ꓠ-ꓒꓸ-ꓗ ꓗꓪ ꓮ ꓔꓳꓸ ꓐꓬ ꓗꓷ ꓟ ꓑꓶꓸ ꓓꓴ ꓫꓸ ꓙꓵ ꓔꓬ ꓢꓴ 100 ꓣꓳ ꓛꓲꓺ ꓐꓱ ꓶ ꓬꓰ ꓙ ꓡ ꓟ ꓔꓯ ꓣꓱꓽ ꓞꓹ ꓔꓬ ꓟ

ꓐꓶ-ꓬꓲ ꓗꓴꓷꓼ ꓫꓴ ꓖꓴ ꓪꓴꓸ ꓕꓲ ꓛꓱꓽ꓾ ꓗꓴꓸ-ꓘꓮꓲ ꓡꓳ ꓒꓱ ꓜꓴ꓾ ꓠ-ꓒꓸ-ꓗ ꓡꓳ ꓒꓱ꓾ ꓟꓮꓲ-ꓡꓪꓮꓠ ꓘꓹ ꓗꓪ 4 ꓦ 7 ꓠꓬꓲ ꓟꓶꓽ ꓘꓶ ꓕꓯ ꓮ ꓔꓳꓸ ꓐꓬ ꓗꓷ ꓟ ꓫꓵꓽ ꓪꓴ ꓒꓬꓱꓼ ꓗꓷ ꓢꓲ꓾ ꓞꓳ ꓦꓲꓻ 27 ꓟ ꓮ ꓔꓳꓸ ꓐꓬ ꓗꓷ ꓟ ꓑꓶꓸ ꓓꓴ ꓑ ꓫꓬ 100 ꓣꓳ ꓛꓲꓺ ꓠꓬ ꓜꓽ ꓓꓴ ꓖꓪꓽ ꓓꓴ ꓫꓸˍ ꓟ ꓔꓯ ꓔꓳꓹ ꓜꓳꓽ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓘꓹ ꓖꓳ ꓟ ꓗꓪ ꓦꓲꓻ 33 ꓦꓲꓻ ꓙꓳˍ ꓟ ꓥ ꓢꓲ꓾ 27 ꓦꓲꓻ ꓠꓬ ꓮ ꓔꓳꓸ ꓐꓬ ꓗꓷ ꓟ ꓑꓶꓸ ꓓꓴ ꓑ ꓫꓬ ꓐꓴ ꓠꓬ ꓬꓲ ꓪ ꓫꓵꓽ ꓤ ꓧꓪ ꓤ ꓐꓴ ꓔꓬ ꓖꓴ ꓗꓪ ꓙꓰ ꓢꓲ ꓔꓬ ꓪˍ ꓟ ꓥ ꓢꓲ꓾ ꓬꓲ ꓪ ꓗꓪ ꓟ ꓕꓲ ꓐꓶꓽ ꓛꓲ ꓠꓬ ꓞꓳ ꓘꓹ ꓗꓪ ꓟ ꓢꓷꓸ ꓠꓲꓹ ꓢꓳ ꓦꓲꓻ ꓗꓪ ꓡꓳꓽ ꓢꓲ ꓔꓬ ꓪˍ ꓡꓳ꓾ ꓐꓰ 4 ꓦ 10 ꓠꓬꓲ ꓕꓯ ꓮ ꓔꓳꓸ ꓐꓬ ꓗꓷ ꓟ ꓑꓶꓸ ꓓꓴ ꓫꓸ ꓙꓵ ꓡꓰ ꓢꓴ ꓐꓴ ꓔꓯ ꓬꓰ ꓙ ꓖꓶ ꓗꓷ ꓟ ꓬꓰ ꓙ ꓢꓴ ꓜꓴ ꓡꓰ ꓐꓯ ꓡꓳ=

ꓡ-ꓫꓬꓳ ꓞꓳ ꓡꓱ ꓐꓴ ꓬꓰ ꓙ ꓜꓴ ꓗꓪ ꓐꓰˍ ꓟꓲ ꓜꓽ ꓒꓴ 50 ꓟꓳ ꓠꓳ꓾ ꓑꓲꓹ-ꓕꓲꓼ 150 ꓒꓬꓸ꓾ ꓜꓽ ꓓꓴ ꓐꓰ ꓖꓪꓽ ꓓꓴ ꓐꓴ ꓔꓯꓹ ꓙꓰ ꓢꓲ ꓬꓰ ꓙ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓮ ꓔꓳꓸ ꓠꓬ ꓦꓲꓻ ꓕꓲ ꓦꓲꓻ ꓒ ꓕꓲ ꓗꓪ ꓙꓳˍ ꓟ ꓑꓱꓸ ꓛꓵꓽ ꓗꓪ ꓐꓰ ꓮ ꓔꓳꓸ ꓐꓬ ꓪꓴꓸ ꓔꓴˍ ꓟ ꓥ ꓢꓲ꓾ ꓙ ꓖꓴ ꓫꓸ ꓟ ꓑꓶꓸ ꓓꓴ ꓮ ꓔꓳꓸ ꓢꓰꓼ ꓟꓳ ꓓꓳ ꓐꓴ ꓟꓲ ꓮ ꓔꓳꓸ ꓐꓬ ꓖꓴ ꓡꓰ ꓢꓲ ꓛꓲꓺ ꓡˍ ꓡꓳ꓾ ꓐꓰ ꓗꓴꓸ-ꓘꓮꓲ ꓡꓳ ꓒꓱ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=

ꓮ ꓔꓳꓸ ꓐꓬ ꓗꓷ ꓟ ꓘꓹ ꓢꓴ ꓐꓴ ꓠꓬ ꓦ ꓟꓲ ꓐꓰ ꓛꓽ-ꓬꓰꓹ (ꓡꓽ ꓚꓬꓸ) ꓔꓶꓺ ꓢꓲ ꓶꓻ ꓡꓯꓼ ꓬꓰ ꓔꓬ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=