ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓖ‐ꓜ ꓗꓪ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓢꓰꓼ ꓟ ꓔꓯ ꓠꓽ ꓗꓷ ꓠ, ꓟ ꓓꓰꓽ ꓔ ꓟ ꓓꓳꓽ

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓖ‐ꓜ ꓗꓪ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓢꓰꓼ ꓟ ꓔꓯ ꓠꓽ ꓗꓷ ꓠ, ꓟ ꓓꓰꓽ ꓔ ꓟ ꓓꓳꓽ

12 ꓦ ꓟ 17 ꓠꓬꓲ 2023 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓖ‐ꓜ ꓗꓴꓷꓼ ꓬꓯ‐ꓢꓷ‐ꓡꓲ ꓟꓯꓼ ꓐꓴ ꓡꓰ ꓝꓴꓲ ꓟꓽ ꓙꓳ ꓟ ꓑ ꓫ ꓐꓴ ꓔꓯ ꓢꓰꓼ ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓖ‐ꓜ ꓟꓵꓽ ꓗꓪ ꓙꓳˍ ꓟ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻꓔꓯ ꓐꓬ ꓡꓰ ꓝꓲ ꓟ ꓐꓰ ꓝꓴꓲ ꓟꓽ ꓙꓳ ꓟ ꓙꓲ‐ꓢꓴ ꓢꓲꓺ ꓤ ꓠꓬꓲꓽ ꓣꓳ ꓔꓯ ꓐꓰ ꓬꓰ ꓙ  ꓢꓴ ꓜꓴꓻ ꓔꓯ ꓢꓰꓼ ꓟ ꓔꓯ ꓟꓽ ꓙꓲ ꓟ ꓟꓬꓱꓽ ꓥ ꓡꓳ ꓐꓯ ꓗꓷ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓔꓲꓺ ꓒ ꓪ ꓔꓲ ꓠꓬ ꓖ‐ꓜ ꓗꓴꓷꓼ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓢꓰꓼ ꓟ ꓚꓱ, ꓠꓬ ꓟꓲ ꓠꓯ ꓕꓯ ꓢꓲ ꓮ ꓘꓶ ꓛꓲ ꓟꓽ ꓙꓲ ꓟ ꓟꓬꓱꓽ ꓥ ꓡꓳ ꓐꓱ ꓟ ꓔꓯ ꓠꓽ ꓗꓷ ꓠ, ꓟ ꓐꓯ ꓗꓷ ꓟ ꓥ ꓡꓳ꓿ ꓖ‐ꓜ ꓟꓵꓽ ꓗꓪ ꓬꓯ‐ꓢꓷ‐ꓡꓰꓼ ꓟꓯꓼ ꓡꓰ ꓐꓬ ꓡꓰ ꓝꓲ ꓟ ꓪꓽ ꓘꓴ ꓦꓲꓻ ꓠꓬ ꓟꓽ ꓙꓲ ꓢꓴ ꓔꓬ ꓟ ꓔꓲ ꓟꓽ ꓥ ꓤ ꓠꓱ ꓤ ꓐꓰ ꓞꓲ ꓫꓳꓻ ꓡꓯꓼ ꓫꓳ ꓢꓴ ꓐꓰ ꓔꓲꓺ  ꓟ ꓐꓴ ꓔꓬ ꓟ ꓔꓲ ꓥ ꓡꓳ꓿ ꓝꓮꓲ ꓑ ꓫꓬ ꓕꓲ ꓣꓳ ꓡꓰ ꓫ. ꓕꓱ ꓔ ꓟ ꓠꓬ ꓥꓪ ꓤ   ꓠꓱ ꓠꓬ ꓬꓲꓻ ꓙꓬ ꓞꓲ ꓔ ꓟ ꓙꓵ, ꓕꓯ ꓡꓽ ꓞꓳ ꓐꓳ ꓡꓰ ꓑꓶ. ꓩꓴ ꓡ ꓟ ꓪꓴ. ꓠꓬꓲ ꓥꓪ ꓤ ꓟꓶ ꓔꓯ ꓠꓻ ꓓꓴ ꓡꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓡꓰ ꓡ ꓞꓳ ꓢꓰꓼ ꓟ ꓠꓬ ꓟꓽ ꓙꓲ ꓟ ꓟꓬꓱꓽ ꓥ ꓡꓳ ꓪꓴ‐ꓢ ꓟꓽ ꓠꓲ, ꓫꓵˍ ꓟ ꓟꓬꓱꓽ ꓥ ꓡꓳ꓿ ꓐꓳ  ꓡꓱ ꓥ ꓟ ꓪꓴ. ꓠꓬꓲ ꓡ ꓞꓳ ꓢꓰꓼ ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓢꓲ ꓡꓲ ꓟꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓐꓯ ꓔ ꓡꓳ꓿ ꓪꓴ‐ꓢꓽ ꓳ ꓢꓲ ꓡꓲ ꓡꓯꓽ ꓘꓳ ꓟ ꓔꓯ ꓠꓽ ꓗꓷ ꓝꓲ ꓢꓲ ꓡꓲ ꓟꓶ ꓠ, ꓟ ꓮ ꓘꓶ. ꓪꓽ ꓘꓴ ꓠ, ꓟ ꓐꓯ ꓔ ꓡꓳ꓿ 

ꓟꓳ ꓡꓳ ꓙꓵ, ꓕꓯ ꓥ ꓟꓲ ꓬꓯ‐ꓢꓲ‐ꓡꓲ ꓟꓯꓼ ꓒꓽ ꓐꓴ ꓠꓬ ꓪꓽ ꓘꓴ ꓦꓲꓻ ꓘꓴꓽ ꓗꓪ ꓟꓯꓼ ꓘꓶꓽ ꓟꓯ ꓑꓬ ꓔꓬ ꓢꓴ ꓤ ꓠꓱ ꓤ ꓠꓬꓲꓽ ꓣꓳ ꓔꓯ ꓑꓶ ꓢꓰꓼ ꓗꓷꓳ ꓖꓳ ꓟ ꓡꓰ ꓟꓽ ꓞꓲ ꓡ ꓑꓬ 7 ꓣꓳ ꓔꓯ ꓥ ꓟꓲ ꓡ ꓚꓴ. ꓑꓶ ꓗꓷ ꓢꓲ ꓠꓬꓲ ꓠꓻ ꓓꓴ ꓡꓰ ꓟ ꓥ ꓡꓳ꓿ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓪꓽ ꓘꓴ ꓦꓲꓻ ꓘꓴꓽ ꓗꓪ ꓢꓰꓼ ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓟꓽ ꓙꓲ ꓟ ꓟꓬꓱꓽ ꓔꓯ ꓕꓽ ꓬꓰ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿

ꓖꓳ ꓡꓱ ꓟ ꓞꓲ ꓮ ꓟꓶ ꓕꓱ ꓕꓲ ꓙꓵ, ꓗꓪ ꓟꓵ ꓗꓳ ꓓꓵ ꓓꓵ ꓗꓪ ꓢꓰꓼ ꓡꓯꓼ ꓘꓳ, ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓬꓰ ꓙ ꓠ, ꓟ ꓐꓯ ꓔ ꓡꓳ꓿ ꓟꓬ‐ꓟ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓥ ꓟ ꓬꓰ ꓙ ꓔꓳ, ꓟ ꓐꓯ ꓔ ꓡꓳ꓿ ꓝꓮꓲ ꓢꓲ ꓡꓲ ꓟꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓐꓯ ꓔ ꓡꓳ ꓐꓰ (Catholic News Agency) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿