ꓔꓲꓺ ꓒ ꓙꓵꓽ ꓪ ꓖꓶˍ ꓟ ꓟꓽ ꓙꓳ ꓗꓷ ꓡꓰ ꓟ 9 ꓘꓳꓼ ꓗ ꓠꓯꓸ꓾ ꓮꓣꓖꓰꓠꓔꓲꓠꓮ ꓗꓪ ꓔꓲꓺ ꓒ ꓫꓵꓼ ꓕꓲ ꓣꓳ ꓙꓳ ꓡꓰꓳ꓾

ꓔꓲꓺ ꓒ ꓙꓵꓽ ꓪ ꓖꓶˍ ꓟ ꓟꓽ ꓙꓳ ꓙꓳ 9 ꓘꓳꓼ ꓙꓳ ꓡꓰ ꓗ ꓠꓯꓸ꓾ ꓮꓣꓖꓰꓠꓔꓲꓠꓮ ꓗꓪ ꓙꓳˍ ꓟ Alto Valle de Rio Negro ꓢ-ꓢꓶ-ꓠ ꓗꓪ 2023 ꓘꓳꓼ꓾ 5 ꓦ 1 ꓠꓬꓲ ꓕꓯ ꓔꓲꓺ ꓒ Alexis Oser ꓠꓬ ꓔꓲꓺ ꓒ ꓙꓵꓽ ꓪ ꓘꓳꓹ ꓣꓴ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

Alto Valle ꓢ-ꓢꓶ-ꓠ ꓗꓪ ꓟ ꓔꓲꓺ ꓒ ꓓꓽ Alejandro Benna ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ General Roca ꓡꓳ ꓒꓱ ꓗꓪ ꓙꓳˍ ꓟ Lady of Mount Camel ꓪꓽ ꓘꓴ ꓦꓲꓻ ꓗꓪ ꓔꓲꓺ ꓒ ꓙꓵꓽ ꓪ ꓖꓶ ꓗꓷꓳ= ꓢ-ꓢꓶ-ꓠ ꓖꓳ ꓟ ꓗꓪ ꓔꓲꓺ ꓒ ꓙꓵꓽ ꓪ ꓘꓳꓹ ꓣꓴˍ ꓟ ꓡꓳꓹ ꓬꓰˍ ꓕꓲ ꓣꓳ ꓥ ꓟ ꓔꓲꓺ ꓒ Vicente Alberto Bo ꓠꓬ 2014 ꓘꓳꓼ ꓕꓯ ꓔꓲꓺ ꓒ ꓙꓵꓽ ꓪ ꓟꓶ ꓡꓰ ꓢꓲ꓾ ꓬꓲ ꓠꓬ ꓚꓳꓦꓲꓓ-19 ꓠꓻ ꓑꓶꓸ ꓓꓴ 2021 ꓘꓳꓼ ꓕꓯ ꓫꓵꓳ꓾ ꓐꓰ ꓢꓷꓸ ꓪ ꓡꓳ=

ꓮ ꓟꓶ ꓔꓲꓺ ꓒ ꓒꓬꓱꓼ ꓡ ꓟ ꓔꓲꓺ ꓒ Alexis Oser ꓬꓲ ꓐꓹ ꓐ ꓟꓹ ꓟ ꓐꓰ ꓬꓲ ꓕꓲ ꓦꓲꓻ ꓢꓴ ꓠꓬ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓢꓲ ꓤ ꓥ ꓐꓯ ꓥˍ ꓟꓲ꓾ ꓙꓵꓻ ꓠꓲꓹ ꓠꓯꓸꓼ ꓗꓪ ꓟꓽ ꓛꓳ ꓫꓱꓽ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓗ ꓠꓯꓸ ꓬꓲ ꓠꓬ ꓪꓽ ꓘꓴ ꓦꓲ ꓗꓪ ꓔꓬ ꓢꓲ ꓔꓲꓺ ꓒ ꓐꓴ ꓡꓰ ꓙ ꓖꓴ ꓟꓳꓸ ꓖꓶˍ ꓟ ꓗꓪ ꓐꓰ ꓔꓲꓺ ꓒ ꓒꓬꓱꓼ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡ ꓗꓷ ꓟ ꓥ ꓡꓳ=

ꓮ ꓟꓶ ꓗꓪ ꓠꓬ Alto Valle de Rio Negro ꓢ-ꓢꓶ-ꓠ ꓗꓪ ꓔꓲꓺ ꓒ 25 ꓣꓳ ꓙꓳˍ ꓟ ꓥ ꓢꓲ꓾ ꓬꓲ ꓪ ꓐꓴ ꓘꓴ ꓗꓪ ꓗꓪ 17 ꓣꓳ ꓠꓬ ꓠꓱꓸ ꓐꓯꓼ ꓢ-ꓢꓶ-ꓠ ꓗꓪ ꓐꓰ ꓡ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸꓪ ꓡꓳ= 1993 ꓘꓳꓼ ꓕꓯ ꓔꓶ ꓔ ꓟ ꓢ-ꓢꓶ-ꓠꓽ ꓗꓪ 30 ꓘꓳꓼ ꓘꓴꓽ ꓗꓪ ꓔꓲꓺ ꓒ ꓙꓵꓽ ꓪ ꓖꓶ ꓑꓮꓲꓽ 8 ꓧꓪꓹ ꓡꓰꓽ ꓬꓰ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=