ꓐ-ꓣ-ꓤꓲꓸ ꓗꓴꓷꓼ ꓗꓪ ꓠꓻ ꓐꓶ ꓓꓲ ꓙꓳ ꓡꓰ ꓢꓴ 10 ꓫꓬꓹ ꓟꓽ ꓛꓲꓺ ꓟꓬꓽ ꓡ ꓟ ꓪꓴꓸ ꓠꓬꓲ ꓗ-ꓔꓳ-ꓡꓲꓗ ꓘꓴ-ꓜꓲ-ꓞꓳ ꓗꓪ ꓐꓰ ꓪꓽ ꓘꓴˍ ꓟ ꓠꓬꓲ ꓔꓯ ꓢꓷꓸ ꓙ ꓟꓳ ꓙ ꓗꓷꓳ꓾

ꓐ-ꓣ-ꓤꓲꓸ ꓗꓴꓷꓼ ꓗꓪ ꓠꓻ ꓐꓶ ꓓꓲ ꓙꓳ ꓡꓰ ꓢꓴ 10 ꓫꓬꓹ ꓟꓽ ꓛꓲꓺ ꓟꓬꓽ ꓡ ꓟ ꓪꓴꓸ ꓠꓬꓲ ꓗ-ꓔꓳ-ꓡꓲꓗ ꓘꓴ-ꓜꓲ-ꓞꓳ ꓗꓪ ꓐꓰ ꓪꓽ ꓘꓴˍ ꓟ ꓠꓬꓲ ꓔꓯ ꓢꓷꓸ ꓙ ꓟꓳ ꓙ ꓗꓷꓳ꓾

ꓚꓳꓦꓲꓓ ꓠꓻ ꓙꓳ ꓡꓰ ꓢꓴ ꓐꓴ ꓮ ꓟꓬꓹ ꓟꓬꓽ ꓡ ꓔꓬ ꓟ ꓪꓴꓸ ꓠꓬꓲ ꓥꓳ ꓡꓳꓸ ꓓꓴ ꓐꓰ ꓠꓲꓹ ꓗꓴ ꓟꓬ ꓗꓴ ꓟꓶ ꓓꓴ ꓔꓯ ꓧꓪꓺ ꓠꓹ ꓟ ꓐꓱ ꓶ ꓐ-ꓣ-ꓤꓲꓸ ꓗ-ꓔꓳ-ꓡꓲꓗ ꓔꓲꓺ ꓒ ꓓꓽ ꓟ ꓐꓴ ꓜꓴꓻ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓡꓰ ꓚꓳꓦꓲꓓ ꓠꓻ ꓔꓯ ꓗꓽ ꓕꓸ ꓠꓹ ꓟ ꓐꓰ ꓠꓻ ꓐꓶ ꓓꓲ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ ꓐꓴ ꓦ ꓐꓱ ꓶ ꓪꓽ ꓘꓴ ꓖꓶ ꓠꓹ ꓟ ꓔꓶꓻ ꓙꓱꓼ ꓬꓰ ꓢꓲ ꓪꓽ ꓘꓴ ꓖꓶ ꓟ ꓠꓬꓲ ꓐꓯ ꓢꓲ 6 ꓦ (19) ꓠꓬꓲ ꓔꓯ ꓢꓷꓸ ꓙ ꓟꓳ ꓙ ꓗꓷꓳ=

ꓮ ꓡꓲꓳ ꓐꓯ ꓠꓬ ꓞꓳ ꓤ ꓢꓯꓼ ꓟꓬ ꓠꓬ ꓪꓴꓽ ꓪꓴꓽ ꓣꓳ ꓣꓳ ꓒꓵꓽ ꓗ ꓗꓶ ꓠꓯꓹ ꓡꓳ= ꓖꓳ ꓕꓲ ꓠꓬꓲ ꓗꓪ ꓐ-ꓣ-ꓤꓰꓸ ꓗꓴꓷꓼ ꓘꓴꓽ ꓗꓪ ꓟ ꓘꓴ-ꓜꓲ-ꓞꓳ ꓮ ꓙꓵꓽ ꓗꓪ ꓙꓳˍ ꓟ ꓪꓽ ꓘꓴ ꓦꓲꓻ ꓗꓪ ꓠꓻ ꓐꓶ ꓓꓲ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ ꓐꓴ ꓐꓱ ꓶ ꓟꓲ-ꓢ ꓪꓽ ꓘꓴ ꓖꓶꓽˍ ꓥꓳ= ꓖꓳ ꓟ ꓡꓰ ꓟꓽ ꓞꓲꓺ ꓟꓳꓼ ꓡꓳꓼ 3ꓽ00 ꓙꓵꓹ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓻ ꓗꓷ ꓟ ꓔꓯ ꓓꓵꓽ ꓙ ꓢꓲ ‘ꓫꓱꓸ ꓤˍ ꓟ ꓬꓲ ꓙꓵꓹ’ ꓐꓰ ꓐꓯ ꓪꓽ ꓘꓴ ꓦꓲꓻ ꓐꓴ ꓗꓪ ꓟ ꓗꓳꓸ ꓡꓱꓸ ꓓꓶꓽ ꓠꓹ ꓟˍ ꓟꓲ ꓐꓯ ꓑꓶ ꓗꓷꓳ= ꓳꓠꓡꓲꓠꓰ ꓗꓪ ꓐꓰˍ ꓟꓲ ꓝꓲꓸ ꓟꓶ ꓓꓴ ꓪꓽ ꓘꓴ ꓖꓶꓽˍ ꓟ ꓬꓲꓸ ꓒꓬꓸ ꓔꓯ ꓖꓶꓽ ꓩꓴꓸˍ ꓥꓳ= ꓗ-ꓔꓳ-ꓡꓲꓗ ꓓꓳꓽ ꓦ ꓖꓴ ꓗ ꓐꓰˍ ꓟꓲ ꓪꓽ ꓘꓴˍ ꓟ ꓔꓯ ꓚꓰꓹ ꓩꓴ ꓖꓶˍ ꓥꓳ=

ꓕꓱ ꓡꓱ ꓬꓰˍ ꓟ ꓬꓲ ꓔꓶꓻ ꓙꓱꓼ ꓠꓬ ꓠꓻ ꓔꓬ ꓢꓴ ꓐꓴ꓾ ꓠꓻ ꓙꓳ ꓡꓰ ꓢꓲ ꓢꓯꓼ ꓟꓬ ꓞꓷꓹ ꓗꓷ ꓢꓴ ꓐꓴ ꓬꓲ ꓪ ꓕꓲ ꓦꓲꓻ ꓢꓴ ꓐꓴ ꓐꓰ ꓕꓲ ꓠꓲꓹ ꓕꓲ ꓪꓽ ꓔꓬ ꓟ ꓔꓯ ꓟꓸ ꓖꓶ ꓠꓹ ꓟ꓾ ꓐ-ꓣ-ꓤꓲꓸ ꓗꓴꓷꓼ ꓔꓯˍ ꓟꓲ ꓪ ꓙꓲ ꓪꓴꓽ ꓡ ꓟꓴ ꓡˍ ꓟ ꓗꓴꓷꓼ ꓕꓲ ꓟ ꓒꓬꓱꓼ ꓡ ꓠꓹ ꓟ꓾ ꓑ ꓫꓬ ꓐꓴ ꓠꓲꓹ ꓟ ꓗꓪ ꓙꓳˍ ꓟ ꓠꓲꓹ ꓫ ꓟꓬ ꓫ ꓟ ꓔꓯ ꓕꓲ ꓑꓹ ꓤ ꓡꓳꓺ ꓦ ꓔ ꓢꓲ ꓠꓻ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ ꓐꓴ(5000 ꓣꓳ) ꓔꓯ ꓓꓵꓽ ꓙ ꓟꓶ ꓠꓹ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓣꓳ ꓛꓲ ꓫꓵꓻ ꓗꓷ ꓟ ꓠꓬ ꓮ ꓘꓶꓸ ꓙꓳꓺ ꓛꓱꓽ ꓓꓴ ꓥ ꓟ꓾ ꓪꓽ ꓘꓴˍ ꓟ ꓗꓪ ꓐꓰ ꓡꓵꓹ ꓫꓴ ꓖꓶ ꓟ ꓠꓬ ꓠꓻ ꓔꓬ ꓢꓴ ꓐꓰ ꓠꓻ ꓪꓴꓸ ꓠꓬꓲ ꓫꓵꓻ ꓗꓷ ꓟ ꓟꓶ ꓢꓴ ꓬꓲꓸ ꓕꓲ ꓦꓲꓻ ꓢꓴ ꓐꓴ ꓔꓯ ꓠꓲꓹ ꓗꓴ ꓟꓬ ꓗꓴ ꓖꓶˍ ꓟ ꓥ ꓟ꓾ ꓮ ꓟꓶ ꓟ ꓡꓰ ꓐꓰ ꓫꓵꓻ ꓢꓴ ꓟꓬꓽ ꓡ ꓔꓬ ꓟ ꓠꓬ ꓞꓼ ꓞꓼ ꓠꓻ ꓫꓬꓹ ꓟꓽ ꓐ ꓡ ꓟ꓾ ꓠꓻ ꓗꓽ ꓕꓸ ꓓꓴ ꓠꓯꓻ ꓞꓲꓼ ꓗꓸ ꓟꓬꓺ ꓡꓰ ꓟ꓾ ꓚꓲꓸ ꓛꓬ ꓛꓳꓽ ꓚꓲꓸ ꓛꓬ ꓗꓽ ꓕꓸ ꓟꓽ ꓟ ꓟꓽ ꓙꓳ ꓟ ꓪꓴꓸ ꓠꓬꓲ ꓥ ꓡꓳ=

“ꓕꓲ ꓗꓴꓷꓼ ꓡꓱꓸꓼ ꓪꓽ ꓘꓴ ꓠꓬꓲ” ꓐꓰ ꓢꓷꓸ ꓙ ꓟꓳ ꓙˍ ꓟ ꓗꓪ ꓐꓰ ꓪꓽ ꓘꓴ ꓢꓯꓼ ꓔꓯ ꓙꓵꓻˍ ꓥ ꓟꓲ꓾ ꓟꓽ ꓙꓵꓻ ꓥˍ ꓟꓲ ꓠꓻ ꓕꓱ ꓟ ꓐꓰ ꓗꓴꓸ ꓙꓲ ꓙꓳ ꓢꓲ ꓬꓲꓸ ꓙꓵꓹ ꓮ ꓔꓲꓸ ꓤ ꓖꓶ ꓢꓲ ꓠꓬꓲ ꓓꓵꓽ ꓙ ꓟꓶ ꓖꓶ ꓠꓹ ꓟ ꓕꓵꓼ ꓪ ꓖꓶ ꓗꓷ ꓟ ꓥꓳ=ꓠꓻ ꓫꓬꓹ ꓟ ꓗꓪ ꓬꓲꓸ ꓚꓱꓹ ꓥꓳꓽ ꓡꓰ ꓔꓬ ꓟ ꓔꓯ ꓐ-ꓣ-ꓤꓲꓸ ꓗ-ꓔꓳ-ꓡꓲꓗ ꓘꓴ-ꓜꓲ-ꓞꓳ ꓡꓰ ꓖꓴ ꓟꓸ ꓖꓶ ꓗꓷꓳ= ꓮ ꓡꓲꓳ ꓐꓯ ꓠꓬ ꓮ ꓟꓶ ꓟ ꓡꓰ ꓠꓻ ꓟꓽ ꓟꓬꓽ ꓡꓰ ꓕꓯ ꓡꓰ ꓜꓳꓽ ꓜꓳꓽ ꓫꓬꓹ ꓗꓷ ꓠꓯꓹ ꓟ ꓔꓯ ꓟꓳꓸ ꓖꓶ ꓗꓷ ꓟ ꓔꓯ꓾ ꓐ-ꓣ-ꓤꓲꓸ ꓗ-ꓔꓳ-ꓡꓲꓗ ꓔꓲ ꓒ ꓓ ꓜꓴꓻ ꓗꓪ ꓔꓳꓹ ꓙ ꓟꓬꓱꓽ ꓬꓰ ꓢꓴ ꓥ ꓟ Rio de Janeiro ꓬꓲꓸ ꓟꓬꓱꓽ ꓔꓯ ꓣꓱꓽ ꓙ ꓢꓴ ꓔꓲꓺ ꓒ ꓓꓽ Joel Portella Amado ꓡꓰ ꓐꓯ ꓟꓸ ꓖꓶ ꓗꓷꓳ=

ꓐ-ꓣ-ꓤꓲꓸ ꓗꓴꓷꓼ ꓙꓵꓽ ꓢꓲꓽ ꓒ Jair Bolsonaro ꓥ ꓟꓲ ꓠꓻ ꓟꓬꓽ ꓡ ꓔꓬ ꓟ ꓔꓯ ꓟꓽ ꓠꓽ ꓠꓽ ꓫꓬꓹ ꓦꓲꓸ ꓔꓬ ꓟ ꓐꓯ ꓖꓶ ꓗꓷꓳ=

https://bit.ly/3zCLCnp