ꓑ-ꓘꓳꓹ-ꓗꓴꓽ ꓡꓳ ꓒꓱ ꓢꓲ-ꓑꓮꓴꓗ-ꓡ ꓬꓲꓻ ꓙꓬ ꓡꓳ ꓗꓸ ꓗꓪ ꓬꓲꓻ ꓙꓬ ꓙꓵꓽ ꓟꓶꓸ ꓡ ꓟ ꓪꓴꓸ ꓠꓬꓲ ꓞꓳ ꓤ 4 ꓣꓳ ꓫꓵꓻ ꓢꓲ ꓦꓲꓻ 11 ꓟ ꓬꓲꓻ ꓙꓬ ꓗꓪ ꓐꓴ ꓙꓰ ꓟ

ꓑ-ꓘꓳꓹ-ꓗꓴꓽ ꓡꓳ ꓒꓱ ꓢꓲ-ꓑꓮꓴꓗ-ꓡ ꓬꓲꓻ ꓙꓬ ꓡꓳ ꓗꓸ ꓗꓪ ꓬꓲꓻ ꓙꓬ ꓙꓵꓽ ꓟꓶꓸ ꓡ ꓟ ꓪꓴꓸ ꓠꓬꓲ ꓞꓳ ꓤ 4 ꓣꓳ ꓫꓵꓻ ꓢꓲ ꓦꓲꓻ 11 ꓟ ꓬꓲꓻ ꓙꓬ ꓗꓪ ꓐꓴ ꓙꓰ ꓟ

ꓟ-ꓗꓪꓰ, ꓟꓵꓽ ꓫꓴ꓾ ꓑ-ꓘꓳꓹ-ꓗꓴꓽ ꓡꓳ ꓒꓱ ꓗꓪ ꓙꓳˍ ꓟ ꓢꓲ-ꓑꓮꓴꓗ-ꓡ ꓬꓲꓻ ꓙꓬ ꓡꓳ ꓗꓸ ꓗꓪ ꓬꓲꓻ ꓙꓬ ꓙꓵꓽ ꓟꓶꓸ ꓡ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓡꓳ ꓗꓸ ꓒ ꓕꓲꓺ ꓗꓪ ꓔꓬ ꓢꓴ ꓞꓳ ꓤ 4 ꓣꓳ ꓫꓵꓻ ꓢꓲ꓾ ꓦꓲꓻ 11 ꓟ ꓬꓲꓻ ꓙꓬ ꓗꓪ ꓐꓴ ꓙꓰꓳ꓾ ꓐꓰ ꓢꓷꓸ ꓪ ꓡꓳ=

ꓑ-ꓘꓳꓹ-ꓗꓴꓽ ꓗꓪ ꓠꓬ ꓗꓳꓸ ꓗꓷ ꓟ 10 ꓦ 8 ꓠꓬꓲ ꓠꓯꓼ 1ꓽ00 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓶꓽ ꓦ ꓓꓽ ꓟ ꓡꓲ ꓗꓷ ꓢꓲ ꓠꓬꓲ꓾ ꓠꓯꓼ 3ꓽ00 ꓙꓵꓹ ꓕꓯ ꓠꓬ ꓬꓲꓻ ꓙꓬ ꓡꓳ ꓗꓸ ꓗꓪ ꓬꓲꓻ ꓙꓬ ꓬꓲ ꓓꓽ ꓟ ꓬꓲꓻ ꓬꓯꓼ ꓡ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓟꓽ ꓛꓲꓺ ꓡ ꓟ ꓗꓪ ꓚꓵꓸ ꓙꓰ ꓠꓹ ꓟ ꓙꓽ ꓖꓶ ꓔꓬ ꓖꓴˍ ꓟ ꓥ ꓡꓳ=

ꓕꓱ ꓡꓱ ꓙꓽ ꓖꓶꓼ ꓔꓬ ꓕꓯ ꓬꓲ ꓞꓲꓼ 6 ꓘꓳꓼ ꓙꓳˍ ꓟ ꓤꓽ꓾ ꓬꓲ ꓞꓲꓼ 15 ꓘꓳꓼ ꓙꓳˍ ꓟ ꓮ ꓟꓲꓽ ꓤ꓾ ꓬꓲ ꓞꓲꓼ 45 ꓘꓳꓼ ꓙꓳˍ ꓟ ꓟꓹ ꓟ ꓣꓱꓽ ꓢꓴ ꓐꓰ ꓬꓲ ꓞꓲꓼ 51 ꓘꓳꓼ ꓙꓳˍ ꓟ ꓐꓹ ꓐ ꓣꓱꓽ ꓢꓴ ꓐꓴ ꓬꓲꓻ ꓙꓬ ꓗꓪ ꓐꓴ ꓙꓰ ꓢꓲ ꓫꓵꓻ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓬꓲꓻ ꓙꓬ ꓙꓵꓽ ꓓꓯꓻ ꓡ ꓔꓬ ꓕꓯ ꓤ ꓣꓳ ꓠꓬ ꓬꓲꓻ ꓙꓬ ꓘꓴꓽ ꓗꓪ ꓐꓴ ꓙꓰ ꓟ ꓪꓴꓸ ꓠꓬꓲ ꓬꓲ ꓮ ꓝꓲ ꓠꓬ ꓬꓲ ꓠꓬꓲ ꓤ ꓔꓯ ꓖꓼ ꓣꓴ ꓙꓰˍ ꓟ ꓗꓪ ꓮ ꓝꓲ ꓣꓱꓽ ꓢꓴ ꓥˍ ꓟꓲ ꓐꓴ ꓙꓰ ꓟ ꓥ ꓡꓳ= ꓤ ꓠꓱ ꓠꓬꓲꓽ ꓣꓳ ꓐꓴ ꓙꓰ ꓟ ꓔꓯ ꓟꓳꓻ ꓡꓰ ꓕꓯ ꓬꓲ ꓐꓹ ꓐ ꓟꓹ ꓟ ꓣꓱꓽ ꓢꓴ ꓐꓴ ꓠꓬ ꓬꓲ ꓪ ꓠꓬꓲꓽ ꓣꓳ ꓔꓯ ꓖꓼ ꓣꓴ ꓙꓰˍ ꓕꓯ ꓬꓲ ꓪ ꓐꓴ ꓥˍ ꓟꓲ ꓬꓲꓻ ꓙꓬ ꓗꓪ ꓐꓴ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓬꓲꓻ ꓙꓬ ꓘꓴꓽ ꓐꓴ ꓙꓰ ꓢꓲ ꓫꓵꓻ ꓟ ꓤ ꓠꓱ ꓤ ꓠꓬꓲ ꓣꓳ ꓫꓵꓻ ꓟꓳ ꓔꓯ 10 ꓦ 8 ꓠꓬꓲ ꓠꓯꓼ ꓕꓯ ꓟꓳꓻ ꓡꓰ ꓢꓲ ꓬꓲ ꓪ ꓔꓯ ꓟꓶꓽ ꓘꓶꓼ 4ꓽ00 ꓙꓵꓹ ꓕꓯ ꓔꓵꓸ ꓗꓷꓳ= ꓟꓹ ꓟ ꓔꓯ ꓠꓬ 10 ꓦ 9 ꓠꓬꓲ ꓕꓯ ꓟꓳꓻ ꓡꓰ ꓠꓬꓲ ꓬꓲ ꓔꓯ ꓔꓵꓸ ꓗꓷ ꓢꓲ꓾ ꓐꓹ ꓐ ꓣꓱꓽ ꓢꓴ ꓔꓯ ꓠꓬ 10 ꓦ 10 ꓠꓬꓲ ꓕꓯ ꓟꓳꓻ ꓡꓰ ꓢꓲ ꓖꓳ ꓕꓲ ꓠꓬꓲ ꓕꓯ ꓔꓵꓸ ꓗꓷꓳ꓾ ꓐꓰ ꓢꓷꓸ ꓪ ꓡꓳ=