ꓚꓬꓸ-ꓑꓳ-ꓛ ꓘꓹ ꓗꓪ ꓪꓴ-ꓢ ꓔꓯ ꓫꓸ ꓟꓳˍ ꓟ ꓐꓰ ꓜ ꓫꓵꓼ ꓜ ꓑꓮꓲꓽ ꓬꓰ ꓗꓷ ꓟ

ꓚꓬꓸ-ꓑꓳ-ꓛ ꓘꓹ ꓗꓪ ꓪꓴ-ꓢ ꓔꓯ ꓫꓸ ꓟꓳˍ ꓟ ꓐꓰ ꓜ ꓫꓵꓼ ꓜ ꓑꓮꓲꓽ ꓬꓰ ꓗꓷ ꓟ

ꓟꓲ-ꓚꓲ-ꓠ ꓡꓳ ꓒꓱ ꓚꓬꓸ-ꓑꓳ-ꓛ ꓘꓹ ꓗꓪ ꓘꓳꓹ ꓣꓴ ꓟꓶ ꓔ ꓟ ꓜꓽ ꓪꓳꓽ ꓡꓳ ꓪꓳꓽ ꓐꓱ ꓶ ꓪꓴ-ꓢ ꓔꓯ ꓫꓸ ꓟꓳˍ ꓟ ꓐꓰ ꓜ ꓫꓵꓼ ꓜꓽ ꓑꓮꓲꓽ ꓔꓯ 2022 ꓘꓳꓼ 11 ꓦ 20 ꓠꓬꓲ ꓠꓽ ꓦꓬꓼ ꓠꓬꓲ꓾ ꓠꓯꓼ 9ꓽ00 ꓙꓵꓹ ꓕꓯ ꓔꓲꓺ ꓒ ꓑꓰꓔꓰꓣ ꓜ-ꓬꓳꓸ-ꓒꓴ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓬꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓫꓸ ꓟꓳ ꓑꓮꓲꓽ ꓬꓰˍ ꓟ ꓬꓲ ꓔꓶꓺ ꓙꓱꓼ ꓠꓬ “ꓘꓳꓹ ꓣꓴ ꓟꓶ ꓡꓰ ꓗꓷ ꓟ ꓜꓽ ꓪꓳꓽ ꓡꓳꓽ ꓪꓳꓽ ꓐꓴ ꓔꓯ ꓧꓶꓸ ꓕꓯ ꓪꓴ-ꓢ ꓔꓯ ꓫꓸ ꓟꓳ ꓔꓲꓺ ꓖꓶˍ ꓟ ꓥ ꓡꓳ”꓾ ꓐꓰ ꓢꓷꓸ ꓪ ꓡꓳ=

ꓑꓮꓲꓽ ꓕꓱ ꓟ ꓐꓰ ꓗꓴꓸ ꓙꓲ ꓙꓳ ꓢꓲ ꓟꓲ-ꓢ ꓪꓽ ꓘꓴˍ ꓟ ꓙꓵꓹ ꓗꓪ ꓓꓰꓮꓚꓳꓠ ꓙꓳꓢꓰꓑꓧ ꓛꓪ-ꓔ ꓡꓰ ꓠꓬꓲꓸ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓘꓳꓼ ꓗꓪ ꓡꓳꓹ ꓬꓰˍ ꓕꓲ ꓠꓽ ꓟ ꓥ ꓢꓲ ꓠꓬꓲ ꓬꓰ-ꓢꓴ ꓪ ꓔꓲ ꓑꓮꓲꓽ ꓔꓯ ꓥˍ ꓟꓲ ꓬꓰ ꓔꓬ ꓟ ꓥ ꓡꓳ= ꓝ ꓢꓲ ꓠꓬꓲ ꓞꓳ ꓘꓹ ꓕꓱ ꓟ ꓗꓪ ꓐꓰ ꓪꓴ-ꓢ ꓔꓯ ꓫꓸ ꓟꓳ ꓑꓮꓲꓽ ꓬꓰˍ ꓟ ꓠꓬ ꓮ ꓘꓶꓸ ꓙꓲˍ ꓟ꓾ ꓬꓰ ꓙꓲ ꓙꓳˍ ꓟ꓾ ꓕꓲ ꓘꓳꓼ ꓡꓱꓸꓼ ꓘꓳ ꓣꓴ ꓪˍ ꓟ ꓣꓱꓽ ꓛꓰꓽ ꓐꓱ ꓶ ꓪꓴ-ꓢ ꓔꓯ ꓫꓸ ꓟꓳ ꓠꓯꓹ ꓟ꓾ ꓙ ꓣꓳˍ ꓟ ꓠꓲꓹ ꓟ ꓡꓰ ꓪꓴ-ꓢ ꓔꓯ ꓫꓸ ꓟꓳˍ ꓟ꓾ ꓕꓱ ꓟ ꓠꓬ ꓮ ꓘꓶꓸ ꓙꓲˍ ꓟ ꓥ ꓡꓳ꓾ ꓐꓰ ꓶꓼ ꓓꓳ ꓫꓱꓹ ꓓꓳ ꓚˍ ꓕꓯ ꓐꓯ ꓗꓷꓳ=

ꓟꓲ-ꓢ ꓬꓰ ꓪꓽ ꓘꓴ ꓓꓳ ꓡꓰ ꓕꓯ ꓚꓬꓸ-ꓑꓳ-ꓛ ꓘꓹ ꓗꓪ ꓟ ꓟꓹ ꓟ ꓜꓴꓻ ꓐꓴ꓾ ꓞꓳ ꓡꓱ ꓐꓴ꓾ ꓤ ꓠꓱ ꓤ ꓐꓴ ꓡꓰ ꓟꓴꓽ ꓖꓪ ꓖꓪ ꓠꓬꓲ꓾ ꓛꓲ ꓡꓵ ꓡꓯꓼ ꓡꓵ ꓬꓰ ꓢꓲ ꓪꓽ ꓘꓴˍ ꓟ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ=

ꓟꓲ-ꓚꓲ-ꓠ ꓡꓳ ꓒꓱ꓾ꓚꓬꓸ-ꓑꓳ-ꓛ ꓞꓳ ꓘꓹ ꓗꓪ ꓠꓬ ꓞꓳ ꓦꓲꓻ 400 ꓦꓲꓻ ꓟꓽ ꓞꓲꓺ ꓙꓳˍ ꓟ ꓥ ꓢꓲ꓾ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ 20 ꓦꓲꓻ ꓟꓽ ꓞꓲꓺ ꓙꓳˍ ꓟ ꓞꓳ ꓘꓹ ꓕꓲ ꓟ ꓥ ꓡꓳ=