ꓟꓲꓽ ꓦꓲ ꓮ ꓘꓶꓸ ꓙꓱꓼ ꓡ ꓟ ꓑꓶꓸ ꓓꓴ ꓑꓬꓮꓪ-ꓒꓪꓰ ꓡꓳ ꓒꓱ ꓗꓪ ꓞꓳ ꓦꓲꓻ 70ꓻ ꓟꓽ ꓞꓲꓺ ꓐꓬ ꓡꓰ ꓟ ꓓꓳꓽ

ꓟ-ꓓ-ꓡꓰꓹ ꓟꓵꓽ ꓫꓴ꓾ ꓑꓬꓮꓪ-ꓒꓪꓰ ꓡꓳ ꓒꓱ ꓗꓯ-ꓔꓯꓸ ꓞꓳ ꓘꓹ ꓗꓪ 4 ꓦ 29 ꓠꓬꓲ ꓟꓶꓽ ꓘꓶꓼ ꓕꓯ ꓟꓲꓽ ꓦꓲ ꓮ ꓘꓶꓸ ꓙꓱꓼ ꓗꓷ ꓟ ꓑꓶꓸ ꓓꓴ ꓞꓳ ꓦꓲꓻ 71 ꓢꓶꓽ ꓐꓬ ꓡꓰꓳ꓾ ꓐꓰ ꓞꓳ ꓘꓹ ꓗꓪ ꓔꓬ ꓢꓴ ꓐꓴ ꓐꓰ ꓑꓬꓮꓪ-ꓒꓪꓰ ꓮ ꓔꓳꓸ ꓢꓰꓼ ꓜꓴ ꓗꓪ ꓐꓰ ꓐꓯ ꓡꓳ=

ꓟꓶꓽ ꓘꓶꓼ 6ꓽ30 ꓙꓵꓹ ꓛꓲ ꓕꓯ ꓟꓲꓽ ꓦꓲ ꓮ ꓘꓶꓸ ꓙꓱꓼ ꓡ ꓠꓬꓲ ꓦꓲꓻ ꓑꓲꓸ ꓔ ꓟ ꓐꓰ ꓗꓽ ꓔ ꓟ ꓐꓬ ꓡꓰ ꓟ ꓙꓳˍ ꓡꓳ꓾ ꓐꓰ ꓑꓬꓮꓪ-ꓒꓪꓰ ꓡꓳ ꓒꓱ ꓮ ꓔꓳꓸ ꓢꓰꓼ ꓜꓴ ꓗꓪ ꓧꓳꓽ ꓣꓱꓽ ꓔꓬ ꓢꓴ ꓕꓲ ꓣꓳ ꓡꓰ ꓐꓯ ꓡꓳ= ꓖꓳ ꓡꓱ ꓥ ꓟꓲ ꓞꓳ ꓘꓹ ꓢꓴ ꓐE ꓙꓱꓽ ꓤ ꓐꓴ NY ꓠꓻ ꓓꓴ ꓓꓴ ꓡꓰ ꓟ ꓠꓽ ꓟꓽ ꓙꓳ꓾ ꓐꓰˍ ꓟꓲ ꓢꓷꓸ ꓪ ꓡꓳ=

ꓐꓬ ꓡꓰ ꓟ ꓦꓲꓻ 71 ꓢꓶꓽ ꓗꓪ ꓔꓬ ꓢꓴ 242 ꓣꓳ ꓙꓳˍ ꓥ ꓟꓲ꓾ ꓐꓬ ꓡꓰ ꓟ ꓔꓯ ꓝꓮꓲ ꓫꓬꓹ ꓗꓷ ꓠꓬ ꓔꓬ ꓠ ꓡꓰꓳ꓾ ꓐꓰ ꓢꓷꓸ ꓪ ꓡꓳ= ꓗꓯ-ꓔꓯꓸ ꓞꓳ ꓘꓹ ꓠꓬ ꓞꓳ ꓦꓲꓻ 400 ꓦꓲꓻ ꓛꓲ ꓙꓳˍ ꓟ ꓥ ꓢꓲ꓾ ꓑꓬꓮꓪ-ꓒꓪꓰ ꓡꓳ ꓒꓱ ꓐꓶꓻ ꓓꓵꓽ ꓕꓲ ꓛꓱꓽ ꓡꓳ ꓔ 27 ꓕꓷꓹ ꓛꓲ ꓗꓪ ꓙꓳˍ ꓟ ꓥ ꓡꓳ=

5 ꓦ 3 ꓠꓬꓲ ꓗꓪ ꓐꓰ 5 ꓠꓬꓲ ꓗꓪ ꓛꓲ꓾ ꓟ-ꓓ-ꓡꓰꓹ ꓟꓵꓽ ꓫꓴ ꓐꓰ ꓠꓱꓸ ꓐꓯ ꓗꓴꓷꓼ ꓫꓴ꓾ ꓟꓵꓽ ꓫꓴ ꓐꓴ ꓗꓪ ꓟꓶꓽ ꓦ ꓬꓲ ꓓꓽ ꓟ ꓡꓲ ꓡ ꓓꓴ ꓙꓳˍ ꓟ ꓥ ꓢꓲ꓾ ꓟꓴ ꓗꓴꓸ ꓢꓯꓼ ꓪꓽ ꓠꓬꓲˍ ꓟ ꓟꓵꓽ ꓐꓴ ꓗꓪ ꓟꓲꓽ ꓦꓲ ꓙꓱꓼˍ ꓟ ꓢꓯꓼ ꓮ ꓘꓶꓸ ꓪꓽ ꓠꓬꓲ ꓡ ꓓꓴ ꓥꓳ꓾ ꓐꓰ ꓟꓵꓽ ꓘꓳꓼ ꓔꓯ ꓟꓳꓸ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓡꓰ 4 ꓦ 29 ꓠꓬꓲ ꓕꓯ ꓐꓯ ꓑꓶ ꓔ ꓟ ꓙꓳˍ ꓡꓳ=