ꓠꓲꓚꓮꓣꓮꓖꓴꓮꓠ ꓗꓴꓷꓼ ꓗꓪ ꓐꓰ ꓔꓲꓺ ꓒ ꓓꓽ ꓔꓯ ꓐꓱ ꓓꓴꓽ ꓔꓳ, ꓦꓲꓻ ꓗꓪ (26) ꓘꓳꓼ ꓐꓱ ꓗꓷ ꓟ ꓙꓵ, ꓔꓯ ꓟꓯꓼ ꓒꓽ ꓐꓴ ꓡꓰ ꓫ. ꓟꓳ ꓫ. ꓚꓬ, ꓬꓰ ꓗꓷ ꓡꓳ ꓐꓰ ꓐꓯ ꓟ ꓓꓳꓽ

#creditphoto #Nicaraguan Bishop, Laments

Monday, December 04, 2023

12 ꓦ ꓟ 1 ꓠꓬꓲ 2023 ꓘꓳꓼ ꓕꓯ ꓠꓲꓚꓮꓣꓮꓖꓴꓮꓠ ꓗꓴꓷꓼ ꓗꓪ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓐꓱ ꓓꓴꓽ ꓔꓳ, ꓦꓲꓻ ꓗꓪ ꓐꓱ ꓗꓷ ꓟ ꓔꓲꓺ ꓒ ꓓꓽ Rolando Alvare ꓔꓯ ꓫ. ꓟꓳ ꓫ. ꓚꓬ ꓬꓰ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓗꓴꓷꓼ ꓫꓵꓽ ꓘꓶꓼ ꓔꓲ ꓗꓪ ꓐꓰ ꓗꓴꓷꓼ ꓗꓳ ꓓꓵ ꓓꓵ ꓗꓪ ꓐꓰ ꓬꓰ ꓙ ꓢꓴ ꓜꓴꓻ ꓡꓰ ꓟꓽ ꓔꓱ, ꓟ ꓚꓱ, ꓗꓪ ꓔꓲꓺ ꓒ ꓓꓽ ꓔꓯ ꓐꓱ ꓓꓴꓽ ꓗꓪ ꓐꓱ ꓔ ꓟ ꓗꓪ ꓐꓰ ꓡꓲ ꓖꓶ ꓠ, ꓟ ꓠꓲꓚꓮꓣꓮꓖꓴꓮꓠ ꓟꓯꓼ ꓒꓽ ꓓꓽ ꓓꓮꓠꓲꓰꓡ ꓳꓣꓔꓰꓖꓮ ꓔꓯ ꓐꓯ ꓔ ꓡꓳ꓿

ꓔꓲꓺ ꓒ ꓓꓽ ꓔꓯ ꓗꓴꓷꓼ ꓫꓵꓽ ꓘꓶꓽ ꓔꓯ ꓫ. ꓕꓱ ꓠ, ꓟ ꓟꓵ ꓗꓳ ꓓꓵ ꓓꓵ ꓗꓪ ꓐꓰ ꓬꓰ ꓙ ꓢꓴ ꓜꓴꓻ ꓡꓰ ꓓꓰꓽ ꓔ ꓟ ꓪꓴ. ꓠꓬꓲ ꓫꓵꓽ ꓘꓶꓼ ꓔꓲ ꓗꓪ ꓔꓲꓺ ꓒ ꓓꓽ ꓫ. ꓕꓱ ꓪ ꓟ ꓙꓵ, ꓔꓯ ꓔꓲꓺ ꓒ ꓓꓽ ꓔꓯ ꓐꓱ ꓓꓴꓽ ꓗꓪ ꓐꓱ ꓔ ꓟ ꓙꓵ, ꓕꓯ ꓟꓯꓼ ꓒꓽ ꓐꓴ ꓡꓰ ꓮ ꓘꓶ. ꓛꓲ ꓫ. ꓓꓴ ꓟꓶ ꓓꓴ ꓖꓶ ꓢꓲ ꓠꓬꓲ ꓮ ꓘꓶ. ꓛꓲ ꓔꓬ ꓫ. ꓔꓬ ꓡꓳ ꓐꓰ ꓐꓯ ꓔ ꓡꓳ ꓐꓰ ꓐꓯ ꓔ ꓡꓳ꓿ ꓗꓴꓷꓼ ꓙꓵꓽ ꓢꓴ ꓟꓯꓼ ꓜꓲꓽ ꓒꓽ ꓠꓬ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓟꓬ, ꓛꓲ ꓫꓵꓽ ꓪꓴꓽ ꓖꓶ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓔꓯ ꓥ ꓟꓲ ꓐꓱ ꓓꓴꓽ ꓗꓪ ꓐꓱ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓓꓼ ꓠꓬ ꓐꓱ ꓡꓰ ꓟꓽ ꓬꓰ ꓠ,ꓟ ꓗꓴꓷꓼ ꓙꓵꓽ ꓢꓴ ꓟꓯꓼ ꓜꓲꓼ ꓒꓽ ꓐꓯ ꓗꓷ ꓟ ꓙꓵ, ꓕꓯ 2022 ꓘꓳꓼ ꓕꓯ ꓐꓱ ꓓꓴꓽ ꓔꓳ, ꓦꓲꓻ ꓗꓪ (26) ꓘꓳꓼ ꓐꓱ ꓗꓷ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓟꓵꓼ ꓗꓳ ꓓꓵ ꓓꓵ ꓗꓪ ꓐꓰ ꓬꓰ ꓙ ꓢꓴ ꓜꓴꓻ ꓐꓰ ꓙꓵꓻ ꓠꓲ, ꓚꓱ, ꓗꓪ ꓧꓳꓽ ꓪꓴ. ꓟꓴ ꓢꓴ ꓜꓴꓻ ꓥ ꓟꓲ ꓔꓲꓺ ꓒ ꓓꓽ ꓠꓬ ꓝꓴꓲ ꓟꓽ ꓙꓳ ꓟ ꓐꓰ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓫ. ꓓꓴ ꓟꓶ ꓓꓴ ꓟꓽ ꓖꓶ ꓠ, ꓟ ꓐꓰ ꓔꓲꓺ ꓒ ꓓꓽ ꓔꓯ ꓞꓼ ꓞꓲ ꓡꓲ ꓖꓶ ꓠ,ꓟ ꓓꓰꓽ ꓔ ꓡꓳ꓿

ꓕꓱ ꓡꓰ ꓐꓰ ꓠꓲꓚꓮꓣꓮꓖꓴꓮꓠ ꓐꓱ ꓓꓴꓽ ꓗꓪ ꓮ ꓘꓶ. ꓛꓲ ꓫ. ꓓꓴ ꓟꓶ ꓓꓴ ꓖꓶ ꓟ ꓙꓵ, ꓔꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓐꓰ ꓓꓴꓽ ꓗꓪ ꓐꓱ ꓟꓶ ꓡꓰ ꓢꓴ ꓕꓲ ꓣꓳ ꓫ. ꓕꓱ ꓔ ꓟ ꓠꓬ ꓬꓲ ꓞꓲꓼ (15) 16) ꓡꓳ ꓬꓰ ꓤ ꓠꓱ ꓤ ꓕꓲ ꓣꓳ ꓔꓯ ꓠꓬ ꓐꓱ ꓓꓴ ꓗꓪ ꓬꓲ ꓛꓲ ꓒꓯꓽ ꓔꓯ ꓮ. ꓔꓳ ꓛꓴꓽ ꓗꓷ ꓡꓳ ꓐꓰ ꓐꓯ ꓔ ꓡꓳ꓿

ꓮ ꓟꓬ, ꓟ ꓙꓵ, ꓗꓪ ꓠꓬ ꓗꓴꓷꓼ ꓔꓯ ꓳꓣꓔꓰꓖꓮ‐ꓟꓴꓣꓲꓡꓡꓳ ꓜꓴꓻ ꓠꓬ ꓙꓵꓽ ꓔꓬ ꓟ ꓪꓴ. ꓠꓬꓲ ꓝꓴꓲ ꓟꓽ ꓙꓳ ꓢꓴ ꓑ ꓫꓬ ꓮ ꓟꓬ, ꓔꓯ ꓢꓰꓼ ꓟ ꓐꓰ ꓐꓱ ꓓꓴꓽ ꓗꓪ ꓐꓱ ꓟ ꓟꓽ ꓙꓲ ꓟ ꓟꓬꓱꓽ ꓮ ꓟꓬ, ꓔꓯ ꓬꓰ ꓔꓬ ꓟ ꓪꓴ. ꓠꓬꓲ ꓕꓱ ꓡꓰ ꓬꓰ ꓔꓬ ꓟ ꓔꓯ ꓞꓳ ꓜꓴꓻ ꓗꓴꓷꓼ ꓡꓰ ꓗꓼ ꓕꓽ ꓖꓶ ꓠ, ꓟ ꓓꓰꓽ ꓔ ꓡꓳ ꓐꓰ (Catholic News Agency) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿