ꓣꓳꓽ ꓙꓵꓻ ꓠꓲꓹ ꓔꓯ ꓣꓱꓽ ꓙˍ ꓟ ꓠꓲꓹ ꓟ ꓗꓪ ꓢꓯꓸ ꓔꓬꓹ ꓝꓲ ꓡꓯ=

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓠꓽ-ꓦꓬ-ꓠꓬꓲ ꓞꓳ ꓜꓴꓻ ꓜꓲꓼ ꓡꓳꓽ ˍ ꓟ ꓐꓰ Angelus ꓪꓽ ꓘꓴˍ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰ ꓑ ꓫꓬꓼ ꓔꓯ ꓧꓪꓸ ꓧꓪꓸꓼ ꓐꓯˍ ꓟ=

ꓣꓳꓽ ꓙꓵꓻ ꓠꓲꓹ ꓔꓯ ꓣꓱꓽ ꓙˍ ꓟ ꓠꓲꓹ ꓟ ꓗꓪ  ꓢꓯꓸ ꓔꓬꓹ ꓝꓲ ꓡꓯ=

10 ꓦ ꓟ 6 ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓜꓲꓼ ꓡꓳꓽˍ ꓟ ꓠ-ꓦꓬ-ꓠꓬꓲ ꓑ ꓫꓬꓼ ꓜꓲꓼ ꓡꓳꓽˍ ꓟ ꓐꓰ Angelus ꓪꓽ ꓘꓴˍ ꓟ ꓗꓪ ꓠ-ꓦꓬ-ꓠꓬꓲ ꓢꓲꓽ ꓫꓬ ꓟꓸ ꓟꓲꓽ ꓗꓪ ꓓꓯˍ ꓟ ꓔꓯꓺ ꓥꓳꓽ ꓟꓸ ꓟꓲ 2 ꓟ ꓥ ꓟ ꓾ ꓪꓳꓽ ꓒꓲꓻ ꓫꓵꓸ ꓔꓯꓺ ꓥꓳꓽ ꓐꓰ ꓠꓺ ꓡꓳˍ ꓟ ꓚꓳꓺ ꓑ ꓔꓯꓺ ꓥꓳꓽ ꓔꓯ ꓟꓸ ꓖꓶꓽ ꓗꓷꓳ=

ꓓꓽ ꓪꓴꓸ ꓟ ꓪꓳꓽ ꓒꓲꓻ ꓫꓵꓸ ꓔꓯꓺ ꓥꓳꓽ ꓗꓪ ꓢꓲꓺ ꓒꓽ ꓬꓰ-ꓢꓴ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽ ꓪꓴ ꓛꓲ ꓤ ꓙꓵ ꓠꓲꓹ ꓙꓳˍ ꓠꓽ꓾ ꓐꓵ ꓜ ꓜꓲꓻ ꓔꓯ ꓬꓲꓸ ꓚꓰꓺ ꓚꓵꓹ ꓔꓴ ꓡ ꓢꓲ꓾ ꓬꓲꓻ ꓡꓴ ꓐꓱ ꓗꓪ ꓔꓶꓺ ꓬꓰ ꓐꓻ ꓡˍ ꓡꓳ=ꓬꓰ-ꓢꓴ ꓠꓬ ꓙꓵꓻ ꓠꓲꓹ ꓙꓳ ꓢꓴ ꓐꓱ ꓶꓼ ꓒꓬꓱꓼ ꓡ ꓟꓽ ꓓ ꓟ ꓕꓲꓽ ꓫꓵꓽˍ ꓟꓲ ꓟꓽ ꓙꓳ= ꓮ ꓡꓲꓳ ꓐꓯˍ ꓠꓬ ꓮꓸ ꓫꓵꓽˍ ꓟꓲ ꓬꓰ ꓐꓻ ꓡ ꓢꓴ ꓐꓴ ꓠꓬ ꓬꓲꓸ ꓪꓽ ꓪꓽ ꓠꓬꓲˍ ꓟ ꓗꓪ ꓐꓰ ꓟꓽ ꓥ꓾ ꓪꓴ-ꓢ ꓙꓵꓽ ꓪꓽ ꓗꓪ ꓐꓰ ꓥ ꓡꓳ꓾ ꓐꓯˍ ꓟ ꓔꓯ ꓙꓽ ꓜꓲꓼ ꓝꓲ ꓠꓲꓹ ꓫꓵˍ ꓡꓳ=

ꓮ ꓠꓶꓸ ꓤꓽ ꓥ ꓟ ꓪꓳꓽ ꓒꓲꓻ ꓫꓵꓸ ꓔꓯ ꓔꓯꓺ ꓢꓲ ꓢꓲꓺ ꓒ ꓬꓰ-ꓢꓴ ꓐꓯˍ ꓟ ꓠꓬ꓾ ꓙꓵꓻ ꓠꓲꓹ ꓐꓯˍ ꓟ ꓠꓽ ꓾ ꓚꓲꓸ ꓛꓬꓽ ꓔꓯ ꓚꓲꓸ ꓛꓬꓽ ꓙꓵꓻ ꓠꓹ ꓟ ꓟꓽ ꓥ꓾ꓢꓲꓽ ꓒꓽ ꓠꓯꓸꓼ ꓗꓪ ꓙꓽ ꓣꓳˍ ꓟ ꓠꓲꓹ ꓟ ꓙꓳ ꓠꓹ ꓟ ꓥ ꓡꓳ=ꓕꓱ ꓟ ꓠꓬ ꓪꓴ-ꓢ ꓐꓱ ꓶ ꓪꓴꓽ ꓓꓰˍ ꓟ ꓣꓱꓽ ꓬꓯꓼ ꓓꓴ ꓕꓲꓽ ꓫꓵꓽ ꓥ ꓡꓳ=ꓚꓲꓸ ꓛꓬꓽ ꓬꓰ ꓐꓻ ꓡˍ ꓟ ꓕꓲꓽ ꓒꓳꓹ ꓗꓪ ꓐꓰ ꓪꓴ-ꓢ ꓠꓯꓸꓼ ꓗꓪ ꓚꓲꓸ ꓛꓬꓽ ꓙꓵꓻ ꓠꓲꓹ ꓐꓰ ꓕꓲꓽ ꓪꓺꓽ ꓚꓲꓸ ꓛꓬꓽ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓠꓹ ꓟ ꓥ ꓡꓳ=ꓚꓲꓸ ꓛꓬꓽ ꓠꓲꓹ ꓡꓶꓽ ꓔꓯ ꓡꓳꓺ ꓩꓴ ꓗꓷ ꓠꓹ ꓟ ꓥ ꓡꓳ=

ꓔꓯꓺ ꓥꓳꓽ ꓠꓬꓲꓽ ꓙꓰꓽ ꓕꓲꓽ ꓙꓰꓽ ꓟ ꓾ꓠꓺ ꓡꓳˍ ꓟ ꓚꓳꓺ ꓑ ꓔꓯꓺ ꓥꓳꓽ

ꓣꓳꓽ ꓚꓵꓺ ꓚꓵꓺ ꓙꓵꓻ ꓠꓲꓹ ꓙꓳˍ ꓟ ꓔꓯ ꓮ ꓡꓲ ꓐꓰ ꓢꓷꓸ ꓐꓻ ꓡˍ ꓡꓺꓽ꓾ ꓐꓰ ꓔꓲꓺ ꓒ ꓪ ꓔꓲ Francis ꓡꓰ ꓠꓺ ꓠꓬꓲ ꓗꓷꓳ=ꓬꓰ-ꓢꓴ ꓠꓬ ꓣꓳꓽ ꓔꓯ ꓚꓳꓺ ꓑ ꓕꓲꓽ ꓣꓳ ꓟ ꓙꓵꓻ ꓠꓲꓹ ꓔꓯ ꓔꓯꓺ ꓟꓳꓸ ꓖꓶꓽ ꓗꓷ ꓢꓲ꓾ ꓣꓱꓽ ꓛꓰꓽ ꓟꓽ ꓙꓳ ꓟ ꓚꓳꓺ ꓑ ꓔꓯꓺ ꓥꓳꓽ ꓗꓪ ꓐꓰ ꓐꓯ ꓟꓸ ꓖꓶꓽ ꓡˍ ꓟ ꓥꓳ=ꓔꓯꓺ ꓥꓳꓽ ꓕꓱ ꓟ ꓔꓯ ꓬꓲꓸ ꓕꓯꓽ ꓢꓲꓺ ꓗꓪ ꓐꓰ ꓡꓰꓽ ꓡꓳˍ ꓠꓬ꓾ ꓚꓵꓺ ꓚꓵꓺ ꓔꓬꓹ ꓫꓸ ꓓꓴ ꓕꓲꓽ ꓟ ꓥ ꓡꓳ꓾ ꓐꓰ ꓔꓲꓺ ꓒꓽ ꓪ ꓔꓲ ꓡꓰ ꓐꓯ ꓖꓶꓽ ꓗꓷꓳ=ꓦꓻ ꓟꓲ ꓗꓪ ꓐꓰ ꓬꓲꓼ ꓡˍ ꓟ ꓚꓳꓺ ꓑ ꓔꓯ ꓪꓴꓽ ꓧꓶꓻ ꓟꓽ ꓠꓽ ꓝꓲ ꓝꓲ ꓐꓰ꓾ ꓬꓲꓸ ꓐꓱ ꓶ ꓜꓻ ꓫꓬꓹ ꓝꓲˍ ꓟ ꓪꓴꓸ ꓠꓬꓲ꓾ ꓚꓳꓺ ꓑ ꓕꓯꓽ ꓢꓲꓺ ꓗꓪ ꓢꓲꓺ ꓒꓽ ꓬꓰ ꓗꓷ ꓟ ꓚꓱꓹ ꓪꓴꓸ ꓠꓬꓲ ꓥ ꓡꓳ=

ꓢꓲꓺ ꓒꓽ ꓠꓲꓹ ꓟ ꓠꓬ ꓔꓯꓺ ꓥꓳꓽ ꓬꓲꓸ ꓬꓳꓸ ꓚꓰˍ ꓟ ꓔꓯ ꓟꓳꓸ ꓖꓶꓽ ꓔꓬꓹ ꓡꓳ=ꓐꓲꓻ ꓙꓲꓽ ꓡꓰ ꓠ ꓐꓯˍ ꓠꓬ꓾ ꓚꓳꓺ ꓑ ꓬꓰ ꓐꓻ ꓡˍ ꓟ ꓠꓲꓹ ꓟ ꓔꓯ ꓟꓳꓸ ꓖꓶꓽ ꓔ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶꓽ ꓗꓷꓳ=ꓬꓰ-ꓢꓴ ꓠꓬ ꓪꓴ-ꓢ ꓐꓰ ꓙ ꓡꓯꓽ ꓘꓳˍ ꓟ ꓗꓪ ꓞꓳ ꓤ ꓕꓲꓽ ꓣꓳ ꓙꓳ ꓠꓯˍ ꓟ ꓙꓵꓻ ꓠꓲꓹ ꓔꓯ ꓟꓳꓸ ꓖꓶꓽ ꓔꓬꓹ ꓟ ꓥ ꓡꓳ= ꓠꓱꓸ ꓐꓯꓼ ꓔꓯ ꓟꓽ ꓥꓳ ꓡꓳꓸ ꓡꓳꓸ ꓐꓰ꓾ ꓮꓽ ꓔꓳ ꓟꓽ ꓬꓰ ꓬꓰ ꓐꓰ ꓪꓴ-ꓢ ꓠꓲꓹ ꓡꓶꓽ ꓔꓯ ꓕꓲꓽ ꓖꓳꓻ ꓓꓱꓽ ꓔꓲꓽ ꓶꓼ ꓟꓬꓻ ꓡꓱꓸꓼ ꓡꓯꓼ ꓙꓱ ꓔ ꓠꓹ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ Francis ꓡꓰ ꓝ ꓢꓲ ꓐꓯ ꓗꓷꓳ=

ꓕꓱ ꓟ ꓠꓬ ꓣꓳꓽ ꓠꓱꓸ ꓐꓯꓼ ꓕꓯꓽ ꓢꓲ ꓗꓪ ꓮ ꓡꓰ ꓐꓰ ꓣꓱꓽ ꓬꓰ ꓗꓳꓸ ꓡꓺꓽ꓾ ꓮ ꓡꓰ ꓐꓰ ꓣꓱꓽ ꓙ ꓗꓷ ꓟ ꓾ ꓣꓱꓽ ꓙ ꓟ ꓗꓪ ꓐꓰ ꓗꓹ ꓛꓲꓽ ꓪꓴ ꓔꓯ ꓮ ꓡꓰ ꓐꓰ ꓧꓪꓺ ꓗꓷ ꓟ꓾ ꓫꓸ ꓟꓳˍ ꓟ ꓐꓰ ꓢꓷꓸ ꓙ ꓟꓳ ꓟ ꓔꓯ ꓟꓽ ꓥꓳ ꓡꓳꓸ ꓡꓳꓸ ꓐꓰ ꓮ ꓡꓰ ꓬꓰ ꓗꓷ ꓟ ꓐꓯˍ ꓟ ꓠꓲꓹ ꓟ ꓥ ꓡꓳ=ꓢꓲꓽ ꓫꓬ ꓟꓸ ꓟꓲꓽ ꓗꓪ ꓢꓲꓺ ꓒꓽ ꓬꓰ-ꓢꓴ ꓐꓯ ꓔ ꓟ ꓾ ꓣꓳꓽ ꓐꓴ ꓔꓯ ꓣꓱꓽ ꓟꓽ ꓬꓯꓼ ꓟ ꓚꓳꓺ ꓑ ꓥ ꓡꓳ꓾ ꓐꓯˍ ꓟ ꓐꓯ ꓘꓶꓽ ꓠꓬ ꓙꓽ ꓣꓳˍ ꓟ ꓠꓲꓹ ꓟ ꓐꓰ ꓬꓰ ꓠꓲꓹ ꓡꓶꓽ ꓙꓳˍ ꓟ ꓠꓲꓹ ꓟ ꓔꓯ ꓟꓳꓸ ꓖꓶꓽˍ ꓟ ꓟꓳꓸ ꓖꓶꓽ ꓓꓴ ꓕꓲꓽ ꓫꓵꓽˍ ꓟꓲ ꓥ ꓡꓳ= ꓕꓱ ꓟ ꓠꓬ ꓘꓴ-ꓜꓲ-ꓞꓳ ꓐꓱ ꓶꓼ ꓙꓲꓽ ꓙꓲꓽ ꓙꓲˍ ꓢꓲ꓾ ꓘꓴ-ꓜꓲ-ꓞꓳ ꓗꓪ ꓣꓱꓽ ꓬꓰ ꓠꓹ ꓟ ꓐꓱ ꓶꓼ ꓔꓱꓹ ꓚꓵˍ ꓟ ꓠꓲꓹ ꓟ꓾ ꓙꓽ ꓣꓳˍ ꓟ ꓠꓲꓹ ꓟ ꓗꓪ ꓐꓰ ꓣꓱꓽ ꓙˍ ꓟ ꓥ ꓡꓳ꓾ ꓐꓯˍ ꓟ ꓔꓯ ꓢꓷꓸ ꓙ ꓟꓳ ꓙ ꓔ ꓡꓳ=

ꓘꓴ-ꓜꓲ-ꓞꓳ ꓢꓲꓺ ꓤꓽ ꓐꓴ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓺꓽ ꓬꓰ ꓢꓲ꓾ꓣꓳꓽ ꓙꓵꓻ ꓠꓲꓹ ꓟꓹ ꓟ ꓥ ꓟ ꓣꓳ-ꓢ-ꓣꓲ ꓟꓹ ꓟ ꓑꓮꓲ ꓗꓪ  ꓣꓳꓽ ꓐꓴ ꓠꓲꓹ ꓥꓳ ꓢꓲ ꓪꓽ ꓘꓴ ꓡꓯ꓾ꓐꓰ ꓐꓯ ꓢꓲ ꓔꓲꓺ ꓒꓽ ꓪ ꓔꓲ Francis ꓡꓰ ꓬꓲꓸ ꓟꓸ ꓟꓲꓽ ꓟꓸ ꓟ ꓔꓯ ꓬꓲꓸ ꓟꓶꓽ ꓢꓰꓼ ꓗꓷꓳ=

Credit to Vatican News

https://www.vaticannews.va/en/pope/news/2019-10/pope-at-angelus-living-o...

Add new comment

12 + 6 =

Please wait while the page is loading