ꓑ-ꓪ ꓡꓳ ꓒꓱ ꓗꓪ ꓟ ꓮ-ꓡꓲꓹ-ꓗ-ꓐ ꓞꓳ ꓡꓱ ꓬꓽ-ꓒꓲꓸ ꓜꓽ ꓢꓴ ꓐꓴ ꓔꓯ ꓠꓽ ꓠꓹ ꓟ ꓐꓱ ꓶ ꓢꓳ ꓜꓲꓼ ꓓꓴ ꓚꓱꓹ ꓡꓲꓺ ꓧꓪꓹ ꓕꓲ ꓧꓪꓹ ꓢꓳꓺ ꓜꓲꓼ ꓓꓳ ꓡꓰ ꓟ ꓑꓮꓲꓽ ꓬꓰˍ ꓟ

ꓑ-ꓪ ꓡꓳ ꓒꓱ ꓗꓪ ꓟ ꓮ-ꓡꓲꓹ-ꓗ-ꓐ ꓞꓳ ꓡꓱ ꓬꓽ-ꓒꓲꓸ ꓜꓽ ꓢꓴ ꓐꓴ ꓔꓯ ꓠꓽ ꓠꓹ ꓟ ꓐꓱ ꓶ ꓢꓳ ꓜꓲꓼ ꓓꓴ ꓚꓱꓹ ꓡꓲꓺ ꓧꓪꓹ ꓕꓲ ꓧꓪꓹ ꓢꓳꓺ ꓜꓲꓼ ꓓꓳ ꓡꓰ ꓟ ꓑꓮꓲꓽ ꓬꓰˍ ꓟ

ꓗ-ꓛꓲ ꓗꓴꓷꓼ ꓫꓴ꓾ ꓑ-ꓪ ꓡꓳ ꓒꓱ ꓗꓪ 10 ꓦ 15 ꓠꓬꓲ ꓠꓯꓼ 11ꓽ00 ꓙꓵꓹ ꓕꓯ ꓮ-ꓡꓲꓹ-ꓗ-ꓐꓽ ꓞꓳ ꓡꓱ ꓐꓴ ꓠꓲꓹ ꓟ ꓒꓳꓹ ꓡꓶꓸ ꓠꓹ ꓟ ꓟꓸ ꓖꓶꓽˍ ꓟ ꓢꓳꓺ ꓦꓲ ꓗꓪ ꓐꓰ ꓡꓲꓺ ꓧꓪꓹ ꓕꓲ ꓧꓪꓹ ꓟ ꓢꓳꓺ ꓓꓳ ꓡꓰ ꓟ ꓑꓮꓲꓽ꓾ ꓣꓱꓽ ꓛꓰꓽ ꓫꓸ ꓟꓳˍ ꓟ ꓑꓮꓲꓽ ꓔꓯ ꓬꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓢꓳꓺ ꓜꓲꓼ ꓓꓴ ꓕꓱ ꓟ ꓠꓬ ꓦ ꓐ (5) ꓟ ꓢꓳ ꓜꓲꓼ ꓓꓴ ꓥ ꓢꓲ꓾ ꓢꓳ ꓜꓲꓼ ꓓꓴ ꓒꓴ ꓔ ꓟ ꓬꓲ ꓔꓶ ꓙꓱꓼ ꓠꓬ ꓬꓽ-ꓒꓲꓸ ꓣꓱꓽ ꓔꓬ ꓟ ꓞꓳ ꓡꓱ ꓐꓴ ꓔꓯ ꓬꓽ-ꓒꓲꓸ ꓔꓪꓸ ꓖꓶˍ ꓟ꓾ ꓬꓲ ꓪ ꓤꓶꓻ ꓔꓯ ꓫꓬꓹ ꓔꓱꓹ ꓖꓶˍ ꓟ꓾ ꓢꓷꓸ ꓫꓵꓽ ꓢꓷꓸ ꓙꓰꓽ ꓟꓸ ꓖꓶ ꓠꓹ ꓟ ꓥ ꓢꓲ ꓠꓬꓲ꓾ ꓢꓳꓺ ꓜꓲꓼ ꓓꓴ ꓕꓱ ꓟ ꓗꓪ ꓐꓰ ꓢꓳ ꓓꓳ ꓡꓰ ꓢꓴ ꓐꓴ ꓠꓬ ꓔ-ꓠꓮꓲꓹ꓾ ꓠꓯꓠꓹ-ꓬꓴꓠꓹ꓾ ꓢꓳꓪꓸ-ꓡꓮꓪꓽ꓾ ꓟꓲ-ꓚꓲ-ꓠꓽ꓾ ꓒ-ꓗꓸ ꓡꓳ ꓒꓱ ꓐꓴ ꓗꓪ ꓐꓰ ꓥ ꓢꓲ ꓮ ꓙꓵꓽ 17 ꓣꓳ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓳ ꓜꓲꓼ ꓓꓴ ꓕꓱ ꓟ ꓔꓯ ꓑ-ꓪ ꓙꓵꓽ ꓪ ꓙꓳ ꓢꓴ ꓗꓳ-ꓟꓲ-ꓔꓲ ꓕꓲ ꓜꓴ ꓡꓰ ꓔꓳꓹ ꓙˍ ꓟ ꓗꓪ ꓐꓰ ꓑꓯ-ꓪ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓗꓪ ꓐꓰ ꓧꓳꓽ ꓪꓴꓸ ꓟꓳ ꓢꓲ ꓒꓴ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓮ-ꓡꓲꓹ-ꓗ-ꓐ ꓞꓳ ꓡꓱ ꓐꓴ ꓔꓯ ꓟꓸ ꓖꓶˍ ꓟ ꓢꓳ ꓦꓲ ꓗꓪ ꓐꓰ ꓬꓽ-ꓒꓲꓸ ꓜꓽ ꓔꓬ ꓟ ꓞꓳ ꓡꓱ ꓐꓴ ꓔꓯ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓢꓳ ꓜꓲꓼ ꓓꓴ ꓬꓰ ꓖꓶ ꓔꓬ ꓟ ꓥ ꓢꓲ ꓮ ꓟꓶ ꓕꓲ ꓧꓪꓹ ꓟ ꓠꓬ ꓡꓲꓺ ꓧꓪꓹ ꓕꓲ ꓧꓪꓹ ꓟ ꓥ ꓢꓲ ꓠꓬꓲ꓾ ꓮ ꓟꓶ ꓗꓪ ꓛꓲ ꓢꓳ ꓤ 70 ꓣꓳ ꓛꓲꓺ ꓔꓯ ꓬꓽ-ꓒꓲꓸ ꓠꓽ ꓡꓰ ꓠ ꓬꓰ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=