ꓐꓰꓠꓖꓮꓡ ꓬꓲꓻ ꓡꓱ ꓐꓱ ꓘꓶꓽ ꓒ ꓕꓲ ꓗꓪ ꓟ ꓑꓮꓴꓗ-ꓔꓮꓪ ꓡꓳ ꓒꓱ ꓥ-ꓑꓲ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓬ ꓟ ꓑ ꓫꓬ ꓬꓲ ꓦꓬ ꓟꓽ ꓞꓲꓺ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓟ ꓗꓪ ꓐꓰ ꓛꓰꓹ ꓡ ꓟ ꓓꓳꓽ

ꓣꓮꓗꓧꓲꓠꓰ ꓗꓴꓷꓼ ꓫꓴ꓾ ꓑꓮꓴꓗ ꓔꓮꓪ ꓡꓳ ꓒꓱ꓾ ꓥ-ꓑꓲ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓬ ꓟ ꓑ ꓫꓬ 300 ꓣꓳ ꓛꓲꓺ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡˍ ꓥꓳ꓾ ꓐꓯ ꓟ ꓓꓳꓽ ꓑꓶꓸ ꓓꓴ ꓗꓬꓰꓲꓠ-ꓘꓪꓰ-ꓟꓮꓪ ꓘꓹ ꓗꓪ 5 ꓦ 7 ꓠꓬꓲ ꓗꓪ ꓐꓰ 9 ꓠꓬꓲ ꓗꓪ ꓛꓲꓺ ꓡ ꓗꓷ ꓟ ꓥ ꓡꓳ=

ꓥ-ꓑꓲ ꓬꓲꓻ ꓗꓳ ꓡꓳ ꓟꓵꓽ ꓠꓬ ꓢꓲꓔꓔꓪꓰ ꓡꓳ ꓒꓱ ꓐꓶ ꓓꓳ ꓕꓲ ꓛꓱꓽ ꓗ-ꓡ-ꓔꓯ ꓬꓲꓻ ꓙꓬ ꓘꓴꓽ ꓗꓪ ꓙꓳˍ ꓟ ꓥ ꓢꓲ꓾ ꓐꓮꓠꓖꓮꓡ ꓬꓲꓻ ꓡꓴꓽ ꓐꓱ ꓐꓰ ꓠꓶꓽˍ ꓟ ꓕꓲ ꓖ ꓥ ꓡꓳ=

ꓟꓲꓽ ꓦꓲ ꓕꓳꓽ ꓥꓳꓽ ꓠꓬ ꓐꓮꓠꓖꓡꓮꓓꓰꓢꓧ ꓐꓰ ꓟꓬ-ꓟ ꓬꓲꓻ ꓡꓴꓽ ꓐꓱ ꓘꓶꓽ ꓟꓵꓽ ꓐꓴ ꓗꓪ ꓙꓱꓼ ꓡ ꓓꓴ ꓥ ꓢꓲ꓾ 5 ꓦ 10 ꓠꓬꓲ ꓗꓪ ꓠꓬ ꓐꓮꓠꓖꓮꓡ ꓬꓲꓻ ꓡꓴ ꓐꓱꓽ ꓗꓪ ꓬꓲ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ ꓚꓬꓚꓡꓳꓠꓲꓚ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡ ꓓꓴ ꓥꓳ꓾ ꓐꓰ ꓟꓵꓽ ꓘꓳꓼ ꓔꓯ ꓟꓳꓸ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓡꓰ ꓐꓯ ꓑꓶ ꓔ ꓟ ꓥ ꓡꓳ=

ꓖꓳ ꓟ ꓑꓶꓸ ꓓꓴ ꓣ-ꓘꓮꓲ ꓗꓴꓷꓼ ꓫꓴ ꓖꓴ ꓪꓴꓸ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓬꓲꓻ ꓡꓴ ꓐꓱ ꓐꓰ ꓶꓽ ꓞꓹ ꓟ ꓗꓪ ꓚꓵꓸ ꓙꓰ ꓠꓹ ꓟ ꓕꓵꓼ ꓪ ꓖꓶ ꓔ ꓠꓬꓲ꓾ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓔꓬ ꓟ ꓑ ꓫꓬ ꓮ ꓟꓬꓹ ꓠꓬ ꓟꓲꓽ ꓦꓲ ꓮ ꓘꓶꓸ ꓟꓽ ꓬꓯꓼ ꓟ ꓗꓪ ꓚꓵꓸ ꓙꓰ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=