ꓟꓽ-ꓛꓹ-ꓐꓳ ꓠꓳꓖ-ꓟꓴꓠꓖ ꓟꓳ ꓓꓳ ꓙꓻ ꓖꓴ ꓗꓪ ꓡꓳꓽ ꓓꓳ ꓧꓳꓹ ꓗꓷ ꓢꓲ ꓙ ꓖꓴ ꓛꓵꓽ ꓡꓰ ꓟ

ꓟꓶꓽ ꓦ ꓠꓬ ꓠꓬꓲꓽ ꓫꓵꓽ ꓠꓽ ꓛꓲꓺ ꓟꓽ ꓠꓽ ꓠꓽ ꓡꓲ ꓩꓴ ꓡˍ ꓟ ꓑꓶꓸ ꓓꓴ ꓟꓽ-ꓛꓹ-ꓐꓳ ꓠꓳꓖ-ꓟꓴꓠꓖ ꓟꓳ ꓓꓳ ꓙꓻ ꓖꓴ ꓗꓪ ꓡꓳꓽ ꓓꓳ ꓧꓳꓹ ꓗꓷ ꓢꓲ 6 ꓦ ꓟ 19 ꓠꓬꓲ꓾ ꓠꓽ ꓕꓲꓽ ꓠꓬꓲ ꓟꓳꓼ ꓡꓳꓼ 2ꓽ00 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ ꓙꓻ ꓖꓴ ꓛꓵꓽ ꓡꓰ ꓗꓷ ꓟ ꓥꓳ꓾ ꓐꓰ ꓢꓷꓸ ꓪ ꓡꓳ=

ꓠꓳꓖ-ꓟꓴꓠꓖ ꓡꓳ ꓒꓱ ꓗꓪ ꓐꓰ ꓡꓳ-ꓔ 5 ꓕꓷꓹ ꓶꓽ ꓞꓹ ꓟ ꓗꓪ ꓡꓳꓽ ꓓꓳ ꓧꓳꓹ ꓢꓲ ꓬꓲꓻ ꓙꓬ ꓙꓵꓽ ꓜꓽ ꓙꓰ ꓟ ꓑꓶꓸ ꓓꓴ ꓓꓽ ꓖꓴꓽ ꓒ ꓕꓲꓺ ꓗꓪ ꓙꓳˍ ꓟ ꓟꓲ ꓛꓬ ꓧꓪꓽ ꓠꓬ ꓘꓪꓼ ꓙꓰ ꓢꓲ ꓙꓻ ꓖꓴ ꓛꓵꓽ ꓡꓰ ꓟ ꓥ ꓡꓳ꓾ ꓐꓰ ꓟꓽ-ꓛꓹ-ꓐꓳ ꓠꓳꓖ-ꓟꓴꓠꓖ ꓙꓻ ꓖꓴ ꓗꓪ ꓟꓳ ꓓꓳ ꓫꓵꓸ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=

ꓟꓽ-ꓛꓹ-ꓐꓳ ꓠꓳꓖ-ꓟꓴꓠꓖ ꓙꓻ ꓖꓴ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓗꓪ ꓟꓶꓽ ꓦ ꓦˍ ꓟ ꓪꓴꓸ ꓠꓬꓲ ꓡꓳꓽ ꓓꓳ ꓧꓳꓹ ꓢꓲ ꓙꓻ ꓖꓴ ꓛꓵꓽ ꓡꓰ ꓟ ꓒꓬꓱꓼ ꓔꓬ ꓟ ꓥ ꓢꓲ ꓠꓬꓲ꓾ ꓙꓻ ꓖꓴ ꓛꓵꓽ ꓡꓰ ꓕꓯ ꓠꓬ ꓠꓳꓖ-ꓟꓴꓠꓖ ꓡꓳ ꓒꓱ ꓗꓪ ꓙꓼ ꓧꓪꓽ ꓞꓶꓻ ꓐꓰ ꓧꓪꓽ ꓞꓶꓻ ꓞꓼ ꓐꓳ ꓜꓻ ꓐꓰ ꓠꓱꓸ ꓐꓯ ꓣꓱꓽ ꓫꓵꓽ ꓣꓱꓽ ꓙꓰꓽ ꓐꓴ ꓠꓬ ꓬꓲ ꓒꓵꓽ ꓠꓬꓲꓽ ꓝꓸ ꓓꓯꓻ ꓙꓰˍ ꓡꓳ꓾ ꓐꓰ ꓑ ꓫꓬ ꓕꓲ ꓣꓳ ꓡꓰ ꓐꓯ ꓟ ꓗꓪ ꓐꓰ ꓢꓷꓸ ꓪ ꓡꓳ=

ꓠꓳꓖ-ꓟꓴꓠꓖ ꓡꓳ ꓒꓱ ꓗꓪ ꓟ ꓑ ꓫꓬ ꓐꓴ ꓠꓬ ꓪꓽ ꓚꓲ ꓪ ꓐ ꓗꓪ ꓐꓰ ꓠꓯꓻ ꓞꓲꓼ ꓢꓲꓹ ꓚꓰꓺ ꓧꓪˍ ꓟ ꓟꓬꓱꓽ ꓐꓰ ꓔꓶꓺ ꓜꓽ ꓔꓶ ꓓꓳˍ ꓟ ꓟꓬꓱꓽ ꓐꓴ ꓔꓯ ꓟꓬꓽ ꓠꓬꓲ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=