ꓘꓴ-ꓜꓲ-ꓞꓳ ꓓꓳꓽ

ꓑꓲ-ꓡꓲ-ꓑꓲ ꓔꓲꓺ ꓒ ꓓ ꓟ ꓐꓴ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓠꓬꓲ ꓐꓰ ꓙꓽ ꓶ

ꓑꓲ-ꓡꓲ-ꓑꓲ ꓔꓲꓺ ꓒ ꓓ ꓐꓴ ꓠꓬ ꓬꓲꓸ ꓪ ꓕꓲꓽ ꓗꓴꓷꓼ ꓡꓱꓸ ꓗꓪ ꓔꓬꓹ ꓢꓴ ꓔꓯ ꓟꓬ-ꓟ ꓗꓴꓷꓼ ꓢꓲ ꓡꓲ ꓟ ꓐꓱ ꓶ ꓕꓱ ꓕꓲꓽ ꓠ ꓗꓪ ꓪꓽ ꓘꓴ ꓙ ꓠꓹ ꓟ ꓙ ꓶ ꓗꓷꓳ=

ꓔꓲꓺ ꓒ ꓓ ꓟ ꓣꓳꓟꓴꓡꓳ ꓦꓮꓡꓡꓰꓢ ꓠꓬ 5 ꓦ ꓟ 30 ꓠꓬꓲ ꓟ ꓔꓯ “ꓟꓬ-ꓟ ꓗꓴꓷꓼ ꓗꓪ ꓫ ꓙꓵ ꓔꓬ ꓢꓴ ꓐꓱ ꓶ꓾ ꓟꓬ ꓠꓬꓲ ꓟꓬ-ꓟ ꓘꓴ ꓜꓲꓼ ꓞꓳ ꓐꓱ ꓶ ꓪ ꓘꓴ ꓙ ꓡꓯ” ꓐꓰ ꓙ ꓶ ꓗꓷꓳ=

ꓖꓳ ꓕꓲꓽ ꓠꓬꓲ ꓟ ꓠꓬ ꓢ ꓣꓳ ꓕꓲꓽ ꓖꓳ ꓓꓱꓽ ꓪꓴ-ꓢ ꓑꓮꓲꓽ ꓥˍ ꓟꓲ ꓬꓯꓼ ꓟ ꓑꓶꓸ ꓓꓴ꓾ ꓑꓲ-ꓡꓲ-ꓑꓲ ꓔꓲꓺ ꓒ ꓓ ꓐꓴ ꓡꓰ ꓕꓲꓽ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓧꓳ ꓫꓵꓽ ꓧꓳ ꓡꓯ ꓘꓳˍ ꓟ ꓠꓬꓲ ꓥˍ ꓟꓲ ꓚꓰꓺ ꓔˍ ꓟꓲ ꓥꓳ=

“ꓞꓳ ꓢꓰꓼ ꓪ ꓢꓰꓼ ꓡꓯ ꓘꓳ ꓔꓬꓹ ꓟ ꓠꓽ ꓡꓰ ꓠꓹ ꓟ ꓪꓴ-ꓢ ꓔꓯ ꓪꓽ ꓘꓴ ꓡꓯ= ꓞꓳ ꓤ ꓮ ꓙꓵꓽ ꓢꓲ ꓡꓲ ꓟ ꓟꓶ ꓡꓰ ꓠꓹ ꓟ ꓢꓯꓼ ꓕꓵꓼ ꓪꓽ ꓘꓴ ꓙ ꓡꓯ=” ꓐꓰ 5 ꓦ 26 ꓠꓬꓲ ꓗꓪ ꓔꓲꓺ ꓒ ꓓ ꓦꓮꓡꓡꓰꓢ ꓡꓰ ꓐꓯ ꓗꓷꓳ=

ꓔꓲꓺ ꓒ ꓓ ꓡꓰ ꓕꓱ ꓡꓱ ꓓꓰꓽ ꓟ ꓠꓬ꓾ ꓗ-ꓔꓳ-ꓡꓲꓗ ꓪꓽ ꓘꓴ ꓦꓲꓻ ꓗꓪ ꓑꓬꓺ ꓔꓬꓹ ꓟ ꓑꓹ ꓫꓬ ꓐꓴ ꓔꓯ ꓟꓯ ꓡꓰ ꓒꓳꓰꓸ ꓢꓲꓽ ꓗꓪ ꓐꓰ ꓐꓶꓺ ꓧꓳꓽ ꓕꓯ ꓞꓳ ꓤ 4 ꓣꓳ ꓫꓵꓻ ꓢꓲ꓾ ꓮ ꓟꓬꓽ ꓣꓳ ꓠꓻ ꓡꓰ ꓕꓯ ꓓꓰꓽ ꓟ ꓥꓳ=

5 ꓦ 23 ꓠꓬꓲ ꓢꓲ ꓒ ꓦꓬꓼ ꓠꓬꓲ ꓢꓲ-ꓫꓬ-ꓟ-ꓦ ꓑꓮꓲ ꓕꓯ ꓡꓳꓲ-ꓗꓮꓪ ꓬꓰ-ꓢꓴ ꓬꓲꓸ ꓫꓵꓺ ꓠꓲꓹ ꓟ ꓪꓽ ꓘꓴ ꓦꓲꓻ ꓗꓪ ꓟꓯꓼ ꓜꓴ ꓐꓴ ꓮ ꓟꓬꓽ ꓧꓪ ꓐꓶ ꓗꓶ ꓟ ꓑꓶꓸ ꓓꓴ꓾ ꓪꓽ ꓘꓴ ꓦꓲꓻ ꓟꓲ ꓐꓬꓺ ꓡꓰ ꓖꓴꓳ=

ꓟꓬ-ꓟ ꓚꓮꓣꓓꓲꓠꓮꓡ ꓐꓳ ꓥˍ ꓟꓲ꓾ ꓟꓯꓼ ꓜꓴ ꓐꓴ ꓐꓰ ꓑꓳꓺ ꓕꓯꓽ ꓢꓴ ꓠꓬꓲ ꓛꓱꓽ ꓔꓯ ꓟꓳ꓾ ꓪꓽ ꓘꓴ ꓦꓲꓻ ꓗꓪ ꓕꓽ ꓑꓳꓺ ꓠꓹ ꓟ ꓓꓰꓽ ꓗꓷꓳ=

20 ꓘꓳ ꓛꓲ ꓙꓳˍ ꓫꓵꓽ ꓞꓳ ꓡꓱ ꓤ ꓕꓲꓽ ꓣꓳ ꓥˍ ꓟꓲ꓾ “ꓐꓯꓺ ꓒꓴ ꓒꓴ ꓔꓶꓺ ꓢꓲ꓾ ꓪꓽ ꓘꓴ ꓦꓲ ꓔꓯ ꓕꓽ ꓑꓳ ꓠꓹ ꓟ꓾ ꓡꓳꓲ-ꓗꓪ ꓔꓲꓺ ꓒ ꓐꓴ ꓓꓰꓽ ꓗꓷꓳ= ꓬꓲꓸ ꓡꓰ ꓐꓯ ꓟ ꓠꓬ꓾ ꓟꓯꓼ ꓜꓴ ꓐꓴ ꓬꓲꓸ ꓪ ꓗꓴꓷꓼ ꓗꓪ ꓟꓽ ꓠꓽ ꓠꓽ ꓑꓳꓺ ꓗꓪ ꓐꓰ ꓥˍ ꓟꓲ꓾ ꓒꓳꓲꓸ ꓢꓲꓽ ꓗꓪ ꓐꓰ ꓥˍ ꓟꓲ ꓐꓶꓺ ꓩꓴ ꓡ ꓔꓬ ꓡꓳ ꓐꓰ ꓐꓯˍ ꓡꓳ=

ꓬꓲꓸ ꓟꓶꓽ ꓣꓳ ꓟꓽ ꓛꓲ꓾ ꓢꓲ ꓠꓯꓺ ꓟꓲ ꓗꓪ ꓘꓰ ꓙꓰ ꓖꓴꓳ= ꓟꓬ-ꓟ ꓗꓴꓷꓼ ꓠꓬ꓾ ꓐꓴ-ꓓꓮ ꓦ ꓡꓱ ꓢꓴ ꓟꓬꓽ ꓟ ꓗꓴꓷꓼ ꓥˍ ꓡꓳ=

“ꓟꓽ ꓠꓽ ꓠꓽ ꓑꓳꓺ ꓧꓳꓽ ꓩꓴ ꓡˍ ꓟ ꓠꓬ꓾ ꓤꓽ ꓟꓶ ꓤꓽ ꓐꓰ ꓞꓳ ꓟꓳꓽ ꓐꓴ ꓤ ꓠꓱ ꓤ ꓐꓴ ꓔꓯ ꓮ ꓘꓶꓸ ꓫ ꓙꓵ ꓡꓰ ꓝꓲ ꓡꓳ ꓐꓰ ꓔꓲꓺ ꓒ ꓓꓽ ꓐꓳ ꓡꓰ ꓐꓯˍ ꓡꓳ=

“ꓕꓱ ꓟ ꓠꓽ ꓗꓷ ꓠ ꓗˍ ꓡꓳ= ꓥꓪ ꓠꓴ ꓪ ꓮ ꓙꓵ ꓢꓴ ꓔꓯ ꓓꓰꓽˍ ꓥꓳ= ꓑꓳꓺ ꓡꓯ ꓘꓳ ꓢꓰꓼ ꓡꓯ ꓘꓳˍ ꓟ ꓕꓽ ꓓꓳꓺ ꓡ ꓝꓲ” ꓐꓰ ꓬꓲꓸ ꓡꓰ ꓐꓯ ꓗꓷꓳ=