ꓟꓳꓠ ꓗꓴꓷꓼ ꓫꓴ꓾ ꓜꓰꓹ-ꓗꓬꓮꓲꓔ ꓡꓳ ꓒꓱ ꓗꓪ ꓮ ꓟꓰ ꓠꓯꓼ ꓕꓯ ꓤ ꓠꓱ ꓤ 9 ꓣꓳ ꓐꓰ ꓕꓲ ꓪꓽ ꓮ ꓟꓬꓹ ꓣꓳ ꓔꓯ ꓮꓸ ꓠꓽ ꓪꓴꓸ ꓘꓳꓼ ꓗꓷ ꓟ

Monday, November 28, 2022

ꓟꓳꓠ ꓗꓴꓷꓼ ꓫꓴ꓾ ꓜꓰꓹ-ꓗꓬꓮꓲꓔ ꓡꓳ ꓒꓱ ꓗꓪ 11 ꓦ 27 ꓠꓬꓲ ꓠꓯꓼ ꓙꓵꓹ ꓕꓯ ꓤ ꓠꓱ ꓤ 9 ꓣꓳ ꓐꓰ ꓕꓲ ꓪꓽ ꓮ ꓟꓬꓹ ꓣꓳ ꓐꓴ ꓔꓯ ꓮꓸ ꓠꓽ ꓪꓴꓸ ꓡꓰ ꓘꓳꓼ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓠꓯꓼ 9 ꓙꓵꓹ ꓛꓲꓺ ꓕꓯ ꓒ-ꓡꓯꓸꓼ ꓞꓳ ꓘꓹ ꓕꓯꓽ ꓢꓲ ꓗꓪ ꓔꓬꓹ ꓟ ꓤ ꓠꓱ ꓤ ꓐꓴ ꓔꓯ ꓪꓴꓸ ꓔꓬ ꓟ ꓮꓸ ꓠꓽ ꓡꓰ ꓘꓳꓼ ꓗꓷ ꓗ ꓠꓯꓸ꓾ ꓒ-ꓡꓯꓸꓼ ꓙꓲ-ꓔꓲ ꓒ ꓕꓲꓺ ꓗꓪ ꓥˍ ꓟꓲ 3 ꓣꓳ ꓔꓯ ꓘꓳꓼ ꓗꓷ ꓗ ꓠꓯꓸ ꓘ-ꓡꓮꓴꓔ-ꓲꓠꓠꓹ ꓘꓹ ꓔꓯ ꓟꓳꓸ ꓙꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓟ ꓪꓴꓸ ꓠꓬꓲ ꓮꓸ ꓠꓽ ꓪꓴꓸ ꓘꓳꓼ ꓗꓷ ꓟ ꓟꓶ ꓡꓰ ꓢꓴ ꓤ ꓠꓱ ꓤ 9 ꓣꓳ ꓔꓯ ꓑꓮꓴꓠꓖ ꓡꓳ ꓒꓱ ꓠꓯꓻ ꓞꓲꓼ ꓫꓬꓹ ꓦꓲꓻ ꓗꓪ ꓧꓳꓽ ꓢꓲ ꓠꓯꓻ ꓞꓲꓼ ꓫꓬꓹ ꓖꓶ ꓢꓲ ꓠꓬꓲ ꓮ ꓸ ꓠꓽ ꓪꓴꓸ ꓠꓻ ꓗꓽ ꓕꓸ ꓓꓴ ꓠꓯꓻ ꓞꓲꓼ ꓥˍ ꓟꓲ ꓗꓸ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓜꓰ ꓞꓹ ꓟ ꓮꓸ ꓠꓽ ꓪꓴꓸ ꓘꓳꓼ ꓗꓷ ꓟꓶ ꓡꓰ ꓢꓴ ꓐꓴ ꓔꓯ ꓥˍ ꓟꓲ ꓮꓸ ꓠꓽ ꓪꓴꓸ ꓠꓻ ꓗꓽ ꓠꓯꓻ ꓞꓲꓼ ꓗꓸ ꓖꓶ ꓠꓹ ꓟ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓧꓪ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓤ ꓠꓱ ꓤ ꓐꓴ ꓐꓰ ꓞꓳ ꓤ ꓮ ꓟꓬꓹ ꓔꓯ ꓘꓳꓼ ꓗꓷ ꓢꓲ ꓛꓰꓹ ꓙꓰ ꓟ ꓮꓸ ꓠꓽ ꓔꓯ ꓘ-ꓡꓮꓴꓔ-ꓲꓠꓠꓹ ꓞꓳ ꓘꓹ ꓗꓪ ꓟ ꓙ ꓖꓴ ꓕꓲ ꓟ ꓗꓪ ꓟꓳꓻ ꓡꓰ ꓠꓬꓲ ꓟꓯꓼ ꓕꓲ ꓣꓳ ꓡꓰ ꓮꓸ ꓠꓽ ꓖꓳ ꓟ ꓔꓯ ꓑꓳ ꓢꓰꓼ ꓗꓷꓳ꓾ ꓐꓰ ꓢꓷꓸ ꓪ ꓡꓳ=