ꓑꓴ-ꓔ-ꓳ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓙꓳˍ ꓟ ꓤ ꓠꓱ ꓤ ꓐꓴ ꓢꓳ ꓜꓲꓼ ꓓꓴ ꓬꓰˍ ꓟ

ꓑꓴ-ꓔ-ꓳ ꓡꓳ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓙꓳˍ ꓟ ꓤ ꓠꓱ ꓤ ꓐꓴ ꓢꓳ ꓜꓲꓼ ꓓꓴ ꓔꓯ ꓑꓴ-ꓔ-ꓳ ꓡꓳ ꓒꓱ꓾ ꓗꓮꓳ-ꓗ-ꓕꓮꓳ ꓘꓹ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ Anthony ꓪꓽ ꓘꓴ ꓦꓲ ꓗꓪ 3 ꓦ ꓟ 6-11 ꓠꓬꓲ ꓗꓪ ꓛꓲꓺ ꓢꓳ ꓜꓲꓼ ꓓꓴ ꓬꓰ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓳ ꓜꓲꓼ ꓓꓴ ꓕꓱ ꓟ ꓗꓪ ꓠꓬ ꓘꓴ ꓜꓲꓼ ꓞꓳ ꓟꓸ ꓒ ꓟꓸ ꓟ ꓐꓰ ꓠꓱꓸ ꓐꓯ ꓟꓸ ꓖꓶ ꓢꓴ ꓮ ꓙꓵꓽ 11 ꓣꓳ ꓐꓰ Holy Childhood ꓗꓪ ꓧꓳꓽ ꓪꓴꓸ ꓟꓴ ꓔꓬ ꓟ ꓔꓲꓺ ꓟ ꓐꓰ ꓟꓬꓱꓽ ꓬꓰ ꓢꓴ 11 ꓣꓳ ꓐꓴ ꓡꓰ ꓟꓸ ꓖꓶ ꓔꓬ ꓟ ꓥ ꓢꓲ ꓠꓬꓲ꓾ ꓤ ꓠꓱ ꓤ ꓐꓴ ꓪꓴ-ꓢ ꓐꓯ ꓘꓶꓽ ꓢꓷꓸ ꓠꓹ ꓟ꓾ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓚꓱꓹ꓾ ꓙꓲꓻ ꓫꓬ ꓢꓴ ꓐꓴ ꓚꓱꓹ꓾ ꓞꓳ ꓡꓲꓽ ꓪ ꓚꓱꓹ꓾ ꓗ ꓟꓲꓽ ꓡꓲꓼ ꓒꓰꓼ ꓚꓱꓹ ꓐꓰ ꓟꓲ ꓠꓯ ꓟꓵꓽ ꓘꓳꓼ ꓚꓱꓹ꓾ ꓓꓳ ꓟꓴ ꓟꓴꓽ ꓖꓪ ꓐꓴ ꓔꓯ ꓟꓸ ꓖꓶ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓳ ꓜꓲꓼ ꓓꓴ ꓬꓲ ꓔꓶ ꓙꓱꓼ ꓠꓬ ꓠꓻ ꓫꓵꓽ ꓐꓰ ꓟꓵꓽ ꓘꓶ ꓡꓶꓽˍ ꓟ ꓦꓬꓼ ꓠꓬꓲ ꓠꓯꓸꓼ ꓗꓪ ꓤ ꓠꓱ ꓤ ꓐꓴ ꓪꓴ-ꓢ ꓟꓸ ꓟꓲꓽ ꓟꓸ ꓖꓶˍ ꓟ ꓐꓰ ꓶꓻ ꓤ ꓐꓰ ꓟꓶ ꓤ ꓗꓷ ꓡꓰ ꓟ ꓑꓶꓸ ꓓꓴ ꓑꓴ-ꓔ-ꓳ ꓔꓲꓺ ꓒ ꓙꓵꓽ ꓔꓶꓸ ꓗꓪ ꓔꓬ ꓟ ꓬꓲꓸ ꓞꓲꓼ 9-15 ꓘꓳꓼ ꓠꓬꓲꓽ ꓗꓴꓸ ꓝꓸꓼ ꓗꓪ ꓟ ꓤ ꓠꓱ ꓤ ꓐꓴ ꓔꓯ ꓘꓴ ꓡꓳꓽ ꓢꓲ ꓟꓸ ꓖꓶ ꓔꓬ ꓟ ꓥ ꓡꓳ= 

ꓢꓳ ꓜꓲꓼ ꓓꓴ ꓗꓪ ꓔꓺ ꓡ ꓢꓴ ꓤ ꓠꓱ ꓤ ꓮ ꓙꓵꓽ ꓠꓬ 134 ꓣꓳ ꓙꓳˍ ꓟ ꓥ ꓢꓲ꓾ ꓢꓳ ꓜꓲꓼ ꓓꓴ ꓬꓰ ꓖꓶ ꓔꓬ ꓟ ꓓꓳꓽ ꓔꓯ ꓟꓽ ꓑ ꓙ ꓡꓰ ꓠꓬꓲ ꓞꓳ ꓘꓹ ꓕꓲ ꓐꓱ ꓗꓪ ꓤ ꓠꓱ ꓤ ꓐꓴ ꓟꓽ ꓛꓲꓺ ꓡ ꓟ ꓙꓳˍ ꓢꓰꓽ ꓡꓳ꓾ ꓐꓰ ꓢꓷꓸ ꓪ ꓡꓳ= ꓢꓳ ꓜꓲꓼ ꓓꓴ ꓗꓪ ꓢꓳ ꓣꓴ ꓔꓬ ꓟ ꓤ ꓠꓱ ꓤ ꓐꓴ ꓠꓬ ꓪꓽ ꓘꓴ ꓦꓲꓻ ꓗꓪ ꓔꓬ ꓢꓲ ꓢꓳ ꓣꓴ ꓔꓬ ꓟ ꓥ ꓡꓳ= ꓡꓳ ꓒꓱ ꓗꓪ ꓟ ꓟꓹ ꓟ ꓜꓴꓻ ꓗꓪ ꓐꓰ 4 ꓣꓳ ꓡ ꓢꓲ ꓤ ꓠꓱ ꓤ ꓐꓴ ꓐꓱ ꓶ ꓜꓻ ꓚꓬꓸ ꓖꓶ ꓜꓽ ꓔꓬ ꓡꓳ= ꓝꓮꓲ ꓬꓲ ꓪ ꓠꓬ 3 ꓦ 12 ꓠꓬꓲ ꓠꓽ ꓦꓬꓼ ꓠꓬꓲ ꓗꓪ ꓚꓲꓸ ꓛꓬ ꓦꓲꓻ ꓗꓪ ꓬꓲꓼ ꓙꓰ ꓓꓴ ꓥꓳ꓾ ꓐꓰ ꓢꓷꓸ ꓪ ꓡꓳ=