ꓑꓴ-ꓔ-ꓳ ꓡꓳ ꓒꓱ ꓘꓹ ꓫꓵꓼ ꓘꓹ ꓗꓪ ꓪꓽ ꓘꓴ ꓪꓽ ꓚꓲ ꓗꓪ ꓟ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓶꓼ ꓥꓳꓽ ꓙꓱꓽ ꓪꓽ ꓘꓴ ꓟꓲ-ꓢ ꓬꓰ ꓗꓷ ꓟ

ꓑꓴ-ꓔ-ꓳ ꓡꓳ ꓒꓱ꓾ ꓟ-ꓗꓯꓸ-ꓟꓴꓠ ꓘꓹ ꓜꓴ꓾ ꓘꓹ ꓫꓵꓼ ꓘꓹ ꓗꓪ 2023 ꓘꓳꓼ꓾ 4 ꓦ 11 ꓠꓬꓲ꓾ ꓮ ꓟꓰ ꓕꓯ ꓪꓽ ꓘꓴ ꓪꓽ ꓚꓲ ꓗꓪ ꓟ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓶꓼ ꓥꓳꓽ ꓙꓱꓽ ꓪꓽ ꓘꓴ ꓟꓲ-ꓢ ꓬꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ= ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓠꓯꓼ 11ꓽ00ꓙꓵꓹ ꓕꓯ ꓔꓲꓺ ꓒ John Awng Htoi ꓡꓰ ꓧꓳꓽ ꓪꓴꓸ ꓟꓴ ꓢꓲ ꓬꓰ ꓓꓳꓻ ꓡꓰꓳ= ꓑꓮꓲꓽ ꓗꓪ ꓛꓲꓺ ꓡ ꓢꓴ 150 ꓣꓳ ꓟꓽ ꓞꓲꓺ ꓙꓳ ꓢꓲ꓾ ꓑꓮꓲꓽ ꓐꓱ ꓶ ꓮꓸ ꓥꓼ ꓕꓲ ꓟ ꓢꓰꓼ ꓢꓲ ꓑꓮꓲꓽ ꓬꓰˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓪꓽ ꓚꓲ ꓖꓳ ꓟ ꓗꓪ ꓧꓶꓸ ꓕꓯ ꓕꓯ ꓠꓬ ꓪꓽ ꓘꓴ ꓦꓲ ꓫꓬꓹ ꓔ ꓟ ꓥ ꓢꓲ꓾ ꓗ ꓠꓯꓸ ꓕꓯ ꓠꓬ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓦꓲꓻ ꓒ ꓕꓲꓺ ꓗꓪ ꓫꓬꓹ ꓗꓷ ꓟ ꓥ ꓢꓲ ꓠꓬꓲ꓾ ꓮ ꓟꓶ ꓠꓬ ꓪꓽ ꓚꓲꓺ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓔꓶꓺ ꓗꓷ ꓟ ꓥ ꓡꓳ= ꓡꓯꓼ ꓐꓳ ꓔꓶꓸ ꓓꓴ ꓟꓽ ꓬꓰ ꓧꓶꓸ ꓕꓯ ꓗꓪ ꓠꓬ ꓟꓬꓱꓽ ꓙ ꓟꓸ ꓒ Bang Awng ꓡꓰ ꓧꓳꓽ ꓪꓴꓸ ꓟꓴ ꓢꓲ꓾ ꓡꓯꓼ ꓐꓳ ꓔꓶꓸ ꓓꓴ ꓔꓶꓺ ꓠꓹ ꓟ ꓐꓱ ꓶ ꓑꓴ-ꓔ-ꓳ ꓡꓳ ꓒꓱ ꓗꓪ ꓙꓳˍ ꓟ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓔꓬ ꓗꓪ ꓐꓰ ꓮ ꓡꓴ ꓒꓴ ꓖꓳꓻ ꓢꓲ ꓫꓬꓹ ꓔꓶꓺ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓘꓹ ꓫꓵꓼ ꓘꓹ ꓠꓬ ꓟ-ꓗꓯꓸ-ꓟꓴꓠ ꓘꓹ ꓜꓴꓻ ꓗꓪ ꓐꓹ ꓟ ꓥ ꓢꓲ꓾ ꓑꓴ-ꓔ-ꓳ ꓗꓪ ꓐꓰ ꓡꓳ-ꓔ 17 ꓕꓷꓹ ꓶꓽ ꓞꓹ ꓟ ꓗꓪ ꓓꓹ ꓡꓳ= ꓘꓹ ꓫꓵꓼ ꓗꓪ ꓗ-ꓕꓳ-ꓡꓲꓗ ꓢꓲꓺ ꓤ ꓦꓲꓻ 6 ꓦꓲꓻ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=