ꓔꓲꓺ ꓒ ꓪ ꓔꓲ Francis ꓠꓬ ꓡ ꓠꓹ ꓟ ꓡꓲꓸ ꓦ ꓕꓯ Hungary ꓗꓴꓷꓼ ꓗꓪ ꓙꓰ ꓠꓹ ꓟ ꓐꓱ ꓶ ꓙꓽ ꓖꓶ ꓔ ꓟ ꓓꓳꓽ

ꓔꓲꓺ ꓒ ꓪ ꓔꓲ Francis ꓠꓬ ꓧꓴꓠꓖꓮꓣꓬ ꓗꓴꓷꓼ ꓗꓪ ꓡ ꓠꓹ ꓟ ꓡꓲꓸ ꓦ 28 ꓠꓬꓲ ꓗꓪ ꓐꓰ 30 ꓠꓬꓲ ꓗꓪ ꓛꓲꓺ ꓟꓵꓽ ꓚꓳꓻ ꓙꓰ ꓠꓹ ꓟ ꓙꓽ ꓖꓶ ꓗꓷ ꓟ ꓔꓯ Vatican ꓓꓳꓽ ꓐꓯ ꓑꓶ ꓔꓶꓸ ꓗꓪ ꓟ Director Matteo Bruni ꓡꓰ ꓠꓽ ꓕꓲꓽ ꓠꓬꓲ ꓕꓯ ꓐꓯ ꓑꓶ ꓗꓷꓳ=

“ꓗꓴꓷꓼ ꓑ ꓫꓬ ꓐꓴ ꓐꓰ ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓘꓴꓻ ꓔ ꓟ ꓑꓶꓸ ꓓꓴ꓾ ꓔꓲꓺ ꓒ ꓪ ꓔꓲ Francis ꓠꓬ Hungary ꓗꓴꓷꓼ ꓗꓪ ꓶꓼ ꓓꓳꓽ ꓫꓱꓹ ꓓꓳꓽ ꓚꓳꓻ ꓙꓰ ꓓꓴ ꓐꓱ ꓶ 4 ꓦ 28 ꓠꓬꓲ ꓗꓪ ꓐꓰ 30 ꓠꓬꓲ ꓗꓪ ꓛꓲꓺ Budapest ꓡꓳ ꓒꓱ ꓗꓪ ꓚꓳꓻ ꓙꓰ ꓓꓴ ꓥꓳ꓾” ꓐꓰ ꓓꓳꓽ ꓐꓯ ꓑꓶ ꓔ ꓟ ꓗꓪ ꓐꓳ ꓔ ꓡꓳ=

Hungary ꓗꓴꓷꓼ ꓗꓪ ꓔꓲꓺ ꓒ ꓪ ꓔꓲꓸ ꓚꓳꓻ ꓙꓰˍ ꓟ ꓠꓬ ꓔꓲꓺ ꓒ ꓪ ꓔꓲ Francis ꓬꓲꓸ ꓶꓼ ꓓꓳꓽ ꓫꓱꓹ ꓓꓳꓽ ꓚꓳꓻ ꓙꓰˍ ꓟ 41 ꓧꓪꓹ ꓐꓲˍ ꓟ ꓚꓲꓸ ꓟꓶ ꓓꓴ ꓥ ꓡꓳ=

Budapest ꓡꓳ ꓒꓱ ꓗꓪ ꓢꓽ ꓠꓬꓲ ꓚꓳꓻ ꓙꓰˍ ꓟ ꓘꓴꓽ ꓗꓪ ꓔꓲꓺ ꓒ ꓪ ꓔꓲ Francis ꓠꓬ Blessed Laszlo Batthyany-Strattmann Institute ꓗꓪ ꓟ ꓫꓸ ꓙꓵ ꓔꓬꓹ ꓢꓴ ꓐꓴ꓾ ꓫꓸ ꓢꓴ ꓟꓷꓼ ꓢꓴ ꓐꓴ ꓐꓰ ꓤ ꓠꓱ ꓤ ꓐꓴ ꓔꓬ ꓗꓪ ꓚꓳꓻ ꓙꓰ ꓠꓹ ꓟ ꓙꓽ ꓖꓶ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓶꓼ ꓙꓳ ꓫꓱꓹ ꓙꓳˍ ꓟ Hungary ꓠꓯꓻ ꓞꓲꓼ ꓟꓸ ꓒ ꓓꓽ ꓟ Laszlo Batthyany-Strattmann ꓠꓬ ꓘꓶꓽ ꓢꓲ ꓠꓻ ꓫꓬꓹ ꓖꓶˍ ꓟ ꓐꓰ ꓟꓬꓻ ꓢꓶꓽ ꓔꓯ ꓟꓳꓸ ꓟꓬꓽ ꓠꓬꓲ ꓠꓯꓻ ꓞꓲꓼ ꓫꓬꓹ ꓖꓶˍ ꓟ ꓠꓯꓻ ꓞꓲꓼ ꓦꓲꓻ ꓬꓲ ꓢꓲꓺ ꓒ ꓥ ꓡꓳ= ꓬꓲ ꓠꓬ ꓟꓽ ꓙꓳ ꓢꓴ ꓐꓴ ꓔꓯ ꓒꓴꓻ꓾ ꓖꓪꓽ ꓓꓴ꓾ ꓠꓯꓻ ꓞꓲꓼ ꓖꓶ ꓢꓴ ꓥ ꓡꓳ= ꓬꓲꓸ ꓠꓬ ꓞꓳꓻ ꓠꓻ ꓐꓴ ꓠꓲꓹ ꓟ ꓐꓰ ꓖꓳ ꓓꓱꓽ ꓔꓬꓹ ꓢ ꓠꓹ ꓟ ꓡꓳꓸ ꓙ ꓖꓶ ꓗꓷꓳ= ꓠꓻ ꓟꓽ ꓫꓬꓹ ꓧꓶꓸ ꓕꓯ ꓬꓲ ꓠꓬ ꓪꓽ ꓘꓴ ꓗꓷꓳ= ꓬꓲ ꓠꓬ ꓞꓳꓻ ꓠꓻ ꓐꓴ ꓔꓯ ꓠꓻ ꓘꓶꓽ ꓖꓶ ꓗꓷ ꓢꓲ꓾ ꓠꓻ ꓔꓯ ꓓꓻ ꓡꓰ ꓝꓲ ꓢꓴ ꓠꓬ ꓪꓴ-ꓢ ꓥ ꓡꓳ= ꓬꓲ ꓠꓬ ꓪꓴ-ꓢ ꓬꓲ ꓟꓶ ꓓꓴ ꓕꓲ ꓟˍ ꓡꓰꓽ ꓥ ꓡꓳ꓾ ꓐꓰ ꓐꓯˍ ꓡꓳ= 2003 ꓘꓳꓼ 3 ꓦ 23 ꓠꓬꓲ ꓕꓯ ꓔꓲꓺ ꓒ ꓪ ꓔꓲꓸ John Paul 2 ꓡꓰ ꓬꓲ ꓔꓯ ꓶꓼ ꓙꓳ ꓫꓱꓹ ꓙꓳꓹ ꓢꓴ ꓥ ꓡꓳ ꓐꓰ꓾ ꓢꓷꓸ ꓙ ꓟꓳ ꓙ ꓗꓷꓳ=

ꓧꓶꓸ ꓕꓯ ꓟˍ ꓡꓰ ꓐꓰ ꓔꓲꓺ ꓒ ꓪ ꓔꓲꓸ Francis ꓠꓬ ꓙꓵꓽ ꓪ ꓙꓳ ꓢꓴ ꓐꓴ꓾ ꓑ ꓫꓬꓼ ꓐꓴ꓾ ꓐꓶꓽ ꓗꓴꓷꓼ ꓝꓲ ꓓꓴ ꓐꓴ꓾ ꓞꓳ ꓡꓱ ꓐꓴ꓾ ꓔꓲꓺ ꓒ ꓓꓽ ꓐꓴ꓾ ꓔꓲꓺ ꓒ ꓐꓴ꓾ ꓓꓰꓮꓚꓳꓠ ꓐꓴ꓾ ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓾ ꓔꓲꓺ ꓒ ꓒꓬꓱꓼ ꓠꓹ ꓟ ꓬꓲ ꓪꓴꓸ ꓢꓳꓻ ꓔꓬ ꓢꓴ ꓐꓴ꓾ ꓪꓴ-ꓢ ꓟꓬꓱꓽ ꓟꓯꓻ ꓔꓬ ꓟ ꓟꓸ ꓒ ꓟꓸ ꓟ ꓐꓴ꓾ ꓢꓷꓸ ꓠꓲꓹ ꓐꓰ ꓐꓲꓻ ꓜꓳꓽ ꓠꓴꓽ ꓚꓱꓹ ꓔꓯ ꓟꓳꓸ ꓑ ꓫꓬ ꓐꓴ ꓔꓯ ꓫꓸ ꓕꓱ ꓓꓴ ꓥ ꓡꓳ=

2021 ꓘꓳꓼ 9 ꓦ 12 ꓠꓬꓲ ꓕꓯ Slovakia ꓗꓴꓷꓼ ꓗꓪ ꓙꓰˍ ꓟ ꓚꓱꓹ ꓗꓪ ꓔꓲꓺ ꓒ ꓪ ꓔꓲ ꓠꓬ 52 ꓧꓪꓹ ꓟ ꓟꓵꓽ ꓗꓳꓹ ꓓꓵ ꓓꓵ ꓟꓲ-ꓢ ꓬꓰˍ ꓟ ꓗꓴ-ꓖ-ꓣꓯꓸꓼ-ꓢꓶꓽ (International Eucharistic Congress) ꓬꓲ ꓟꓶꓽ ꓢꓰꓼ ꓑꓮꓲꓽ ꓬꓰ ꓠꓹ ꓟ ꓐꓱ ꓶ ꓬꓲ ꓠꓬ Budapest ꓡꓳ ꓒꓱ ꓗꓪ ꓠꓽ ꓗꓷꓳ=

Worldometers.info ꓗꓪ ꓐꓳ ꓔ ꓟ ꓠꓬ Hungary ꓗꓴꓷꓼ ꓞꓳ ꓵꓻ ꓣꓳ ꓠꓬ 2023 ꓘꓳꓼ ꓗꓪ ꓛꓲ꓾ 95 ꓫꓬꓹ ꓛꓲꓺ ꓙꓳˍ ꓟ ꓥ ꓢꓲ꓾ ꓗꓴꓷꓼ ꓑ ꓫꓬ ꓐꓴ ꓗꓪ ꓟ 37% ꓠꓬ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓰꓼ ꓡꓯ ꓘꓳˍ ꓟ ꓪꓴꓸ ꓔꓴˍ ꓕꓯ ꓡꓰ Ukraine ꓗꓪ ꓐꓰ ꓚꓵꓸ ꓡ ꓢꓴ 10 ꓫꓬꓹ ꓣꓳ ꓛꓲꓺ Hungary ꓗꓴꓷꓼ ꓗꓪ ꓓꓵꓽ ꓡ ꓗꓷꓳ ꓐꓰ ꓗꓴꓷꓼ ꓘꓴꓽ ꓗꓪ ꓟ ꓓꓳꓽ ꓐꓴ ꓗꓪ ꓐꓯ ꓔ ꓡꓳ꓾ ꓐꓰ ꓣꓦꓮ ꓓꓳꓽ ꓗꓪ ꓐꓰ ꓢꓷꓸ ꓪ ꓡꓳ=