ꓗ‐ꓔꓳ‐ꓡꓲ ꓔꓲꓺ ꓒ ꓓꓽ ꓐꓴ (16) ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓔꓲꓺ ꓒ Francis ꓪ ꓔꓲ ꓡꓰ ꓖꓪ ꓙꓱ ꓜꓲꓼ ꓓꓴ ꓒꓴ ꓘꓶꓽ ꓶꓼ ꓓꓳꓽ ꓫꓱ, ꓓꓳꓽ

ꓗ‐ꓔꓳ‐ꓡꓲ ꓔꓲꓺ ꓒ ꓓꓽ ꓐꓴ (16) ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓔꓲꓺ ꓒ Francis ꓪ ꓔꓲ ꓡꓰ ꓖꓪ ꓙꓱ ꓜꓲꓼ ꓓꓴ ꓒꓴ ꓘꓶꓽ ꓶꓼ ꓓꓳꓽ ꓫꓱ, ꓓꓳꓽ

ꓔꓲꓺ ꓒ ꓪ ꓔꓲ Francis ꓡꓰ ꓠꓵꓻ ꓠꓲ, ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓔꓲꓺ ꓒ ꓪ ꓔꓲ St. John (6) ꓡꓰ ꓖꓴ ꓟꓶ. ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓕꓲ ꓪ ꓪꓴ‐ꓢ ꓟꓬꓱꓽ ꓬꓰ ꓟ ꓗꓪ ꓕꓲ ꓠꓲ, ꓕꓲ ꓪꓼ ꓶꓻ ꓫꓱ, ꓠ, ꓟ ꓟꓶꓽ ꓡꓰ ꓡ ꓪ ꓐꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓛꓲ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒ ꓓꓽ ꓐꓴ ꓔꓯ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓬꓰ ꓠ, ꓟ ꓜꓴꓻ ꓔꓯ ꓒꓴ ꓖꓶ ꓔ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓐꓴ ꓜꓴꓻ ꓡꓰ ꓧꓳꓽ ꓪꓴ. ꓟꓴ ꓟ ꓗꓪ ꓐꓰ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓔꓶꓻ ꓙꓱꓼ ꓮ ꓟꓬ, ꓔꓯ ꓖꓪ ꓙꓱ ꓜꓲꓼ ꓓꓴ ꓗꓪ ꓖꓪ ꓙꓱ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓕꓲ ꓠꓲꓹ ꓕꓲ ꓪꓼ ꓙꓻ ꓫꓱ_ ꓟ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓟꓬꓱꓽ ꓬꓰ ꓠ, ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ Francis ꓡꓰ ꓥꓪ ꓚꓲ. ꓛꓬ ꓖꓪ ꓙꓱ ꓜꓲꓼ ꓓꓴ ꓕꓲ ꓟ ꓗꓪ ꓧꓳꓽ ꓪꓴ. ꓟꓴ ꓢꓴ ꓬꓰ ꓗꓷ ꓟ ꓙꓵ, ꓗꓪ ꓟꓯꓸ ꓗꓷꓻ ꓠ, ꓟ ꓬꓰ ꓔꓬ ꓟ ꓙꓵ, ꓕꓯ Cardinal ꓔꓯ ꓮ ꓫꓵꓽ ꓬꓰ ꓔꓬ ꓡ ꓐꓰ ꓠꓻ ꓠꓬꓲˍ ꓟ ꓙꓵ, ꓔꓯ ꓬꓲ ꓡꓰ ꓦꓻ ꓠꓯꓼ ꓟꓯꓸ ꓗꓷꓻ ꓠ, ꓟ ꓬꓰ ꓔꓬ ꓡꓳ ꓐꓰ ꓐꓯ ꓖꓶ ꓡ ꓟ ꓥ ꓡꓳ꓿

ꓖꓳ ꓕꓯ ꓬꓲ ꓔꓯ ꓟꓯꓹ ꓖꓶ ꓟꓽ ꓛꓲ ꓐꓰ ꓐꓯ ꓗꓷ ꓢꓲ ꓠꓬꓲ ꓕꓱ ꓖꓪ ꓙꓱ ꓜꓲꓼ ꓓꓴ ꓔꓯ ꓟꓯꓸ ꓗꓷꓻ ꓢꓲ ꓠꓬꓲ ꓟꓽ ꓬꓰ ꓐꓰ ꓐꓯ ꓖꓶ ꓡ ꓡꓳ꓿ ꓖꓳ ꓕꓯ ꓔꓲꓺ ꓒ ꓪ ꓔꓲ ꓡꓰ ꓕꓱ ꓖꓪ ꓙꓱ ꓜꓲꓼ ꓓꓴ ꓠꓬ ꓮ ꓙꓵꓽ ꓢꓴ ꓐ ꓠ, ꓟ ꓖꓪ ꓙꓱ ꓜꓲꓼ ꓓꓴ ꓥ ꓟ ꓪꓴ. ꓠꓬꓲ ꓚꓲ. ꓛꓬ ꓠꓲ, ꓫꓵ._ ꓟ ꓔꓯ ꓟꓯꓸ ꓗꓷꓻ ꓠ, ꓟ ꓙꓳˍ ꓡꓳ ꓐꓰ ꓐꓯ ꓖꓶ ꓡꓳ꓿ ꓚꓲ. ꓛꓬ ꓓꓵꓽ ꓙ ꓚꓱ, ꓔꓯ ꓐꓯ ꓟ. ꓖꓶ ꓠ, ꓟ ꓗꓼ ꓟꓽ ꓢꓷꓸ ꓔ ꓟ ꓥꓳ꓾ ꓕꓱ ꓡꓱ ꓐꓰ (60) ꓘꓳꓼ ꓘꓴꓽ ꓗꓪ ꓖꓪ ꓙꓱ ꓜꓲꓼ ꓓꓴ ꓮ ꓟꓬ, ꓬꓰ ꓗꓷ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓪꓴꓽ ꓟꓴ ꓡ ꓚꓱ, ꓗꓪ ꓕꓲ ꓠꓲ, ꓕꓲ ꓪꓼ ꓙꓻ ꓫꓱ_ ꓟ ꓘꓴ ꓜꓲꓼ ꓞꓳ ꓒꓬꓱꓼ ꓡ ꓠ, ꓟ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓔꓬ ꓟ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ Francis ꓡꓰ ꓫ. ꓕꓱ ꓗꓷ ꓟ ꓥ ꓡꓳ꓿

ꓕꓱ ꓟ ꓠꓬ ꓢ ꓢꓹ ꓡꓰ ꓒꓬꓱꓼ ꓡ ꓟ ꓟꓽ ꓥ꓾ ꓔꓲ.. ꓒ ꓓꓽ ꓐꓴ ꓠꓬ ꓕꓱ ꓡꓱ ꓬꓰ ꓠ, ꓟ ꓬꓲ ꓙꓵ, ꓛꓲ ꓡ ꓟ ꓑꓶ. ꓓꓴ ꓕꓱ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓔꓬ ꓟ ꓥˍ ꓡꓳ꓿ ꓖꓪ ꓙꓱ ꓜꓲꓼ ꓓꓴ ꓕꓱ ꓟ ꓔꓯ ꓧꓳꓽ ꓪꓴ. ꓟꓴ ꓢꓴ ꓕꓯ ꓢꓲ ꓢꓲ-ꓫꓬ-ꓟ-ꓦ ꓡꓰ ꓬꓰ ꓙ ꓟ ꓪꓴ. ꓠꓬꓲ ꓥ ꓡꓳ꓿ ꓣꓳ ꓔꓯ ꓙꓲ, ꓟ ꓚꓱ, ꓗꓪ ꓧꓳꓽ ꓙ ꓖꓶ ꓢꓴ ꓢꓲ-ꓫꓬ-ꓟ-ꓦ ꓣꓳ ꓑ ꓕꓲ ꓗꓪ ꓔꓬ ꓡ ꓕꓯ ꓠꓬ ꓖꓪ ꓙꓱ ꓜꓲꓼ ꓓꓴ ꓕꓱ ꓟ ꓠꓬ ꓙꓲ_ ꓟ ꓖꓪ ꓙꓱ ꓜꓲꓼ ꓓꓴ ꓒꓬꓱꓼ ꓡ ꓥꓳ꓿ ꓢ‐ꓢꓶ‐ꓠ ꓤꓶ., ꓙꓻ ꓖꓴ ꓗꓪ ꓢꓲ-ꓫꓬ-ꓟ-ꓦ ꓠꓬ ꓟꓬ ꓠꓬꓲ ꓟꓬꓱꓽ ꓬꓰ ꓔꓬ ꓢꓴ ꓥ ꓡꓳ꓿ ꓢꓲ-ꓫꓬ-ꓟ-ꓦ ꓣꓳ ꓠꓯ.ꓼ ꓗꓪ ꓬꓯꓼ ꓡ ꓕꓯ ꓢꓲ꓾ ꓟꓲ ꓠꓯ ꓞꓳ ꓤ ꓐꓴ ꓚꓬꓴ ꓙ_ ꓟ ꓣꓱꓽ ꓛꓰ ꓟꓶ ꓡ ꓓꓴ ꓥ ꓡꓳ꓿

ꓕꓱ ꓖꓪ ꓙꓱ ꓜꓲꓼ ꓓꓴ ꓓꓳ ꓡꓰ ꓗꓸ ꓠꓯꓸ ꓖꓪ ꓙꓱ ꓞꓷꓹ ꓗꓷ ꓟ ꓠꓬ ꓮ ꓫꓵ ꓡꓰ ꓟꓽ ꓫꓱꓹ ꓕꓲꓽ ꓪꓽ ꓡꓰ ꓖꓪ ꓙꓱ ꓞꓷꓹ ꓗꓷ ꓐꓰ ꓓꓳꓺ ꓡ ꓠꓬ ꓕꓱ ꓟ ꓠꓬ꓾ ꓢꓲ-ꓫꓬ-ꓟ-ꓦ ꓐ_ ꓟ ꓖꓪ ꓙꓱ ꓜꓲꓼ ꓓꓴ ꓟꓽ ꓥ꓾ ꓢꓲ-ꓫꓬ-ꓟ-ꓦ ꓠꓬ ꓟꓽ ꓫꓱꓹ ꓟ ꓔꓯ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ ꓠꓹ ꓟ ꓬꓰ ꓖꓶ_ ꓟ ꓥ ꓡꓳ꓾ꓘꓴ ꓜꓲꓼ ꓞꓳ ꓔꓯ ꓥ ꓟꓲ ꓡꓳꓸ ꓙ ꓐꓳ ꓙ ꓢꓴ ꓥ ꓡꓳ꓾ ꓣꓳ ꓠꓬ ꓢꓲ-ꓫꓬ-ꓟ-ꓦ ꓬꓲꓸ ꓢꓯꓼ ꓔꓯ ꓠ ꓠꓹ ꓗꓴꓸ ꓠꓹ ꓟ ꓙꓻ ꓜꓲꓼ ꓗꓴꓸ ꓠ ꓔ ꓡꓳ=

ꓢꓲ-ꓫꓬ-ꓟ-ꓦ ꓔꓯ ꓠꓲꓹ ꓫꓸ ꓟꓬ ꓫꓸ ꓝꓲ_ ꓟ ꓠꓬ꓾ ꓙꓲ ꓖꓴ ꓟꓽ ꓙꓳ_ ꓟ ꓫꓸ ꓕꓱ ꓘꓶꓽ ꓥ ꓡꓳ꓾ ꓕꓱ ꓟ ꓗꓪ ꓐꓰ ꓢꓲ ꓫꓬ ꓕꓳ ꓶ ꓬꓲ-ꓩꓴ-ꓢꓳ 4ꓽ40 ꓗꓪ “ꓫꓴꓹ ꓣꓴ_ ꓟ ꓦꓬꓼ ꓠꓬꓲ ꓗꓪ ꓛꓲ ꓠꓴ ꓪ ꓔꓳꓹ ꓠꓷꓼ ꓔ ꓢꓴ꓾ ꓪꓴ-ꓢ ꓬꓲ ꓢꓲ-ꓫꓬ-ꓟ-ꓦ ꓔꓯ ꓠꓲꓹ ꓟ ꓕꓽ ꓫꓸ ꓡꓰ ꓝꓲ=” ꓐꓰ ꓐꓯ ꓔ ꓡꓳ= ꓗꓸ ꓠꓯꓸ ꓢꓲ ꓘꓳ ꓫꓱꓸ ꓫꓱꓸ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓟꓽ ꓙꓲ_ ꓟ ꓚꓱꓹ ꓔꓯ ꓐꓯ_ ꓟ ꓓꓲ ꓢ ꓔꓲꓺ ꓒ ꓓꓽ꓾ ꓔꓲꓺ ꓟ꓾ ꓠꓱꓸ ꓐꓯꓼ ꓢꓴ ꓡꓰ ꓫꓸ ꓕꓱ_ ꓟ ꓔꓯ ꓟꓽ ꓘꓳꓹ ꓣꓴ ꓠꓬ ꓬꓲꓸ ꓟꓲ ꓕꓯ ꓗꓪ ꓐꓯ ꓖꓶ= ꓕꓱ ꓟ ꓑꓶ ꓓꓴ ꓕꓱ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓔꓬ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓢꓲ-ꓫꓬ-ꓟ-ꓦ ꓔꓯ ꓠꓲꓹ ꓟ ꓫꓸ ꓡꓰ ꓠ ꓕꓽ ꓬꓰ=

ꓙꓲ_ ꓟ ꓔꓯ ꓠ ꓡꓳꓸ ꓗꓴꓸ_ ꓟ ꓫꓱꓹ ꓐꓱ ꓶ ꓥꓪ ꓐꓯ ꓖꓶ ꓠꓲꓹ ꓫꓵ_ ꓟ ꓥ ꓡꓳ꓾ ꓫꓸ ꓕꓱ_ ꓟ ꓕꓯ ꓢꓲ ꓠ ꓡꓳꓹ ꓓꓴ ꓔꓯ ꓟꓬ ꓠꓬꓲ ꓬꓰ ꓠꓹ ꓟ ꓐꓱ ꓶ ꓢꓲ-ꓫꓬ-ꓟ-ꓦ ꓪꓴ-ꓢ ꓡꓰ ꓣꓳ ꓔꓯ ꓡꓵꓹ ꓔꓴ ꓖꓶ ꓔꓬ ꓟ ꓔꓯ ꓡ ꓞꓳ ꓮ ꓟꓬꓹ ꓢꓷꓸ ꓡꓰ ꓠꓹ ꓟ ꓐꓱ ꓶ ꓟꓰꓓꓲꓮ ꓐꓴ ꓥ ꓟꓲ ꓬꓰ ꓙ ꓡ ꓠꓹ ꓟ ꓔꓯ ꓥꓪ ꓓꓰꓽ ꓠꓲꓹ ꓫꓵ_ ꓟ ꓥ ꓡꓳ=

ꓢꓲ ꓒꓽ ꓬꓰ-ꓢꓴ ꓫꓵꓻ ꓗꓷ ꓟ ꓠꓽ ꓥꓪꓽ ꓠꓬꓲ ꓗꓪ ꓝꓲ ꓓꓴ ꓐꓴ ꓮ ꓙꓵ ꓠꓬ ꓢꓲ ꓡꓲꓹ ꓐꓰ ꓗꓷ ꓡꓰ ꓟ ꓡꓰ ꓐꓰ ꓣꓳ ꓐꓴ ꓥ ꓟꓲ ꓢꓲ ꓡꓲꓹ ꓡꓲꓹ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓠ ꓡꓳꓸ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠ ꓗꓹ ꓡꓳ= ꓕꓱ ꓟ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓚꓱꓹ ꓕꓲ ꓟ ꓟꓲ ꓥ ꓡꓳ= ꓠꓴ ꓪ ꓢꓯꓼ ꓕꓵꓼ ꓔ ꓟ ꓮ ꓙꓵ ꓔꓯ ꓥ ꓟꓲ ꓮ ꓘꓶꓸ ꓫꓸ ꓟꓳ ꓐꓰ ꓥꓪ ꓐꓯ ꓠꓲꓹ ꓫꓵ_ ꓟ ꓥ ꓡꓳ꓾ ꓮ ꓙꓵ ꓔꓯ ꓫꓸ ꓟꓳ=