ꓟꓳ-ꓘ ꓟꓲꓽ ꓦꓲ ꓕꓳꓽ ꓥꓳꓽ ꓑꓶꓸ ꓓꓴ ꓫꓸ ꓙꓵ ꓡꓰ ꓢꓴ ꓟꓬ-ꓟ ꓑ ꓫꓬ ꓐꓴ ꓔꓯ ꓢꓲꓠꓖꓮꓑꓳꓣꓰ ꓡꓰ ꓴꓢ ꓓꓳ-ꓡ 50ꓹ000 ꓬꓰ ꓙ ꓓꓴ ꓥꓳ

ꓬꓲ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ ꓟꓳ-ꓘ ꓚꓬꓚꓡꓳꓠꓰ ꓟꓲꓽ ꓦꓲ ꓕꓳꓽ ꓥꓳꓽ ꓑꓶꓸ ꓓꓴ ꓫꓸ ꓙꓵ ꓡꓰ ꓢꓴ ꓟꓬ-ꓟ ꓑ ꓫꓬ ꓐꓴ ꓔꓯ ꓢꓲꓠꓖꓮꓑꓳꓣꓰ ꓬꓰ ꓙ ꓜꓴꓻ ꓡꓰ ꓮꓟꓰꓣꓲꓚꓮꓠ ꓒꓴ ꓓꓳ-ꓡ 50ꓹ000 ꓬꓰ ꓙ ꓔꓳꓹ ꓙˍ ꓥꓳ꓾ ꓐꓰ ꓢꓔꓣꓰꓰꓔ ꓔꓲꓟꓰ ꓓꓳꓽ ꓗꓪ ꓐꓯ ꓑꓶ ꓔ ꓡꓳ=

ꓢꓲꓠꓖꓮꓑꓳꓣꓰ ꓫꓸ ꓙꓵ ꓟꓶ ꓙꓵ ꓢꓴ ꓔꓯ ꓬꓰ ꓙˍ ꓟ ꓜꓴꓻ ꓗꓪ ꓟꓬꓱꓽ ꓙ ꓐꓰ ꓙꓵꓽ ꓪ ꓙꓳ ꓢꓴ ꓥ ꓟ ꓟꓣꓸ ꓐꓰꓠꓙꓮꓟꓲꓠ ꓪꓲꓡꓡꓲꓮꓟ ꓡꓰ꓾ ꓚꓬꓚꓡꓳꓠꓰ ꓟꓲꓽ ꓦꓲ ꓕꓳꓽ ꓥꓳꓽ ꓑꓶꓸ ꓓꓴ ꓐꓬ ꓡꓰ ꓟ ꓮ ꓙꓵꓽ ꓐꓰ꓾ ꓫꓵꓻ ꓢꓴ ꓐꓴ ꓙꓳˍ ꓟ ꓑꓶꓸ ꓓꓴ ꓥꓪ ꓠꓴꓽ ꓟꓲ ꓮ ꓘꓶꓸ ꓠꓲꓹ ꓟ ꓫꓸ ꓡꓳ= ꓟꓲꓽ ꓦꓲ ꓕꓳꓽ ꓥꓳꓽ ꓠꓬ ꓬꓲ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ ꓑꓶꓸ ꓓꓴ ꓣꓱꓽ ꓬꓯꓼ ꓣꓱꓽ ꓞꓹ ꓟ ꓮ ꓟꓬꓹ ꓙꓳ ꓡˍ ꓥꓳ= ꓖꓳ ꓟ ꓑꓶꓸ ꓓꓴ ꓑ ꓫꓬ ꓐꓴ ꓔꓯ ꓬꓰ ꓙ ꓐ ꓡ ꓠꓹ ꓟ ꓐꓱ ꓶ ꓥꓪ ꓠꓴꓽ ꓠꓬ ꓟꓬ-ꓟ ꓫꓸ ꓙꓵ ꓟꓶ ꓙꓵ ꓢꓴ ꓐꓴ ꓔꓯ ꓬꓰ ꓙ ꓢꓴ ꓜꓴꓻ ꓐꓴ ꓐꓰ ꓙ ꓡꓯ ꓘꓳ ꓢꓲ ꓬꓰ ꓔꓬ ꓡꓳ= ꓡꓯꓼ ꓫꓵˍ ꓟꓲ ꓬꓰ ꓙ ꓓꓴ ꓥꓳ꓾ ꓐꓰ ꓐꓯ ꓡꓳ=

ꓮ ꓟꓶ ꓟꓬꓽ ꓠꓬꓲ ꓬꓰ ꓙˍ ꓟ ꓔꓯ ꓣꓱꓽ ꓞꓹ ꓔꓬ ꓟ ꓠꓬ ꓣ-ꓘꓮꓲ꓾ Chin꓾ Sagaing ꓐꓰ Magway ꓟꓵꓽ ꓫꓴ ꓐꓰ ꓗꓴꓷꓼ ꓫꓴ ꓐꓴ ꓗꓪ ꓟ ꓡꓳ ꓒꓱ ꓮ ꓟꓬꓹ ꓗꓪ ꓮ ꓔꓳꓸ ꓐꓰ ꓲꓠꓔꓰꓣꓠꓰꓔ ꓚꓱꓹ ꓐꓬ ꓡꓰ ꓗꓷ ꓟ ꓑꓶꓸ ꓓꓴ ꓫꓸ ꓙꓵ ꓡꓰ ꓟ ꓑ ꓫꓬ ꓐꓴ ꓐꓰ ꓙ ꓡꓯ ꓘꓳ ꓠꓹ ꓟ꓾ ꓬꓲ ꓪ ꓡꓰ ꓬꓰ ꓙ ꓡ ꓠꓹ ꓟ ꓓꓰꓽˍ ꓟ ꓗꓪ ꓫꓸ ꓓꓴ ꓙꓳ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=