ꓕꓮꓲꓸ ꓗꓴꓷꓼ ꓗꓪ ꓟ ꓗ-ꓕꓳ-ꓡꓲꓗ ꓘꓴ-ꓜꓲ-ꓞꓳ ꓡꓰ ꓠꓻ ꓫꓵꓽ (COVID -19) ꓞꓳ ꓠꓻ ꓔꓯ ꓬꓰ ꓙˍ ꓟ

ꓕꓮꓲꓸ ꓗꓴꓷꓼ ꓗꓪ ꓟ ꓗ-ꓕꓳ-ꓡꓲꓗ ꓘꓴ-ꓜꓲ-ꓞꓳ ꓡꓰ ꓠꓻ ꓫꓵꓽ (COVID -19) ꓞꓳ ꓠꓻ ꓔꓯ ꓬꓰ ꓙˍ ꓟ

ꓕꓮꓲꓸ ꓕꓲ ꓗꓴꓷꓼ ꓡꓱꓸꓼ ꓗꓪ ꓟ ꓗ-ꓕꓳ-ꓡꓲꓗ ꓘꓴ-ꓜꓲ-ꓞꓳ ꓐꓴ ꓐꓰ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓙꓳˍ ꓟ ꓟꓳ-ꓓꓳ ꓐꓴ ꓔꓯ ꓠꓻ ꓫꓵꓽ (COVID -19) ꓞꓳ ꓠꓻ ꓐꓴ ꓔꓯ ꓧꓳꓽ ꓔꓯꓹ ꓙꓰ ꓖꓶˍ ꓟ ꓗꓪ ꓣꓱꓽ ꓢꓲ꓾ ꓘꓴ ꓜꓲꓼ ꓞꓳ ꓦꓲ ꓐꓴ ꓔꓯ ꓠꓬ ꓠꓻ ꓫꓬꓹ ꓖꓴ ꓬꓰ ꓗꓷ ꓢꓲ ꓠꓬꓲ꓾ ꓕꓲ ꓑꓹ ꓤ ꓠꓯ ꓞꓲꓼ ꓫꓬꓹ ꓖꓴ ꓐꓱ ꓶ ꓣꓱꓽ ꓔꓬ ꓡꓳ= ꓐꓮꓠꓖꓗꓳꓗ ꓘꓴ-ꓜꓲ-ꓞꓳ ꓗꓪ ꓐꓰ ꓮ ꓟꓶ ꓕꓱ ꓕꓲ ꓦ 6 ꓠꓬꓲ ꓕꓯ ꓞꓳ ꓠꓻ ꓜꓳꓽ-ꓟ (630) ꓟ ꓗꓶ ꓓꓲˍ ꓟ ꓦꓲꓻ ꓕꓲ ꓟ ꓔꓯ ꓠꓻ ꓫꓵꓽ (COVID -19) ꓠꓻ ꓙꓳˍ ꓡꓳ ꓐꓰ ꓔꓬ ꓪ ꓢꓴ ꓐꓴ ꓐE ꓶ ꓣꓱꓽ ꓓꓴ ꓬꓰ ꓗꓷꓳ= “ꓞꓳ ꓤ ꓐꓴ ꓪ ꓙꓲ ꓫ ꓙꓵꓻ ꓡꓹ ꓕꓯ꓾ ꓠꓵꓻ ꓠꓲꓹ ꓾ ꓫꓱꓸ ꓤ ꓠꓲꓹ ꓐꓰ ꓠꓬꓲ ꓙˍ ꓟ ꓪ ꓙꓲ ꓣꓱꓽ ꓞꓹ ꓡꓳ꓾” ꓐꓰ ꓐꓮꓠꓖꓗꓳꓗ ꓗꓪ ꓟ ꓔꓲꓺ ꓒ ꓓꓽ Cardinal Kriengsak Kovithavanich ꓡꓰ ꓗ-ꓕꓳ-ꓡꓲꓗ ꓓꓳꓽ ꓦ ꓖꓴ ꓕꓲ ꓟ ꓥ ꓟ LiCAS ꓗꓪ ꓐꓯ ꓔ ꓡꓳ=

ꓘꓴ ꓜꓲ ꓞꓳ ꓦꓲ ꓔꓯ ꓠꓻ ꓫꓬꓹ ꓖꓴ ꓐꓱ ꓶ ꓣꓱꓽ ꓠꓹ ꓟ ꓖꓶˍ ꓕꓯ ꓔꓲꓺ ꓒ ꓓꓽ ꓡꓰ “ꓠꓻ ꓕꓱ ꓟ ꓠꓬ ꓣꓳ ꓮ ꓙꓵꓽ ꓐꓱ ꓶ ꓠꓻ ꓓꓱꓽ ꓣꓴ ꓔꓯꓹ ꓖꓶ ꓡˍ ꓡꓳ= ꓟꓬꓽ ꓠꓬꓲ ꓠꓬ ꓞꓳ ꓫ ꓐꓴ꓾ ꓟꓬꓱꓽ ꓗꓪ ꓒꓴ ꓮ ꓟꓬꓹ ꓟꓽ ꓓꓵꓽ ꓢꓴ꓾ ꓟꓬꓱꓽ ꓟꓽ ꓙꓳ ꓢꓴ ꓐꓴ꓾ ꓥꓳ ꓡꓳꓸ ꓓꓴ ꓟꓽ ꓙꓳ ꓢꓴ ꓐꓴ ꓐꓱ ꓶ ꓪ ꓙꓲ ꓫꓸ ꓓꓴ ꓓꓳ ꓡˍ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓞꓳ ꓤ ꓐꓴ ꓔꓯ ꓠꓲꓹ ꓠꓵˍ ꓡꓳ= ꓬꓲ ꓝꓲ ꓓꓴ ꓐꓴ ꓥ ꓟ ꓣꓳ ꓐꓴ ꓔꓯˍ ꓟꓲ ꓫ ꓓꓴ ꓕꓱ ꓟ ꓔꓳꓹ ꓜꓳꓽ ꓔꓬ ꓢꓴ ꓐꓴ ꓔꓯ ꓠꓵꓻ ꓠꓲꓹ ꓖꓶ ꓠꓹ ꓟ ꓠꓲꓹ ꓡꓶꓽ ꓙꓳˍ ꓥꓳ꓾ ꓐꓰ ꓥꓪ ꓙꓵˍ ꓡꓳ= (COVID -19) ꓠꓻ ꓫꓵꓽ ꓓꓳ ꓡ ꓗꓷ ꓟ ꓘꓴꓽ ꓗꓪ ꓕꓮꓲꓸ ꓗꓴꓷꓼ ꓗꓪ ꓟ ꓗ-ꓕꓳ-ꓡꓲꓗ ꓘꓴ-ꓜꓲ-ꓞꓳ ꓗꓪ ꓐꓰ ꓪꓽ ꓘꓴ ꓦꓲ ꓐꓴ ꓐꓰ ꓠꓱꓸ ꓐꓯꓼ ꓦꓲ ꓐꓴ ꓔꓯ ꓠꓻ ꓐꓶ ꓓꓲ ꓡꓳꓸ ꓠꓬꓲ ꓖꓴ꓾ ꓠꓻ ꓗꓽ ꓕꓸ ꓓꓴ ꓠꓯꓻ ꓞꓲꓼ ꓗꓸ ꓖꓴ ꓐꓯ ꓢꓲ ꓣꓱꓽ ꓔꓬ ꓝꓲ ꓗꓷ ꓟ ꓥꓳ=

ꓐꓮꓠꓖꓗꓳꓗ ꓡꓳ ꓒꓱ ꓓꓽ ꓟ ꓗꓪ ꓢꓲꓽ-ꓫꓬ-ꓟ-ꓚꓬꓴꓸ-ꓙ-ꓢꓴ-ꓐꓴ ꓜꓴꓻ (Most Holy Redeemer (or) Redem ptorists) ꓐꓴ ꓠꓬ Malta ꓜꓴꓻ ꓐꓰ ꓡꓳꓽ ꓗꓷ ꓢꓲ ꓠꓻ ꓫꓵꓽ (COVID -19) ꓞꓳ ꓠꓻ ꓐꓴ ꓔꓯ ꓠꓯꓻ ꓞꓲꓼ ꓦꓲꓻ ꓗꓪ ꓧꓳꓽ ꓔꓯꓹ ꓙꓰ ꓖꓶ ꓔꓬ ꓡꓳ= Most Holy Redeemer ꓜꓴꓻ ꓐꓴ ꓠꓬ ꓠꓯꓻ ꓞꓲꓼ ꓦꓲ ꓗꓪ ꓠꓻ ꓐꓶꓽ ꓓꓲꓻ ꓙꓳ ꓟꓽ ꓙꓳ ꓡꓳꓸ ꓠꓬꓲˍ ꓟ ꓗꓪ ꓥˍ ꓟꓲ꓾ ꓠꓯꓻ ꓞꓲꓼ ꓐꓱ ꓖꓶˍ ꓟ ꓗꓪˍ ꓟꓲ ꓬꓰ ꓙ ꓔꓬ ꓡꓳ= ꓤ-ꓐꓰꓸ-ꓣꓲ-ꓬꓯ ꓪꓴ-ꓢ ꓟꓬꓱꓽ ꓬꓰ ꓜꓴꓻ ꓐꓴˍ ꓟꓲ ꓡꓳ ꓒꓱ ꓘꓴꓽ ꓗꓪ ꓔꓬ ꓟ ꓞꓳ ꓫ ꓐꓴ ꓔꓯ ꓜꓽ ꓓꓴ ꓖꓶˍ ꓟ ꓐꓰ꓾ ꓬꓲ ꓐꓽ ꓗꓪ ꓟꓽ ꓟꓶ ꓓꓳ ꓟ ꓦꓬꓼ ꓠꓬꓲ ꓗꓪ ‘ꓑꓬ ꓠꓬ ꓖꓴ ꓦꓲ’ ꓐꓴ ꓔꓯˍ ꓟꓲ ꓫꓬꓹ ꓖꓶ ꓗꓷꓳ=

ꓐꓮꓠꓖꓗꓳꓗ ꓗꓪ ꓟ ꓔꓲꓺ ꓒ ꓓꓽ Cardinal ꓠꓬ 8 ꓦ 6 ꓠꓬꓲ ꓕꓯ Surasak Charoensirichot ꓦꓲ ꓔꓯ ꓞꓳ ꓠꓻ ꓜꓳꓽ-ꓟ 630 ꓟ ꓗꓶ ꓓꓲˍ ꓟ ꓠꓯꓻ ꓞꓲꓼ ꓦꓲ ꓡꓰ ꓐꓰ ꓣꓱꓽ ꓠꓹ ꓟ ꓐꓱ ꓶ Nakom Pathom ꓗꓴꓷꓼ ꓫꓴ ꓟꓯꓼ ꓐꓴ ꓔꓯ ꓡꓯꓼ ꓙꓱꓻ ꓗꓷꓳ= Cardinal ꓡꓰ ꓬꓰ ꓙˍ ꓟ ꓗꓪ ꓐꓰ ‘ꓮꓪ-ꓐ-ꓡꓰꓸ-ꓢꓶ’ ꓜꓴꓻ ꓐꓴ ꓥˍ ꓟꓲ ꓞꓳ ꓘꓹ ꓐꓴ꓾ ꓜꓽ ꓓꓴ ꓟꓽ ꓙꓳ ꓗꓷ ꓡꓰ ꓢꓴ ꓐꓴ ꓔꓯ ꓜꓽ ꓓꓴ ꓖꓶ ꓗꓷꓳ= “ꓣꓳ ꓘꓴ-ꓜꓲ-ꓞꓳ ꓘꓴꓽ ꓐꓰ ꓞꓳ ꓘꓹ ꓐꓴ ꓗꓪ ꓫ ꓙꓵꓻ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓐꓴ ꓔꓯ ꓚꓲ ꓛꓬ ꓟꓬꓱꓽ ꓟꓽ ꓥ ꓡꓰ ꓐꓰ ꓔꓬ ꓟꓽ ꓓ= ꓣꓱꓽ ꓞꓹ ꓢꓴ ꓐꓴ ꓔꓯ ꓬꓲ ꓚꓱꓹ ꓧꓪ ꓢꓲ ꓬꓰ ꓙ ꓖꓶ ꓠꓯꓹ ꓡꓳ= ꓟꓬꓽ ꓠꓬꓲ ꓞꓲꓼ ꓪꓴꓽ ꓢꓴ ꓐꓴ꓾ ꓤ ꓠꓱ ꓤ ꓐꓴ ꓔꓯ ꓟꓽ ꓬꓰ ꓙ ꓙ ꓔꓬꓹ ꓟꓽ ꓓ= ꓮ ꓡꓲꓳ ꓐꓯ ꓠꓬ ꓬꓲ ꓪ ꓐꓴ ꓠꓬ ꓢꓯꓼ ꓐꓽˍ ꓟ ꓪꓴꓸ ꓠꓬꓲ ꓢꓯꓼ ꓙꓳ ꓢꓴ ꓐꓴ ꓕꓯꓽ ꓢꓲ ꓟꓬꓽ ꓠꓬꓲ ꓫ ꓙꓵꓻ ꓪˍ ꓡꓳ꓾ ꓐꓰ ‘ꓮꓪ-ꓐ-ꓡꓰꓸ-ꓢꓶ’ ꓜꓴꓻ ꓗꓪ ꓟ ꓔꓲꓺ ꓒ June Ongart ꓡꓰ ꓐꓯˍ ꓡꓳ= 8 ꓦ 9 ꓠꓬꓲ ꓕꓯ ꓡꓰ ꓠꓻ ꓫꓵꓽ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ (149) ꓣꓳ ꓙꓳ ꓗꓷ ꓢꓲ꓾ ꓞꓳ ꓠꓻ ꓫꓵꓼ ꓠꓬ (19603) ꓣꓳ ꓙꓳ ꓡ ꓗꓷ ꓟ ꓥꓳ= ꓮꓽ ꓠꓬꓲꓹ ꓕꓲ ꓘꓳꓼ ꓠꓻ ꓫꓵꓽ ꓓꓵꓽ ꓡˍ ꓟ ꓙꓵꓹ ꓗꓪ ꓐꓰ ꓮ ꓟꓶ ꓗꓪ ꓛꓲꓺ ꓠꓻ ꓟꓶ ꓡꓰ ꓢꓴ ꓐꓴ ꓮ ꓙꓵꓽ ꓠꓬ (776108) ꓣꓳ ꓙꓳ ꓗꓷ ꓢꓲ꓾ ꓠꓻ ꓫꓵꓽ ꓗꓪ ꓐꓰ ꓓꓻ ꓡꓰ ꓢꓴ ꓐꓴ ꓠꓬ (555334) ꓣꓳ ꓙꓳ ꓗꓷꓳˍ ꓐꓰ꓾ ꓞꓳ ꓵꓻ ꓟꓬꓱ ꓐꓳ ꓔ ꓖꓴ ꓗꓪ ꓟꓸ ꓖꓶ ꓔ ꓟ ꓡꓳ=

Ref: CAN