ꓒꓲ-ꓡꓲ-ꓒꓲ ꓗꓴꓷꓼ ꓗꓪ ꓔꓬ ꓟ ꓟꓬ-ꓟ Chin ꓗ-ꓕꓳ-ꓡꓲꓗ ꓜꓴꓻ ꓗꓪ ꓐꓰ “Chin ꓞꓳ ꓫꓵꓽ ꓠꓬꓲ” ꓑꓮꓲꓽ ꓬꓰˍ ꓟ

ꓒꓲ-ꓡꓲ-ꓒꓲ ꓗꓴꓷꓼ ꓗꓪ ꓔꓬ ꓟ ꓟꓬ-ꓟ Chin ꓗ-ꓕꓳ-ꓡꓲꓗ ꓜꓴꓻ ꓗꓪ ꓐꓰ “Chin ꓞꓳ ꓫꓵꓽ ꓠꓬꓲ” ꓑꓮꓲꓽ ꓬꓰˍ ꓟ

ꓒ-ꓡꓲ-ꓒꓲ ꓗꓴꓷꓼ ꓗꓪ ꓔꓬ ꓟ ꓟꓬ-ꓟ Chin ꓗ-ꓕꓳ-ꓡꓲꓗ ꓜꓴꓻ ꓠꓬ 75 ꓘꓳꓼ ꓐꓲˍ ꓟ Chin ꓞꓳ ꓫꓵꓽ ꓐꓴ ꓦꓬꓼ ꓠꓬꓲ ꓑꓮꓲꓽ ꓔꓯ ꓒꓲ-ꓡꓲ-ꓒꓲ ꓗꓴꓷꓼ꓾ Quezon ꓡꓳ ꓒꓱ ꓗꓪ ꓙꓳˍ ꓟ Radio Veritas Asia ꓐꓱꓻ ꓘꓴꓽ ꓗꓪ 2 ꓦ 20 ꓠꓬꓲ ꓕꓯ ꓑꓮꓲꓽ ꓬꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓔꓲꓺ ꓒ Joseph Phe Ling Lay ꓠꓬ ꓠꓱꓸ ꓐꓯ ꓔꓲꓺ ꓒ ꓫꓵꓽ ꓣꓳ ꓐꓴ ꓐꓰ ꓕꓲ ꓪ ꓫꓸ ꓟꓳˍ ꓟ ꓑꓮꓲꓽ ꓪꓽ ꓘꓴˍ ꓟ ꓗꓪ ꓔ ꓗꓷꓳ=

ꓔꓲꓺ ꓒ ꓠꓬ ꓪꓽ ꓘꓴ ꓖꓴ ꓗꓪ ꓡ ꓢꓴ ꓮ ꓙꓵꓽ ꓔꓯ ꓢꓲꓽ ꓫꓬ ꓕꓳꓽ ꓶ ꓔꓯ ꓢꓷꓸ ꓕꓲ ꓖꓼ ꓢꓷꓸˍ ꓟ ꓢꓶꓸ ꓟꓽ ꓞꓲꓺ꓾ ꓪꓴ-ꓢ ꓐꓯ ꓘꓶꓽ ꓙꓳˍ ꓟ ꓕꓲ ꓡꓰꓹ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓕꓵꓼ ꓪ ꓖꓶ ꓗꓷꓳ=

ꓑꓮꓲꓽ ꓕꓱ ꓟ ꓗꓪ ꓛꓲꓺ ꓡ ꓢꓴ ꓑ ꓫꓬ 50 ꓣꓳ ꓟꓽ ꓞꓲꓺ ꓙꓳˍ ꓟ ꓥ ꓢꓲ꓾ ꓑꓮꓲꓽ ꓘꓴꓽ ꓗꓪ ꓠꓬ ꓟꓬ-ꓟ ꓗꓴꓷꓼ ꓐꓱ ꓶ꓾ ꓟꓬꓽ ꓠꓬꓲ ꓠꓬ ꓟꓯꓼ ꓘꓶꓻ ꓡꓶꓽ ꓔꓬꓹ ꓟ ꓟꓵꓽ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

75 ꓘꓳꓼ ꓐꓲˍ ꓟ Chin ꓞꓳ ꓫꓵꓽ ꓬꓲ ꓠꓬꓲ ꓔꓯ ꓒꓵꓽ ꓗ ꓬꓰ ꓗꓷ ꓢꓲ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶˍ ꓟ ꓪꓴꓸ ꓠꓬꓲ꓾ Chin ꓞꓳ ꓫꓵꓽ ꓜꓴꓻ ꓔꓯ ꓧꓳꓽ ꓣꓱꓽ ꓔꓬ ꓢꓴ ꓥ ꓟ Chin Deacon Joseph Thang Ha (ꓢꓙ) ꓗꓪ ꓐꓰ ꓫꓸ ꓟꓳ ꓘꓶꓽ ꓫꓸ ꓕꓱ ꓗꓷꓳ=

“ꓣꓳꓽ ꓠꓬ ꓮ ꓟꓬ ꓗꓪ ꓛꓲ ꓟꓽ ꓫꓱꓸ ꓡꓯ ꓘꓳ ꓓꓴ ꓙꓳˍ ꓥ ꓟꓲ ꓣꓳ ꓐꓴ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓟꓬ-ꓟ ꓗꓴꓷꓼ ꓗꓪ ꓔꓬ ꓢꓲ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓟ ꓑ ꓫꓬ ꓐꓴ ꓐꓰ꓾ ꓣꓳ ꓕꓲ ꓠꓲꓹ ꓕꓲ ꓪ ꓙꓳ ꓔꓬ ꓟ ꓔꓯ ꓟꓳꓸ ꓖꓶ ꓠꓹ ꓟ ꓪꓴ-ꓢ ꓬꓲ ꓑ ꓫꓬ ꓐꓰ ꓞꓳ ꓫꓵꓽ ꓕꓲ ꓫꓵꓽˍ ꓡꓰ ꓐꓰ ꓕꓲ ꓪ ꓜꓲꓼ ꓡꓳꓽ ꓗꓷꓳ= ꓕꓲ ꓪ ꓪꓽ ꓘꓴˍ ꓟ꓾ ꓣꓳ ꓚꓺ ꓟꓲꓽ ꓐꓴ ꓔꓯ ꓐꓯ ꓑꓶ ꓖꓶˍ ꓟ ꓐꓰ ꓟꓳꓼ ꓡꓳ ꓜꓻ ꓕꓲ ꓪ ꓜꓽˍ ꓟ꓾ ꓕꓱ ꓟ ꓡꓰ ꓐꓰ ꓬꓰˍ ꓟ ꓠꓬ ꓣꓳ ꓐꓴ ꓟꓽ ꓫꓱꓸ ꓡꓯ ꓘꓳ ꓟ ꓠꓯꓸꓼ ꓗꓪ ꓪꓽ ꓡꓯꓽ ꓘꓳ꓾ ꓕꓽ ꓡꓯꓽ ꓘꓳˍ ꓟ ꓔꓯ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ”꓾ ꓐꓰ Deacon ꓡꓰ ꓐꓯ ꓡꓳ=

Falam Chin ꓔꓲꓺ ꓟ ꓥ ꓟ ꓔꓲꓺ ꓟ Margarita Sai Tin Thiam(ꓢꓙꓮ) ꓡꓰ ꓐꓯ ꓟ ꓠꓬ “ꓥꓪ ꓠꓴꓽ ꓠꓬ Chin ꓞꓳ ꓫꓵꓽ ꓠꓬꓲ ꓗꓪ ꓕꓲ ꓪ ꓜꓲꓼ ꓡꓳ ꓔꓬ ꓐꓯˍ ꓥ ꓟꓲ꓾ ꓕꓱ ꓟ ꓠꓬ Chin ꓞꓳ ꓫꓵꓽ ꓕꓲ ꓫꓵꓽ ꓐꓱ ꓶˍ ꓡꓰꓽ ꓟꓽ ꓥ= ꓥꓪ ꓠꓽ ꓕꓱ ꓟ ꓑꓶꓸ ꓓꓴ ꓮ ꓘꓶꓸ ꓗꓹ ꓛꓲꓽˍ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓣꓳ ꓐꓴ ꓮ ꓙꓵꓽ ꓠꓬ ꓕꓲ ꓠꓲꓹ ꓕꓲ ꓪ꓾ ꓪꓽ ꓡꓯꓽ ꓘꓳ ꓠꓲꓹ ꓗꓪ ꓐꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳ ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓟ ꓑꓶꓸ ꓓꓴ ꓥ ꓡꓳ” ꓐꓰ ꓐꓯ ꓡꓳ=

Chin ꓞꓳ ꓫꓵꓽ ꓐꓴ ꓠꓬ Chin ꓗꓴꓷꓼ ꓫꓴ ꓗꓪ ꓡꓰꓽ ꓟꓽ ꓞꓲꓺ ꓟꓬ-ꓟ ꓗꓴꓷꓼ ꓗꓪ ꓡꓳ ꓒꓱ ꓮ ꓟꓬꓹ ꓗꓪ ꓔꓬ ꓡꓳ= ꓕꓲ ꓐꓱ ꓠꓬ ꓲ-ꓓꓲ-ꓬ ꓗꓴꓷꓼ ꓟꓲ-ꓜꓳ:-ꓣꓯ ꓗꓴꓷꓼ ꓫꓴ ꓗꓪˍ ꓟꓲ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

“Chin ꓞꓳ ꓫꓵꓽ ꓐꓴ ꓠꓬꓲ” ꓠꓬ Chin ꓞꓳ ꓫꓵꓽ (53) ꓙꓰꓽ ꓐꓱ ꓶ ꓮ ꓘꓶꓸ ꓪꓴꓽ ꓓꓰˍ ꓟ ꓠꓬꓲ ꓕꓲ ꓠꓬꓲ ꓥ ꓢꓲ ꓠꓬꓲ꓾ Chin ꓚꓧꓲꓠ ꓞꓳ ꓫꓵꓽ ꓐꓴ ꓔꓬ ꓟ ꓗꓴꓷꓼ ꓮ ꓟꓬꓹ ꓗꓪ ꓑꓮꓲꓽ ꓕꓱ ꓟ ꓔꓯ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓣꓦꓮ ꓓꓳꓽ ꓗꓪ ꓐꓯ ꓔ ꓡꓳ=