ꓔꓲꓺ ꓒ ꓓꓽ Cardinal George Pell ꓫꓵꓻ ꓗꓷ ꓟ ꓑꓶꓸ ꓓꓴ ꓔꓲꓺ ꓒ ꓪ ꓔꓲ Francis ꓠꓲꓹ ꓟ ꓫꓸ ꓟ

Cardinal ꓠꓬ Vatican ꓐꓰ ꓙ ꓡꓯ ꓘꓳ ꓢꓲ ꓟꓬꓱꓽ ꓬꓰ ꓗꓷ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓫꓵꓻ ꓟ ꓓꓳꓽ ꓔꓯ ꓑ ꓙ ꓡꓰ ꓕꓯ ꓔꓲꓺ ꓒ ꓪ ꓔꓲ Francis ꓠꓬ ꓕꓳꓽ ꓶ ꓐꓳ ꓩꓴ ꓗꓷ ꓢꓲ ꓕꓱ ꓡꓱ ꓑ ꓙ ꓪ ꓡꓰ ꓟ ꓓꓳꓽ ꓐꓱ ꓶ ꓮ ꓟꓬꓹ ꓠꓲꓹ ꓟ ꓫꓸ ꓔꓬ ꓡꓳ꓾ ꓐꓰ ꓐꓯ ꓖꓶ ꓗꓷꓳ=

Cardinal ꓠꓬ ꓶꓻ ꓡꓯꓼ ꓟꓬꓱꓽ ꓔꓯ ꓟꓳꓸ ꓧꓳꓽ ꓣꓱꓽˍ ꓟ ꓟꓬꓱꓽ ꓬꓰ ꓗꓷꓳ= ꓔꓲꓺ ꓒ ꓪ ꓔꓲ ꓠꓬ ꓬꓲ ꓠꓲꓹ ꓟ ꓫꓸ ꓢꓲ ꓪꓽ ꓘꓴ ꓙ ꓖꓶ ꓔꓬꓹ ꓟ ꓕꓳꓽ ꓶ ꓔꓯ Cardinal ꓐꓴ ꓜꓴꓻ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓔꓲꓺ ꓒ ꓓꓽ Cardinal Giovanni Battista Re ꓔꓬ ꓗꓪˍ ꓟꓲ ꓐꓳ ꓩꓴ ꓗꓷꓳ=

Cardinal ꓠꓬ 1 ꓦ 10 ꓠꓬꓲ ꓕꓯ ꓫꓵꓻ ꓗꓷ ꓟ ꓥ ꓡꓳ= ꓬꓲ ꓠꓬ ꓐꓶꓻ ꓪꓵꓽ ꓗꓪ ꓘꓶꓽ ꓢꓲ ꓠꓻ ꓫꓬꓹ ꓗꓷ ꓗ ꓠꓯꓸ ꓟꓽ ꓓꓻ ꓡꓰ꓾ ꓬꓲ ꓞꓲꓼ 81 ꓘꓳꓼ ꓕꓯ ꓫꓵꓻ ꓘꓷ ꓡꓰ ꓗꓷ ꓟ ꓥ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓫꓵꓻ ꓘꓷ ꓡꓰ ꓗꓷ ꓟ Cardinal ꓬꓲ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓥˍ ꓟꓲ ꓪꓽ ꓘꓴ ꓙ ꓖꓶˍ ꓔꓬ ꓟ ꓔꓯ ꓕꓳꓽ ꓶ ꓐꓳ ꓩꓴ ꓗꓷꓳ=

ꓔꓲꓺ ꓒ ꓪ ꓔꓲ ꓠꓬ ꓫꓵꓻ ꓗꓷ ꓟ Cardinal ꓬꓲ ꓔꓲꓺ ꓖꓴ  ꓟꓬꓱꓽ ꓬꓰ ꓗꓷ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ Cardinal ꓠꓬ Vatican ꓗꓪ ꓙꓵꓽ ꓪ ꓙꓳˍ ꓟ ꓠ ꓑ 3 ꓕꓲ ꓣꓳ ꓟ ꓥ ꓢꓲ꓾ ꓞꓳ ꓤ ꓐꓴ ꓡꓰ ꓒꓵꓽ ꓗ ꓖꓶˍ ꓟ꓾ ꓦ ꓡꓱ ꓐꓳˍ ꓟ ꓟꓶ ꓢꓴ ꓕꓲ ꓣꓳ ꓥ ꓟ꓾ Vatican ꓘꓴꓽ ꓗꓪ ꓒꓴ ꓣꓱꓽ ꓚꓱꓹ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓫꓬꓹ ꓔꓱꓹ ꓠꓹ ꓟ ꓐꓱ ꓶ ꓮ ꓟꓬꓹ ꓢꓯꓼ ꓕꓵꓼ ꓗꓷ ꓢꓴ ꓥ ꓡꓳ꓾ ꓐꓰ ꓐꓯ ꓡꓳ=

ꓮ ꓟꓶ ꓟ ꓡꓰ ꓚꓲꓸ ꓛꓬ ꓪꓴ-ꓢ ꓟꓬꓱꓽ ꓔꓯ ꓡꓳꓹ ꓬꓰˍ ꓗꓪ ꓛꓲꓺ ꓠꓲꓹ ꓟ ꓫꓸ ꓓꓴ ꓔꓳꓹ ꓜꓳꓽˍ ꓥ ꓟꓲ꓾ ꓫꓸ ꓓꓴ ꓔꓳꓹ ꓜꓳꓽˍ ꓥ ꓟꓲ ꓖꓳ ꓟ ꓘꓴꓽ ꓗꓪ ꓐꓰ ꓪꓴ-ꓢ ꓟꓬꓱꓽ ꓔꓯ ꓡꓳꓹ ꓬꓰˍ ꓗꓪ ꓛꓲꓺ ꓕꓶꓻ ꓕꓶꓻ ꓡꓰꓽ ꓬꓰ ꓗꓷ ꓟ ꓪꓴ-ꓢ ꓬꓲ ꓤ ꓠꓱ ꓕꓲ ꓣꓳ ꓒꓬꓱꓼ ꓗꓷ ꓟ ꓪꓴꓸ ꓠꓬꓲ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲˍ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓣꓱꓽ ꓛꓰꓽ ꓡꓯꓼ ꓫꓴ ꓘꓳꓹ ꓣꓴ ꓟꓶ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓖꓶ ꓔ ꓡꓳ=

https://bit.ly/3GXsu85