ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓟꓵꓽ ꓗꓪ ꓟ ꓞꓳ ꓦꓲꓻ ꓐꓴ ꓐꓱ ꓶ ꓪꓝꓑ ꓡꓰ ꓰꓴ ꓒꓴ 60 ꓫꓬꓹ ꓬꓰ ꓙ ꓗꓷꓳ

Friday, December 09, 2022

ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓟꓵꓽ ꓗꓪ ꓟ ꓞꓳ ꓦꓲꓻ ꓐꓴ ꓐꓱ ꓶ ꓜꓽ ꓓꓴ ꓓꓳꓻ ꓓꓴ꓾ ꓒꓴ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓜꓽ ꓫꓵꓽ ꓐꓴ ꓔꓯ ꓪꓴꓸ ꓔꓴ ꓢꓲ ꓬꓰ ꓙ ꓖꓶ ꓔꓬꓹ ꓡꓳ ꓐꓰ ꓟꓲ ꓠꓯ ꓜꓽ ꓓꓴ ꓓꓳꓻ ꓓꓴ ꓜꓴꓻ ꓪꓝꓑ ꓡꓰ ꓐꓯ ꓟ ꓗꓪ ꓐꓰ ꓢꓷꓸ ꓪ ꓡꓳ=

ꓰꓴ (ꓰꓴꓣꓳꓑꓰꓮꓠ ꓴꓠꓲꓳꓠ) ꓡꓰ ꓬꓴ-ꓣꓳ 60 ꓫꓬꓹ ꓐꓶꓽ (ꓟꓬ-ꓟ ꓒꓴ 150ꓹ000 ꓫꓬꓹ ꓛꓲꓺ) ꓔꓯ ꓖꓶ ꓔ ꓟ ꓥ ꓢꓲ ꓡ ꓞꓳ 80 ꓫꓬꓹ ꓟꓽ ꓞꓲꓺ ꓔꓯ ꓬꓰ ꓙ ꓐ ꓡˍ ꓥꓳ꓾ ꓐꓰ ꓐꓯˍ ꓡꓳ=

ꓟꓬ-ꓟ ꓗꓴꓷꓼ ꓐꓶ ꓓꓳ ꓖꓴ ꓟꓶꓸ ꓟꓵꓽ꓾ ꓐꓶ ꓓꓵꓽ ꓐꓴ ꓪꓴꓸ ꓟꓵꓽ ꓐꓰ ꓟꓵꓽ ꓫꓸ ꓗ ꓗꓪ ꓟ ꓮ ꓟꓬꓹ ꓖ ꓗꓪ ꓪꓴꓸ ꓔꓴ ꓢꓲ ꓬꓰ ꓙ ꓔꓬ ꓟ ꓥ ꓢꓲ꓾ ꓟꓽ ꓟꓶ ꓫꓵ ꓕꓯ ꓠꓬ ꓫꓸ ꓟ ꓡꓳ ꓒꓱ ꓐꓴ ꓗꓪ ꓛꓲ ꓡˍ ꓥꓳ ꓐꓰ ꓪꓝꓑ ꓗꓪ ꓐꓰ ꓢꓷꓸ ꓪ ꓡꓳ=

ꓮ ꓟꓶ ꓟꓬ-ꓟ ꓗꓴꓷꓼ ꓗꓪ ꓟ ꓟꓬ-ꓟ ꓞꓳ ꓫꓵꓽ 150 ꓫꓬꓹ ꓛꓲꓺ ꓠꓬ ꓜꓽ ꓓꓴ ꓓꓳꓻ ꓓꓴ ꓫꓸ ꓔꓬ ꓟ ꓥ ꓡꓳ=

ꓮ ꓜꓴꓸ ꓬꓼ ꓟꓽ ꓥ ꓟ ꓠꓱꓸ ꓐꓯ ꓬꓰ ꓙ ꓜꓴꓻ ꓗꓪ ꓐꓰ ꓕꓲ ꓝꓸ ꓚꓵ ꓚꓵ ꓣꓱꓽ ꓞꓹ ꓢꓴ ꓔꓯ ꓬꓰ ꓙ ꓔꓬ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ=

2022 ꓘꓳꓼ ꓘꓳꓼ ꓪꓴꓸ ꓗꓪ ꓐꓰ ꓪꓴꓸ ꓔꓴ ꓢꓲ ꓪꓝꓑ ꓠꓬ ꓕꓲ ꓗꓴꓷꓼ ꓡꓱꓸꓼ ꓗꓪ ꓟ ꓡ ꓞꓳ 30 ꓫꓬꓹ ꓐꓱ ꓶ ꓜꓽ ꓓꓴ ꓐꓰ ꓶꓻ ꓡꓯꓼ ꓬꓰ ꓚꓱꓹ ꓐꓴ ꓗꓪ ꓬꓰ ꓙ ꓖꓶ ꓐ ꓡ ꓢꓲ ꓠꓬꓲ꓾ ꓮ ꓟꓶ ꓗꓪ ꓟꓯꓽ ꓘꓶꓽ ꓗꓪ ꓫꓸ ꓔꓬ ꓟ ꓚꓧꓲꓠ꓾ ꓗ-ꓬ꓾ ꓟ-ꓖꓪꓮꓬ ꓐꓰ ꓢꓲꓖꓮꓲꓠꓖ ꓟꓵꓽ ꓐꓴ ꓗꓪ ꓐꓰ ꓟꓬꓽ ꓠꓬꓲ ꓬꓰ ꓙ ꓠꓹ ꓟ ꓣꓱꓽ ꓞꓹ ꓟ ꓗꓪ ꓙꓰ ꓢꓲ ꓬꓰ ꓙ ꓖꓶ ꓐ ꓡ ꓠꓹ ꓟ ꓮ ꓟꓬꓹ ꓫ ꓓꓴ ꓙꓳ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

Credit Photo