ꓠꓬꓲꓸ ꓠꓬꓲ ꓟ ꓓꓳꓽ

* ꓓꓳꓽ ꓕꓲꓽ

ꓗ-ꓛꓲ ꓗꓴꓷꓼ ꓫꓴ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓪꓴꓸ ꓠꓬꓲ ꓑ ꓫꓬ ꓐꓴ ꓡꓰ ꓚꓲ ꓛꓬ ꓦꓲꓻ ꓦ ꓓꓴꓽ ꓡꓳꓸ ꓔꓲꓸ ꓬꓰ ꓢꓲ ꓛꓰꓹ ꓙꓰ ꓪˍ ꓟ 11 ꓘꓳꓼ ꓐꓲ ꓡꓰˍ ꓟ ꓚꓲꓸ ꓟꓶ ꓓꓴ ꓑꓮꓲꓽ ꓔꓯ ꓗ-ꓛꓲ ꓞꓳ ꓫꓵꓽ ꓜꓴꓻ WMR ꓡꓰ ꓧꓳꓽ ꓪꓴꓸ ꓟꓳ ꓢꓲ ꓪꓮꓲ-ꓟꓮꓪ ꓡꓳ ꓒꓱ ꓟꓮꓲꓸ-ꓠꓸ KBC ꓟꓯꓼ ꓛꓰꓹ ꓑꓬ ꓔꓶꓸ ꓗꓪ 6 ꓦ 9 ꓠꓬꓲ꓾ ꓠꓯꓼ ꓙꓵꓹ ꓕꓯ ꓬꓰ ꓗꓷꓳ=

ꓚꓲꓸ ꓟꓶ ꓓꓴ ꓑꓮꓲꓽ ꓕꓱ ꓟ ꓔꓯ ꓟꓮꓲꓸ-ꓠꓸ ꓟꓯꓼ ꓛꓰꓹ ꓑꓬ ꓔꓶꓸ ꓗꓪ ꓟ ꓑ ꓫꓬ ꓕꓲ ꓔꓴꓺ ꓟꓽ ꓛꓲꓺ ꓚꓬꓼˍ ꓟ ꓥ ꓢꓲ ꓙꓲ-ꓢꓴ ꓢꓲꓺ ꓤ ꓐꓴ ꓬꓰ ꓝꓳꓽ ꓥ ꓟ ꓡꓰˍ ꓐꓰ ꓪꓽ ꓘꓴ ꓗꓷ ꓢꓲ ꓠꓬꓲ꓾ ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓗꓴꓷꓼ ꓫꓵꓽ ꓪꓴ ꓑꓶꓸ ꓓꓴ ꓛꓰꓹ ꓑꓬ ꓔꓬ ꓪ ꓢꓴ ꓐꓴ ꓐꓱ ꓶˍ ꓟꓲ ꓪꓽ ꓘꓴ ꓙ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓗ-ꓛꓲ ꓗꓴꓷꓼ ꓫꓴ ꓗꓪ 2011 ꓘꓳꓼ 6 ꓦ 9 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓝꓮꓲ ꓕꓲ ꓧꓪꓹ ꓒꓬꓱꓼ ꓡ ꓟ ꓟꓯꓼ ꓓꓶꓽ ꓡꓯ ꓘꓳ ꓔꓴ ꓡ ꓟ ꓪꓴꓸ ꓠꓬꓲ ꓑ ꓫꓬ ꓕꓲ ꓫꓬꓹ ꓟꓽ ꓞꓲꓺ ꓠꓬ ꓚꓲ ꓛꓬ ꓦꓲ ꓔꓯ ꓡꓳꓸ ꓔ ꓬꓰ ꓢꓲ ꓛꓰꓹ ꓑꓬ ꓔꓬ ꓪˍ ꓟ ꓮ ꓟꓰ ꓕꓯ ꓠꓬ 11 ꓘꓳꓼ ꓙꓳ ꓡꓰꓳ꓾ ꓐꓰ ꓢꓷꓸ ꓪ ꓡꓳ=

* ꓓꓳꓽ ꓠꓬꓲꓽ

ꓬꓮ-ꓖꓳ ꓟꓵꓽ ꓫꓴ꓾ ꓔꓴꓸ-ꓔꓰꓸ ꓡꓳ ꓒꓱ ꓘꓴꓽ ꓗꓪ 6 ꓦ 10 ꓠꓬꓲ꓾ ꓠꓬꓲꓸ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ ꓢꓮꓲ-ꓗꓯ ꓜꓶꓽ ꓟꓽ ꓓ ꓟ ꓔꓯ ꓔꓴꓸ-ꓔꓰ ꓡꓳ ꓒꓱ ꓑ ꓫꓬ ꓐꓴ ꓗꓪ ꓐꓰ ꓢꓷꓸ ꓪ ꓡꓳ=

ꓕꓱ ꓡꓱ ꓢꓮꓲ-ꓗꓯ ꓜꓲꓽ ꓟꓽ ꓓꓽ ꓐꓯ ꓟ ꓔꓯ ꓞꓳ ꓘꓹ ꓜꓴꓻ ꓐꓴ ꓡꓰ ꓞꓳ ꓘꓹ ꓕꓲ ꓘꓹ ꓡꓰ ꓕꓲ ꓘꓹ ꓐꓰ ꓙꓻ ꓖꓴ ꓓꓽ ꓟ ꓗꓪ ꓬꓲ ꓢꓯꓼ ꓪꓴꓽ ꓟꓬꓽ ꓡ ꓝꓲ ꓓꓴ ꓣꓱꓽ ꓢꓲ ꓑ ꓫꓬ ꓐꓴ ꓢꓷꓸ ꓡꓰ ꓠ ꓐꓯ ꓑꓶ ꓗꓷꓳ= ꓔꓴꓸ-ꓔꓰꓸ ꓡꓳ ꓒꓱ ꓗꓪ ꓔꓬ ꓢꓴ ꓑ ꓫꓬ ꓟꓬꓽ ꓐꓱ ꓠꓬ ꓢꓮꓲ-ꓗꓯ ꓔꓯ ꓡꓰꓽ ꓣꓱꓽ ꓢꓲ ꓙꓰ ꓙꓰ ꓡ ꓡ ꓬꓰ ꓔꓬ ꓢꓴ ꓐꓴ ꓥ ꓠꓬꓲ ꓕꓱ ꓡꓱ ꓢꓮꓲ-ꓗꓯ ꓜꓶꓽ ꓟꓽ ꓪ ꓗꓷ ꓡꓰ ꓟ ꓪꓴꓸ ꓠꓬꓲ ꓫꓸ ꓓꓴ ꓒꓬꓱꓼ ꓡˍ ꓥꓳ꓾ ꓐꓰ ꓡꓳ ꓒꓱ ꓗꓪ ꓔꓬ ꓢꓴ ꓐꓴ ꓡꓰ ꓐꓯ ꓡꓳ=

ꓔꓴꓸ-ꓔꓰ ꓡꓳ ꓒꓱ ꓠꓬ ꓡꓳ ꓒꓱ ꓘꓴꓽ ꓗꓪ ꓢꓮꓲ-ꓗꓯ ꓜꓶꓽ ꓟꓽ ꓓ ꓐꓰ ꓐꓯ ꓑꓶ ꓔ ꓟ 3 ꓟ ꓕꓲ ꓟ ꓟ ꓡꓳ ꓒꓱ ꓥ ꓢꓲ꓾ ꓬꓲ ꓪꓴꓸ ꓕꓯ ꓠꓬ ꓔꓯꓥ-ꓡꓲꓠ ꓡꓳ ꓒꓱ ꓾ ꓠꓬꓲꓽ ꓟ ꓕꓲ ꓟ ꓠꓬ ꓓ-ꓡꓸ ꓡꓳ ꓒꓱ ꓥ ꓡꓳ ꓐꓰ ꓢꓷꓸ ꓪ ꓡꓳ=

* ꓓꓳꓽ ꓢ

ꓜꓻ ꓔꓶꓺ ꓜꓽ ꓢꓴ ꓐꓴ ꓠꓬ ꓔꓶꓺ ꓒꓵꓽ ꓮ ꓟꓬꓹ ꓓꓯꓻ ꓡ ꓟ ꓐꓰ ꓔꓶꓺ ꓢꓴ ꓞꓳ ꓤ ꓠꓲꓸ ꓡꓰ ꓔꓬ ꓟ ꓪꓴꓸ ꓠꓬꓲ ꓛꓲꓺ ꓠꓲꓹ ꓕꓲ ꓘꓳꓼ ꓟꓶꓽ ꓦ ꓜꓻ ꓔꓶ ꓓꓴ ꓐꓱ ꓶ ꓫꓸ ꓓꓴ ꓓꓳ ꓡ ꓢꓲ ꓔꓶˍ ꓟ ꓰ-ꓗꓸ ꓠꓲꓸ ꓡꓰ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓔꓶꓺˍ ꓟ ꓗꓪ ꓟꓽ ꓙꓳꓻ ꓟꓽ ꓓ ꓣꓱꓽ ꓞꓹ ꓟ ꓩꓲꓸ-ꓛꓲꓻ꓾ ꓟꓳꓼ ꓜꓲ ꓫꓵꓸ ꓜꓲ ꓢꓰꓼ ꓠꓯꓻ ꓞꓲꓼ꓾ ꓐꓶꓽ ꓓꓲꓻ ꓢꓰꓼ ꓠꓯꓻ ꓞꓲꓼ ꓐꓴ ꓠꓬ ꓬꓲ ꓒꓵꓽ ꓮ ꓟꓬꓹ ꓓꓯꓻ ꓙꓰ ꓢꓲ꓾ ꓔꓶꓺ ꓜꓽ ꓖꓴ ꓗꓪ ꓣꓱꓽˍ ꓟ ꓣꓱꓽ ꓫꓵꓽ ꓣꓱꓽ ꓙꓰꓽ ꓐꓰ ꓙꓼ ꓧꓪꓽ ꓞꓶꓻ ꓒꓵꓽ ꓓꓯꓻ ꓡꓰ ꓟ ꓡꓰꓽ ꓟꓽ ꓞꓲꓺ ꓗꓴꓷꓼ ꓶꓻ ꓡꓯꓼ ꓚꓱꓹ ꓗꓪ ꓫꓸ ꓓꓴ ꓙꓳˍ ꓟ ꓪꓴꓸ ꓠꓬꓲ ꓟꓬꓱꓽ ꓬꓰ ꓢꓯꓼ ꓙꓳˍ ꓟ ꓞꓳ ꓡꓱ꓾ ꓞꓳ ꓡꓯꓸ ꓐꓴ ꓠꓬ ꓐꓶꓽ ꓗꓴꓷꓼ ꓗꓪ ꓙꓰ ꓢꓲ ꓟꓬꓱꓽ ꓬꓰˍ ꓟ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓐꓶꓹ ꓟꓬꓽ ꓡ ꓔꓬ ꓟ ꓪꓴꓸ ꓠꓬꓲ ꓟꓶꓽ ꓦ ꓜꓻ ꓔꓶˍ ꓟ ꓗꓪ ꓫꓸ ꓓꓴ ꓙꓳꓻ ꓡˍ ꓡꓳ꓾ ꓐꓰ ꓔꓶꓺ ꓜꓽ ꓢꓴ ꓐꓴ ꓡꓰ ꓐꓯ ꓡꓳ=

ꓮ ꓟꓶ ꓟ ꓡꓰ ꓒꓬꓱꓼ ꓡ ꓔꓬ ꓟ ꓠꓬ ꓟꓬ-ꓟ ꓗꓴꓷꓼ ꓗꓪ ꓡ ꓠꓹ ꓟ ꓦꓬꓼ ꓠꓬꓲ ꓕꓯ ꓟꓬ-ꓟ ꓑ ꓫꓬ ꓐꓴ ꓜꓽ ꓓꓴ ꓫꓸ ꓡ ꓟ ꓫꓵꓽ ꓪꓴ ꓔꓯ ꓔꓳꓹ ꓜꓳꓽ ꓡ ꓗꓴꓸˍ ꓡꓳ ꓐꓰ꓾ ꓶꓻ ꓡꓯꓼ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓡꓳ=