We chat ꓗꓪ ꓐꓰ ꓣꓦꓮ ꓡꓲꓢꓴ ꓢꓯꓼ ꓔꓯ ꓠꓽ ꓡꓳ ꓢꓯꓼ ꓖꓶ ꓔꓬ ꓟ ꓟ. ꓒꓽ ꓚ‐ꓬꓯꓼ‐ꓬꓳ ꓡꓰ ꓫ. ꓕꓱ ꓖꓶ ꓡ ꓟ

 We chat ꓗꓪ ꓐꓰ ꓣꓦꓮ ꓡꓲꓢꓴ ꓢꓯꓼ ꓔꓯ ꓠꓽ ꓡꓳ ꓢꓯꓼ ꓖꓶ ꓔꓬ ꓟ ꓟ. ꓒꓽ ꓚ‐ꓬꓯꓼ‐ꓬꓳ ꓡꓰ ꓫ. ꓕꓱ ꓖꓶ ꓡ ꓟ

ꓟ. ꓒꓽ ꓠꓬ ꓑꓮꓠ‐ꓪ ꓡꓳ ꓒꓱ ꓐ‐ꓑꓴ ꓘ, ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ  ꓟ. ꓒꓽ ꓬꓳ‐ꓢꓷ ꓚ‐ꓬꓯꓼ‐ꓬꓳ ꓥ ꓡꓳ꓿ ꓬꓲ. ꓠꓬ ꓗꓳ. ꓗꓷ ꓟ 2022 ꓘꓳꓼ ꓗꓪ ꓐꓰ ꓑꓮꓠ‐ꓪ ꓡꓳ ꓒꓱ ꓐ‐ꓑꓴ ꓘ, ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓢꓴ ꓟ. ꓒꓽ ꓕꓲ ꓣꓳ ꓥ ꓡꓳ꓿ ꓐ‐ꓑꓴ ꓞꓳ ꓘ, ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ (60) ꓦꓲꓻ ꓔꓬ ꓟ ꓞꓳ ꓘ, ꓕꓲ ꓘ, ꓥ ꓢꓲ ꓠꓬꓲ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ (15) ꓦꓲꓻ ꓔꓬ ꓟ ꓞꓳ ꓘ, ꓥ ꓡꓳ꓿

ꓕꓱ ꓐ‐ꓑꓴ ꓞꓳ ꓘ, ꓗꓪ ꓠꓬ ꓘꓴ ꓜꓲꓼ ꓞꓳ (4) ꓟ ꓔꓬ ꓟ ꓞꓳ ꓘ, ꓥ  ꓢꓲ ꓠꓬꓲ ꓟ. ꓒꓽ ꓟ. ꓟ ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓕꓲ ꓣꓳ ꓛꓳ ꓕꓲ ꓣꓳ ꓥ ꓟꓲ ꓮ ꓘꓶ. ꓠꓲ, ꓠꓵ ꓡꓯ ꓘꓳ, ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓟ ꓥ ꓡꓳ ꓐꓰ ꓟ. ꓒ ꓬꓳ‐ꓢꓷ ꓚ‐ꓬꓯꓼ‐ꓬꓳ ꓡꓰ ꓐꓮ ꓟ. ꓖꓶ ꓡ ꓡꓳ꓿

ꓑꓮꓠ‐ꓪ ꓟꓵꓽ ꓗꓪ ꓞꓳ ꓫꓵꓽ ꓮ ꓟꓬ, ꓫꓵꓽ ꓔꓬ ꓟ ꓚꓱ,ꓔꓯ ꓥ ꓟꓲ ꓟ. ꓒꓽ ꓡꓰ ꓐꓯ ꓟ. ꓖꓶ ꓡ ꓡꓳ꓿ ꓕꓱ ꓗꓪ ꓔꓬ ꓢꓴ ꓐꓴ ꓠꓬ ꓞꓳ ꓫꓵꓽ ꓡꓲꓽ ꓒꓱꓼ ꓔꓯ ꓮ ꓘꓶ. ꓞꓳ ꓒꓵꓽ ꓔꓬ ꓢꓴ ꓐꓴ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓡꓲꓽ ꓒꓰꓼ ꓔꓯ ꓟꓽ ꓟꓶꓽ ꓡꓰ ꓟꓽ ꓐꓬ ꓡꓰ ꓠ, ꓟ ꓥ ꓟꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓟ. ꓒꓽ ꓡꓰ ꓐ‐ꓑꓴ ꓞꓳ ꓘ, ꓗꓪ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ ꓬꓲ. ꓫꓵꓼ ꓫꓬ, ꓔꓬ ꓟ ꓚꓱ, ꓔꓯ ꓥ ꓟꓲ ꓐꓯ ꓟ. ꓖꓶ ꓡ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓪꓽ ꓘꓴ ꓙꓽ ꓖꓶ ꓠ, ꓟ ꓓꓰꓽ ꓔ ꓡꓳ꓿

ꓑꓮꓠ‐ꓪ ꓟꓵꓽ ꓗꓪ ꓠꓬ ꓡꓲ‐ꓢꓴ ꓥꓳꓽ ꓫ. ꓕꓱ ꓗꓴ. ꓢꓴ ꓮ ꓟꓬ, ꓔꓬ ꓟ ꓪꓴ. ꓠꓬꓲ ꓡꓲ‐ꓢꓴ ꓣꓦꓮ ꓗꓪ ꓐꓰ ꓚꓺ ꓟ. ꓖꓶ ꓡ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓐꓱ ꓶ ꓪꓴ‐ꓢ ꓐꓯ  ꓘꓶꓽ ꓐꓰ ꓓꓳꓽ ꓫꓵꓽ ꓓꓳꓽ ꓙꓰ ꓝꓮꓲ ꓢꓷ. ꓠꓲ, ꓪ ꓟ ꓮ ꓟꓬ, ꓫꓵꓽ ꓔꓯ ꓥ ꓟꓲ ꓥꓪ ꓠꓴ ꓠꓽ ꓡꓳ. ꓐ ꓙ ꓪ ꓟ ꓪꓴ. ꓠꓬꓲ ꓮ ꓘꓶ. ꓗ, ꓛꓲ ꓔꓬ ꓟ ꓚꓱ, ꓔꓯ ꓟ. ꓒꓽ ꓡꓰ ꓐꓯ ꓟ. ꓖꓶ ꓔ ꓡꓳ꓿

ꓝꓮꓲ ꓪꓰꓚꓧꓮꓔ ꓗꓪ ꓐꓰ ꓦꓻ ꓖꓶ ꓩꓴ ꓡ ꓟ ꓗꓪ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓠꓽ ꓡꓳ ꓢꓯꓼ ꓕꓵꓼ ꓔꓬ ꓟ ꓡꓳ꓿ ꓝꓮꓲ ꓧꓶꓽ ꓗꓴꓷꓼ ꓗꓪ ꓔꓬ ꓢꓴ ꓐꓴ ꓔꓯ ꓥ ꓟꓲ ꓟ. ꓒꓽ ꓡꓰ ꓦꓻ ꓖꓶ ꓢꓲ ꓠꓬꓲ ꓬꓲ. ꓪ ꓥ ꓟꓲ ꓠꓽ ꓡꓳ. ꓔꓬ ꓡꓳ ꓐꓰ ꓐꓯ ꓔ ꓡꓳ꓿

ꓣꓦꓮ ꓡꓲ‐ꓢꓴ ꓠꓬ ꓣꓳ ꓡꓲ‐ꓢꓴ ꓫꓵꓽ ꓐꓴ ꓐꓰ ꓠꓱ. ꓐꓯꓼ ꓡꓲ‐ꓢꓴ ꓥꓳꓽ ꓠꓽ ꓡꓳ. ꓗꓴ. ꓢꓴ ꓐꓴ ꓐꓰ ꓶ ꓮ ꓘꓶ. ꓣ. ꓚꓲ ꓟ ꓓꓳꓽ ꓫꓵꓽ ꓐꓯ ꓒꓬꓱꓼ ꓔꓶ. ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿