ꓘ-ꓘꓴꓹ ꓴꓸ-ꓟꓸ-ꓖꓸ ꓟꓵꓽ ꓛꓳꓽ ꓟꓵꓽ ꓗꓪ ꓟ ꓑ ꓫꓬ ꓐꓴ ꓜꓽ ꓓꓴ ꓟꓽ ꓙꓳ ꓗꓷ ꓡ ꓔꓬ ꓟ ꓔꓯ ꓔꓳꓹ ꓜꓳꓽ ꓔꓬ ꓪˍ ꓟ

ꓗ-ꓛꓲ ꓗꓴꓷꓼ ꓫꓴ꓾ ꓢꓴꓟ-ꓑ-ꓣ-ꓐꓴꓟ ꓟ-ꓡꓲ-ꓘ ꓬꓲꓻ ꓙꓬ ꓡꓳꓻ ꓖꓳ ꓪꓴꓸ ꓕꓲ ꓛꓱꓽ ꓗꓪ ꓙꓳˍ ꓟ ꓞꓳ ꓘꓹ 10 ꓟ ꓗꓪ꓾ ꓙ ꓖꓴ ꓫꓸ ꓟ ꓡꓰꓽ ꓟꓽ ꓞꓲꓺ ꓶꓻ ꓤ ꓚꓬ ꓢꓲꓸ ꓒꓵꓽ ꓮ ꓘꓶꓸ ꓟꓴ ꓓꓯ ꓡ ꓟ ꓑꓶꓸ ꓓꓴ ꓜꓻ ꓒꓴ ꓕꓲ ꓟꓳ-ꓠꓳ ꓔꓯ ꓟꓳ-ꓓꓳ ꓚꓰꓹ ꓒꓵꓽ ꓐꓰ ꓕꓲ ꓪꓽ 3 ꓫꓬꓹ ꓟꓽ ꓞꓲꓺ ꓖꓶꓽ ꓠ ꓗꓷ ꓡꓰ ꓠꓬꓲ ꓖꓳ ꓗꓪ ꓔꓬ ꓟ ꓑ ꓫꓬꓼ ꓐꓴ ꓜꓽ ꓓꓴ ꓫꓸ ꓡꓰ ꓔꓬ ꓟ ꓫꓵꓽ ꓪꓴ ꓔꓳꓹ ꓜꓳꓽ ꓔꓬꓹ ꓪ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓮ ꓟꓶ ꓟꓶꓽ ꓦ ꓦ ꓝꓲꓸ ꓶꓻ ꓤ ꓚꓬ ꓢꓲꓸ ꓒꓵꓽ ꓟꓴ ꓓꓯ ꓡ ꓔꓬ ꓕꓯ ꓜꓻ ꓒꓴ ꓪꓴ ꓜꓽ ꓓꓴ ꓐꓱ ꓶ ꓫꓸ ꓔꓬ ꓟˍ ꓡꓰ ꓐꓰ꓾ ꓗꓳꓸ ꓗꓷ ꓟ 2022 ꓘꓳꓼ ꓕꓯ ꓜꓻ ꓟꓲ ꓗꓪ ꓦꓯꓹ ꓒꓶꓼ ꓮ ꓘꓶꓸ ꓖꓪ ꓡ ꓟ ꓑꓶꓸ ꓓꓴ ꓖꓳ ꓕꓲ ꓖ ꓗꓪ ꓟ ꓑ ꓫꓬꓼ ꓐꓴ ꓠꓬ ꓬꓲ ꓪ ꓔꓶ ꓔ ꓟ ꓜꓻ ꓐꓴ ꓔꓯ ꓶꓼ ꓫ ꓟꓽ ꓟꓶ ꓟ ꓥ ꓡꓳ꓾ ꓐꓰ ꓘꓴ ꓜꓲꓼ ꓞꓳ ꓟꓸ ꓒ ꓙ-ꓬꓳ ꓡꓰ ꓐꓯ ꓡꓳ=

ꓖꓳ ꓡꓱ ꓫꓸ ꓔꓬ ꓟ ꓞꓳ ꓘꓹ ꓐꓴ ꓗꓪ ꓧꓶꓸ ꓕꓯ ꓕꓯ ꓡꓰ ꓙ ꓖꓴ ꓫꓸ ꓟ ꓑꓶꓸ ꓓꓴ ꓜꓻ ꓟꓲ ꓔꓶ ꓜꓽ ꓢꓲ ꓠꓬꓲ ꓕꓲ ꓘꓳꓼ ꓐꓱ ꓶ ꓜꓽ ꓓꓴ ꓔꓯ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓔꓶ ꓔ ꓟ ꓗꓪ ꓐꓰ ꓫ ꓔꓬ ꓪ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓗꓳꓸ ꓗꓷ ꓟ 2022 ꓘꓳꓼ ꓕꓯ ꓜꓻ ꓟꓲ ꓮ ꓙꓵꓽ ꓠꓬ ꓦꓯꓹ ꓒꓶꓼ ꓐꓴ ꓡꓰ ꓒꓬ ꓗꓷ ꓟ ꓑꓶꓸ ꓓꓴ ꓜꓻ ꓒꓴ ꓫ ꓟꓽ ꓪ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓗꓪ ꓛꓲ ꓬꓰ ꓠꓹ ꓟ ꓠꓬ ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓐꓰ ꓟꓳ-ꓓꓳ ꓙ ꓖꓴ ꓗꓪ ꓐꓰ ꓕꓲ ꓔꓳꓸ꓾ ꓬꓲꓻ ꓙꓬ ꓗꓪ ꓐꓰ ꓕꓲ ꓔꓳꓸ ꓙꓰ ꓪˍ ꓟ ꓥ ꓢꓲ꓾ ꓡꓳ ꓒꓱ ꓗꓪ ꓐꓰ ꓲ-ꓕꓯꓹ-ꓜꓴꓑ ꓗꓪ ꓛꓲ ꓙꓰ ꓠꓹ ꓟ ꓠꓬ ꓕꓲ ꓣꓳ ꓐꓱ ꓶ ꓙ ꓖꓴ ꓒꓵꓽ 2 ꓫꓬꓹ ꓟꓽ ꓛꓲꓺ ꓖꓴ ꓡꓰˍ ꓟ ꓑꓶꓸ ꓓꓴ ꓙꓰ ꓙꓰ ꓡ ꓡ ꓬꓰ ꓠꓹ ꓟ ꓫꓸ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓟ ꓑꓶꓸ ꓓꓴ ꓢꓴꓟ-ꓑ-ꓣ-ꓐꓴꓟ ꓡꓳ ꓒꓱ ꓲ-ꓬ-ꓪ-ꓓꓲ ꓬꓲꓻ ꓙꓬ ꓪꓴꓸ ꓗꓪ ꓔꓬ ꓢꓴ ꓐꓴ ꓠꓬ ꓫꓸ ꓓꓴ ꓗꓪ ꓐꓰ ꓡꓲꓹ ꓗꓷ ꓐ ꓡ ꓠꓹ ꓟ ꓐꓱ ꓶ ꓟꓲ-ꓠꓲ-ꓚ ꓡꓳ ꓒꓱ ꓗꓪ ꓔꓬ ꓟ ꓬꓲ ꓪ ꓫꓵꓽ ꓤ ꓧꓪ ꓤ ꓐꓴ ꓔꓬ ꓗꓪ ꓚꓵꓸ ꓙꓰ ꓗꓷ ꓢꓴˍ ꓟꓲ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=