ꓟꓴ-ꓖꓴ ꓡꓳ ꓒꓱ ꓗꓪ ꓪꓽ ꓢꓶꓽ (ꓟꓶꓽ ꓦ ꓢꓶꓽ) ꓞꓰꓻ ꓡ ꓟ ꓑꓶꓸ ꓓꓴ ꓦꓲꓻ ꓑꓲꓸ ꓓꓴ ꓡꓯꓹ ꓒꓲꓼ (ꓑꓶ ꓕꓲꓼ) ꓐꓬ ꓡꓰ ꓗꓷ ꓟ

ꓟꓮꓠꓓꓮꓡꓮꓬ ꓟꓵꓽ ꓫꓴ꓾ ꓟꓴ-ꓖꓴ ꓡꓳ ꓒꓱ ꓗꓪ 3 ꓦ 13 ꓠꓬꓲ ꓟꓶꓽ ꓘꓶꓽ ꓗꓪ ꓟꓶꓽ ꓦ ꓦ ꓡ ꓕꓯ ꓪꓽ ꓢꓶꓽ (ꓟꓶꓽ ꓦ ꓢꓶꓽ) ꓞꓰꓻ ꓡ ꓟ ꓑꓶꓸ ꓓꓴ ꓦꓲꓻ ꓗꓪ ꓑꓲꓸ ꓔ ꓟ ꓡꓯꓹ ꓒꓲꓼ (ꓑꓶ ꓕꓲꓼ) ꓐꓴ ꓐꓬ ꓡꓰ ꓟ ꓙꓳˍ ꓟ ꓑꓶ ꓓꓴ 3 ꓦ 4 ꓠꓬꓲ ꓠꓯꓼ ꓙꓵꓹ ꓕꓯ ꓠꓬ ꓐꓬ ꓡꓰ ꓟ ꓦꓲꓻ ꓐꓴ ꓔꓯ ꓫꓬꓹ ꓑꓱ ꓔꓬ ꓪˍ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

“ꓮ ꓟꓰ (3 ꓦ 13) ꓟꓶꓽ ꓘꓶꓼ 11 ꓙꓵꓹ ꓛꓲꓺ ꓕꓯ ꓟꓶꓽ ꓦ ꓦ ꓪꓴꓸ ꓔꓴ ꓡ ꓗꓷ ꓢꓲ꓾ ꓟꓶꓽ ꓦ ꓦˍ ꓟ ꓮ ꓘꓶꓸ ꓪꓽ ꓠꓬꓲ ꓡ ꓢꓲ ꓠꓬꓲ ꓟꓴ-ꓖꓴ ꓕꓲ ꓡꓳ ꓒꓱ ꓡꓱꓸꓼ ꓐꓯ ꓠ ꓛꓲ ꓪꓽ ꓢꓶꓽ ꓞꓰꓻ ꓡ ꓟ ꓥ ꓡꓳ= ꓪ ꓢꓲꓽ(ꓟꓶꓽ ꓦ ꓢꓶꓽ) ꓠꓬ ꓮ ꓭꓸ ꓩꓴ ꓤ ꓤ ꓪꓴ ꓛꓲ ꓙꓳˍ ꓟ ꓥꓳ= ꓟꓴ-ꓖꓴ ꓡꓳ ꓒꓱ ꓗꓪ ꓙꓳˍ ꓟ ꓦꓲꓻ ꓗꓪ ꓑꓲꓸ ꓔ ꓟ ꓡꓯꓹ ꓒꓲꓼ (ꓑꓶ ꓕꓲꓼ) ꓠꓬ ꓐꓽˍ ꓟ ꓑꓶꓸ ꓓꓴ ꓦꓱ ꓡꓰ ꓐꓬ ꓡꓰ ꓟ ꓙꓳˍ ꓟ ꓥ ꓢꓲ꓾ ꓮ ꓟꓶ ꓠꓯꓼ ꓕꓯ ꓠꓬ ꓡꓯꓹ ꓒꓲꓼ (ꓑꓶ ꓕꓲꓼ) ꓬꓲ ꓫꓵꓼ ꓪꓴꓻ ꓔꓬ ꓪˍ ꓟ ꓙꓳˍ ꓡꓳ” ꓐꓰ ꓡꓰ-ꓴ ꓞꓳ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓟ ꓗꓪ ꓐꓰ ꓢꓷꓸ ꓪ ꓡꓳ=

ꓟꓴ-ꓖꓴ ꓡꓳ ꓒꓱ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓟꓶꓽ ꓦ ꓮ ꓟꓬꓹ ꓦˍ ꓟ ꓑꓶꓸ ꓓꓴ ꓬꓲꓻ ꓙꓬ ꓙꓵꓽ ꓬꓲꓻ ꓙꓬ ꓟꓶꓸ ꓡˍ ꓟ꓾ ꓡꓳꓽ-ꓓꓳ ꓧꓳꓹ (ꓡꓽ ꓧꓳꓹ ꓧꓳꓹ) ꓟ ꓒꓬꓱꓼ ꓡ ꓢꓲ ꓑ ꓫꓬ ꓐꓴ ꓥˍ ꓟꓲ ꓫꓵꓻ ꓢꓴ ꓫꓵꓻ꓾ ꓠꓻ ꓓꓴ ꓓꓴ ꓡꓰ ꓢꓴˍ ꓟꓲ ꓙꓳ ꓔꓬ ꓟ ꓥ ꓡꓳ= ꓟꓴ-ꓖꓴ ꓡꓳ ꓒꓱ ꓗꓪ ꓡꓰꓽ ꓟꓽ ꓞꓲꓺ ꓐꓶ-ꓬꓲ ꓗꓴꓷꓼ ꓫꓴ꓾ ꓬꓯꓸꓼ-ꓢꓮꓴꓸꓼ ꓡꓳ ꓒꓱ ꓗꓪ ꓥˍ ꓟꓲ 3 ꓦ 14 ꓠꓬꓲ ꓠꓯꓼ 3ꓽ00 ꓙꓵꓹ ꓛꓲꓺ ꓕꓯ ꓟꓶꓽ ꓦ ꓦ ꓔꓴ ꓡˍ ꓟ ꓗꓪ ꓟꓶꓽ ꓦ ꓢꓶꓽ (ꓪꓽ ꓢꓶꓽ) ꓐˍ ꓟ ꓑꓶꓸ ꓓꓴ ꓦꓲꓻ ꓐꓬ ꓡꓰ ꓟ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ