ꓪꓮꓲ-ꓟꓮꓪ ꓡꓳ ꓒꓱ ꓗ-ꓔꓳ-ꓡꓲꓗ ꓪꓽ ꓘꓴ ꓦꓲꓻ ꓗꓪ ꓙꓳˍ ꓟ ꓦꓲꓻ ꓕꓲ ꓟ ꓮ ꓔꓳꓸ ꓐꓬ ꓗꓷꓳ

ꓪꓮꓲ-ꓟꓮꓪ ꓡꓳ ꓒꓱ ꓗ-ꓔꓳ-ꓡꓲꓗ ꓪꓽ ꓘꓴ ꓦꓲꓻ ꓗꓪ ꓙꓳˍ ꓟ ꓦꓲꓻ ꓕꓲ ꓟ ꓮ ꓔꓳꓸ ꓐꓬ ꓡꓰ ꓟ

ꓪꓮꓲ-ꓟꓮꓪ ꓡꓳ ꓒꓱ꓾ ꓟꓬꓳꓸ-ꓟ ꓘꓹ ꓗꓪ ꓙꓳˍ ꓟ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓪꓽ ꓘꓴ ꓦꓲꓻ ꓐꓱ ꓘꓴꓽ ꓗꓪ ꓙꓳˍ ꓟ ꓦꓲꓻ ꓕꓲ ꓟ ꓠꓬ 2ꓦ 28ꓠꓬꓲ ꓟꓶꓼ ꓘꓶꓽ꓾ ꓮ ꓟꓰ ꓟꓶꓼ ꓘꓶꓽ 11ꓽ30 ꓙꓵꓹ ꓛꓲꓺ ꓕꓯ ꓮ ꓔꓳꓸ ꓐꓬ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓪꓽ ꓘꓴ ꓦꓲꓻ ꓐꓱ ꓘꓴꓽ ꓗꓪ ꓔꓲꓺ ꓒ ꓐꓴ ꓔꓬꓹ ꓟ ꓠꓬꓲꓽ ꓝꓸ ꓦꓲꓻ ꓕꓲ ꓟ ꓮ ꓔꓳꓸ ꓐꓬ ꓗꓷ ꓟ ꓥ ꓡꓳ ꓐꓰ ꓪꓽ ꓘꓴ ꓦꓲꓻ ꓒ ꓕꓲꓺ ꓗꓪ ꓔꓬ ꓟ ꓞꓳ ꓘꓹ ꓢꓴ ꓐꓴ ꓡꓰ ꓐꓯ ꓡꓳ꓾ ꓐꓰ ꓢꓷꓸ ꓪ ꓡꓳ=

“ꓮ ꓔꓳꓸ ꓫꓵꓻ ꓗꓷˍ ꓟ ꓡꓰ ꓪꓽ ꓘꓴ ꓦꓲꓻ ꓒ ꓕꓲ ꓗꓪ ꓔꓬ ꓟ ꓥꓪ ꓛꓳꓽ ꓒꓯꓹ ꓕꓲ ꓣꓳ ꓥꓪ ꓔꓯ ꓑꓧꓳꓠꓰ ꓫꓸ ꓕꓱ ꓡ ꓗꓷꓳ= ꓮ ꓔꓳꓸ ꓐꓬ ꓔꓬ ꓥ ꓐꓰ ꓐꓯ ꓖꓶ ꓡˍ ꓠꓬꓲ꓾ ꓙꓰ ꓢꓲ ꓡꓳꓸ ꓠꓬꓲˍ ꓕꓯ ꓮ ꓘꓶꓸ ꓐꓬ ꓔꓬ ꓡꓳ= ꓮ ꓡꓰ ꓗꓷ ꓡꓰ ꓢꓲ ꓐꓬ ꓔꓴ ꓡˍ ꓥ ꓐꓯˍ ꓟ ꓔꓯ ꓠꓽ ꓟꓽ ꓢꓷꓸ= ꓖꓳ ꓟ ꓠꓬ ꓬꓳꓹˍ ꓟꓲ ꓥꓳ꓾ ꓔꓲꓺ ꓒ ꓐꓰ ꓟꓸ ꓒ ꓐꓴˍ ꓟꓲ ꓔꓬ ꓥ ꓐꓰ ꓢꓷꓸ ꓪˍ ꓡꓳ꓾” ꓐꓰ ꓬꓲ ꓡꓰ ꓐꓯˍ ꓡꓳ=

ꓫꓵꓽ ꓫꓵ ꓕꓲꓽ ꓐꓶꓽ ꓛꓲꓺ ꓮ ꓔꓳꓸ ꓐꓬ ꓗꓷ ꓢꓲ ꓮ ꓔꓳꓸ ꓢꓰꓼ ꓟꓳ ꓓꓳ 3 ꓒꓽ ꓐꓰ ꓢꓲ-ꓑꓲꓠ ꓬꓲꓻ ꓙꓬ ꓟꓳ ꓓꓳ 2 ꓒꓽ ꓐꓴ ꓡ ꓢꓲ ꓮ ꓔꓳꓸ ꓢꓰꓼ ꓗꓷ ꓟ ꓥꓳ꓾ ꓐꓰ ꓬꓲ ꓡꓰ ꓝꓸ ꓢꓲ ꓐꓯˍ ꓡꓳ=

“ꓦꓲꓻ ꓠꓬ ꓮ ꓙꓵꓽ ꓐꓬ ꓖꓴ ꓡꓰˍ ꓗꓪ ꓛꓲꓺ ꓠꓽ ꓟꓽ ꓥ= ꓪꓽ ꓘꓴ ꓦꓲꓻ ꓔꓯ ꓟꓳꓸ ꓮ ꓔꓲꓸ ꓠꓬ ꓓꓳꓼ ꓛꓲꓺ ꓬꓰꓳ= ꓥꓪ ꓢꓷꓸˍ ꓟ ꓡꓰ ꓛꓲꓺ ꓠꓬ ꓠꓻ ꓓꓴ ꓡꓰ ꓢꓴ ꓠꓽ ꓟꓽ ꓙꓳ꓾” ꓐꓰ ꓐꓯˍ ꓡꓳ=