ꓔꓲꓺ ꓒꓽ ꓪ ꓔꓲ ꓕꓲꓽ ꓟꓲꓺ ꓠꓯꓺ ꓡꓱꓸꓼ ꓐꓰ ꓙꓲꓻˍ ꓡꓯꓽ ꓘꓳ ꓓꓴ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓟ=

ꓔꓲꓺ ꓒꓽ ꓪ ꓔꓲ ꓕꓲꓽ ꓟꓲꓺ ꓠꓯꓺ ꓡꓱꓸꓼ ꓐꓰ ꓙꓲꓻˍ ꓡꓯꓽ ꓘꓳ ꓓꓴ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓟ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓐꓰ ꓛꓳꓽ ꓒꓯꓹ ꓐꓴꓳ

ꓙꓲˍ ꓟ ꓓꓳꓽ ꓠꓽ ꓛꓲ ꓡꓻꓳ=ꓙꓲˍ ꓟ ꓓꓳꓽ ꓖꓳ ꓟ ꓠꓬ ꓾ ꓔꓲꓺ ꓒꓽ ꓪꓺ ꓔꓲ Francis ꓠꓬ ꓕꓧꓮꓲ ꓗꓴꓷꓼ ꓐꓰ ꓙꓮꓑꓮꓠ ꓗꓴꓷꓼ ꓗꓪ ꓪꓽ ꓘꓴ ꓚꓳꓻ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓟ ꓥ ꓡꓳ=ꓖꓳ ꓟ ꓠꓬ ꓗꓴꓷꓼ 2 ꓗꓴꓷꓼ ꓗꓪ ꓟ ꓘꓴ-ꓜꓲ-ꓞꓳ ꓐꓰ ꓠꓱꓸ ꓐꓯꓼ ꓐꓱ ꓶ ꓣꓱꓽ ꓛꓰꓽ ꓟꓶˍ ꓟ ꓬꓲꓸ ꓙꓵꓹ ꓥ ꓡꓳ= ꓔꓲꓺ ꓒ ꓪ ꓔꓲ Francis ꓠꓬ ꓢꓲꓺ ꓡꓲꓺ ꓟ ꓬꓰ-ꓢꓴ ꓬꓲꓸ ꓗꓴꓷꓼ ꓟꓸ ꓟꓲꓽ ꓔꓯ ꓞꓳ ꓤ ꓮꓽ ꓙꓵꓽ ꓔꓯ ꓚꓺ ꓟꓸ ꓖꓶꓽ ꓔꓬꓹ ꓟ ꓠꓬ ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓟ  ꓟꓷꓽ ꓠꓷꓹ ꓝꓸ ꓒꓽ ꓥ ꓡꓳ=ꓔꓲꓺ ꓒ ꓪꓺ ꓔꓲ Francis ꓠꓬ ꓪꓴ-ꓢ ꓟꓬꓱꓽ ꓬꓰ ꓢꓴ ꓡꓰꓽ ꓟꓽ ꓛꓲꓺ ꓾ ꓞꓳ ꓫꓵꓽ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓐꓱ ꓶ ꓣꓱꓽ ꓙ ꓢꓴ ꓐꓴ ꓐꓱ ꓶ ꓧꓳꓽ ꓪꓴꓸ ꓟꓴ ꓢꓴ ꓥ ꓡꓳ=ꓬꓲꓸ ꓠꓬ ꓟꓲꓺ ꓠꓯꓺ ꓪꓴꓸ ꓓꓵꓺ ꓥ ꓡꓳ=

ꓔꓲꓺ ꓒ ꓪ ꓔꓲ ꓠꓬ ꓞꓳ ꓫꓵꓽ ꓞꓳ ꓙꓰ ꓐꓴ ꓠꓲꓹ ꓟ ꓗꓪ ꓕꓲꓺ ꓡꓰ ꓢꓴ ꓥꓳ=ꓬꓲꓸ ꓠꓬ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓢꓲ ꓤ ꓮꓸ ꓔꓲꓸ ꓤꓽ ꓙꓳˍ ꓟ ꓗꓴꓷꓼ ꓔꓯ ꓢꓲꓺ ꓗꓷ ꓟ ꓥꓳ=ꓡꓳꓹ ꓬꓰ ꓗꓪ ꓠꓬ ꓞꓳ ꓜꓴꓻ ꓐꓴ ꓕꓯꓽ ꓢꓲ ꓬꓲꓸ ꓙꓽ ꓫꓸ ꓙˍ ꓟ ꓠꓬ ꓮꓽ ꓘꓶꓸ ꓟꓬꓽ ꓡˍ ꓡꓳ=ꓡꓳꓹ ꓬꓰˍ ꓟ 2 ꓘꓳꓼ ꓕꓯ꓾ ꓘꓴ-ꓜꓲ-ꓞꓳ ꓟꓽ ꓞꓽ ꓠꓲˍ ꓟ Myanmar ꓐꓰ Bangladesh ꓗꓴꓷꓼ ꓗꓪ ꓚꓳꓻ ꓙꓰ ꓠꓹ ꓟ ꓢꓲꓺ ꓗꓷꓳ=ꓘꓴ-ꓜꓲ-ꓞꓳ Myanmar ꓗꓴꓷꓼ ꓗꓪ ꓛꓲꓺ ꓡ ꓟ ꓠꓬ 500 ꓘꓳꓼ ꓙꓳ ꓗꓷ ꓟ ꓥꓳ= ꓬꓲꓸ ꓚꓳꓺ ꓙꓰˍ ꓟ ꓠꓬ ꓮꓸ ꓔꓲꓸ ꓤ ꓟ ꓮꓸ ꓣꓳ ꓐꓴ ꓔꓯ ꓕꓲꓽ ꓟꓵꓽ ꓕꓲꓽ ꓢꓰꓺ ꓢꓷꓸ ꓡꓰ ꓝꓲˍ ꓟ ꓥ ꓡꓳ= ꓣꓳꓽ ꓐꓱ ꓶꓼ ꓮꓸ ꓫꓵꓽ ꓙꓳꓻ ꓖꓴ ꓙꓳꓺꓽ? ꓮꓽ ꓘꓶꓸ ꓪꓴꓽˍ ꓟ ꓟꓬꓱꓽ ꓐꓬꓱꓽ ꓘꓶꓽ꓾ ꓢꓲꓽ ꓫꓬꓹ ꓟ ꓣꓳꓽ ꓐꓹ ꓐ (ꓔꓲꓺ ꓒꓽ ꓪꓺ ꓔꓲ Francis) ꓠꓬ ꓠꓲꓸˍ ꓟ ꓮꓸ ꓣꓳ ꓜꓴꓻ ꓔꓯˍ ꓟꓲ ꓠꓲꓹ ꓠꓵˍ ꓡꓳ=

ꓬꓲꓸ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓟ ꓠꓬ ꓛꓴꓽ ꓙꓳ ꓓꓴ ꓟꓬꓽˍ ꓥˍ ꓟꓲ ꓾ ꓖꓳ ꓟ ꓠꓬ ꓬꓲꓸ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓟ ꓗꓪ ꓗꓽ ꓕꓸ ꓟꓽ ꓐꓻ ꓡ= ꓠꓵ ꓠꓲꓹ ꓗꓪ ꓐꓰ ꓢꓲꓺ ꓡꓲꓺˍ ꓟꓶ ꓠꓹ ꓟ ꓐꓱ ꓶꓼ ꓡ ꓗꓷ ꓟ ꓥ ꓡꓳ=ꓬꓲꓸ ꓠꓬ Myanmar ꓗꓴꓷꓼ ꓗꓪ ꓟ ꓗꓴꓷꓼ ꓙꓵꓽ ꓢꓴ꓾ ꓙꓵꓻ ꓚꓱꓹ ꓟꓽ ꓫꓱꓸ ꓡꓯꓽ ꓘꓳ ꓟ ꓗꓪ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓐꓰ ꓗꓴꓷꓼ ꓔꓯ ꓡꓳꓸ ꓙ ꓢꓴ ꓟꓯꓼ ꓢꓲꓽ ꓒꓽ ꓐꓴ ꓾ ꓮ ꓡꓲ ꓕꓲꓽ ꓣꓳ ꓔꓯˍ ꓟꓲ ꓟꓳ ꓠꓹ ꓟ ꓙꓳꓺ ꓛꓱꓽ ꓓꓴ ꓟꓽ ꓙꓳ=ꓬꓲꓸ ꓠꓬ ꓢꓲꓺ ꓡꓲꓺˍ ꓟ ꓗꓪ ꓚꓳꓻ ꓙꓰ ꓢꓴ ꓕꓲꓽ ꓟˍ ꓡꓰ ꓐꓰ ꓡ ꓗꓷ ꓢꓲ꓾ ꓣꓳꓽ ꓞꓳ ꓤ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓲꓹ ꓟ ꓗꓪ ꓬꓲꓸ ꓪꓴꓽ ꓓꓰˍ ꓟ ꓗꓹ ꓛꓲꓽ ꓓꓴ꓾ ꓠꓲꓹ ꓒꓴ ꓓꓴ ꓔꓯ ꓣꓴꓺ ꓔꓯꓹ ꓖꓶꓽ ꓡ ꓗꓷ ꓟ ꓥꓳ=ꓔꓲꓺ ꓒꓽ ꓪꓺ ꓔꓲ ꓣꓳꓽ ꓐꓰ ꓔꓬꓹ ꓟ ꓦꓬꓼ ꓠꓬꓲ ꓕꓯ ꓣꓳꓽ ꓕꓲꓽ ꓗꓴꓷꓼ ꓡꓱꓸꓼ ꓠꓬ ꓥꓳꓺ ꓡꓳꓸˍ ꓟ ꓗꓪ ꓙꓲꓻ ꓡꓰ ꓔꓬꓹ ꓡꓳ=ꓗ-ꓔꓳ-ꓡꓲ ꓘꓴ-ꓜ-ꓞꓳ ꓐꓰ ꓞꓳ ꓡꓱꓻ ꓐꓴ ꓔꓯ ꓢꓲꓺ ꓡꓲꓺˍ ꓟ ꓐꓽ ꓡꓻ ꓢꓯꓼ ꓟꓶꓻ ꓓꓴ ꓒꓬꓱꓼ ꓡ ꓠꓹ ꓟˍ ꓟꓲ ꓢꓯꓼ ꓪꓽ ꓖꓶꓽ ꓗꓷꓳ=

Thailand ꓗꓴꓷꓼ ꓐꓰ Japan ꓗꓴꓷꓼ ꓗꓪ ꓪꓰꓻ ꓤ ꓡꓰꓽ ꓐꓰ ꓚꓳꓻ ꓙꓰ ꓠꓹ ꓟ ꓔꓯ ꓘꓳꓹ ꓣꓴ ꓖꓶꓽ ꓡˍ ꓠꓬꓲ꓾ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ=ꓕꓱꓻ ꓗꓴꓷꓼ 2 ꓗꓴꓷꓼ ꓠꓬ ꓦꓻ ꓡꓯꓼ ꓪꓽ ꓮꓽ ꓟꓬꓹ ꓙꓳˍ ꓟ ꓗꓴꓷꓼ ꓥ ꓡꓳ=ꓔꓲꓺ ꓒꓽ ꓪꓺ ꓔꓲ ꓥˍ ꓟꓲ Asia ꓗꓪ ꓟ ꓘꓴ-ꓜꓲ-ꓞꓳ ꓐꓴ ꓔꓯ ꓪꓺ ꓙꓲꓻ ꓠꓲꓹ ꓟ ꓙꓳˍ ꓡꓳ=ꓙꓵꓻ ꓠꓲꓹ ꓔꓯꓸ ꓟꓳꓸꓼ ꓪꓴꓽˍ ꓟ ꓔꓯꓸˍ ꓟꓲ ꓬꓲꓸ ꓢꓷˍ ꓡꓳ=ꓝꓮꓲ ꓠꓬ ꓔꓲꓺ ꓒꓽ ꓪ ꓔꓲ ꓬꓲꓸ ꓠꓬ ꓪꓴ-ꓢ ꓚꓰꓼ ꓔ ꓟ ꓡꓯꓼ ꓪꓽ ꓮꓽ ꓙꓵꓽ ꓔꓯ ꓠꓲꓹ ꓠꓵˍ ꓡꓳ= ꓬꓲꓸ ꓠꓵ ꓠꓲꓹ ꓔꓯ ꓠꓬ ꓬꓲꓸ ꓐꓳꓻ ꓔ ꓟ ꓕꓳꓽ ꓶꓽ ꓥ ꓟ Laudato Si ꓐꓰ  synod on Amazon ꓗꓪ ꓟꓳꓻ ꓓˍ ꓡꓳ=ꓕꓱꓻ ꓟ ꓮꓽ ꓙꓵꓽ ꓡꓱꓸꓼ ꓗꓪ ꓬꓲꓸ ꓠꓬ Asia ꓗꓪ ꓟ ꓖꓴ ꓪꓴꓸ ꓗꓴꓷꓼ ꓗꓪ ꓟ ꓪꓴ-ꓢ ꓚꓰꓼ ꓔ ꓟ꓾ ꓢꓯꓸ ꓫꓵꓽ ꓢꓯꓸ ꓙꓰꓽ ꓮꓽ ꓙꓵꓽ ꓐˍ ꓟ  ꓦꓻ ꓔꓯꓸ ꓟꓳꓸꓼ ꓙꓵꓻ ꓚꓱꓹ  ꓔꓯ ꓠꓲꓹ ꓟ ꓙꓳˍ ꓡꓳ=

ꓔꓲꓺ ꓒ ꓪ ꓔꓲꓸ ꓜꓲꓼ ꓡꓯꓽ ꓘꓳꓹ ꓟ  ꓗꓪ ꓟꓶꓽ ꓘꓳꓼ ꓒꓳꓹ ꓡꓶˍ ꓟ ꓐꓰ ꓗꓴꓷꓼ ꓑ ꓫꓬꓼ ꓫꓸ ꓙꓵˍ ꓟ ꓔꓯ ꓟꓳꓸ ꓪꓴꓸ ꓔꓴ ꓢꓲ ꓖꓪꓻ ꓙꓱꓻ ꓠꓲꓹ ꓫꓵˍ ꓡꓳ=Thailand ꓗꓴꓷꓼ ꓐꓰ Japan ꓗꓴꓷꓼ ꓗꓪ ꓠꓬ ꓟꓶꓽ ꓘꓳꓼ ꓒꓳꓹ ꓡꓶꓸ ꓟ ꓪꓴꓸ ꓠꓬ ꓮꓽ ꓘꓶꓸ ꓫꓸ ꓙꓵꓺ ꓔꓬꓹ ꓖꓴˍ ꓡꓳ=ꓙꓵꓻ ꓚꓱꓹ ꓗꓪ ꓐꓰ ꓞꓳ ꓤ ꓒꓵꓽ ꓶꓼˍ ꓐꓰ ꓪꓴ-ꓢ ꓚꓰꓼ ꓔ ꓟ ꓮꓽ ꓙꓵꓽ ꓠꓬ ꓕꓲꓽ ꓠꓲꓹ ꓕꓲꓽ ꓪꓺꓽ ꓗꓷ ꓡꓰ ꓠ ꓛꓲꓺ ꓡꓯꓼ ꓕꓲꓺ ꓬꓰ ꓐ ꓡˍ ꓥꓳ ꓐꓰ꓾ ꓔꓲꓺ ꓒꓽ ꓪ ꓔꓲ ꓥꓳ ꓡꓳꓸ ꓔ ꓡꓳ=ꓔꓲꓺ ꓒ ꓪꓺ ꓔꓲ ꓐꓯˍ ꓟ ꓔꓯ ꓮꓽ ꓟˍ ꓟꓲ ꓑ ꓙˍ ꓥꓳ ꓐꓰ ꓥꓳ ꓡꓳꓸ ꓔ ꓡꓳ=

ꓔꓱꓹ ꓚꓵˍ ꓟ (ꓣꓱꓽ ꓙ ꓚꓱꓹ ꓐꓰ ꓚꓳꓺ ꓡꓳꓺ ꓗꓪ ꓟ ꓔꓱꓹ ꓚꓵˍ ꓟ) ꓟꓷꓽ ꓠꓷꓹ ꓝꓸ ꓢꓴ(ꓔꓲꓺ ꓒꓽ ꓪ ꓔꓲ Francis) ꓔꓯ Asia ꓗꓪ ꓐꓰ ꓘꓳꓹ ꓣꓴˍ ꓥꓳ=Asia ꓠꓬ ꓦꓻ ꓡꓱ ꓚꓱꓹ ꓐꓰ ꓞꓳꓽ ꓡꓲꓽ ꓪꓽ ꓚꓱꓹ ꓗꓪ ꓮꓽ ꓘꓶꓸ ꓢꓯꓼ ꓐꓽ ꓔꓬꓹ ꓟ ꓗꓴꓷꓼ ꓐꓴ ꓥ ꓡꓳ=ꓕꓱꓻ ꓡꓰ ꓐꓰ ꓦꓻ ꓔꓯꓸ ꓟꓳꓸꓼ ꓜꓲꓼ ꓡꓳꓽˍ ꓟ ꓠꓬ Asia ꓗꓪ ꓟ ꓗꓴꓷꓼ ꓮꓽ ꓙꓵꓽ ꓐꓱ ꓶ ꓙꓲˍ ꓟ ꓶꓽ ꓤ ꓫꓱꓹ ꓤ ꓒꓬꓱꓼ ꓡˍ ꓥꓳ꓾ Asia ꓐꓱ ꓶ ꓥꓳ ꓡꓳ ꓓꓴ ꓟꓲꓽ ꓟꓲ ꓒꓬꓱꓼ ꓡˍ ꓥꓳ꓾ ꓪꓴꓽ ꓡ ꓟꓴ ꓡ ꓓꓴ ꓒꓬꓱꓼ ꓡˍ ꓥꓳ ꓐꓰ꓾ ꓥꓳ ꓐꓰ ꓡꓳꓸˍ ꓡꓳ=

Add new comment

7 + 5 =

Please wait while the page is loading