ꓖ‐ꓜ ꓟꓵꓽ ꓗꓪ ꓔꓬ ꓟ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓔꓯ ꓪꓽ ꓘꓴ ꓦꓲꓻ ꓕꓲ ꓦꓲꓻ ꓗꓪ ꓔꓬ ꓝꓲ ꓢꓲ ꓠꓬꓲ ꓜ ꓓꓴ ꓓꓳꓻ ꓓꓴ ꓬꓰ ꓙ ꓟ ꓓꓳꓽ

ꓖ‐ꓜ ꓟꓵꓽ  ꓗꓪ ꓔꓬ ꓟ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓔꓯ ꓪꓽ ꓘꓴ ꓦꓲꓻ ꓕꓲ ꓦꓲꓻ ꓗꓪ ꓔꓬ ꓝꓲ ꓢꓲ ꓠꓬꓲ ꓜ ꓓꓴ ꓓꓳꓻ ꓓꓴ ꓬꓰ ꓙ ꓟ ꓓꓳꓽ

10 ꓦ ꓟ18 ꓠꓬꓲ 2023 ꓘꓳꓼ ꓕꓯ ꓬꓲ‐ꓢꓷ‐ꓡꓲ ꓟꓯꓼ ꓐꓴ ꓐꓰ Hamas ꓟꓯꓼ ꓜꓴꓻ ꓢꓰꓼ ꓡꓯ ꓘꓳꓼ ꓔꓬ ꓟ ꓪꓴ. ꓠꓬꓲ ꓫ. ꓔꓬ ꓟ ꓖ‐ꓜ ꓟꓵꓽ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓡꓰ ꓪꓽ ꓘꓴ ꓦꓲꓻ ꓕꓲ ꓦꓲꓻ ꓗꓪ ꓔꓬ ꓝꓲ ꓢꓲ ꓠꓬꓲ ꓜ ꓓꓴ ꓓꓳꓻ ꓓꓴ ꓐꓰ ꓣꓱ ꓬꓯꓼ ꓔꓬ ꓟ  ꓔꓯ ꓬꓰ ꓙ ꓔꓳ, ꓙ ꓔꓬ ꓡꓳ ꓐꓰ ꓐꓯ ꓔ ꓡꓳ꓿

ꓬꓲ‐ꓢꓷ‐ꓡꓰ ꓟꓯꓼ ꓐꓴ ꓡꓰ ꓐꓬꓱ ꓦꓲꓻ ꓗꓪ ꓐꓰ ꓐꓳ ꓑꓶ. ꓩꓴ ꓡ ꓟ ꓪꓴ. ꓠꓬꓲ Palestine ꓗꓴꓷꓼ ꓗꓪ ꓔꓬ ꓟ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓦꓲꓻ (20) ꓦꓲꓻ ꓐꓬ ꓡꓰꓳ ꓐꓰ ꓐꓯ ꓔ ꓡꓳ꓿

ꓖꓳ ꓡꓱ ꓥ ꓟꓲ ꓪꓽ ꓘꓴ ꓦꓲꓻ ꓐꓰ ꓠꓻ ꓓꓴ ꓡꓰ ꓢꓴ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓥ ꓟꓲ ꓟꓽ ꓙꓳ ꓐꓰ ꓫ. ꓔꓬ ꓢꓴ ꓐꓴ ꓔꓯ ꓬꓰ ꓙ ꓢꓴ ꓔꓲꓺ ꓒ ꓡꓰ ꓐꓯ ꓔ ꓡꓳ꓿Arabic ꓥꓳꓽ ꓫꓵꓽ ꓫ. ꓕꓱ ꓢꓴ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲ ꓡꓲ ꓟ ꓔꓲ ꓗꓪ ꓔꓬ ꓝꓲ ꓢꓲ ꓠꓬꓲ ꓣꓱ ꓤ ꓔꓬ ꓟ ꓔꓯ ꓬꓰ ꓔꓬ ꓙ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓫ. ꓔꓬ ꓢꓴ ꓐꓴ ꓔꓯ ꓬꓰ ꓙ ꓜ ꓢꓴ ꓔꓲꓺ ꓒ ꓡꓰ ꓫ. ꓕꓱ ꓔ ꓟ ꓠꓬ ꓠꓬꓲ. ꓠꓬꓲ ꓗꓪ ꓛꓲ ꓟꓯꓼ ꓢꓰꓼ ꓡꓯꓽ ꓘꓳ ꓟ ꓪꓴ. ꓠꓬꓲ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ ꓗꓪ ꓔꓬ ꓡ ꓢꓴ ꓑ ꓫꓬ ꓮ ꓙꓵꓽ ꓠꓬ (500) ꓣꓳ ꓟꓽ ꓞꓲ ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿ ꓮ ꓟꓶ ꓥ ꓟꓲ ꓟꓯꓼ ꓘꓰ ꓢꓴ ꓑ ꓫꓬ ꓐꓴ ꓪꓽ ꓘꓴ ꓦꓲꓻ ꓗꓪ ꓡ ꓢꓴ ꓔꓬ ꓢꓴ ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿

ꓫ. ꓔꓬ ꓢꓴ ꓐꓴ ꓔꓯ ꓬꓰ ꓙ ꓢꓴ ꓔꓲꓺ ꓒ ꓓꓽ ꓡꓰ ꓫ. ꓕꓱ ꓔ ꓟ ꓠꓬ ꓖ‐ꓜ ꓟꓵꓽ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺꓤ ꓐꓴ ꓠꓯ, ꓗꓪ ꓓꓳꓻ ꓓꓴ ꓬꓲꓻ ꓙꓬ ꓐꓰ ꓬꓯꓼ ꓔ ꓔꓲ. ꓐꓰ ꓫ ꓓꓴ ꓓꓳꓻ ꓥ ꓟꓲ ꓣꓱ ꓬꓯꓼ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓔꓲꓺ ꓒ ꓡꓰ ꓫ. ꓕꓱ ꓔ ꓟ ꓠꓬ ꓪꓴ‐ꓢ ꓠꓬ ꓬꓲ ꓤ ꓠꓱ ꓐꓴ ꓮ ꓙꓵꓽ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓡꓳ ꓖ‐ꓜ ꓕꓲ ꓡꓳ ꓒꓱ ꓡꓱ ꓐꓬ ꓡꓰ ꓗꓪ ꓛꓲ ꓐꓬꓱ ꓦꓲꓻ ꓐꓳ ꓗꓪ ꓐꓰ ꓑꓶ. ꓩꓴ ꓡ ꓥ ꓟꓲ ꓫꓵꓻ ꓢꓴ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓥ ꓟꓲ ꓟꓽ ꓙꓳ ꓐꓰ ꓐꓯ ꓔ ꓡꓳ꓿

ꓫ. ꓔꓬ ꓟ ꓙꓲ‐ꓢꓴ ꓢꓲꓺꓤ ꓐꓴ ꓮ ꓙꓵꓽ ꓔꓯ ꓢꓲꓽ ꓫꓬ ꓕꓲ ꓦꓲ ꓘꓴ ꓪꓽ ꓘꓴ ꓦꓲꓻ ꓗꓪ ꓔꓬ ꓝꓲ ꓟ ꓥ ꓡꓳ꓿ ꓝ ꓢꓲ ꓥ ꓟꓲ ꓬꓲ‐ꓢꓷ‐ꓡꓰ ꓗꓴꓷꓼ ꓐꓰ Palestine ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓓꓴ ꓬꓰ ꓡꓯ ꓔꓲꓺ ꓒ ꓡꓰ ꓐꓯ ꓔ ꓡꓳ ꓐꓰ (Catholic News Agency) ꓓꓳꓽ ꓗꓪ ꓢꓷ. ꓪ ꓡꓳ ꓐꓰ ꓐꓯ ꓔ ꓡꓳ꓿