ꓣꓳ-ꓟ ꓡꓳ ꓒꓱ ꓗꓪ ꓟ ꓞꓳ ꓫ ꓐꓴ ꓠꓬ ꓔꓲꓺ ꓒ ꓪ ꓔꓲ ꓔꓯ ꓫꓸ ꓟꓳ ꓠꓹ ꓟ ꓠꓯ ꓞꓲꓼ ꓦꓲ ꓗꓪ ꓛꓲꓺ ꓡ ꓗꓷ ꓟ

ꓠꓽ-ꓦꓬꓼ-ꓠꓬꓲ ꓟꓶꓽ ꓘꓶꓽ (11ꓸ7ꓸ2021) ꓕꓯ George ꓠꓬ ꓬꓲ (63) ꓘꓳꓼ ꓐꓲˍ ꓟ ꓑꓮꓲꓽ ꓔꓯ ꓠꓱꓸ ꓐꓯꓼ ꓪꓰ ꓤ ꓐꓴ ꓐꓰ Migliori ꓦꓲ ꓓꓽ ꓟ ꓗꓪ ꓬꓰ ꓠꓹ ꓟ ꓥꓳ= ꓖꓳ ꓟ ꓠꓬ ꓔꓲꓺ ꓒ ꓪ ꓔꓲ Francis ꓗꓪ ꓐꓰ ꓣꓳ-ꓟ ꓡꓳ ꓒꓱ ꓘꓴꓽ ꓗꓪ ꓟ ꓔꓬ ꓖꓴ ꓦꓲꓻ ꓟꓽ ꓙꓳ ꓢꓴ ꓐꓴ ꓐꓱ ꓶ ꓖꓶꓽ ꓔ ꓟ ꓦꓲ ꓥ ꓡꓳ=ꓕꓱ ꓟ ꓠꓬ Vatican ꓒ ꓕꓲ ꓗꓪ ꓚꓹ ꓡꓳ= ꓬꓲ ꓠꓬ ꓑꓲ-ꓣꓴ ꓗꓴꓷꓼ ꓢꓴ ꓥ ꓡꓳ= ꓖꓳ ꓡꓱ ꓥˍ ꓟꓲ ꓲ-ꓔ-ꓡꓲ ꓗꓴꓷꓼ ꓗꓪ ꓔꓬ ꓡ ꓗꓷ ꓟ ꓟꓶ ꓤ ꓗꓷ ꓡꓰꓳ= ꓬꓲ ꓠꓬ ꓬꓲ ꓦꓵꓻ ꓦꓬꓼ ꓠꓬꓲ ꓑꓮꓲꓽ ꓔꓯ ꓔꓲꓺ ꓒ ꓪ ꓔꓲ ꓠꓯ ꓞꓲꓼ ꓦꓲ ꓗꓪ ꓔꓬ ꓢꓲ ꓠꓻ ꓫꓬꓹ ꓔꓬ ꓟ ꓠꓯ ꓞꓲꓼ ꓦꓲ ꓗꓪ ꓦꓲꓻ ꓟꓽ ꓙꓳ ꓢꓴ 20 ꓣꓳ ꓛꓲꓺ ꓡ ꓢꓲ ꓔꓲꓺ ꓒ ꓪ ꓔꓲ ꓠꓻ ꓓꓴ ꓞꓼ ꓞꓼ ꓓ ꓡꓰ ꓠꓹ ꓟ ꓪꓽ ꓘꓴ ꓖꓶ ꓠꓲꓹ ꓫꓵˍ ꓟ ꓡꓰ ꓐꓰ꓾ ꓣꓳ-ꓟ ꓡꓳ ꓒꓱ ꓗꓪ ꓡꓰꓽ ꓟꓽ ꓛꓲꓺ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓬꓲ ꓡꓰ ꓐꓰ ꓦꓲꓻ ꓟꓽ ꓙꓳ ꓢꓴ ꓐꓴ ꓮ ꓙꓵꓽ ꓔꓯ ꓔꓲꓺ ꓒ ꓪ ꓔꓲ ꓬꓰ ꓖꓶ ꓗꓷ ꓟ ꓟꓬꓱꓼ ꓮ ꓙꓵꓽ ꓐꓱ ꓶ ꓫ ꓟꓳ ꓠꓲꓹ ꓫꓵˍ ꓟ ꓐꓰ꓾ ꓬꓲ ꓪ ꓐꓴ ꓠꓬ ꓔꓲꓺ ꓒ ꓪ ꓔꓲ ꓒ ꓕꓲ ꓗꓪ ꓔꓬ ꓟ ꓔꓯ ꓟꓳꓸ ꓖꓶ ꓠꓹ ꓟ ꓥ ꓡꓳ=

ꓔꓲꓺ ꓒ ꓪ ꓔꓲ ꓔꓬ ꓟ ꓗꓶꓹ ꓗꓪ ꓛꓲ ꓬꓰ ꓐ ꓡˍ ꓠꓬ ꓔꓲꓺ ꓒ ꓪ ꓔꓲ ꓔꓯ “ꓪꓴ-ꓢ ꓡꓰ ꓠꓴ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓝꓲ= ꓮ ꓟꓬꓹ ꓘꓳꓼ ꓗꓪ ꓛꓲꓺ ꓔꓬ ꓢꓹ ꓟ ꓣꓱꓽ ꓛꓰꓽ ꓖꓶ ꓝꓲ꓾” ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ꓾ ꓐꓰ ꓐꓯ ꓗꓷꓳ=

63 ꓘꓳꓼ ꓐꓲ ꓡꓰ ꓗꓷ ꓟ George ꓡꓰ ꓔꓲꓺ ꓒ ꓪ ꓔꓲ ꓠꓬ ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓕꓯ ꓠꓻ ꓓꓻ ꓡꓰˍ ꓟ ꓔꓯ ꓥꓳ ꓡꓳꓸ ꓔ ꓟ꓾ ꓬꓲ ꓔꓯ ꓠꓯ ꓞꓲꓼ ꓦꓲ ꓗꓪ ꓛꓲ ꓧꓳꓽ ꓔꓯꓹ ꓙꓰ ꓖꓶ ꓡꓹ ꓟ ꓢꓯ-ꓓꓲ-ꓙꓲ-ꓓꓲ-ꓬꓳ ꓜꓴꓻ ꓔꓯˍ ꓟꓲ ꓫ ꓟꓳˍ ꓟ꓾ ꓬꓲ ꓠꓬ ꓬꓲ ꓖꓳ ꓓꓱꓽ ꓗꓪ ꓠꓻ ꓡꓳꓸ ꓠꓬꓲˍ ꓟ ꓔꓯ ꓮ ꓕꓯ ꓟꓲ ꓬꓰ ꓐ ꓡˍ ꓟ ꓙꓵꓽ ꓪ ꓟꓶ ꓔ ꓟ꓾ ꓔꓲꓺ ꓒ ꓪ ꓔꓲ ꓠꓬ ꓟꓽ ꓟꓶ ꓫꓵ ꓕꓯ ꓠꓻ ꓓ ꓡꓰˍ ꓟ ꓔꓯ Angelus ꓪꓽ ꓘꓴ ꓡꓳꓹ ꓬꓰ ꓕꓯ ꓑ ꓫꓬ ꓐꓴ ꓔꓯ ꓐꓯ ꓖꓶ ꓗꓷ ꓟ꓾ ꓧꓶꓸ ꓕꓯ ꓠꓬ ꓔꓲꓺ ꓒ ꓪ ꓔꓲ ꓬꓲ ꓚꓲ ꓛꓬ ꓡꓰ ꓧꓳꓽ ꓣꓱꓽ ꓢꓲ ꓪꓽ ꓘꓴˍ ꓥ ꓟꓲ ꓮ ꓟꓶ ꓕꓲ ꓧꓪꓹ ꓗꓪ ꓠꓬ ꓔꓲꓺ ꓒ ꓪ ꓔꓲ ꓬꓲ ꓠꓯ ꓞꓲꓼ ꓦꓲ ꓗꓪ ꓐꓰ ꓪꓽ ꓘꓴ ꓢꓲ꓾ ꓪ ꓘꓴˍ ꓟ ꓔꓯ ꓔꓲꓺ ꓒ Francesco Tedeschi ꓡꓰ ꓧꓳꓽ ꓣꓱꓽ ꓖꓶ ꓗꓷ ꓟ ꓥꓳ= ꓔꓲꓺ ꓒ ꓖꓳ ꓕꓲ ꓣꓳ ꓠꓬ Trastevere ꓗꓪ ꓟ Santa Maria ꓬꓲ ꓟꓬꓱꓽ ꓙ ꓢꓴ ꓔꓲꓺ ꓒ ꓥ ꓡꓳ=

ꓢꓯ-ꓓꓲ-ꓙꓲ-ꓓꓲ-ꓬꓳ ꓜꓴꓻ ꓐꓴˍ ꓟꓲ ꓠꓯ ꓞꓲꓼ ꓦꓲ ꓗꓪ ꓛꓲꓺ ꓡ ꓟ

ꓠꓯ ꓞꓲꓼ ꓦꓲ ꓗꓪ ꓛꓲꓺ ꓡ ꓗꓷ ꓟ ꓠꓬ ꓟꓽ ꓙꓳ ꓞꓳ ꓫ ꓐꓴ ꓡꓰ ꓓꓰꓽ ꓗꓷ ꓟ ꓪꓴꓸ ꓠꓬꓲ ꓥ ꓡꓳ= ꓦꓲꓻ ꓖꓳ ꓟ ꓔꓯ ꓙꓵꓽ ꓔꓬ ꓟ ꓠꓬ Carlo Santoro ꓥ ꓡꓳ= ꓬꓲ ꓡꓰ ꓜꓲꓼ ꓡꓯ ꓘꓳ ꓢꓲ ꓠ ꓠꓬꓲˍ ꓟ ꓗꓪ “ꓦꓲꓻ ꓟꓽ ꓙꓳ ꓞꓳ ꓫ ꓐꓴ ꓠꓬ ꓬꓲ ꓪ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓬꓰ ꓖꓶ ꓗꓷ ꓟ ꓮ ꓙꓵꓽ ꓐꓱ ꓶ ꓮ ꓘꓶꓸ ꓫꓸ ꓟꓳ ꓔꓬ ꓟ ꓐꓰ꓾ ꓜꓳꓽ-ꓟ(ꓬꓲꓼ ꓔ ꓖꓴ ꓢꓽ ꓡ) ꓫꓬꓹ ꓖꓶˍ ꓟ꓾ ꓮ ꓟˍ ꓟꓲ ꓟꓽ ꓓꓵꓽ ꓙ ꓖꓶ ꓔ ꓟ ꓟꓽ ꓙꓳ ꓢꓴ ꓐꓴ ꓐꓱ ꓶ COVID ꓠꓻ ꓔꓯ ꓗꓽ ꓕꓸ ꓟ ꓠꓯ ꓞꓲꓼ ꓗꓸ ꓖꓶˍ ꓟ ꓥ ꓡꓳ= ꓦꓬꓼ ꓠꓬꓲ ꓕꓱ ꓟ ꓘꓴꓽ ꓗꓪ ꓔꓲ ꓒ ꓪ ꓔꓲ ꓠꓬ ꓫ ꓔꓬ ꓢꓴ ꓮ ꓙꓵꓽ ꓐꓰ ꓒ ꓕꓲꓺ ꓗꓪ ꓔꓬ ꓗꓷ ꓟ ꓥ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓡ ꓞꓳ ꓮ ꓙꓵꓽ ꓔꓯˍ ꓟꓲ ꓟꓽ ꓙꓳ ꓞꓳ ꓫ ꓐꓴ ꓐꓱ ꓶ ꓙꓲꓻˍ ꓟ ꓛꓳꓽ ꓒꓯꓹ ꓬꓰ ꓠꓹ ꓟ ꓬꓲꓼ ꓠꓬꓲꓸ ꓖꓶ ꓗꓷꓳ=

ꓔꓲꓺ ꓒ ꓪ ꓔꓲ Francis ꓐꓱ ꓶ ꓟ-ꓡꓲ-ꓬ ꓬꓲ ꓡꓯꓼ ꓫꓴꓻ

ꓠꓯ ꓞꓲꓼ ꓦꓲ ꓟꓲ ꓙꓬꓼ ꓗꓪ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ John Paul 2 ꓐꓬꓱꓽ ꓑꓵꓹ ꓔ ꓡꓳ= ꓖꓳ ꓗꓪˍ ꓟꓲ ꓢꓯ-ꓓꓲ-ꓙꓲ-ꓓꓲ-ꓬꓳ ꓜꓴꓻ ꓐꓰ ꓬꓲ ꓪ ꓐꓴ ꓐꓰ ꓐꓹ ꓟ ꓦꓲꓻ ꓟꓽ ꓙꓳ ꓢꓴ ꓐꓴ ꓐꓰ ꓕꓲ ꓪꓽ “ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ” ꓔꓯ ꓘꓴ ꓗꓷꓳ= ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ John Paul 2 ꓗꓪ ꓐꓰ ꓠꓯ ꓞꓲꓼ ꓦꓲꓻ ꓕꓱ ꓟ ꓔꓯ ‘Vatican 3’ ꓐꓰ ꓟꓬꓱꓺ ꓖꓶ ꓔ ꓟˍ ꓟꓲ ꓥ ꓡꓳ=ꓮ ꓡꓲꓳ ꓐꓯ ꓠꓬ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ John Paul 2 ꓠꓬ ꓠꓯ ꓞꓲꓼ ꓦꓲ ꓕꓱ ꓟ ꓗꓪ ꓮ ꓟꓬꓹ ꓧꓪꓹ ꓓꓯ ꓠꓬꓲ ꓗꓷ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓕꓲ ꓖ ꓗꓪ ꓐꓰ Migliori ꓦꓲꓻ ꓓ ꓟ ꓔꓯ ꓙꓵꓽ ꓢꓴ ꓟ-ꓡꓲ-ꓬ ꓡꓰ ꓧꓳꓽ ꓪꓴꓸ ꓟꓴ ꓢꓲ Vatican ꓗꓪ ꓙꓵꓽ ꓪ ꓙꓳ ꓢꓴ ꓐꓴ ꓐꓰ ꓔꓲꓺ ꓒ ꓪ ꓔꓲ ꓠꓻ ꓫꓬꓹ ꓔꓬ ꓟ ꓗꓪ ꓓꓯꓺ ꓙꓰ ꓗꓷꓳ= ꓟ-ꓡꓲ-ꓬ ꓠꓬ ꓔꓲꓺ ꓒ ꓪ ꓔꓲ ꓔꓯ ꓖꓶ ꓓꓴ ꓐꓯ ꓓꓲ ꓔꓯꓹ ꓡ ꓗꓷ ꓟ ꓢꓲꓹ ꓪꓰꓻ ꓔꓯ ꓖꓳ ꓗꓪ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓖꓶ ꓗꓷ ꓗꓸ ꓠꓯꓸ꓾ ꓬꓲ ꓪ ꓐꓴ ꓡꓰ ꓔꓲꓺ ꓒ ꓪ ꓔꓲ ꓔꓬ ꓗꓪ ꓦꓲꓻ ꓟꓽ ꓙꓳ ꓟ ꓞꓳ ꓫ ꓐꓴ ꓔꓯ ꓧꓳꓽ ꓔꓯꓹ ꓙꓰ ꓗꓷꓳ=