ꓓꓳꓽ

(1) ꓟꓶ-ꓚꓲ-ꓠ aung nan ꓢꓷꓸ ꓠꓲꓹ ꓕꓳ ꓶ ꓢꓳ ꓦꓲꓻ (3) ꓗꓪ ꓢꓳ ꓤ 40 ꓣꓳ ꓚꓳꓦꓲꓓ-19 ꓠꓸꓹ ꓫꓵꓽ ꓟꓳˍ ꓟ ꓓꓳꓽ

ꓟꓶ-ꓚꓲ-ꓠ Aung Nan ꓢꓷꓸ ꓠꓲꓹ ꓕꓳ ꓶ ꓢꓳ ꓦꓲꓻ (3) ꓗꓪ ꓢꓳ ꓔꓬ ꓢꓴ ꓢꓳ ꓤ (40) ꓣꓳ  ꓚꓳꓦꓲꓓ-19 ꓠꓸꓹ ꓫꓵꓽ ꓚꓬꓹ ꓕꓯ ꓠꓸꓹ ꓫꓵꓽ ꓟꓳ ꓡꓰꓳ ꓐꓰ ꓢꓷꓸ ꓪ ꓡꓰꓳ= ꓢꓳ ꓦꓲꓻ ꓗꓪ ꓕꓳꓽ ꓶ ꓟꓸ ꓔꓬ ꓟ ꓟꓸ ꓟ ꓕꓲ ꓣꓳ ꓠꓸꓹ ꓫꓵꓽ ꓟꓳˍ ꓟ ꓪꓴꓸ ꓠꓬꓲ  ꓠꓬꓲꓸ ꓠꓬꓲ ꓢꓳ ꓤ ꓕꓲ ꓜꓴꓻ ꓔꓯ ꓚꓬꓹ ꓠꓬꓲˍ ꓕꓯ ꓠꓸꓹ ꓫꓵꓽ ꓟꓳ ꓡꓰꓳ= (9) ꓔ ꓢꓳ ꓢꓴ (3) ꓣꓳ (10) ꓔ ꓢꓳ ꓢꓴ (6) ꓣꓳ ꓐꓰ (8) ꓔ ꓢꓳ ꓢꓴ (20) ꓣꓳ ꓥ ꓡꓳ ꓐꓰ ꓐꓯ ꓡꓳ= ꓠꓸꓹ ꓫꓵꓽ ꓚꓬꓹ ꓟꓶ ꓢꓴ ꓔꓯ ꓠꓯꓻ ꓞꓲꓼ ꓦꓲꓸꓹ ꓗꓪ ꓠꓯꓻ ꓞꓲꓼ ꓫꓬꓹ ꓔꓬ ꓢꓲ  ꓢꓳ ꓦꓲꓻ ꓔꓯ ꓥ ꓟꓲ (10) ꓠꓬꓲ ꓠꓽ ꓓꓴ ꓥꓳ꓾ ꓐꓰ The 74 Media ꓗꓪ ꓐꓯ ꓔ ꓡꓳ=

(2)  2 ꓦ ꓟ 16 ꓠꓬꓲ ꓔꓯ ꓗꓴꓷꓼ ꓠꓲꓹ ꓧꓳꓹ ꓫꓵꓽ ꓧꓳꓹ ꓦꓬꓼ ꓠꓬꓲ ꓐꓯ ꓢꓲꓸ ꓬꓴ-ꓗ-ꓣꓲꓸ ꓢꓷ ꓙ ꓟꓴ ꓙˍ ꓟ ꓓꓳꓽ

2ꓦ ꓟ 16 ꓠꓬꓲ ꓔꓯ ꓗꓴꓷꓼ ꓠꓲꓹ ꓧꓳꓹ ꓫꓵꓽ ꓧꓳꓹ ꓦꓬꓼ ꓠꓬꓲ ꓐꓯ ꓢꓲꓸ ꓬꓴ-ꓗ-ꓣꓲꓸ ꓙꓵꓽ ꓢꓲꓽ ꓒꓽ ꓑꓳ-ꓡꓳ-ꓟꓲ-ꓓꓲ-ꓬ ꓜꓯ-ꓡꓲ-ꓢꓲ- ꓗꓰꓸ ꓡꓰ ꓮ ꓟꓰ ꓕꓯ ꓢꓷꓹ ꓙ ꓟꓳ ꓙ  ꓗꓷꓳ= ꓣ-ꓫꓸ ꓗꓴꓷꓼ ꓡꓰ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓟꓯꓼ ꓢꓰꓼ ꓪꓴꓸ ꓔꓴ ꓓꓴ ꓥꓳ꓾ ꓐꓯˍ ꓟ ꓛꓽ ꓒꓽ ꓓꓳꓽ ꓔꓯ ꓮ-ꓟꓯ-ꓣꓲ-ꓗ ꓡꓰ ꓐꓯ ꓒꓬꓱꓸꓸ ꓩꓴ ꓡ ꓟ ꓑꓶꓸ ꓓꓴ ꓬꓴ-ꓗ-ꓣꓲꓸ ꓠꓬ ꓟꓯꓼ ꓔꓳꓹ ꓗꓽ ꓡꓯ ꓘꓳ ꓠꓹ ꓟ ꓕꓱ ꓡꓱ ꓙꓽ ꓖꓶ ꓩꓴ ꓡˍ ꓟ ꓥ ꓡꓳ= ꓣꓳ ꓔꓯ ꓟꓯꓼ ꓢꓰꓼ ꓡ ꓓꓴ ꓬꓰꓸꓳ ꓐꓯ ꓖꓶ ꓡꓸꓹꓳ= ꓣꓳ ꓮ ꓙꓵ ꓠꓲꓹ ꓧꓳꓹ ꓫꓵꓽ ꓧꓳꓹ ꓠꓹ ꓟ ꓦꓬꓼ ꓠꓬꓲ ꓥꓳ= ꓦꓬꓼ ꓠꓬꓲ ꓕꓱ ꓟ ꓐꓱ ꓶ ꓥꓪ ꓡꓯꓼ ꓓꓴ ꓢꓽ ꓓꓳ ꓡꓰꓳ꓾ ꓐꓰ ꓬꓴ-ꓗ-ꓣꓲꓸ ꓙꓵꓽ ꓢꓲꓽ ꓒꓽ ꓡꓰ ꓐꓯ ꓡꓳ=

ꓟꓲ ꓠꓯ ꓗꓴꓷꓼ ꓜꓴ ꓟꓬꓱꓽ ꓢꓲꓸꓸ ꓓꓽ ꓟ ꓖꓴ-ꓔ-ꓬꓯꓼ-ꓢꓲ ꓡꓰ ꓮ ꓙꓵꓽ ꓢꓴ ꓠꓲꓹ ꓟ ꓫꓵꓸꓸ ꓫꓵꓸꓸ ꓬꓰ ꓠ ꓔꓸ ꓥ ꓐꓯ ꓩꓴ ꓡ ꓡꓳ= ꓣ-ꓫꓸ ꓗꓴꓷꓼ ꓙꓵꓽ ꓢꓲꓽ ꓒꓽ ꓑꓴ-ꓔꓲ ꓡꓰ ꓟꓯꓼ ꓬꓲꓸ ꓫꓬꓹ ꓬꓴ-ꓗ-ꓣꓲꓸ ꓐꓰ ꓣ-ꓫ ꓟꓵꓽ ꓘꓶꓽ ꓗꓪ ꓝꓲꓸ ꓔ ꓠꓬꓲ-ꓸ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓟꓯꓼ ꓟꓽ ꓢꓰꓼ ꓐꓰ ꓐꓯ ꓔꓬ ꓡꓳ= ꓮ ꓧꓪꓹ ꓣ-ꓫ ꓡꓰ ꓟꓯꓼ ꓢꓰꓼ ꓟꓵꓽ ꓦꓴ  ꓡ ꓐꓭˍ ꓠꓬ ꓴꓢꓮ ꓐꓰ ꓙ-ꓟꓶ-ꓠꓰ ꓐꓴ ꓡꓰ ꓡꓲꓽ ꓡꓲꓽ ꓒꓳꓹ ꓔꓳꓹ ꓓꓴ ꓥꓳ ꓐꓯ ꓔꓸ ꓟ ꓙꓳˍ ꓡꓳ꓾ ꓐꓰ ꓢꓷꓹ ꓪ ꓡꓰꓳ=

(3) ꓑꓴ-ꓔ-ꓳ ꓗꓪ ꓝꓮꓲ ꓕꓲ ꓧꓪꓹ ꓐꓶ ꓡꓯ ꓘꓳꓹ ꓟ ꓓꓳꓽ

2022 ꓘꓳꓼ 2 ꓦ ꓟ 15 ꓠꓬꓲ ꓟꓶ ꓘꓶꓼ 8ꓽ00 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲ ꓡꓴ-ꓫꓬ-ꓬ ꓘꓹ ꓐꓰ ꓒ-ꓟꓽ ꓘꓹ ꓠꓬꓲꓽ ꓗꓴꓸ ꓚꓸ ꓗꓪ ꓐꓳꓽ ꓓ ꓣꓱꓽ ꓢꓲ ꓐꓶ ꓡꓯ ꓘꓳꓹ ꓡꓳ꓾ ꓐꓰ ꓢꓷꓸ ꓪ ꓡꓰꓳ= ꓞꓳ ꓘꓹ ꓢꓴ ꓠꓽ ꓬꓲꓸ ꓐꓽ ꓗꓪ ꓓꓳ ꓙꓰ ꓟꓽ ꓑꓶꓸꓳ= ꓒ-ꓟꓽ ꓗꓶꓽ ꓛꓲ ꓓꓰꓺ ꓕꓲ ꓟꓵꓽ ꓟ ꓗꓪ ꓐꓶ ꓡꓯ ꓘꓳ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓡꓳ= ꓥꓪ ꓠꓴ ꓠꓽ ꓕꓱ ꓗꓪ ꓔꓬꓹ ꓟꓽ ꓑꓶꓸꓳ=  ꓮ ꓡꓲ ꓟꓽ ꓬꓰꓳ ꓟꓽ꓾ ꓐꓰ ꓒ-ꓟ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓡꓳ= ꓟꓯꓼ ꓠꓬꓲꓽ ꓛꓱꓽ ꓡꓱꓸꓼ ꓠꓬ ꓟꓶ-ꓚꓲ-ꓠ ꓑꓴ-ꓔ-ꓳ ꓙ ꓖꓴ ꓔꓯ ꓗꓪꓽ ꓠꓹ ꓟ ꓦꓴꓻ ꓡꓯ ꓘꓳ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=