ꓖ‐ꓟꓶ‐ꓓꓲ ꓡꓳ ꓒꓱ ꓗꓪ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓢꓳꓻ ꓜꓲꓼ ꓓꓴ ꓬꓰ ꓖꓶ ꓗꓷ ꓟ ꓓꓳꓽ

ꓖ‐ꓟꓶ‐ꓓꓲ ꓡꓳ ꓒꓱ ꓗꓪ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓢꓳꓻ ꓜꓲꓼ ꓓꓴ ꓬꓰ ꓖꓶ ꓗꓷ ꓟ ꓓꓳꓽ

3 ꓦ ꓟ 19 ꓠꓬꓲ ꓗꓪ ꓐꓰ 26 ꓠꓬꓲ 2023 ꓘꓳꓼ ꓕꓯ ꓖ‐ꓟꓶ‐ꓓꓲ ꓡꓳ ꓒꓱ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓢꓳꓻ ꓜꓲꓼ ꓓꓴ ꓔꓯ ꓬꓰ ꓖꓶ ꓗꓷꓳ ꓐꓰ ꓢꓷ. ꓪ ꓡꓳ꓿ ꓠꓴ ꓪ ꓠꓬ ꓟꓲ ꓠꓯ ꓞꓳ ꓤ ꓐꓱ ꓶ ꓠꓬꓲ ꓟꓳꓻ ꓓꓴ ꓥꓳ ꓐꓰ ꓐꓯ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓔꓯ ꓣꓴ ꓔ ꓢꓲ ꓠꓬꓲ ꓢꓳꓻ ꓜꓲꓼ ꓓꓴ ꓔꓯ ꓒꓴ ꓖꓶ ꓗꓷꓳ꓿

ꓕꓱ ꓢꓳꓻ ꓜꓲꓼ ꓓꓴ ꓗꓪ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓶꓻ ꓡꓯꓼ ꓬꓰ ꓚꓱ, ꓞꓳ ꓡꓯ. ꓐꓰ ꓙꓵꓻ ꓠꓲ, ꓚꓱ,꓾ ꓡꓲꓽ ꓒꓰꓼ ꓚꓱ,꓾ ꓞꓳ ꓡꓯ. ꓐꓰ ꓡꓯ ꓒꓯ, ꓝ. ꓚꓱ,꓾ ꓬꓯꓼ ꓑꓲ. ꓔꓯ ꓤ ꓟꓳ ꓠ, ꓟ ꓚꓱ,꓾ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱ, ꓧꓪꓽ ꓖꓳ ꓓꓱ ꓔꓬ ꓢ ꓠ, ꓟ ꓚꓱ, ꓟꓴ ꓖꓪꓽ ꓐꓰ ꓡꓳ ꓖꓪ ꓓꓴ ꓮ ꓟꓬ, ꓫꓵꓽ ꓔꓯ ꓟ. ꓖꓶ ꓗꓷꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓕꓱ ꓢꓳꓻ ꓜꓲꓼ ꓓꓴ ꓗꓪ ꓞꓳ ꓘ, ꓮ ꓟꓬ, ꓗꓪ ꓐꓰ ꓬꓲ. ꓞꓲꓼ (16) ꓘꓳꓼ ꓕꓯ ꓢꓲ ꓞꓳ ꓡꓯ. ꓐꓴ (75) ꓣꓳ ꓢꓳꓻ ꓜꓲꓼ ꓓꓴ ꓗꓪ ꓢꓳꓻ  ꓗꓷꓳ ꓐꓰ ꓐꓯ ꓔ ꓡꓳ꓿ ꓢꓳꓻ ꓜꓲꓼ ꓓꓴ ꓗꓪ ꓟ. ꓖꓶ ꓢꓴ ꓟ. ꓒ ꓟ. ꓟ ꓐꓴ ꓠꓬ (15) ꓣꓳ ꓥ ꓡꓳ꓿

ꓝꓮꓲ ꓕꓱ ꓢꓳꓻ ꓜꓲꓼ ꓓꓴ ꓒꓬꓱꓼ ꓡ ꓠ, ꓟ ꓮ ꓟꓬ, ꓫꓵꓽ ꓗꓪ ꓐꓰ ꓬꓰ ꓙ ꓔꓳ, ꓙ ꓢꓴ ꓮ ꓙꓵꓽ ꓔꓯ ꓮ ꓘꓶ. ꓫ. ꓟꓳ ꓡꓳ ꓐꓰ ꓐꓯ ꓔ ꓡꓳ꓿ ꓢꓳꓻ ꓜꓲꓼ ꓓꓴ ꓗꓪ ꓢꓳꓻ ꓡ ꓢꓴ ꓞꓳ ꓡꓱ ꓤ ꓐꓴ ꓮ ꓟꓬ, ꓔꓯ ꓥ ꓟꓲ ꓮ ꓘꓶ. ꓫ. ꓟꓳ ꓡꓳ ꓐꓰ ꓔꓲꓺ ꓒ ꓙꓳꓧꓠ ꓮꓴꓠꓖ‐ꓧꓔꓳꓲ ꓡꓰ ꓖꓶ ꓩꓴ ꓡ ꓟ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿