ꓣ-ꓘꓮꓲ ꓗꓪ ꓬꓲꓻ ꓙꓬ ꓙꓵꓽ ꓟꓶꓸ ꓗꓷ ꓟ ꓑꓶꓸ ꓓꓴ ꓜꓻ ꓟꓲ ꓰ-ꓗ ꓥꓪꓽ ꓟꓶꓽ ꓟꓽ ꓞꓲ ꓐꓬ ꓡꓰꓳ

ꓣ-ꓘꓮꓲ ꓗꓴꓷꓼ ꓫꓴ ꓗꓪ ꓟꓶꓽ ꓦ ꓟꓽ ꓠꓽ ꓠꓽ ꓦ ꓗꓷ ꓟ ꓪꓴꓸ ꓠꓬꓲ ꓬꓲꓻ ꓙꓬ ꓙꓵꓽ ꓟꓶꓸ ꓡ ꓢꓲ ꓜꓻ ꓔꓶ ꓔ ꓟ ꓜꓻ ꓟꓲ ꓰ-ꓗ ꓥꓪꓽ ꓟꓶꓽ ꓟꓽ ꓞꓲ ꓐꓬ ꓡꓰꓳ꓾ ꓐꓰ ꓣ-ꓘꓮꓲ ꓗꓴꓷꓼ ꓫꓴ ꓔꓶꓺ ꓜꓽ ꓔꓶꓺ ꓓꓳ ꓟꓬꓱꓽ ꓜꓴ ꓐꓴ ꓡꓰ ꓐꓳ ꓚꓲꓸ ꓔ ꓟ ꓗꓪ ꓐꓰ ꓢꓷꓸ ꓪ ꓡꓳ=

ꓮ ꓟꓶ ꓕꓲ ꓦ ꓠꓬꓲꓽ ꓠꓽ ꓘꓴꓽ ꓗꓪ ꓟꓶ ꓦ ꓮ ꓟꓬꓹ ꓦ ꓗꓷ ꓠꓬꓲ ꓗꓬꓮꓴꓔ꓾ꓓꓮꓪ ꓡꓳ ꓒꓱ ꓗꓪ ꓜꓻ ꓟꓲ ꓰ-ꓗ 15ꓹ000 ꓟꓽ ꓞꓲ꓾ ꓟꓬꓮꓴꓗ-ꓴ ꓡꓳ ꓒꓱ ꓗꓪ ꓜꓻ ꓟꓲ ꓰ-ꓗ 12ꓹ000 ꓟꓽ ꓞꓲ꓾ ꓟꓲꓠ-ꓑꓬꓸ ꓡꓳ ꓒꓱ ꓗꓪ ꓜꓻ ꓟꓲ ꓰ-ꓗ 24ꓹ000 ꓟꓽ ꓞꓲ ꓐꓬ ꓡꓰ ꓗꓷ ꓟ ꓥ ꓡꓳ=

ꓖꓳ ꓡꓱ ꓐꓬ ꓡꓰ ꓟ ꓑꓶꓸ ꓓꓴ ꓜꓻ ꓟꓲ ꓢꓲ ꓒ ꓐꓴ ꓠꓬ ꓝꓮꓲ ꓕꓲ ꓧꓪꓹ ꓔꓶꓺ ꓠꓹ ꓟ ꓜꓻ ꓫꓵꓸ ꓧꓪ ꓟꓶ ꓟꓽ ꓓ ꓟ꓾ ꓜꓻ ꓫꓵꓸ ꓐꓱ ꓶ ꓒꓴ ꓟꓽ ꓐ ꓡ ꓟ ꓕꓱ ꓟꓬ ꓫꓵꓽ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓪˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓣ-ꓘꓮꓲ ꓗꓴꓷꓼ ꓫꓴ ꓘꓴꓽ ꓗꓪ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓜꓻ ꓔꓶˍ ꓟ ꓰ-ꓗ ꓠꓲꓸ ꓡꓰ ꓔꓬ ꓟˍ ꓡꓰ ꓐꓰ ꓜꓻ ꓥ ꓟꓲ ꓮ ꓤꓹ ꓤꓹ ꓠꓲꓸ ꓡꓰ ꓔꓬ ꓟ ꓙꓵꓹ ꓗꓪ꓾ ꓮ ꓟꓶ ꓟ ꓡꓰ ꓟꓳ-ꓘ ꓟꓲꓽ ꓦꓲ ꓕꓳꓽ ꓥꓳꓽ ꓐꓰ ꓬꓲꓻ ꓙꓬ ꓙꓵꓽ ꓟꓶꓸˍ ꓟ ꓒꓬꓱꓼ ꓡ ꓔꓬ ꓟ ꓑꓶꓸ ꓓꓴ ꓜꓻ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓮ ꓟꓬꓹ ꓠꓲꓸ ꓡꓰˍ ꓟ ꓡꓰꓽ ꓟꓽ ꓞꓲ꓾ ꓜꓽ ꓓꓴ ꓟꓽ ꓡꓳꓼ ꓗꓷ ꓡ ꓓꓴ ꓥꓳ ꓐꓰ ꓣ-ꓘꓮꓲ ꓗꓴꓷꓼ ꓫꓴ ꓔꓶ ꓜꓽ ꓔꓶ ꓓꓳ ꓟꓬꓱꓽ ꓜꓴ ꓗꓪ ꓟ ꓢꓽ ꓡ ꓙꓵꓽ ꓴ-ꓗꓬꓮꓪ-ꓜꓯ ꓡꓰ ꓐꓯˍ ꓡꓳ=

ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓣ-ꓘꓮꓲ ꓗꓴꓷꓼ ꓫꓴ ꓗꓪ ꓠꓬ ꓜꓻ ꓔꓶˍ ꓟ ꓰ-ꓗ 1ꓹ040ꓹ000 ꓟꓽ ꓞꓲꓺ ꓙꓳˍ ꓟ ꓥ ꓢꓲ ꓕꓲ ꓘꓳꓼ ꓗꓪ ꓜꓻ ꓒꓴ 700 ꓫꓬꓹ ꓠꓳꓸ ꓘꓴꓽ ꓓꓳˍ ꓡꓳ ꓐꓰ ꓐꓯ ꓔ ꓥ ꓟꓲ꓾ ꓚꓵ ꓚꓵ ꓠꓬ ꓜꓻ ꓔꓶˍ ꓟ ꓰ-ꓗ 850ꓹ000 ꓟꓽ ꓞꓲˍ ꓡꓰꓽ ꓙꓳ ꓢꓲ ꓕꓲ ꓘꓳꓼ ꓗꓪ ꓜꓻ ꓒꓴ 400 ꓫꓬꓹ ꓠꓳꓸ ꓘꓴꓽ ꓛꓲˍ ꓡꓰꓽ ꓟꓶˍ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ=