ꓗꓯ-ꓠꓬ ꓗꓪ ꓙꓵꓻ ꓠꓲꓹ ꓑꓶꓸ ꓓꓴ ꓜꓽ ꓓꓴ ꓚꓲꓸ ꓢꓴ 300 ꓣꓳ ꓫꓵꓳ

ꓗꓯ-ꓠꓬ ꓗꓴꓷꓼ ꓗꓪ ꓜꓽ ꓓꓴ ꓚꓲꓸ ꓢꓲ ꓦ ꓡꓱˍ ꓟ ꓑꓶꓸ ꓓꓴ ꓫꓵꓻ ꓢꓴ ꓠꓬ 6ꓦ 14 ꓠꓬꓲ ꓮ ꓟꓰ ꓠꓽ ꓠꓬꓲꓽ ꓠꓬꓲ ꓕꓯ 300 ꓣꓳ ꓙ ꓬꓰ ꓟ ꓥ ꓡꓳ= ꓢꓲꓹ ꓠꓯꓹ ꓘꓴꓽ ꓗꓪ ꓫꓵꓻ ꓟꓳ ꓐꓴ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓟꓰꓹ ꓠꓬꓲ ꓗꓷ ꓕꓯ ꓮ ꓟꓶ ꓟ ꓡꓰ ꓟꓳꓻ ꓗꓷ ꓟ ꓥ ꓡꓳ= ꓫꓵꓻ ꓢꓴ ꓐꓴ ꓠꓬ ꓙꓲˍ ꓟ ꓓꓳꓽ ꓟꓵꓽ ꓗꓳꓹ ꓓꓵ ꓓꓵ ꓘꓴ ꓜꓲꓼ ꓞꓳ (Good news International Church) ꓜꓴꓻ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓬꓲ ꓪ ꓠꓬ ꓬꓲ ꓪ ꓚꓲꓸ ꓛꓬ ꓐꓰ ꓬꓲ ꓪ ꓤ ꓠꓱ ꓮ ꓙꓵꓽ ꓜꓽ ꓓꓴ ꓚꓲꓸ ꓢꓲ ꓫꓵꓻˍ ꓟ ꓗꓪ ꓐꓰ ꓟꓲ ꓠꓯ ꓟꓽ ꓐꓬ ꓡꓰ ꓢꓰꓽ ꓕꓯ ꓡꓰ ꓟꓴ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ꓾ ꓑꓰ ꓬꓰ ꓐ ꓡˍ ꓡꓳ꓾ ꓐꓰ ꓘꓴ ꓜꓲꓼ ꓞꓳ ꓖꓳ ꓟ ꓗꓪ ꓧꓳꓽ ꓪꓴꓸ ꓟꓴ ꓢꓴ Paul Macknezie ꓡꓰ ꓐꓯ ꓝꓲˍ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓗꓯ-ꓠꓬ ꓗꓴꓷꓼ ꓐꓶ ꓓꓳ ꓖꓴ ꓟꓶꓸ Shakahola ꓢꓲꓹ ꓠꓯ ꓗꓪ ꓡ ꓞꓳ ꓮ ꓟꓬꓹ ꓔꓵꓸ ꓔ ꓟ ꓔꓯ ꓟꓰꓹ ꓠꓬꓲ ꓗꓷ ꓕꓯ ꓫꓵꓻ ꓟꓳ 19 ꓟꓳ ꓔꓯ ꓝꓮꓲ ꓧꓪ ꓟꓶ ꓡꓰ ꓟ ꓑꓶꓸ ꓓꓴ꓾ ꓫꓵꓻ ꓢꓴ ꓮ ꓙꓵꓽ ꓠꓬ 303 ꓣꓳ ꓙꓳ ꓡ ꓗꓷ ꓟ ꓥ ꓡꓳ= ꓝꓮꓲ 600 ꓣꓳ ꓟꓽ ꓞꓲꓼ ꓔꓯ ꓠꓬ ꓧꓪ ꓟꓽ ꓟꓳꓻ ꓡꓰ ꓢꓰꓽ ꓐꓰ ꓖꓳ ꓗꓪ ꓟ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=

ꓕꓲ ꓐꓱ ꓔꓯ ꓚꓬꓴꓸ ꓙ ꓐ ꓡ ꓗꓷ ꓥˍ ꓟꓲ꓾ ꓬꓲ ꓪ ꓗꓪ ꓟ 65 ꓣꓳ ꓠꓬ 6 ꓦ 6 ꓠꓬꓲ ꓗꓪ ꓐꓰ 10 ꓠꓬꓲ ꓘꓴꓽ ꓗꓪ ꓬꓰ ꓙ ꓔꓶꓸ ꓗꓪ ꓔꓬ ꓕꓯ ꓜꓽ ꓓꓴ ꓟꓽ ꓜꓽ ꓜꓽ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=