ꓪꓴ-ꓢ ꓐꓰ ꓟꓳꓻ ꓪ ꓠꓹ ꓟ ꓙ ꓖꓶꓽ ꓠ ꓗˍ ꓟ=

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓠꓽ-ꓦꓬ-ꓠꓬꓲ ꓞꓳ ꓜꓴꓻ ꓜꓲꓼ ꓡꓳꓽ ˍ ꓟ ꓐꓰ Angelus ꓪꓽ ꓘꓴˍ ꓟ

ꓪꓴ-ꓢ ꓐꓰ ꓟꓳꓻ ꓪ ꓠꓹ ꓟ ꓙ ꓖꓶꓽ ꓠ ꓗˍ ꓟ=

8 ꓦꓻ ꓟ 11ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓠꓽ-ꓦꓬ-ꓠꓬꓲ ꓞꓳ ꓜꓴꓻ ꓜꓲꓼ ꓡꓳꓽ ˍ ꓟ ꓐꓰ Angelus ꓪꓽ ꓘꓴˍ ꓟ ꓟꓽ ꓬꓰ ꓧꓶꓸ ꓕꓯ ꓠꓽ-ꓦꓬ-ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶꓽ ꓔꓯ ꓟꓳꓸꓼ ꓪꓴꓸ ꓔꓴꓺ ꓢꓲ ꓚꓲꓸ ꓛꓬꓼ ꓤꓶꓻ ꓐꓱ ꓶ ꓢꓻ ꓢꓻ  ꓡꓳ ꓡꓳ ꓡꓰ: ꓔꓬꓹ ꓪˍ ꓟ ꓤꓶꓻ ꓔꓯ ꓟꓽ ꓠꓲꓹ ꓥꓳꓻ ꓥꓳꓻ ꓐꓰ ꓪꓴ-ꓢ ꓔꓯ ꓐꓲꓻ ꓜꓲꓼˍ ꓟ ꓙꓵꓻ ꓠꓲꓹ ꓕꓲꓽ ꓞꓲꓼ ꓕꓲꓽ ꓑ ꓥ ꓟ꓾ ꓝꓮꓲ ꓕꓲꓽ ꓤꓶꓻ ꓔꓯ ꓟꓳꓸꓼ ꓙꓻ ꓫꓱꓽ ꓢꓲ ꓪꓴ-ꓢ ꓐꓰ ꓟꓳꓻ ꓪ ꓠꓹ ꓟ ꓙ ꓖꓶꓽ ꓠ ꓗˍ ꓡꓳ ꓐꓰ ꓐꓯ ꓗꓷˍ ꓡꓳ=

ꓠꓯꓻ ꓞꓲˍ ꓟ ꓡꓰꓽ ꓙꓵꓽ ꓔꓬꓹ ꓟ ꓞꓳ ꓤ ꓤꓶꓻ ꓗꓪ ꓕꓶꓻ ꓞˍ ꓟ ꓙꓵꓻ ꓠꓲꓹ꓾ ꓐꓲꓻ ꓙꓲˍ ꓟ ꓤꓶꓻ ꓐꓰ ꓠꓴꓻ ꓪ ꓤꓶꓻ ꓮꓸ ꓔꓳꓸ ꓦꓲꓻ ꓔꓯ ꓮ ꓕꓯˍ ꓟꓲ ꓐꓬꓻ ꓔꓬꓹ ꓝꓲ ꓠ ꓗˍ ꓡꓳ꓾ ꓖꓳ ꓟ ꓡꓰ ꓐꓬꓻ ꓔꓬꓹ ꓠꓹ ꓟ ꓪꓴ-ꓢ ꓐꓯ ꓘꓶꓽ ꓔꓯ ꓠꓺ ꓠꓹ ꓟ꓾ ꓬꓰ-ꓢꓴ ꓙꓲ-ꓢꓴ ꓬꓲꓸ ꓠꓲꓹ ꓟ ꓐꓰ ꓠꓶꓽ ꓡꓰ ꓠ ꓪꓽ ꓘꓴˍ ꓟ  ꓤꓶꓻ  ꓐꓴ ꓔꓯ ꓟꓽ ꓠꓽ ꓠꓽ ꓬꓰ ꓔꓬꓹ ꓠ  ꓗˍ ꓡꓳ=ꓔꓱꓹ ꓚꓵˍ ꓟ ꓙꓵꓻ ꓠꓲꓹ ꓠꓬ ꓚꓲꓸ ꓛꓬꓼ ꓠꓲꓹ ꓟ ꓔꓯ ꓠꓱꓸ ꓐꓯꓼ ꓞꓳ ꓤ ꓐꓱ ꓶꓼ ꓒꓴ ꓖꓶꓽ ꓔ ꓟ꓾ ꓠꓲꓹ ꓗꓴ ꓟꓬ ꓗꓴ ꓖꓶꓽ ꓗꓴˍ ꓟ꓾ ꓟꓬꓽ ꓠꓬꓲ ꓫꓸ ꓙꓵ ꓔꓬꓹ ꓢꓴ ꓾ ꓣꓱꓽ ꓞ ꓔꓬꓹ ꓢꓴ ꓐꓴ ꓐꓰ  ꓕꓲꓽ ꓠꓲꓹ ꓕꓲꓽ ꓪꓺꓽ ꓒꓬꓱꓼ ꓔꓬꓹ ꓝꓲˍ ꓡꓳ=

ꓢꓲꓺ ꓒꓽ ꓡˍ ꓟ ꓬꓲꓸ ꓙꓵꓹ ꓔꓯ ꓧꓪꓸ ꓛꓲꓽ ꓛꓲꓽ ꓡꓳꓸ ꓠꓬ ꓔꓬꓹ ꓟ ꓚꓳꓺ ꓑ ꓡꓰ ꓐꓰ꓾ ꓪꓴ-ꓢ ꓐꓰ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓕꓯ ꓟꓳꓻ ꓪ ꓠꓹ ꓟ ꓬꓲꓸ ꓙꓵꓹ ꓐꓱ ꓶ ꓮꓽ ꓙꓵꓽ ꓙ ꓖꓶꓽ ꓠ ꓔ ꓡꓳ=ꓢꓲꓺ ꓒꓽ ꓡˍ ꓟ ꓬꓲꓸ ꓙꓵꓹ ꓔꓯ ꓧꓪꓸ ꓛꓲꓽ ꓛꓲꓽ ꓡꓳꓸ ꓠꓬ ꓔꓬꓹ ꓟ ꓚꓳꓺ ꓑ ꓔꓯ ꓙꓲˍ ꓟ ꓚꓳꓺ ꓑ ꓾ ꓔꓱꓹ ꓚꓵˍ ꓟ ꓚꓳꓺ ꓑ ꓐꓰ ꓘꓴˍ ꓟ ꓟꓶˍ ꓟ ꓡꓰ ꓐꓰ ꓾ ꓣꓳꓽ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓬꓰ-ꓢꓴ ꓙꓲ-ꓢꓴ ꓠꓬ ꓙꓲˍ ꓟ ꓔꓱꓹ ꓟ ꓚꓳꓺ ꓑ ꓐꓰ ꓘꓴ ꓪ ꓠꓹ ꓟ ꓙ ꓖꓶꓽ ꓠ ꓔ ꓟ꓾ ꓖꓳ ꓡꓰ ꓙ ꓖꓶꓽ ꓔ ꓟ ꓚꓳꓺ ꓑ ꓔꓯ ꓢꓲꓺ ꓒꓽ ꓐꓰ ꓕꓲꓽ ꓪꓺꓽ ꓜ ꓜꓼ ꓑꓮꓲ ꓗꓪ ꓓꓵꓽ ꓙꓰ ꓪˍ ꓟ ꓡꓰ ꓐꓰ꓾ ꓣꓳꓽ ꓐꓴ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓠꓹ ꓟ꓾ ꓟꓽ ꓬꓲꓼ ꓟꓶ ꓟꓶ ꓡꓳꓸ ꓠꓬ ꓔꓬꓹ ꓠ ꓗˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓗꓪ ꓙ ꓗꓴꓸ ꓠꓲꓹ ꓡꓰ ꓢꓯꓸ ꓔꓬꓹ ꓢꓲ꓾ ꓕꓲꓽ ꓞꓲꓼ ꓕꓲꓽ ꓑ ꓟ ꓟꓴꓽ ꓗꓪ ꓗꓴꓷ  ꓗꓪ ꓓꓵꓽ ꓙꓰ ꓪ ꓠꓹ ꓟ ꓙ ꓖꓶꓽ ꓠꓯˍ ꓡꓳ=

ꓣꓳꓽ ꓐꓴ ꓠꓬ ꓪꓴ-ꓢ ꓬꓲꓸ ꓶꓼ ꓓꓳꓽ ꓫꓱꓹ ꓓꓳꓽ꓾ ꓪꓴ-ꓢ ꓐꓯ ꓘꓶꓽ ꓐꓰ ꓕꓲꓽ ꓪꓺꓽ ꓛꓳ ꓫꓱˍ ꓠꓬ꓾ ꓪꓴ-ꓢ ꓠꓬ ꓣꓳꓽ ꓐꓴ ꓔꓯ ꓕꓲꓽ ꓞꓲꓼ ꓕꓲꓽ ꓑ ꓗꓹ ꓛꓲˍ ꓟ ꓔꓯ ꓖꓶꓽˍ ꓟ ꓥꓳ= ꓧꓪꓸ ꓛꓲꓽ ꓛꓲꓽ ꓡꓳꓸ ꓠꓬ ꓔꓬꓹ ꓟ ꓚꓳꓺ ꓑ ꓐꓴ ꓔꓯ ꓜꓽ ꓓꓴ ꓑꓮꓲ ꓗꓪ ꓘꓴ ꓔꓯˍ ꓙꓰ ꓢꓲ ꓠꓬꓲ ꓬꓲꓸ ꓢꓲꓺ ꓒꓽ ꓐꓰ ꓕꓲꓽ ꓪꓺꓽ ꓜꓽ ꓪ ꓓˍ ꓟ꓾ ꓢꓲꓺ ꓒꓽ ꓗꓪ ꓐꓰ ꓬꓲꓸ ꓪ ꓐꓴ ꓔꓯ ꓣꓱꓽ ꓙˍ ꓟ ꓠꓬ ꓪꓴꓽ ꓓꓰ ꓡꓰˍ ꓟ ꓗꓹ ꓛꓲ ꓓꓴ ꓥ ꓟ꓾ ꓪꓴ-ꓢ ꓬꓲꓸ ꓚꓲꓸ ꓛꓬꓼ ꓗꓪ ꓐꓰ ꓜꓽ ꓓꓴ ꓑꓮꓲ ꓗꓪ ꓣꓳꓽ ꓐꓴ ꓔꓯ ꓲ’ ꓖꓶꓽ ꓜꓽ ꓡˍ ꓥꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓣꓳꓽ ꓐꓲꓻ ꓜꓲꓼˍ ꓟ ꓚꓳꓺ ꓑ ꓬꓰ ꓗꓷ ꓟ ꓪꓴꓸ ꓠꓬꓲ꓾ ꓚꓳꓺ ꓑ ꓐꓱ ꓶꓼ ꓪꓴ-ꓢ ꓖꓶꓽˍ ꓟ ꓡꓯꓼ ꓫꓴ ꓥꓳ=

ꓟꓲ ꓠꓯ ꓕꓱ ꓟ ꓗꓪ ꓢꓲꓺ ꓡꓲꓺ ꓗꓹ ꓛꓲˍ ꓟ ꓮꓸ ꓬꓲꓼ ꓠꓬꓲ ꓤ ꓠꓵ ꓠꓲꓹ ꓔꓯ ꓣꓱꓽ ꓢꓲ ꓟꓴꓽ ꓗꓪ ꓗꓴꓷ  ꓔꓯ ꓐꓲꓻ ꓜꓲꓼˍ ꓟ ꓙꓵꓻ ꓠꓲꓹ꓾ ꓥꓳ ꓡꓳꓸ ꓢꓴ ꓐꓰ ꓞꓳ ꓙꓳ ꓢꓯꓸ ꓔꓬꓹ ꓐꓰ ꓔꓲꓺ ꓒꓽ ꓪ ꓔꓲꓸ ꓝꓣꓮꓠꓚꓲꓢ ꓡꓰ ꓐꓯ ꓗꓷ ꓟ ꓥ ꓡꓳ=

Photo credit to Vatican News

https://bit.ly/2GW0OlV

Add new comment

6 + 3 =

Please wait while the page is loading