ꓟ-ꓡꓰꓹ-ꓫꓸ ꓗꓪ ꓚꓳꓦꓲꓓ ꓠꓻ ꓫꓵꓽ ꓝꓮꓲ ꓕꓲ ꓧꓪꓹ ꓒꓬꓱꓼ ꓡ ꓔꓬ ꓟ ꓑꓶꓸ ꓓꓴ ꓟꓷꓽ ꓠꓷꓹ ꓛꓵꓽ ꓓꓴ ꓛꓵꓽ ꓠꓹ ꓟ ꓕꓵꓼ ꓪ ꓖꓶ ꓔ ꓟ ꓓꓳꓽ

ꓟ-ꓡꓰꓹ-ꓫꓸ ꓗꓴꓷꓼ ꓗꓪ ꓚꓳꓦꓲꓓ ꓠꓻ ꓫꓵꓽ ꓝꓮꓲ ꓕꓲ ꓧꓪꓹ ꓒꓬꓱꓼ ꓡ ꓟ ꓑꓶꓸ ꓓꓴ ꓟꓷꓼ ꓠꓷꓹ ꓛꓵꓽ ꓓꓴ ꓛꓵꓽ ꓠꓹ ꓟ ꓠꓯꓻ ꓞꓲꓼ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓑ ꓫꓬ ꓐꓴ ꓔꓯ ꓕꓵꓼ ꓪ ꓖꓶ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓠꓯꓻ ꓞꓲꓼ ꓢꓲꓽ ꓒ ꓟꓬꓱꓽ ꓣꓱꓽ ꓜꓴ ꓗꓪ ꓐꓰ ꓢꓷꓸ ꓪ ꓟ ꓡꓳꓹ ꓬꓰ ꓟ ꓓꓳꓽ ꓗꓪ 4 ꓦ 8 ꓠꓬꓲ ꓗꓪ ꓛꓲꓺ꓾ 14 ꓠꓬꓲ ꓘꓴꓽ ꓗꓪ ꓚꓬꓹ ꓠꓬꓲ ꓔ ꓟ ꓚꓳꓦꓲꓓ ꓠꓻ ꓙꓳ ꓡꓰ ꓢꓴ ꓠꓬ 87ꓸ5% ꓗꓪ ꓛꓲꓺ ꓟꓴ ꓓꓯ ꓡ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓚꓳꓦꓲꓓ ꓠꓻ ꓗꓪ ꓐꓰ ꓫꓵꓻ ꓢꓴ ꓮ ꓟꓬꓹ ꓙꓳ ꓡ ꓟ ꓡꓰꓽ ꓟꓽ ꓞꓲꓺ꓾ 4 ꓦ 8 ꓠꓬꓲ ꓗꓪ ꓛꓲꓺ ꓕꓲ ꓗꓴꓷꓼ ꓡꓱꓸꓼ ꓗꓪ ꓚꓳꓦꓲꓓ ꓠꓻ ꓙꓳ ꓡꓰ ꓢꓴ 13ꓹ000 ꓟꓽ ꓞꓲꓺ ꓙꓳˍ ꓡꓳ꓾ ꓐꓰˍ ꓟꓲ ꓐꓯ ꓔ ꓡꓳ=

ꓖꓳ ꓟ ꓑꓶꓸ ꓓꓴ ꓠꓯꓻ ꓞꓲꓼ ꓚꓱꓹ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓑ ꓫꓬ ꓐꓴ ꓔꓯ ꓞꓳ ꓤ ꓮ ꓘꓶꓸ ꓟꓬꓽˍ ꓟ ꓗꓪ ꓙꓰˍ ꓕꓯ ꓟꓷꓽ ꓠꓷꓹ ꓑꓲꓸ ꓓꓴ ꓑꓲꓸ ꓠꓹ ꓟ꓾ ꓕꓲ ꓣꓳ ꓐꓰ ꓕꓲ ꓣꓳ ꓒ ꓕꓲꓺ ꓗꓪ ꓟꓽ ꓔꓬ ꓠꓹ ꓟ꓾ ꓕꓱ ꓟꓬ ꓟ ꓚꓳꓦꓲꓓ ꓙꓵꓽ ꓗ ꓔꓯ ꓝꓮꓲ ꓕꓲ ꓧꓪꓹ ꓖꓼ ꓛꓳꓻ ꓠꓹ ꓟ ꓔꓯˍ ꓟꓲ ꓕꓵꓼ ꓪ ꓖꓶ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=