟ꓾ ꓪꓴ-ꓢ ꓤ ꓔꓲ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓢꓲ ꓠꓬꓲ ꓣꓳ ꓔꓯ ꓚꓬꓴ ꓗꓷ ꓐꓯ ꓟ ꓣꓳ ꓙꓵꓻ ꓟ꓾ ꓙꓵꓻ ꓠꓲꓹ ꓥ ꓡꓳ= ꓖꓳ ꓡꓱ ꓠꓬꓲ ꓡꓲꓽ ꓒꓰꓼ ꓐꓰ ꓙꓵꓻ ꓠꓲꓹ ꓠꓬ ꓮ ꓡꓰ ꓐꓰ ꓗꓳꓸ ꓙꓰ ꓙꓳ  ꓓꓴ ꓥ ꓡ꓾ ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓲꓽ ꓒꓰꓼ ꓕꓱ ꓟ ꓠꓬ ꓣꓳ ꓫꓵ ꓣꓳ ꓧꓪ ꓠꓯꓼ ꓗꓪ ꓐꓰ ꓓꓳꓺ ꓡ ꓟ꓾ꓣꓳ ꓥꓳꓽ ꓠꓯꓼ ꓗꓪ ꓐꓰ ꓐꓶꓽ ꓓꓳꓺ ꓡ ꓟ꓾ ꓣꓳ ꓓꓵꓽ ꓙ ꓚꓱꓹ ꓠꓯꓼ ꓗꓪ ꓐꓰ ꓦꓱ ꓡ ꓟ ꓤ ꓫꓵꓸ ꓤ ꓠꓱ ꓥ ꓡꓳ꓾ ꓣꓳ ꓥꓳꓽ ꓫꓵ ꓕꓱ ꓟ ꓠꓬ ꓐꓯ ꓘꓶꓽ ꓗꓪ ꓐꓰ ꓔꓯꓺ ꓟꓽ ꓠ ꓟ꓾ ꓣꓳ ꓠꓲꓹ ꓟ ꓮ ꓠꓯꓸ ꓠꓯꓸ ꓗꓪ ꓐꓰ ꓓꓳꓺ ꓡ ꓟ꓾ ꓕꓯ ꓢꓲ ꓗꓪ ꓟꓳꓸ ꓖꓶ_ ꓟ ꓕꓲ ꓫꓵ ꓥ ꓡꓳ= ꓖꓳ ꓡꓱ ꓠꓬꓲ ꓡꓲꓽ ꓒꓰꓼ ꓐꓰ ꓣꓳ ꓐꓯ_ ꓕꓯ ꓡ ꓞꓳ ꓖꓳ ꓕꓲ ꓫꓵ ꓟ ꓬꓲ ꓪ ꓠꓲꓹ ꓟ ꓮ ꓠꓯꓸ ꓠꓯꓸ ꓗꓪ ꓐꓰ ꓓꓳꓺ ꓡ ꓟ ꓗꓪ ꓐꓰ ꓟꓳꓸ ꓖꓶ_ ꓟ ꓓꓵꓽ ꓙ ꓚꓱꓹ ꓥꓳꓽ ꓫꓵ ꓡꓲꓽ ꓒꓰꓼ ꓥ ꓡꓳ= ꓕꓲ ꓡꓲ ꓐꓰ ꓮ ꓠꓯꓸ ꓠꓯꓸ ꓗꓪ ꓐꓰ ꓓꓳꓺ ꓡ ꓟ ꓡꓲꓽ ꓒꓰꓼ ꓕꓱ ꓟ ꓠꓯꓼ ꓗꓪ ꓙꓵꓺ ꓠꓲꓹ ꓠꓬ ꓮ ꓡꓰ ꓫꓱꓽ ꓓꓰꓽ ꓣꓱꓽ ꓔꓬ ꓡ꓾ ꓣꓳ ꓢꓷꓸ ꓟ ꓡꓰ ꓐꓰ ꓙꓵꓺ ꓠꓲꓹ ꓕꓱ ꓟ ꓠꓬ ꓣꓳ ꓢꓷꓸ ꓟ ꓡꓰ ꓐꓰ ꓡꓲꓽ ꓒꓰꓼ ꓘꓴꓽ ꓠꓯꓼ ꓗꓪ ꓙꓵꓻ ꓠꓲꓹ ꓕꓱ ꓟ ꓦꓰꓼ ꓞꓹ ꓠꓹ ꓟ ꓟꓲ ꓣꓳꓸ ꓚꓵ_ ꓡꓳ= ꓮ ꓡꓲꓳ ꓐꓯ ꓠꓬ ꓡꓲꓽ ꓒꓰꓼ ꓢꓲ ꓫꓬ ꓠꓹ ꓟ ꓡꓲꓽ ꓒꓰꓼ ꓘꓴꓽ ꓠꓯꓼ ꓗꓪ ꓢꓲ ꓫꓬ ꓠꓹ ꓟ ꓐꓱ ꓶ ꓙꓵꓻ ꓠꓲꓹ ꓥ ꓟꓲ ꓪꓴꓽ_ ꓟ ꓝꓲꓸ ꓕꓲ ꓝꓲꓸ ꓥ ꓡꓳ= ꓕꓱ ꓡꓱ ꓟꓽ ꓥ ꓠꓬ ꓕꓲ ꓖ ꓕꓲ ꓧꓶꓸ ꓟ ꓣꓳ ꓡꓲꓽ ꓒꓰꓼ ꓔꓯ ꓣꓱꓽ ꓢꓴ ꓣꓳ ꓡꓲꓽ ꓒꓰꓼ ꓐꓯ ꓢꓲ ꓚꓲ ꓛꓬ ꓐꓱ ꓶ ꓡꓰ ꓚꓲ ꓛꓬ ꓫꓵꓽ ꓡꓰ ꓚꓲ ꓛꓬ ꓑ-ꓔꓲ ꓐꓱ ꓶ ꓐꓯ ꓢꓲ ꓠꓬꓲ ꓕꓱ ꓡꓱ ꓣꓱꓽ ꓢꓴ ꓓꓳꓺ ꓡ ꓗꓴꓸ_ ꓡꓳ= ꓟꓽ ꓙꓲ ꓠꓯ ꓟ꓾ ꓟꓽ ꓔꓱꓹ ꓜꓳ ꓟ꓾ ꓠꓲꓹ ꓟ ꓖꓳꓼ ꓢꓴ꓾ ꓖꓳ ꓟ ꓠꓬ ꓡꓲꓽ ꓒꓰꓼ ꓐꓯ ꓟ ꓐꓯ ꓘꓶꓽ ꓔꓯ ꓣꓱꓽ ꓢꓲ ꓠꓬꓲ ꓚꓲ ꓛꓬ ꓕꓲ ꓫꓵ ꓡꓱꓼ ꓫꓸ ꓙꓵ ꓡꓰ ꓠꓹ ꓟ ꓐꓱ ꓶ ꓚꓲ ꓛꓬ ꓕꓲ ꓫꓵꓽ ꓡꓱꓼ ꓫꓸ ꓔꓳ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓴ ꓟꓲ ꓙꓳ ꓡ ꓗꓴꓸ_ ꓡꓳ=

ꓖꓳꓡꓱ ꓠꓬꓲ ꓡꓲꓽ ꓒꓰꓼ ꓕꓱ ꓟ ꓔꓯ ꓣꓳ ꓮ ꓕꓯ ꓥ ꓟꓲ ꓟꓬ ꓢꓶꓽ ꓒꓴ ꓔ ꓢꓲ ꓛꓬ ꓪ ꓪ ꓡꓰ ꓔꓬ ꓠꓹ ꓟ ꓠꓬ ꓣꓳ ꓙꓵꓻ ꓠꓲꓹ ꓔꓯ ꓪꓳ ꓔ ꓢꓲ ꓠꓬꓲ ꓣꓳ ꓕꓱ ꓡꓱ ꓐꓰ ꓔꓬ ꓠꓹ ꓟ ꓥ ꓟꓲ ꓣꓳꓸ ꓚꓵ_ ꓡꓳ= ꓣꓳ ꓡꓲꓽ ꓒꓰꓼ ꓞꓳ ꓫꓵꓽ ꓔꓯ ꓣꓱꓽ ꓔꓬ ꓡ꓾ꓟꓽ ꓥ ꓠꓬ ꓣꓳ ꓞꓳ ꓫꓵ ꓪꓴꓽ ꓟꓴ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓔꓬ ꓡ ꓐꓯ_ ꓟ ꓡꓳꓸ ꓗꓴꓸ ꓠ ꓗꓹ ꓡꓳ= ꓢꓴ ꓡꓰ ꓬꓲ ꓪ ꓫꓵꓽ ꓐꓱ ꓶ ꓣꓱꓽ ꓠꓹ ꓟ ꓟꓽ ꓗꓷ ꓡꓰ ꓠꓹ ꓟ ꓣꓳꓸ ꓚꓵ_ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓲ ꓛꓬ ꓫꓵꓽ ꓚꓲ ꓛꓬ ꓡꓲꓽ ꓒꓰꓼ ꓐꓰ ꓐꓯ ꓕꓯ ꓙꓵꓻ ꓠꓲꓹ ꓔꓯ ꓥ ꓟꓲ ꓡꓲꓽ ꓒꓰꓼ ꓘꓴꓽ ꓠꓯꓼ ꓗꓪ ꓙꓵꓻ ꓔ ꓠꓬ ꓮ ꓡꓰ ꓟ ꓙꓲ_ ꓡ꓾ ꓮ ꓡꓰ ꓟ ꓟꓽ ꓙꓲ_ ꓡ꓾ꓐꓯ ꓟ ꓣꓳ ꓫꓬ ꓫꓬ ꓡꓰ ꓢꓷꓸ ꓪ ꓓ ꓥꓳ= ꓙꓲ_ ꓟ ꓔꓯ ꓣꓴ ꓢꓲ ꓟꓽ ꓙꓲ ꓟ ꓔꓯ ꓡꓳꓺ ꓩꓴ ꓗꓷ ꓠꓹ ꓟ ꓠꓬ ꓣꓳ ꓶꓻ ꓥ ꓡꓳ=