ꓞꓬꓸ-ꓔ-ꓬꓴꓮ ꓘꓹ ꓗ-ꓔꓳ-ꓡꓲꓗ ꓔꓲꓺ ꓒ ꓐꓴ ꓔꓯ ꓠ ꓠꓬꓲ ꓚꓰꓼ ꓠꓬꓲ ꓗꓷ ꓢꓲ ꓔꓲꓺ ꓒ 6 ꓣꓳ ꓔꓯ ꓣꓴ ꓔꓯꓹ ꓙꓰ ꓗꓷꓳ

ꓞꓬꓸ-ꓔ-ꓬꓴꓮ ꓘꓹ ꓗ-ꓔꓳ-ꓡꓲꓗ ꓔꓲꓺ ꓒ ꓐꓴ ꓔꓯ ꓠ ꓠꓬꓲ ꓚꓰꓼ ꓠꓬꓲ ꓗꓷ ꓢꓲ ꓔꓲꓺ ꓒ 6 ꓣꓳ ꓔꓯ ꓣꓴ ꓔꓯꓹ ꓙꓰ ꓗꓷꓳ

ꓟꓯꓸ-ꓔ-ꓡꓰꓸ ꓗ-ꓔꓳ-ꓡꓲꓗ ꓢ-ꓢꓶ-ꓠꓽ꓾ ꓢꓲ-ꓗꓮꓲꓸ ꓗꓴꓷꓼ ꓫꓴ꓾ ꓬꓰ-ꓴ ꓡꓳ ꓒꓱ꓾ ꓞꓬꓸ-ꓔ-ꓬꓴꓮ ꓘꓹ ꓗꓪ 6 ꓦ 12 ꓠꓬꓲ ꓟꓶꓽ ꓘꓶꓼ ꓕꓯ ꓟꓯꓼ ꓟꓳ ꓓꓳ 9 ꓒꓽ ꓓꓵꓽ ꓡ ꓗꓷ ꓢꓲ꓾ ꓐꓴ-ꓓ ꓪꓽ ꓘꓴ ꓦꓲ꓾ ꓗ-ꓔꓳ-ꓡꓲꓗ ꓔꓲꓺ ꓒ ꓐꓴ ꓦꓲ ꓐꓰ ꓔꓲꓺ ꓟ ꓦꓲ ꓐꓴ ꓔꓯ ꓓꓵꓽ ꓙꓰ ꓡꓳꓸ ꓠꓬꓲ ꓬꓰ ꓢꓲ ꓠꓱꓸ ꓐꓯꓼ ꓡꓳ ꓒꓱ ꓗꓪ ꓐꓰ ꓛꓲꓺ ꓡ ꓟ ꓔꓲꓺ ꓒ 6 ꓣꓳ ꓐꓰ ꓘꓴ-ꓜꓲ-ꓞꓳ ꓢꓲꓺ ꓤ ꓕꓲ ꓣꓳ ꓔꓯ ꓘꓴ ꓔꓯꓹ ꓙꓰ ꓗꓷꓳ= ꓘꓹ ꓡ ꓞꓳ ꓐꓴˍ ꓟꓲ ꓖꓳ ꓕꓲ ꓦꓬꓽ ꓗꓪ ꓡꓰꓽ ꓠꓱꓸ ꓐꓯꓼ ꓕꓲ ꓖ ꓗꓪ ꓚꓵꓸ ꓙꓰ ꓢꓲ ꓬꓲ ꓪ ꓐꓴ ꓘꓴꓽ ꓗꓪ ꓧꓪꓽ ꓖꓳ ꓓꓱ ꓔꓬ ꓟꓽ ꓢ ꓐꓴˍ ꓟꓲ ꓐꓹ ꓡꓳ=

6 ꓦ 13 ꓠꓬꓲ ꓠꓽ-ꓦꓬꓼ-ꓠꓬꓲ ꓟꓳꓼ ꓡꓳ ꓕꓯ ꓠꓬ ꓔꓲꓺ ꓒ ꓐꓴ ꓡꓰ ꓬꓲ ꓪ ꓚꓲꓸ ꓛꓬ ꓦꓲꓻ ꓗꓪ ꓬꓲꓼ ꓛꓲ ꓡ ꓗꓷ ꓟ ꓥꓳ꓾ ꓐꓰ ꓔꓲꓺ ꓒ ꓕꓲ ꓣꓳ ꓡꓰ ꓢꓷꓸ ꓙ ꓟꓳ ꓙ ꓢꓲ ꓐꓯ ꓑꓶ ꓗꓷꓳ=

ꓫꓵꓽ ꓪꓴ ꓕꓱ ꓟ ꓠꓬ ꓟꓽ ꓥ ꓟ ꓓꓳꓽ ꓖꓶꓽ ꓗꓷ ꓟ ꓪꓴꓸ ꓠꓬꓲ ꓥ ꓟ꓾ ꓞꓬꓸ-ꓔ-ꓬꓴꓮ ꓘꓹ ꓗꓪ ꓐꓴ-ꓓ ꓪꓽ ꓘꓴ ꓦꓲ ꓐꓰ ꓗ-ꓔꓳ-ꓡꓲꓗ ꓔꓲꓺ ꓒ ꓐꓴ ꓦꓲ ꓗꓪ ꓗꓴꓷꓼ ꓫꓵꓽ ꓜꓴ ꓜꓲꓼ ꓙꓵꓽ ꓚꓱꓹ ꓫꓬꓹ ꓜꓴ ꓗꓪ ꓟ ꓢꓲꓽ ꓒ ꓕꓲ ꓣꓳ ꓔꓯ ꓑꓬ ꓠꓬꓹ ꓔꓬ ꓝꓲˍ ꓡꓳ꓾ ꓐꓯ ꓟ ꓓꓳꓽ ꓔꓯ ꓕꓲ ꓣꓳ ꓣꓳ ꓗꓪ ꓐꓰ ꓐꓯ ꓖꓶ ꓗꓷ ꓟ ꓪꓴꓸ ꓠꓬꓲ ꓬꓲ ꓪ ꓓꓵꓽ ꓙꓰ ꓢꓲ ꓟꓰꓹ ꓠ ꓠꓬꓲ ꓚꓰꓼ ꓠ ꓠꓬꓲ ꓗꓷ ꓟ ꓥ ꓡꓳ꓾ ꓐꓰ ꓐꓯ ꓡꓳ=

ꓠꓱꓸ ꓐꓯꓼ ꓕꓲ ꓖ ꓗꓪ ꓚꓵꓸ ꓙꓰ ꓔꓷꓹ ꓙꓰ ꓗꓷ ꓟ ꓘꓹ ꓡ ꓞꓳ ꓐꓴˍ ꓟꓲ 6 ꓦ 13 ꓠꓬꓲ ꓠꓯꓼ ꓠꓯꓼ ꓕꓯ ꓘꓹ ꓗꓪ ꓬꓲꓼ ꓛꓲ ꓡ ꓟ ꓥꓳ=