ꓔꓲꓺ ꓒ ꓪ ꓔꓲ Francis ꓠꓬ ꓢꓲꓽ ꓫꓬꓹ ꓟ ꓟꓵꓽ (ꓬꓲ-ꓢꓷ-ꓡꓰ ꓟꓵꓽ) ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓕꓲ ꓣꓳ ꓢꓲꓺ ꓗꓷꓳ

ꓔꓲꓺ ꓒ ꓪ ꓔꓲ Francis ꓠꓬ ꓢꓲꓽ ꓫꓬꓹ ꓟ ꓟꓵꓽ (ꓬꓲ-ꓢꓷ-ꓡꓰ ꓟꓵꓽ) ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓕꓲ ꓣꓳ ꓢꓲꓺ ꓗꓷꓳ

Vatican ꓗꓪ ꓢꓲꓽ ꓫꓬ ꓖꓳ ꓓꓱꓽ ꓑꓮꓲꓽ ꓓꓽ ꓟ ꓔꓯ ꓬꓰˍ ꓟ ꓠꓬꓲ ꓗꓪ ꓔꓲꓺ ꓒ ꓪ ꓔꓲ ꓡꓰ ꓒꓲ-ꓡꓲ-ꓒꓲ ꓔꓲꓺ ꓒ ꓓ Adolfo Tito Yllana ꓔꓯ ꓬꓲ-ꓢꓷ-ꓡꓰ ꓐꓰ ꓚꓲ-ꓑꓲ-ꓡꓴ ꓟꓵꓽ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓕꓲ ꓣꓳ ꓐꓯ ꓢꓲ ꓢꓲꓺ ꓗꓷ ꓟ ꓡꓰꓽ ꓟ ꓛꓲ꓾ ꓙꓱ-ꓣꓴ-ꓢ-ꓡꓱ ꓐꓰ ꓩꓴ-ꓡꓲ-ꓫꓵ ꓐꓱ ꓶ ꓔꓲꓺ ꓒ ꓪ ꓔꓲ ꓬꓲ ꓞꓲ ꓟꓬꓱꓽ ꓖꓶꓽ ꓗꓷ ꓟ ꓔꓯ ꓐꓯ ꓑꓶ ꓗꓷꓳ=

ꓖꓳ ꓟ ꓪꓴꓸ ꓠꓬꓲ ꓔꓲꓺ ꓒ ꓓꓽ ꓠꓬ ꓮ ꓟꓶ ꓟꓬꓱꓽ ꓟꓽ ꓬꓰ ꓧꓶꓸ ꓕꓯ ꓕꓯ Africa꓾ Asia꓾ Europe ꓐꓰ ꓬꓲꓻ ꓡꓴꓽ ꓐꓱ ꓘꓶꓽ ꓗꓴꓷꓼ ꓐꓴ ꓗꓪ Vatican ꓗꓴꓷꓼ ꓬꓲ ꓞꓲꓺ ꓕꓲ ꓣꓳ ꓬꓰ ꓗꓷꓳ= ꓟꓬꓱꓽ ꓖꓳ ꓟ ꓬꓰ ꓗꓷ ꓟ ꓪꓴꓸ ꓠꓬꓲ ꓮ ꓟꓶ ꓔꓲꓺ ꓒ ꓪ ꓔꓲ Francis ꓡꓰ ꓬꓲ ꓔꓯ ꓮꓽ ꓢꓳ ꓕꓯ ꓐꓯ ꓗꓷ ꓟ ꓟꓬꓱꓽ ꓔꓯ ꓬꓰ ꓠꓹ ꓟ ꓟꓬꓱꓽ ꓖꓶ ꓗꓷ ꓟ ꓥ ꓡꓳ= ꓔꓲꓺ ꓒ ꓓꓽ ꓠꓬ ꓬꓲ ꓞꓲꓼ (73) ꓘꓳꓼ ꓙꓳ ꓡꓰ ꓟ ꓥꓳ= ꓬꓲ ꓠꓬ Australia ꓗꓴꓷꓼ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓟꓬꓱꓽ ꓬꓰ ꓗꓷꓳ=

ꓔꓲꓺ ꓒ ꓓꓽ ꓔꓯ 1948 ꓘꓳꓼ꓾ 2 ꓦ 6 ꓠꓬꓲ ꓕꓯ ꓦꓵꓻ ꓗꓷ ꓢꓲ꓾ 1972 ꓘꓳꓼ 3 ꓦ (19) ꓠꓬꓲ ꓕꓯ ꓔꓲꓺ ꓒ ꓙꓵꓽ ꓪ ꓘꓳꓹ ꓣꓴ ꓗꓷꓳ= ꓬꓲ ꓠꓬ ꓘꓴ-ꓜꓲ-ꓞꓳ ꓙꓵꓽ ꓗ ꓢꓷꓸ ꓠꓲꓹ ꓔꓯ ꓣꓳ-ꓟ ꓡꓳ ꓒꓱ ꓗꓪ ꓟ ꓔꓲꓺ ꓒ ꓪ ꓔꓲ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓟꓴꓺ ꓕꓲꓸ ꓢꓳ ꓦꓲꓻ ꓘꓴꓽ ꓗꓪ ꓕꓲ ꓟ ꓥ ꓟꓲ ꓡꓰ-ꓔꓯ-ꓣꓲ ꓟꓴꓺ ꓕꓲꓸ ꓢꓳ ꓦꓲꓻ ꓗꓪ ꓐꓰ ꓙꓵꓽ ꓗ ꓢꓷꓸ ꓠꓲꓹ ꓙꓵꓽ ꓪꓴꓸ ꓛꓴꓽ ꓟꓶ ꓗꓷꓳ= ꓢꓷꓸ ꓠꓲꓹ ꓕꓱ ꓟ ꓔꓯ ꓢꓳ ꓡꓳꓹ ꓬꓰ ꓗꓸ ꓠꓯꓸ ꓕꓯ ꓡꓰꓽ ꓘꓴ-ꓜꓲ-ꓞꓳ ꓗꓴꓷꓼ ꓬꓲ ꓞꓲꓺ ꓟꓬꓱꓽ ꓘꓴꓽ ꓗꓪ (1984) ꓘꓳꓼ ꓕꓯ ꓓꓵꓽ ꓡꓰ ꓗꓷꓳ= ꓬꓲ ꓟꓬꓱꓽ ꓬꓰ ꓟ ꓗꓴꓷꓼ ꓐꓴ ꓠꓬ ꓖꓯ-ꓓ꓾ ꓔꓲ-ꓣꓲ-ꓡꓲ-ꓗ꓾ ꓔꓴ-ꓣ-ꓗꓲ꓾ ꓡꓰ-ꓐꓯ-ꓠꓷ꓾ ꓦꓯ-ꓖꓰ-ꓣꓲ꓾ ꓕꓮꓲ꓾ꓪꓮ ꓗꓴꓷꓼ ꓐꓴ ꓥ ꓡꓳ=

2001 ꓘꓳꓼ 12 ꓦ ꓗꓪ ꓐꓰ ꓪꓴꓸ ꓔꓴ ꓢꓲ ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ 2 ꓡꓰ ꓬꓲ ꓔꓯ ꓑ-ꓑꓴ-ꓮ-ꓠꓴ-ꓖꓰ-ꓠꓲ ꓗꓴꓷꓼ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓢꓲꓺ ꓗꓷ ꓟ ꓔꓯ ꓐꓯ ꓑꓶ ꓗꓷ ꓢꓲ꓾ 2002 ꓘꓳꓼ 1 ꓦ꓾ 6 ꓠꓬꓲ ꓕꓯ ꓔꓲꓺ ꓒ ꓓꓽ ꓙꓵꓽ ꓪ ꓔꓯ ꓙꓲꓻ ꓫꓬ ꓢꓴ ꓒꓲ-ꓕꓱ ꓑꓹ ꓗꓪ ꓖꓶꓽ ꓗꓷꓳ= ꓔꓲꓺ ꓒ ꓪ ꓔꓲ ꓐꓰ-ꓠ-ꓓꓲ (16) ꓔꓲꓺ ꓒ ꓪ ꓔꓲ ꓣꓱꓽˍ ꓟ ꓦꓬꓼ ꓠꓬꓲ ꓗꓪ ꓬꓲ ꓔꓯ ꓑ-ꓗꓲ-ꓢ-ꓔꓯ ꓗꓴꓷꓼ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓟꓬꓱꓽ ꓔꓯ 2006 ꓘꓳꓼ ꓕꓯ ꓖꓶꓽ ꓗꓷꓳ= 2010 ꓘꓳꓼ ꓕꓯ ꓗꓴ-ꓖꓳ ꓟꓵꓽ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓐꓰ꓾ (2015) ꓘꓳꓼ 2 ꓦ ꓕꓯ ꓔꓲꓺ ꓒ ꓪ ꓔꓲ Francis ꓡꓰ ꓬꓲ ꓔꓯ  Australi ꓗꓴꓷꓼ ꓐꓱ ꓶ Vatican ꓗꓴꓷꓼ ꓬꓲ ꓞꓲꓺ ꓟꓬꓱꓽ ꓖꓶ ꓗꓷ ꓢꓲ ꓟꓬꓱꓽ ꓖꓳ ꓟ ꓔꓯ ꓬꓰ ꓗꓷꓳ=

(Apostolic Nuncia =Vatican ꓗꓴꓷꓼ ꓬꓲ ꓞꓲꓺ꓾ Apostolic Delegate ꓔꓲꓺ ꓒ ꓮ ꓔꓲ ꓬꓲꓸ ꓞꓲꓺ ꓒꓬꓱꓼ ꓡ ꓗꓷ ꓠꓬ ꓦ ꓡꓱ ꓚꓱꓹ ꓙꓵꓻ ꓠꓲꓹ ꓚꓱꓹ ꓐꓱ ꓶˍ ꓡꓰꓽ ꓟꓽ ꓞꓲꓺ꓾ ꓚꓲꓸ ꓛꓬ ꓛꓲꓺ ꓬꓰ ꓟ ꓗꓴꓷꓼ ꓗꓪ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓬꓰˍ ꓟ ꓑꓮꓲꓽ ꓖꓪ ꓙꓱ ꓜꓲꓼ ꓓꓴ ꓗꓪ Vatican ꓗꓴꓷꓼ ꓬꓲ ꓞꓲꓺ ꓓꓯ ꓪˍ ꓡꓳ= ꓔꓲꓺ ꓒ ꓪ ꓔꓲ ꓬꓲ ꓞꓲꓺ ꓠꓽ ꓙꓵꓻ ꓠꓲꓹ ꓚꓱꓹ ꓐꓱ ꓶˍ ꓡꓰꓽ ꓥ ꓡꓳ=)

https://bit.ly/3uYpWib