ꓔꓴ-ꓣ-ꓗꓲ ꓗꓪ ꓟꓵꓽ ꓓꓵˍ ꓟ(ꓟꓵꓽ ꓙꓴꓽ ꓚꓵꓹˍ ꓟ) ꓪꓴꓸ ꓠꓬꓲ ꓔꓴ-ꓣ-ꓗꓲ ꓐꓰ ꓢꓲ-ꓡꓲ-ꓬ ꓗꓪ ꓡ ꓞꓳ 2700 ꓣꓳ ꓟꓽ ꓞꓲꓺ ꓫꓵꓳ

Tuesday, February 07, 2023

2023 ꓘꓳꓼ 2 ꓦ 6 ꓠꓬꓲ꓾ ꓮ ꓟꓰ ꓠꓯꓼ ꓙꓵꓹ ꓕꓯ ꓔꓴ-ꓣ-ꓗꓲ ꓗꓴꓷꓼ ꓗꓪ ꓣꓲ-ꓔ ꓢꓚꓮꓡꓰ 7ꓸ8 ꓢꓯꓼ ꓙꓳˍ ꓟ ꓟꓵꓽ ꓓꓵˍ ꓟ ꓐꓰ ꓟꓳꓼ ꓡꓳ ꓙꓵꓹ ꓗꓪ 7ꓸ5 ꓣꓲ-ꓔ ꓢꓚꓮꓡꓰ ꓐꓰ ꓬꓲ ꓖ ꓠꓬꓲꓽ ꓖ ꓗꓪ ꓟꓵꓽ ꓙꓵꓽ ꓚꓵꓹ ꓗꓷ꓾ ꓟꓵꓽ ꓓꓵ ꓗꓷ ꓟ ꓑꓶꓸ ꓓꓴ ꓮ ꓟꓶ ꓗꓪ ꓛꓲ ꓡ ꓞꓳ 2700 ꓣꓳ ꓟꓽ ꓞꓲ ꓫꓵꓻ ꓗꓷꓳ ꓐꓰ ꓢꓷꓸ ꓪ ꓡꓳ=

ꓔꓴ-ꓣ-ꓗꓲ ꓗꓴꓷꓼ ꓗꓪ ꓫꓵꓻ ꓢꓴ 1762 ꓣꓳ ꓗꓪ ꓛꓲ ꓙꓳ ꓗꓷ ꓢꓲ꓾ ꓢꓲ-ꓡꓲ-ꓬ ꓗꓪ ꓠꓬ 1000 ꓣꓳ ꓟꓽ ꓞꓲꓺ ꓫꓵꓻ ꓗꓷ ꓟ ꓥ ꓡꓳ=

ꓬꓲ ꓪꓴꓸ ꓕꓲ ꓧꓪꓹ ꓟꓵꓽ ꓓꓵˍ ꓟ ꓠꓬ ꓡ ꓞꓳ 1500 ꓣꓳ ꓟꓽ ꓞꓲꓺ ꓫꓵꓻ ꓗꓷ ꓟ ꓥ ꓢꓲ ꓠꓬꓲ꓾ ꓡ ꓞꓳ 9700 ꓣꓳ ꓟꓽ ꓞꓲꓺ ꓠꓻ ꓓꓴ ꓓꓴ ꓡꓰ ꓟ ꓥ ꓡꓳ꓾ ꓐꓰ ꓔꓴ-ꓣ-ꓗꓲ ꓗꓴꓷꓼ ꓢꓲꓽ ꓒ ꓠꓬꓲꓽ ꓣꓳ ꓕꓲ ꓣꓳ ꓡꓰ ꓐꓯ ꓡꓳ=

ꓬꓲ ꓓꓽ ꓟ ꓟꓵꓽ ꓙꓴꓽ ꓚꓵꓹ ꓟ꓾ ꓟꓵꓽ ꓓꓵˍ ꓟ ꓠꓬꓲꓽ ꓧꓪꓹ ꓗꓷ ꓡꓰ ꓗ ꓠꓯꓸ ꓬꓲ ꓢꓯꓸ ꓮ ꓘꓶꓸ ꓟꓽ ꓪ ꓠꓬꓲ ꓟ ꓟꓵꓽ ꓙꓴꓽ ꓥˍ ꓟꓲ ꓝꓸ ꓢꓲ ꓮ ꓟꓬꓹ ꓧꓪꓹ ꓚꓵꓹ ꓗꓷ ꓟ ꓥ ꓡꓳ=

ꓚꓬꓴꓸ ꓙ ꓢꓴ꓾ ꓬꓰ ꓙ ꓢꓴ ꓜꓴꓻ ꓐꓴ ꓠꓬ ꓐꓬ ꓡꓰ ꓟ ꓠꓯꓸ ꓘꓪ ꓗꓪ ꓑꓲꓸ ꓓꓹ ꓓꓴ ꓐꓴ ꓔꓯ ꓧꓪ ꓢꓲ ꓚꓬꓴꓸ ꓙ ꓬꓰ ꓙ ꓔꓬ ꓟ ꓥ ꓢꓲ ꓠꓬꓲ꓾ ꓠꓬꓲꓽ ꓗꓴꓷꓼ ꓡꓱꓸꓼ ꓗꓪ ꓦꓲꓻ ꓬꓲ ꓦꓬꓻ ꓟꓽ ꓞꓲꓺ ꓐꓱꓽ ꓡꓰ ꓐꓬ ꓗꓷ ꓟ ꓥ ꓡꓳ=

ꓔꓴ-ꓣ-ꓗꓲ ꓢꓲ-ꓡꓲ-ꓬ ꓡꓰꓽ ꓟꓽ ꓞꓲꓺ ꓡꓰ-ꓐꓯ-ꓠꓷ꓾ ꓢꓮꓲ-ꓑ-ꓣꓯꓸ-ꓢꓶ ꓐꓰ ꓬꓲ-ꓢꓷ-ꓡꓰ ꓗꓴꓷꓼ ꓐꓴ ꓗꓪ ꓐꓰˍ ꓟꓲ ꓟꓵꓽ ꓙꓴꓽ ꓚꓵꓹ ꓟꓵꓽ ꓓꓵˍ ꓟ ꓔꓯ ꓡ ꓞꓳ ꓬꓲ ꓞꓲꓺ ꓫꓬꓹ ꓟꓽ ꓞꓲꓺ ꓚꓬꓹ ꓪ ꓡꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓔꓴ-ꓣ-ꓗꓲ ꓠꓬ ꓗꓴꓷꓼ ꓗꓪ ꓬꓳꓸ ꓚꓵˍ ꓟ ꓔꓯ ꓐꓯ ꓑꓶ ꓗꓷ ꓢꓲ ꓬꓲ ꓪ ꓔꓯ ꓬꓰ ꓙ ꓖꓶ ꓠꓹ ꓟ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓐꓴ ꓔꓯ ꓓꓰꓽ ꓔ ꓡꓳ=

ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓗꓴꓷꓼ ꓙꓵꓽ ꓢꓴ ꓐꓴˍ ꓟꓲ ꓬꓰ ꓙ ꓔꓳꓹ ꓙ ꓖꓶꓽ ꓠꓹ ꓟ ꓐꓯ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=