ꓠꓬꓲꓸ ꓠꓬꓲ ꓟ ꓓꓳꓽ

(1) ꓔꓮꓲꓪꓮꓠ ꓗꓪ ꓢꓯꓼ ꓪꓽ ꓠꓬꓲˍ ꓟ ꓟꓵꓽ ꓙꓴꓽ ꓚꓵꓹ ꓗꓷ ꓢꓲ꓾ ꓙ-ꓑ ꓗꓪˍ ꓟꓲ ꓢꓴ-ꓠ-ꓟꓲ ꓬꓲꓻ ꓙꓬ ꓟꓵꓽ ꓙꓴꓽ ꓔꓯ ꓤ ꓟꓳ ꓔ ꓠꓹ ꓟ ꓐꓯ ꓖꓶˍ ꓟ ꓓꓳꓽ

ꓔꓮꓲꓪꓮꓠ ꓗꓪ ꓮ ꓟꓰ ꓟꓶꓽ ꓘꓶꓼ ꓙꓵꓹ ꓕꓯ ꓢꓯꓼ 6ꓸ8 ꓟꓮꓖꓠꓲꓔꓴꓓꓰ ꓙꓳˍ ꓟ ꓟꓵꓽ ꓙꓴꓽ ꓕꓲ ꓟ ꓚꓵꓹ ꓗꓷ ꓟ ꓪꓴꓸ ꓠꓬꓲ ꓧꓳꓽ ꓛꓱꓺ ꓕꓲ ꓟ ꓙ ꓖꓴ ꓧꓶꓸ ꓡꓰ ꓢꓲ ꓦꓲ ꓓꓽ ꓟ ꓕꓲ ꓐꓱ ꓐꓬ ꓡꓰꓳ ꓐꓰ ꓢꓷꓸ ꓪ ꓡꓳ=

ꓔꓮꓲꓪꓮꓠ ꓟꓵꓽ ꓘꓳꓼ ꓔꓯ ꓟꓳꓸ ꓐꓯ ꓑꓶ ꓔꓶꓸ ꓠꓬ ꓮ ꓟꓰ ꓟꓶꓽ ꓘꓶꓼ ꓝꓲ ꓕꓯ ꓚꓵꓹ ꓗꓷ ꓓꓵ ꓗꓷ ꓟ ꓟꓵꓽ ꓙꓴꓽ ꓠꓬ ꓢꓯꓼ 7ꓸ2 ꓟꓮꓖꓠꓲꓔꓴꓓꓰ ꓙꓳ ꓢꓲ ꓟꓲ ꓛꓬ ꓠꓯꓸ ꓘꓪ ꓡꓳ ꓔ 6 ꓕꓷꓹ ꓟꓽ ꓞꓲꓺ ꓗꓪ ꓟꓵꓽ ꓙꓵꓽ ꓚꓵꓹ ꓗꓷ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ=

(2) ꓲꓠꓓꓳꓠꓰꓢꓲꓮ ꓤ ꓟꓶ ꓤ ꓐꓲ ꓔꓯꓺ ꓡꓯ ꓘꓳꓹ ꓟ ꓗꓪ ꓗ-ꓕꓳ-ꓡꓲꓗ ꓞꓳ ꓡꓱ ꓕꓲ ꓣꓳ ꓧꓪꓸ ꓡꓰ ꓟ

ꓲꓠꓓꓳꓠꓰꓢꓲꓮ ꓗꓴꓷꓼ ꓖꓴ ꓪꓴꓸ ꓢꓴꓡꓮꓪꓰꓢꓲ ꓗꓪ ꓙꓳˍ ꓟ ꓟꓮꓠꓮꓓꓳ ꓡꓳ ꓒꓱ ꓗꓪ ꓟ ꓬꓲ ꓞꓲꓼ 22 ꓘꓳꓼ ꓙꓳˍ ꓟ ꓮꓴꓓꓣꓰꓬ ꓦꓮꓠꓰꓢꓢꓮ ꓢꓴꓢꓲꓡꓳ ꓠꓬ 2022 ꓘꓳꓼ ꓤ ꓟꓶ ꓤ ꓐꓲ ꓔꓯꓺ ꓡꓯ ꓘꓳꓹ ꓟ ꓟꓲꓢꓢ ꓲꓠꓓꓳꓠꓰꓢꓲꓮ 2022 ꓙꓵꓽ ꓪꓴꓸ ꓛꓴꓽ ꓘꓳꓹ ꓣꓴ ꓟꓶ ꓡꓰ ꓢꓲ ꓗꓴꓷꓼ ꓘꓴꓽ ꓗꓪ ꓟ ꓟꓵꓽ ꓫꓴ꓾ ꓗꓴꓷꓼ ꓫꓴ ꓗꓪ ꓐꓰ ꓡ ꓢꓲ ꓔꓯꓺ ꓡꓯ ꓘꓳꓹ ꓟ ꓠꓱꓸ ꓐꓯ ꓤ ꓟꓶ ꓤ 36 ꓔꓯ ꓧꓪꓸ ꓡꓰ ꓗꓷꓳ=

ꓟꓲꓢꓢ ꓲꓠꓓꓳꓠꓰꓢꓲꓮ 2022 ꓐꓲ ꓔꓯꓺ ꓡꓯ ꓘꓳꓹ ꓟ ꓑꓮꓲ ꓔꓯ 9 ꓦ 5 ꓠꓬꓲ ꓕꓯ ꓲꓠꓓꓳꓠꓰꓢꓲꓮ ꓗꓴꓷꓼ ꓡꓳ ꓒꓱ ꓓꓽ ꓟ ꓥ ꓟ ꓙꓮꓗꓮꓣꓔꓮ ꓗꓪ ꓬꓰ ꓗꓷ ꓟ ꓥ ꓡꓳ=

ꓧꓪꓸ ꓡꓰ ꓟ ꓤ ꓟꓶ ꓤ ꓠꓬ ꓢꓲꓽ ꓫꓬꓹ ꓟ ꓢ ꓣꓳ ꓕꓲ ꓖꓳ ꓓꓱꓽ ꓜꓴꓻ (ꓧꓳꓡꓬ ꓔꓣꓲꓲꓔꓬ ꓚꓳꓟꓟꓴꓠꓲꓔꓬ-ꓗꓔꓟ) ꓐꓰ ꓚꓮꓔꓧꓳꓡꓲꓚ ꓚꓧꓮꓣꓲꓢꓟꓮꓔꓲꓚ ꓑꓣꓮꓬꓰꓣ ꓝꓰꓡꓡꓳꓪꓢꓧꓲꓑ ꓑꓓꓗꓗ ꓜꓴꓻ ꓗꓪˍ ꓟꓲ ꓣꓱꓽ ꓬꓰ ꓔꓬ ꓢꓴ ꓕꓲ ꓣꓳ ꓥ ꓡꓳ=

ꓟꓲꓢꓢ ꓲꓠꓓꓳꓠꓰꓢꓲꓮ 2022 ꓥ ꓟ ꓮꓴꓓꓣꓰꓬ ꓠꓬ ꓡ ꓠꓹ ꓟ 2023 ꓘꓳꓼ ꓕꓯ ꓟꓲꓢꓢ ꓪꓳꓣꓡꓓ ꓐꓲ ꓔꓯꓺ ꓡꓯ ꓘꓳˍ ꓟ ꓗꓪ ꓲꓠꓓꓳꓠꓰꓢꓲꓮ ꓗꓴꓷꓼ ꓐꓱ ꓶ ꓐꓲ ꓔꓯꓺ ꓓꓴ ꓥꓳ꓾ ꓐꓰ ꓢꓷꓸ ꓪ ꓡꓳ=

(3) ꓑꓬꓲ-ꓴ-ꓡꓪꓲꓠ ꓡꓳ ꓒꓱ ꓢꓲ-ꓗꓸ ꓞꓳ ꓘꓹ ꓗꓪ ꓞꓳ ꓤ 5 ꓣꓳ ꓫꓵꓻ ꓟ ꓓꓳꓽ

ꓟ-ꓓ-ꓡꓲ ꓟꓵꓽ ꓫꓴ꓾ ꓑꓬꓲ-ꓴ-ꓡꓪꓲꓠ ꓡꓳ ꓒꓱ꓾ ꓮꓴꓠꓖ ꓚꓧꓮꓠ ꓔꓧꓮꓣ ꓞꓳ ꓘꓹ ꓜꓴꓻ ꓗꓪ ꓟ ꓢꓲ-ꓗꓸ ꓘꓹ ꓙ ꓖꓴ ꓠ-ꓑ 3 ꓗꓪ ꓟ ꓮ ꓭꓸ ꓐꓱ ꓕꓲ ꓟ ꓗꓪ 9 ꓦ 18 ꓠꓬꓲ ꓠꓯꓼ ꓕꓯ ꓤ ꓑ ꓤ꓾ ꓤ ꓟꓶ ꓤ 5 ꓣꓳ ꓗꓶꓸ ꓝꓲꓸ ꓗꓪ ꓮ ꓕ ꓗꓸ ꓔ ꓟ ꓠꓻ ꓓꓴ ꓗꓪ ꓐꓰ ꓫꓵꓻ ꓗꓷ ꓟ ꓫꓵꓽ ꓪꓴ ꓒꓬꓱꓼ ꓗꓷꓳ=

ꓫꓵꓻ ꓢꓴ ꓐꓴ ꓠꓬ ꓮ ꓭꓸ ꓐꓱ ꓢꓲꓺ ꓒ ꓴ-ꓟꓮꓴꓠꓖ-ꓖꓬꓲ ꓾ ꓬꓲ ꓤ ꓟꓶ ꓐꓰ ꓬꓲ ꓮ ꓟꓲꓽ꓾ ꓴ ꓑꓧꓳ-ꓡꓳꓠꓰ ꓐꓰ ꓬꓲ ꓮ ꓟꓲꓽ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=