ꓠꓴ ꓪ ꓠꓲꓹ ꓟ ꓗꓪ ꓪꓴ-ꓢ ꓔꓬꓹ ꓟ ꓔꓯ ꓫꓱꓸ ꓤ ꓠꓲꓹ꓾ ꓙ ꓗꓳ ꓠꓲꓹ ꓗꓪ ꓐꓰ ꓟꓳꓸ ꓖꓶꓽ ꓡꓯ=

ꓟꓵꓽ ꓗꓳꓹ ꓓꓵꓺ ꓓꓵꓺ ꓜꓳꓽ ꓓꓽ ꓟ꓾ꓘꓴ-ꓜꓲ-ꓞꓳ ꓜꓳꓽ ꓐꓴ 21 ꓧꓪꓹ ꓟ ꓘꓳꓼ ꓚꓳꓺ ꓜꓲꓼ ꓓꓴ=

ꓠꓴ ꓪ ꓠꓲꓹ ꓟ ꓗꓪ ꓪꓴ-ꓢ ꓔꓬꓹ ꓟ ꓔꓯ ꓫꓱꓸ ꓤ ꓠꓲꓹ꓾ ꓙ ꓗꓳ ꓠꓲꓹ ꓗꓪ ꓐꓰ ꓟꓳꓸ ꓖꓶꓽ ꓡꓯ= 

9 ꓦ ꓟ 21 ꓠꓬꓲ꓾2019

ꓟꓵꓽ ꓗꓳꓹ ꓓꓵꓺ ꓓꓵꓺ  ꓜꓳꓽ ꓓꓽ ꓟ꓾ꓘꓴ-ꓜꓲ-ꓞꓳ ꓜꓳꓽ ꓐꓴ 21 ꓧꓪꓹ ꓟ ꓘꓳꓼ ꓚꓳꓺ ꓜꓲꓼ ꓓꓴ ꓗꓪ ꓜꓲꓼ ꓛꓲ ꓡˍ ꓟ ꓗꓴꓷꓼ ꓞꓲꓺ 300 ꓐꓰ ꓔꓲꓺ ꓒ ꓪ ꓔꓲ Francis ꓜꓲꓼ ꓡꓯꓽ ꓘꓳꓹ ꓟ ꓗꓪ ꓪꓴ-ꓢ ꓬꓲꓸ ꓣꓱꓽ ꓛꓰ ꓠꓴ ꓪ ꓠꓲꓹ ꓟ ꓘꓴ: ꓠꓯꓸꓼ ꓗꓪ ꓐꓬꓻ ꓔꓬꓹ ꓝꓲ ꓠ ꓗ ꓡꓳ꓾ ꓐꓰ ꓬꓲꓼ ꓠꓬꓲꓸ ꓖꓶꓽ ꓗꓷꓳ=

ꓪꓴ-ꓢ ꓔꓯ ꓡꓯꓼ ꓕꓲꓺ ꓟꓶ ꓠꓹ ꓟ ꓠꓲꓹ ꓡꓶꓽ ꓙꓳ ꓔꓬ ꓡꓳ=ꓖꓳ ꓡꓱ ꓥˍ ꓟꓲ ꓪꓴ-ꓢ ꓣꓳꓽ ꓐꓰ ꓒ ꓕꓲꓸꓼ ꓗꓪ ꓔꓬꓹ ꓟ ꓔꓯ ꓠꓬ ꓲ-ꓟ-ꓴ ꓗꓪ ꓙꓰ ꓔꓬꓹ ꓟ ꓝꓲ ꓓꓴ ꓠꓬꓲꓽ ꓣꓳ ꓡꓰ ꓐꓰ ꓟꓽ ꓟꓳ ꓢꓴ ꓟꓲ ꓮꓽ ꓟꓬꓹ ꓙꓳˍ ꓡꓳ=ꓪꓴ-ꓢ ꓠꓬ ꓣꓳꓽ ꓒ ꓕꓲꓸꓼ ꓗꓪ ꓔꓬꓹ ꓢꓲ ꓣꓳꓽ ꓔꓯ ꓐꓯ ꓟꓳꓸ ꓖꓶꓽ ꓔꓬꓹ ꓡꓳ=ꓣꓳꓽ ꓐꓴ ꓠꓲꓹ ꓟ ꓔꓯ ꓐꓬꓻ ꓔꓬꓹ ꓝꓲˍ ꓡꓳ=

ꓘꓴ-ꓜꓲ-ꓞꓳ ꓠꓬ ꓟꓲ ꓠꓯ ꓧꓪꓸ ꓡꓰˍ ꓟ ꓗꓪ ꓡꓰꓽ ꓠꓲꓹ ꓒꓴ ꓔꓬꓹ ꓢꓲ꓾ ꓢꓲꓺ ꓒꓽ ꓬꓰ-ꓢꓴ  ꓔꓯ ꓐꓯ ꓑꓶꓻ ꓠꓹ ꓟ ꓟꓲ ꓡꓲ ꓔꓬꓹ ꓟ ꓕꓽ ꓗꓷ ꓡꓰ ꓝꓲ=ꓘꓴ-ꓜꓲ-ꓞꓳ ꓗꓪ ꓬꓳꓸ ꓚꓰˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓥ ꓡꓳ=ꓪꓽ ꓘꓴ ꓦꓲ ꓔꓯ ꓐꓲˍ ꓟ ꓮ ꓠꓱ ꓦꓲ ꓓꓽ ꓟ ꓡꓰ ꓐꓰ ꓟꓽ ꓟꓳꓻ ꓟꓳꓻ꓾ ꓐꓹ ꓐ ꓪꓴ-ꓢ ꓬꓲꓸ ꓦꓲ ꓡꓰ ꓐꓰ ꓟꓳꓻ ꓠ ꓗˍ ꓟ꓾ ꓐꓹ ꓐ ꓪꓴ-ꓢ ꓠꓬ ꓬꓲꓸ ꓤꓽ ꓠꓱ ꓐꓴ ꓬꓲꓸ ꓦꓲ ꓗꓪ ꓡ ꓢꓲ꓾ ꓕꓲꓽ ꓦꓲ ꓘꓴ ꓢꓴ ꓐꓴ ꓦꓲ꓾ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓔꓯ ꓟꓶ ꓝꓲ ꓠꓲꓹ ꓫꓵˍ ꓡꓳ=

ꓠꓬꓲꓸ ꓠꓬꓲ ꓟ ꓟꓲ ꓠꓯ ꓗꓪ ꓟꓲ ꓠꓯ ꓗꓹ ꓛꓲ ꓓꓴ ꓔꓯ ꓡꓰꓽ ꓟꓳꓻ ꓔꓬꓹ ꓢꓲ ꓠꓬꓲ꓾ ꓚꓲꓸ ꓛꓬ ꓤꓶꓻ ꓗꓪ ꓔꓱꓹ ꓚꓵˍ ꓟ ꓕꓲꓺ ꓡꓰ ꓢꓴ ꓠꓽ ꓮꓸ ꓔꓲꓸ ꓤꓽ ꓗꓷ ꓡꓰ ꓔꓬꓹ ꓡꓳ=ꓖꓳ ꓟ ꓪꓴꓸ ꓠꓬꓲ ꓕꓲꓽ ꓦꓲ ꓘꓴꓽ ꓢꓴ ꓗꓪ ꓐꓰ ꓤꓽ ꓠꓱ ꓐꓴ ꓔꓯ ꓮ ꓟꓶꓺ ꓣꓱꓽ ꓔꓬꓹ ꓟ ꓫꓸ ꓕꓱꓻ ꓓꓴ ꓚꓬꓼ (Phone) ꓗꓪ ꓐꓰ ꓟꓶˍ ꓟ ꓗꓹ ꓛꓲꓽ ꓓꓴ ꓗꓪ ꓐꓰ ꓡꓰꓽ ꓟꓽ ꓠꓲꓹ ꓥꓳ ꓥꓳ ꓐꓰ ꓔꓱꓹ ꓚꓵˍ ꓟ ꓦꓲ ꓘꓴꓽ ꓗꓹ ꓛꓲꓽ ꓓꓴ ꓡꓰꓽ ꓖꓶꓽ ꓠ ꓗˍ ꓡꓳ=

ꓦꓲ ꓘꓴꓽ ꓢꓴ ꓐꓴ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ꓾ ꓠꓵ ꓠꓲꓹ ꓖꓶꓽ ꓗꓴꓸ ꓢꓴ ꓒꓬꓱꓼ ꓡ ꓠ ꓟꓸ ꓖꓶꓽ ꓠ ꓗˍ ꓡꓳ= ꓖꓳ ꓡꓱ ꓟꓸ ꓖꓶꓽ ꓠꓹ ꓟ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓮ ꓡꓲ ꓥ ꓮ ꓡꓲ ꓘꓳꓹ ꓣꓴ ꓗꓴꓸ ꓠ ꓗˍ ꓡꓳ=ꓖꓳ ꓟ ꓐꓰ ꓡꓰꓽ ꓦꓲ ꓘꓴ ꓢꓴ ꓐꓴ ꓔꓯ ꓠꓱꓸ ꓐꓯꓼ ꓕꓯꓽ ꓢꓲ ꓔꓱꓹ ꓚꓵˍ ꓟ ꓗꓹ ꓛꓲ ꓓꓴ ꓔꓯ ꓖꓶꓽ ꓐ ꓡˍ ꓡꓳ=

ꓢꓲꓺ ꓒꓽ ꓬꓰ-ꓢꓴ ꓔꓯ ꓧꓪꓺ ꓢꓴ ꓥ ꓠ ꓗˍ ꓡꓳ=ꓬꓲꓸ ꓗꓪ ꓐꓰ ꓡꓰꓽ ꓠꓲꓹ ꓟ ꓗꓪ ꓗꓹ ꓛꓲꓽ ꓓꓴ ꓡꓰ ꓐꓬꓻ ꓔꓬꓹ ꓝꓲ ꓠꓯˍ ꓡꓳ= ꓢꓴ ꓔꓯ ꓟꓸ ꓒꓽ ꓬꓰ ꓢꓲ ꓟꓳꓸ ꓖꓶꓽ ꓔꓬꓹ ꓟ꓾ ꓝꓴꓲꓸ ꓐꓯ ꓔꓬꓹ ꓟ ꓢꓲꓸ ꓟꓽ ꓛꓲ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓰ ꓬꓲꓸ ꓪ ꓒꓽ ꓕꓲꓸꓼ ꓗꓪ ꓬꓲꓸ ꓪ ꓐꓴ ꓐꓰ ꓕꓲꓽ ꓪꓺꓽ ꓓꓴ ꓓꓳ ꓢꓴ ꓡꓰ ꓐꓰ ꓬꓰ ꓖꓶꓽ ꓢꓲ꓾ ꓬꓲꓸ ꓪ ꓠꓲꓹ ꓟ ꓔꓯ ꓠꓵ ꓠꓲꓹ ꓡꓰ ꓐꓲꓻ ꓡꓶꓽ ꓐꓬꓻ ꓔꓬꓹ ꓝꓲ ꓠ ꓗˍ ꓡꓳ=

ꓪꓴ-ꓢ ꓟꓸ ꓟꓲꓽ ꓚꓸ ꓟ ꓕꓯꓽ ꓢꓲꓺ꓾ ꓢꓲꓺ ꓒꓽ ꓬꓰ-ꓢꓴ ꓬꓲꓸ ꓒ ꓕꓲꓸꓼ ꓗꓪ ꓔꓬꓹ ꓟ ꓔꓯ ꓢꓷ ꓡꓰ ꓠ ꓠꓴ ꓪ ꓙ ꓗꓳ ꓠꓲꓹ ꓔꓯ ꓟꓳꓸ ꓖꓶꓽ ꓠꓯˍ ꓡꓳ=ꓢꓲꓺ ꓒꓽ ꓬꓰ-ꓢꓴ ꓒ ꓕꓲꓸꓼ ꓗꓪ ꓔꓬꓹ ꓟ ꓔꓯ ꓢꓷˍ ꓟ ꓠꓬ ꓬꓲꓸ ꓤꓶ ꓔꓯ ꓪꓺ ꓙꓲꓺ ꓐꓲꓻ ꓜꓲꓼ ꓡꓰ ꓝꓲˍ ꓡꓳ=

ꓘꓴ-ꓜꓲ-ꓞꓳ ꓠꓲꓹ ꓟ ꓥ ꓟ ꓪꓴ-ꓢ ꓠꓬ ꓠꓵ ꓠꓲꓹ ꓥ ꓡꓳ꓾ ꓐꓯˍ ꓟ ꓓꓳꓽ ꓔꓯ ꓞꓳ ꓤ ꓟꓲꓽ ꓙꓬꓼ ꓗꓪ ꓛꓲ ꓬꓰ ꓠ ꓦꓻ ꓩꓴ ꓠ ꓗˍ ꓡꓳ=ꓬꓰ-ꓢꓴ ꓠꓬ ꓣꓳꓽ ꓐꓴ ꓔꓯ ꓠꓲꓹ ꓠꓵˍ ꓡꓳ꓾ ꓬꓲꓸ ꓢꓯꓼ ꓟꓬ ꓖꓶꓽ ꓢꓲ ꓣꓳ ꓔꓯ ꓚꓬꓴꓸ ꓙ ꓗꓷꓳ=ꓮ ꓟꓶ ꓣꓳꓽ ꓒ ꓕꓲꓸꓼ ꓗꓪ ꓔꓬꓹ ꓡꓳ ꓐꓯˍ ꓟ ꓔꓯ ꓢꓷˍ ꓠꓬ ꓙꓲ-ꓢꓴ ꓢꓲꓼ ꓤ ꓤꓶꓻ ꓪꓴꓽ ꓟꓴ ꓡˍ ꓥꓳ=

ꓠꓱꓸ ꓐꓯꓼ ꓤꓶꓻ ꓪꓴꓽ ꓟꓴ ꓡ ꓠꓹ ꓟ ꓣꓳꓽ ꓙꓲ-ꓢꓴ ꓢꓲꓼ ꓤ ꓐꓴ ꓬꓰ ꓠꓹ ꓟ ꓠꓬ ꓠꓵ ꓠꓲꓹ ꓓꓽ-ꓖꓴꓽ ꓫꓬꓹ ꓠ ꓗˍ ꓡꓳ=ꓫꓸ ꓙꓵ ꓔꓬꓹ ꓢꓴ ꓐꓴ ꓔꓯ ꓬꓰ ꓙ ꓠꓯˍ ꓡꓳ=ꓞꓳ ꓫꓸ ꓐꓴ ꓔꓯ ꓔꓳꓹ ꓙ ꓠ ꓗˍ ꓡꓳ=ꓙꓽ ꓫ ꓔꓬꓹ ꓢꓴ ꓐꓴ ꓔꓯ ꓠꓲꓹ ꓟ ꓗꓴ ꓖꓶꓽ ꓠ ꓗˍ ꓡꓳ=ꓚꓲꓸ ꓛꓬꓼ ꓔꓯ ꓔꓳꓹ ꓙ ꓢꓴ ꓔꓯ ꓫꓸ ꓟꓳ ꓗꓴꓸ ꓠ ꓗˍ ꓡꓳ=ꓖꓳ ꓡꓱ ꓬꓰ ꓢꓲ ꓣꓳꓽ ꓐꓴ ꓠꓬ ꓪꓴ-ꓢ ꓔꓬꓹ ꓟ ꓔꓯ ꓡꓯꓼ ꓕꓲꓺ ꓢꓷ ꓙ ꓟꓳ ꓙ ꓢꓴ ꓒꓬꓱꓼ ꓠꓯˍ ꓡꓳ=

 Credit to Vatican News

https://bit.ly/2kHbDjL

Add new comment

1 + 12 =

Please wait while the page is loading