ꓑ‐ꓠ‐ꓓꓰ ꓟꓵꓽ ꓗꓪ ꓜ ꓒꓴꓻ ꓒꓵꓽ ꓮ ꓘꓶ. ꓓꓯ ꓔꓬ ꓟ ꓪꓴ. ꓠꓬꓲ ꓤ ꓠꓱ ꓤ ꓐꓴ ꓬꓲ. ꓪ ꓐ, ꓐ ꓟ, ꓟ ꓐꓴ ꓐꓰ ꓶꓻ ꓟꓯꓻ ꓟ ꓓꓳꓽ

ꓑ‐ꓠ‐ꓓꓰ ꓟꓵꓽ ꓗꓪ ꓜ ꓒꓴꓻ ꓒꓵꓽ ꓮ ꓘꓶ. ꓓꓯ ꓔꓬ ꓟ ꓪꓴ. ꓠꓬꓲ ꓤ ꓠꓱ ꓤ ꓐꓴ ꓬꓲ. ꓪ ꓐ, ꓐ ꓟ, ꓟ ꓐꓴ ꓐꓰ ꓶꓻ ꓟꓯꓻ ꓟ ꓓꓳꓽ

4 ꓦ 24 ꓠꓬꓲ 2023 ꓘꓳꓼ ꓕꓯ ꓗ‐ꓛꓲ ꓗꓴꓷꓼ ꓫꓴ ꓑ‐ꓠ‐ꓓꓲ ꓟꓵꓽ ꓗꓪ ꓠꓬ ꓜ ꓒꓴꓻ ꓒꓵꓽ ꓮ ꓘꓶ. ꓓꓯ ꓡ ꓟ ꓪꓴ ꓠꓬ ꓤ ꓠꓱ ꓤ ꓐꓴ ꓬꓲ. ꓪ ꓐ, ꓐ ꓟ, ꓟ ꓐꓴ ꓐꓰ ꓕꓲ ꓪ ꓜ ꓓꓴ ꓟꓯꓻ ꓔꓬ ꓟ  ꓥ ꓡꓳ ꓐꓰ ꓢꓷ. ꓪ ꓡꓳ꓿

ꓕꓱ ꓑ‐ꓠ‐ꓓꓰ ꓟꓵꓽ ꓗꓪ ꓐꓰ ꓞꓳ ꓘ, ꓥ ꓟ ꓕ‐ꓡ‐ꓔꓴ ꓘ,꓾ ꓓ‐ꓜꓴ ꓘ, ꓗꓪ ꓔꓬ ꓟ ꓑ ꓫꓬ ꓐꓴ ꓔꓬ ꓟ ꓗꓪ ꓙ ꓖꓴ ꓙꓰ ꓠ, ꓟ ꓮ ꓘꓶ. ꓫ. ꓔ ꓟ ꓪꓴ. ꓠꓬꓲ ꓜ ꓓꓴ ꓮ ꓘꓶ. ꓫ. ꓔ ꓢꓲ ꓠꓬꓲ ꓕꓲ ꓠꓬꓲ ꓘꓴꓽ ꓗꓪ ꓜ ꓕꓲ ꓜ ꓡꓰ ꓜ ꓔꓬ ꓡꓳ ꓐꓰ ꓐꓯ ꓔ ꓡꓳ꓿

ꓑ ꓫꓬ ꓐꓴ ꓡꓰ ꓫ. ꓕꓱ ꓔ ꓟ ꓠꓬ ꓜ ꓔꓯ ꓕꓲ ꓠꓬꓲ ꓘꓴꓽ ꓗꓪ ꓕꓲ ꓧꓪ, ꓡꓰ ꓜ ꓓꓴ ꓙꓳˍ ꓡꓳ꓿ ꓠꓯꓼ ꓙꓵ, ꓕꓯ ꓜ ꓜꓽ ꓠꓬ ꓟꓶꓽ ꓘꓶꓼ ꓙꓵ, ꓗꓪ ꓜ ꓓꓴ ꓟꓽ ꓙꓳ ꓗꓷ ꓡꓰꓳ꓿ ꓜ ꓒꓴ ꓟꓽ ꓙꓳ ꓟ ꓪꓴ. ꓠꓬꓲ ꓦꓻ ꓟꓲ ꓗꓪ ꓔꓶꓻ ꓔ ꓟ ꓳꓽ ꓫꓻ꓾ ꓟꓶ ꓙꓲꓻ ꓠꓱ. ꓐꓯꓼ ꓜꓽ ꓫꓵꓽ ꓔꓯ ꓡꓰ ꓜ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ꓑ ꓫꓬ ꓐꓴ ꓮ ꓟꓬ, ꓠꓬ ꓦꓻ ꓟꓲ ꓬꓰ ꓜ ꓢꓴ ꓥ ꓢꓲ ꓠꓬꓲ ꓦꓻ ꓟꓲ ꓬꓰ ꓥ ꓟꓲ ꓜ ꓟꓽ ꓪ ꓗꓷ ꓡꓰꓳ꓿ ꓝꓮꓲ ꓶꓻ ꓟꓯꓻ ꓒꓵꓽ ꓥ ꓟꓲ ꓮ ꓘꓶ. ꓓꓯ ꓔꓬ ꓟ ꓪꓴ ꓠꓬꓲ ꓤ ꓠꓱ ꓤ ꓐꓴ ꓬꓲ. ꓪ ꓐ, ꓐ ꓟ, ꓟ ꓐꓴ ꓐꓰ ꓕꓲ ꓪ ꓜ ꓫꓵꓽ ꓟꓯ ꓔꓬ ꓟ ꓥ ꓡꓳ꓿

ꓑ ꓫꓬ ꓕꓲ ꓣꓳ ꓡꓰ ꓫ. ꓕꓱ ꓔ ꓟ ꓠꓬ ꓐ, ꓐ ꓟ, ꓟ ꓐꓴ ꓠꓬ ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓔꓯ ꓶꓻ ꓟꓯꓻ ꓠ, ꓟ ꓠꓲ, ꓟ ꓫꓵ꓿ ꓖꓳ ꓡꓱ ꓥ ꓟꓲ ꓐ, ꓐ ꓟ, ꓟ ꓔꓯ ꓬꓰ ꓙ ꓠꓲ, ꓫꓵˍ ꓟ ꓤ ꓠꓱ ꓤ ꓐꓴ ꓬꓲ. ꓞꓲꓼ 8 ꓘꓳꓼ ꓗꓪ ꓐꓰ 10 ꓘꓳꓼ ꓙꓳˍ ꓡꓰ ꓢꓴ ꓐꓴ ꓔꓯ ꓪꓴ. ꓓꓵ ꓗꓪ ꓐꓰ ꓶꓻ ꓟꓯ ꓠ, ꓟ ꓙꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓕ0ꓱ ꓟꓵꓽ ꓗꓪ ꓙꓳ ꓟ ꓠꓯꓺ ꓞꓲꓼ ꓧꓪ ꓢꓲ ꓠꓬꓲ ꓜ ꓓꓴ ꓜ ꓒꓴ ꓪꓴꓻ ꓜ ꓔꓬ ꓟ ꓥ ꓡꓳ꓿ ꓞꓳ ꓘ, ꓗꓪ ꓙꓰ ꓠ, ꓟ ꓙ ꓖꓴ ꓥ ꓟꓲ ꓟꓽ ꓙꓲꓻ ꓝꓮꓲ ꓞꓲꓻ ꓠꓲ, ꓠꓬ ꓜ ꓒꓴ ꓒꓵꓽ ꓥ ꓟꓲ ꓮ ꓘꓶ. ꓓꓯ ꓙꓰ ꓟ ꓪꓴ. ꓠꓬꓲ ꓑ ꓫꓬ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜ ꓓꓴ ꓮ ꓘꓶ. ꓫ. ꓔꓬ ꓡꓳ ꓐꓰ (The 74 media ) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿