ꓧꓶꓽ ꓗꓴꓷꓼ ꓗꓪ ꓗ-ꓕꓳ-ꓡꓲꓗ ꓔꓲꓺ ꓒ ꓓꓽ ꓕꓲ ꓣꓳ ꓒꓲꓼ ꓡꓰ ꓟ ꓓꓳꓽ

ꓧꓶꓽ ꓗꓴꓷꓼ ꓗꓪ ꓟ ꓗ-ꓕꓳ-ꓡꓲꓗ ꓔꓲꓺ ꓒ ꓓꓽ ꓕꓲ ꓣꓳ ꓠꓬ ꓗꓳꓸ ꓗꓷ ꓟ ꓕꓲ ꓠꓽ ꓕꓯ ꓡꓰ ꓒꓲꓼ ꓡꓰꓳ ꓐꓰ ꓢꓷꓸ ꓪ ꓡꓳ= ꓔꓲꓺ ꓒ ꓓꓽ ꓔꓯ ꓣꓱꓽ ꓙ ꓔꓬ ꓟ ꓔꓲꓺ ꓒ ꓔꓯ ꓥˍ ꓟꓲ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓣꓴ ꓔꓯꓹ ꓙꓰ ꓟ ꓥ ꓢꓲ ꓞꓲꓼ ꓙꓳˍ ꓟ ꓔꓲꓺ ꓒ ꓫꓵꓻ ꓗꓷ ꓟ ꓑꓶꓸ ꓓꓴ ꓔꓲꓺ ꓒ ꓔꓯ ꓪꓽ ꓘꓴ ꓖꓶˍ ꓟ ꓫꓵꓻ ꓟꓳ ꓔꓵꓸˍ ꓟ ꓗꓪ ꓟꓽ ꓙꓰ ꓠꓹ ꓟ ꓐꓱ ꓶ ꓬꓲ ꓪ ꓔꓯ ꓣꓴ ꓔꓯꓹ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

Asia News ꓓꓳꓽ ꓗꓪ ꓐꓯ ꓔ ꓟ ꓠꓬ ꓧꓶꓽ ꓙꓵꓽ ꓪ ꓙꓳ ꓢꓴ ꓐꓴ ꓡꓰ Zhejing  ꓗꓴꓷꓼ ꓫꓴ꓾ Wenzhou ꓡꓳ ꓒꓱ ꓗꓪ ꓟ ꓔꓲꓺ ꓒ ꓓꓽ Shao Zhumin ꓔꓯ ꓔꓲꓺ ꓒ Chen Nailing ꓬꓲ ꓫꓵꓻ ꓟꓳꓻ ꓔꓯ ꓪꓽ ꓘꓴ ꓢꓲ ꓔꓵꓸ ꓖꓶˍ ꓟ ꓗꓪ ꓟꓽ ꓙꓰ ꓠꓹ ꓟ ꓬꓲ ꓔꓯ ꓧꓳꓽ ꓔꓯꓹ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓔꓲꓺ ꓒ Chen ꓠꓬ ꓧꓶꓽ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓢꓷꓸ ꓙ ꓟꓳ ꓙˍ ꓟ ꓟꓽ ꓟꓶ ꓔ ꓟ ꓜꓴ ꓗꓪ ꓟ ꓕꓲ ꓣꓳ ꓥ ꓢꓲ ꓬꓲ ꓠꓬ 2023 ꓘꓳꓼ 1 ꓦ 29 ꓠꓬꓲ ꓬꓲ ꓞꓲꓼ 90 ꓕꓯ ꓫꓵꓻ ꓗꓷ ꓟ ꓥ ꓡꓳ=

ꓔꓲꓺ ꓒ ꓓꓽ Shao ꓔꓯ ꓬꓲ ꓔꓯ ꓣꓱꓽ ꓙˍ ꓟ ꓟꓬꓱꓽ ꓬꓰ ꓔꓬ ꓟ ꓔꓲꓺ ꓒ Jiang Sunian ꓐꓰ ꓕꓲ ꓪ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓡꓳꓽ ꓔꓯꓹ ꓙꓰ ꓣꓴ ꓔꓯꓹ ꓙꓰ ꓗꓷ ꓟ ꓥ ꓡꓳ=

ꓔꓲꓺ ꓒ ꓓꓽ ꓔꓯ ꓣꓴ ꓔꓯꓹ ꓙꓰ ꓟ ꓠꓬ ꓮ ꓟꓶ ꓟ ꓬꓲ ꓪꓴꓸ ꓕꓲ ꓧꓪꓹ ꓟ ꓟꓽ ꓥ꓾ ꓧꓶꓸ ꓕꓯ ꓗꓪ ꓥˍ ꓟꓲ ꓬꓲ ꓔꓯ ꓣꓴ ꓔꓯꓹ ꓙꓰ ꓗꓷ ꓟ ꓫꓵꓽ ꓪꓴ ꓙꓳˍ ꓡꓳ꓾ ꓐꓰ ꓓꓳꓽ ꓐꓯ ꓑꓶ ꓖꓴ ꓗꓪ ꓐꓰ ꓐꓯ ꓑꓶ ꓔ ꓡꓳ=

2022 ꓘꓳꓼ 4 ꓦ 7 ꓠꓬꓲ ꓕꓯ ꓢꓲꓽ ꓫꓬꓹ ꓟ ꓕꓲ ꓫꓵꓽ ꓠꓽ ꓑꓮꓲꓽ ꓬꓰˍ ꓟ ꓗꓪ ꓐꓰ ꓗꓽ ꓕꓸ ꓠꓹ ꓟ ꓐꓱ ꓶ ꓣꓴ ꓔꓯꓹ ꓙꓰ ꓟꓶ ꓗꓷꓳ= ꓟꓬꓽ ꓠꓬꓲ ꓠꓬ ꓢꓯꓸ ꓬꓲꓼ ꓡ ꓑꓮꓲꓽ ꓟꓽ ꓬꓰ ꓠꓹ ꓟ ꓥ ꓡꓳ=

ꓝꓮꓲ ꓕꓲ ꓧꓪꓹ ꓠꓬ 2021 ꓘꓳꓼ 10 ꓦ 25 ꓠꓬꓲ ꓕꓯ ꓔꓲꓺ ꓒ ꓓꓽ Shao ꓔꓯ ꓓꓴ ꓓꓳ ꓙꓰ ꓠꓹ ꓟ ꓐꓱ ꓶ ꓐꓯ ꓢꓲ ꓬꓲ ꓔꓯ  2 ꓠꓽ ꓗꓪ ꓛꓲ ꓣꓴ ꓔꓯꓹ ꓙꓰ ꓟ ꓥ ꓡꓳ=

2016 ꓘꓳꓼ 8 ꓦ 23 ꓠꓬꓲ ꓐꓰ 10 ꓦ 8 ꓠꓬꓲ ꓬꓲ ꓘꓴꓽ ꓗꓪ ꓟꓯꓼ ꓐꓴ ꓡꓰ ꓔꓲꓺ ꓒ ꓓꓽ Shao ꓧꓶꓸ ꓕꓯ ꓟꓬꓱꓽ ꓬꓰ ꓗꓷ ꓟ ꓔꓲꓺ ꓒ ꓓꓽ Zhu Weifang ꓬꓲ ꓫꓵꓻ ꓟꓳꓻ ꓔꓯ ꓪꓽ ꓘꓴ ꓖꓶ ꓢꓲ ꓔꓵꓸˍ ꓟ ꓗꓪ ꓟꓽ ꓔꓹ ꓪ ꓠꓹ ꓟ ꓐꓱ ꓶ ꓔꓲꓺ ꓒ ꓓꓽ ꓐꓰ ꓔꓲꓺ ꓒ  Jiang  ꓐꓴ ꓔꓯ ꓓꓴ ꓓꓳ ꓙꓰ ꓖꓴ ꓕꓲ ꓖ ꓗꓪ ꓧꓳꓽ ꓔꓯꓹ ꓙꓰ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓔꓲꓺ ꓒ ꓓꓽ Shao ꓔꓯ ꓠꓬ Vatican ꓗꓪ ꓐꓰ ꓢꓷꓸ ꓙ ꓟꓳ ꓙ ꓔ ꓥˍ ꓟꓲ ꓗꓴꓷꓼ ꓘꓴꓽ ꓗꓪ ꓟ ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓣꓱꓽ ꓬꓰ ꓚꓱꓹ ꓐꓴ ꓔꓯ ꓙꓵꓽ ꓔꓬ ꓟ ꓧꓶꓽ ꓗꓴꓷꓼ Communist Party ꓗꓪ ꓐꓰ ꓠꓬ ꓢꓷꓸ ꓙ ꓟꓳ ꓙ ꓔ ꓟ ꓟꓽ ꓟꓶ ꓟ ꓥ ꓡꓳ=  

https://bit.ly/3l5fVAb