ꓪꓴ-ꓢ ꓟꓬꓱꓽ ꓟꓯ ꓠꓹ ꓟ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓠꓹ ꓟ ꓐꓱ ꓶ ꓧꓳꓽ ꓪꓴꓸ ꓟꓴ ꓢꓴ ꓢꓲꓽ ꓫꓬꓹ ꓟ ꓦ ꓪꓴ-ꓢ

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓠ-ꓢ-ꓠꓬꓲ ꓑ ꓫꓬꓼ ꓜꓲꓼ ꓡꓳꓽˍ ꓟ ꓐꓰ ꓪꓴ-ꓢ ꓟꓸ ꓟꓲꓽ ꓟꓸ ꓖꓶꓽˍ ꓟ=

ꓪꓴ-ꓢ ꓟꓬꓱꓽ ꓟꓯ ꓠꓹ ꓟ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓠꓹ ꓟ ꓐꓱ ꓶ ꓧꓳꓽ ꓪꓴꓸ ꓟꓴ ꓢꓴ ꓢꓲꓽ ꓫꓬꓹ ꓟ ꓦ ꓪꓴ-ꓢ

10 ꓦ ꓟ 2 ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓜꓲꓼ ꓡꓳꓽˍ ꓟ ꓠꓽ-ꓢꓽ-ꓠꓬꓲ ꓑ ꓫꓬꓼ ꓜꓲꓼ ꓡꓳꓽˍ ꓟ ꓐꓰ ꓪꓴ-ꓢ ꓟꓸ ꓟꓲꓽ ꓟꓸ ꓖꓶꓽˍ ꓗꓪ  ꓪꓴ-ꓢ ꓟꓬꓱꓽ ꓟꓯˍ ꓟ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚˍ ꓟ ꓗꓪ ꓢꓲꓽ ꓫꓬꓹ ꓟ ꓦ ꓪꓴ-ꓢ ꓡꓰ ꓧꓳꓽ ꓟꓳꓸ ꓖꓶꓽ ꓔꓬꓹ ꓟ ꓔꓯ ꓟꓸ ꓖꓶꓽ ꓗꓷ ꓟ ꓥ ꓡꓳ=

ꓣꓴ ꓞꓳꓹ ꓢꓲ ꓓꓶꓽˍ ꓟ꓾ ꓢ-ꓔꓲ-ꓩ-ꓠꓳ ꓔꓯ ꓭꓸ ꓛꓲ ꓐꓰ ꓡꓳꓺ ꓢꓰꓼ ꓗꓷˍ ꓟ꓾ ꓕꓱ ꓡꓱ ꓫꓵꓽ ꓘꓶꓻ ꓙꓵˍ ꓟ ꓪꓴꓸ ꓠꓬꓲ ꓮꓽ ꓠꓱ ꓬꓲꓸ ꓪꓴꓸ ꓟ ꓘꓴ-ꓜꓲ-ꓞꓳ ꓢꓲꓺ ꓤ ꓐꓴ ꓠꓬ ꓕꓲꓽ ꓖ ꓡꓰ ꓕꓲꓽ ꓖ ꓗꓪ ꓒꓬꓱꓻ ꓙꓰ ꓟ ꓥ ꓡꓳ=ꓘꓴ-ꓜꓲ-ꓞꓳ ꓠꓬ ꓘꓶꓻ ꓙꓵ ꓟꓶˍ ꓟ ꓪꓴꓸ ꓠꓬꓲ ꓪꓺ ꓙꓲ ꓪꓴꓽ ꓡ ꓔꓬꓹ ꓡꓳ=

ꓮꓽ ꓠꓱ ꓬꓲꓸ ꓪꓴꓸ ꓟ ꓘꓴ-ꓜꓲ-ꓞꓳ ꓐꓴ ꓗꓳ ꓡꓳ ꓗꓪ ꓢꓴ ꓔꓯ ꓬꓰ ꓙ ꓔꓳꓹ ꓙˍ ꓟ ꓫꓱꓸ ꓤˍ ꓟ ꓟꓬꓱꓽ ꓔꓯ ꓧꓳꓽ ꓣꓱꓽ ꓢꓴ Deacon ꓫꓵꓽ ꓣꓳ ꓗꓪ ꓟ ꓒꓲ-ꓡꓲ ꓠꓬ ꓢ-ꓟ-ꓣꓲ-ꓬ ꓗꓪ ꓚꓺ ꓒꓬꓱˍ ꓟ꓾ ꓠꓻ ꓫꓬꓹ ꓖꓶꓽˍ ꓟ꓾ ꓠꓲꓽ ꓔꓯ ꓖꓼ ꓓꓳ ꓗꓷˍ ꓟ ꓟꓬꓱꓽ ꓔꓯ ꓬꓰ ꓖꓶꓽ ꓗꓷ ꓢꓲ꓾ ꓢꓲꓽ ꓫꓬꓹ ꓟ ꓦ ꓪꓴ-ꓢ ꓗꓪ ꓐꓰ ꓥˍ ꓟꓲ ꓒꓲ-ꓡꓲ ꓬꓲꓸ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓠꓺ ꓠꓹ ꓢꓴ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓲꓹ ꓟ ꓔꓯ ꓒꓴꓺ ꓖꓶꓽ ꓗꓷꓳ=

ꓒꓲ-ꓡꓲ ꓠꓬ ꓢꓲꓽ ꓫꓬꓹ ꓟ ꓦ ꓬꓲꓸ ꓡꓵꓹ ꓫꓴˍ ꓟ ꓔꓯ ꓟꓶ ꓢꓲ꓾ ꓡꓲ ꓛꓲ ꓟꓵꓽ ꓛꓱꓹ ꓕꓲꓽ ꓟ ꓗꓪ ꓙꓰ ꓗꓷꓳ=ꓬꓲꓸ ꓙꓰ ꓔꓬꓹ ꓟ ꓙ ꓖꓴ ꓗꓪ ꓟꓶꓽ ꓠꓷꓹ ꓝ ꓒꓽ ꓬꓲ-ꓢ-ꓬ ꓟꓸ ꓟꓲꓽ ꓔꓯ ꓵ ꓗꓷ ꓢꓲ꓾ ꓙꓰ ꓔꓬꓹ ꓟ ꓲ-ꓔꓲ-ꓬꓳ-ꓑꓲ-ꓬ ꓗꓴꓷꓼ ꓢꓲꓼ ꓟ ꓬꓲꓸ ꓖꓴꓽ ꓙꓴꓽ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓕꓲꓽ ꓣꓳ ꓐꓰ ꓟꓳ ꓗꓷ ꓢꓲ꓾ ꓢꓲꓽ ꓫꓬ ꓟꓸ ꓟꓲꓽ ꓔꓯ ꓒꓶꓻ ꓟꓸ ꓖꓶꓽ ꓗꓷꓳ=

ꓲ-ꓔꓲ-ꓬꓳ-ꓑꓲ-ꓬ ꓗꓴꓷꓼ ꓢꓲꓼ ꓟ ꓬꓲꓸ ꓖꓴꓽ ꓙꓴꓽ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓠꓬ ꓟꓶꓽ ꓠꓷꓹ ꓒꓽ ꓬꓲ-ꓢ-ꓬ ꓟꓸ ꓟꓲꓽ ꓗꓪ ꓟ ꓪꓴ-ꓢ ꓬꓲꓸ ꓚꓳꓺ ꓑ ꓚꓱꓹ ꓔꓯ ꓵ ꓔꓬꓹ ꓡꓳ=ꓖꓳ ꓡꓱ ꓥˍ ꓟꓲ ꓬꓲꓸ ꓟꓽ ꓙꓽ ꓜꓲꓼ=ꓟꓸ ꓟꓲꓽ ꓵ ꓔꓬꓹ ꓟ ꓔꓯ ꓢꓷˍ ꓟ ꓒꓲ-ꓡꓲ ꓠꓬ ꓬꓲꓸ ꓔꓯ꓾ ꓠꓴ ꓵ ꓔꓬꓹ ꓟ ꓔꓯ ꓠꓴ ꓙꓽ ꓜꓲꓼˍ ꓡ ꓾ ꓐꓰ ꓠ ꓠꓬꓲˍ ꓡꓳ= ꓬꓲꓸ ꓥˍ ꓟꓲ ꓟꓽ ꓙꓽ ꓜꓲꓼ ꓟ ꓐꓰ ꓕꓲꓽ ꓣꓳ ꓣꓳ ꓗꓪ ꓐꓰ ꓒꓶꓻ ꓟꓸ ꓖꓶꓽ ꓠꓹ ꓟ ꓠꓲꓹ ꓫꓵˍ ꓡꓳ꓾ ꓐꓯ ꓖꓶꓽ ꓗꓷꓳ=

ꓪꓴ-ꓢ ꓟꓸ ꓟꓲꓽ ꓔꓯ ꓵ ꓡꓰꓽ ꓵ ꓔꓬꓹ ꓠꓽ ꓟꓽ ꓐꓲꓻ ꓙꓲꓼ ꓡ= ꓟꓸ ꓟꓲꓽ ꓗꓪ ꓠꓲꓹ ꓥꓳ ꓢꓲ ꓢꓯꓸ ꓔꓬꓹ ꓢꓴ ꓒꓬꓱꓼ ꓠꓯˍ ꓡꓳ= ꓖꓳ ꓡꓱ ꓫꓵꓽ ꓞꓳ ꓤ ꓐꓴ ꓠꓬ ꓙꓽ ꓣꓳˍ ꓟ ꓣꓱꓽ ꓛꓰꓽ ꓡꓰ ꓐꓲꓻ ꓞꓹ ꓢꓴ ꓐꓴ ꓥ ꓡꓳ=ꓪꓴ-ꓢ ꓐꓯ ꓘꓶꓽ ꓡꓰ ꓡꓵꓹ ꓫꓴˍ ꓟ ꓗꓪ ꓐꓰ ꓪꓴ-ꓢ ꓔꓯ ꓪꓺ ꓙꓲꓻ ꓢꓷꓸ ꓠꓲꓹ ꓫꓵˍ ꓟ ꓠꓲꓹ ꓟ ꓪꓴꓽ ꓡ ꓟ ꓡꓰ ꓟꓽ ꓞꓲ꓾ ꓪꓴ-ꓢ ꓔꓯ ꓧꓪꓺˍ ꓟ꓾ ꓢꓷꓸ ꓡꓰ ꓠ ꓢꓯꓼ ꓕꓵˍ ꓟ ꓚꓱꓹ ꓮꓽ ꓙꓵꓽ ꓠꓬ ꓙꓽ ꓣꓳˍ ꓟ  ꓣꓱꓽ ꓛꓰꓽ ꓢꓯꓼ ꓪꓽ ꓒꓬꓱꓼ ꓠ ꓗˍ ꓡꓳ=

ꓵ ꓗꓷ ꓟ ꓪꓴ-ꓢ ꓐꓯ ꓘꓶꓽ ꓕꓲꓽ ꓘꓶꓽ ꓡꓰ ꓕꓲꓽ ꓘꓶꓽ ꓗꓪ ꓢꓲꓽ ꓫꓬꓹ ꓟ ꓦ ꓬꓲꓸ ꓡꓵꓹ ꓫꓴˍ ꓟ ꓔꓯ ꓟꓶ ꓠ ꓗˍ ꓡꓳ=ꓪꓴ-ꓢ ꓬꓲꓸ ꓚꓱꓹ꓾ ꓪꓴ-ꓢ ꓐꓯ ꓘꓶꓽ ꓔꓯ ꓙꓲꓻ ꓙꓲꓻ ꓙꓽ ꓜꓲꓼ ꓡꓰ ꓠꓹ ꓟ ꓞꓳ ꓤ ꓔꓯ ꓗꓽ ꓕꓸ ꓦꓽˍ ꓔ ꓟ ꓟꓲꓺ ꓠꓯꓺ ꓖꓴꓽ ꓙꓴꓽ꓾ ꓟꓽ ꓙꓲꓻ ꓟ ꓓꓵꓽ ꓙꓽ ꓚꓱꓹ꓾ ꓠꓲꓹ ꓟ ꓗꓪ ꓓꓯˍ ꓟ ꓮꓽ ꓙꓵꓽ ꓔꓯ ꓪꓴ-ꓢ ꓐꓯ ꓘꓶꓽ ꓠꓬ ꓧꓪꓸ ꓡꓰ ꓢꓲ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲ ꓟ ꓙꓳ ꓠꓹ ꓟ ꓢꓲꓽ ꓫꓬꓹ ꓟ ꓦ ꓔꓯ ꓣꓱꓽ ꓞꓹ ꓡꓳ=

ꓪꓴ-ꓢ ꓐꓯ ꓘꓶꓽ ꓔꓯ ꓙꓽ ꓜꓲꓼ ꓡꓰ ꓢꓴ ꓾ ꓠꓲꓹ ꓟ ꓗꓪ ꓟꓶ ꓢꓴ ꓠꓬ ꓒꓳꓹ ꓡꓶꓸ ꓡˍ ꓡꓳ=ꓲ-ꓔꓲ-ꓬꓳ-ꓑꓲ-ꓬ ꓗꓴꓷꓼ ꓢꓲꓼ ꓟ ꓬꓲꓸ ꓖꓴꓽ ꓙꓴꓽ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓠꓬ ꓟꓶꓽ ꓠꓷꓹ ꓝꓸ ꓒꓽ ꓬꓲ-ꓢ-ꓬ ꓬꓲꓸ ꓟꓸ ꓟꓲꓽ ꓗꓪ ꓟ ꓪꓴ-ꓢ ꓬꓲꓸ ꓚꓳꓺ ꓑ ꓚꓱꓹ ꓔꓯ ꓒꓲ-ꓡꓲ ꓒꓶꓻ ꓟꓸ ꓖꓶꓽˍ ꓟ ꓗꓪ ꓐꓰ ꓙꓽ ꓜꓲꓼ ꓡˍ ꓕꓯ ꓬꓲꓸ ꓙꓵꓻ ꓠꓲꓹ ꓔꓯ ꓪꓴ-ꓢ ꓐꓰ ꓕꓲꓽ ꓠꓲꓹ ꓕꓲꓽ ꓪꓺꓽ ꓗꓷ ꓡꓰ ꓠ꓾ ꓪꓴ-ꓢ ꓤ ꓠꓱ ꓒꓬꓱꓼ ꓡꓰ ꓠ ꓖꓳꓻ ꓓꓱꓽ ꓔꓲꓹ ꓟ ꓔꓯ ꓒꓲ-ꓡꓲ ꓡꓯꓽ ꓒꓯꓹ ꓗꓪ ꓐꓰ ꓘꓳꓹ ꓣꓴ ꓗꓷꓳ=

ꓢꓲꓽ ꓫꓬꓹ ꓟ ꓦ ꓪꓴ-ꓢ ꓠꓬ ꓒꓲ-ꓡꓲ ꓔꓯ ꓲ-ꓔꓲ-ꓬꓳ-ꓑꓲ-ꓬ ꓗꓴꓷꓼ ꓢꓲꓼ ꓟ ꓬꓲꓸ ꓖꓴꓽ ꓙꓴꓽ ꓔꓯ ꓟꓳꓸ ꓙꓵꓽ ꓪ ꓙꓳ ꓢꓴ ꓐꓰ ꓟꓳ ꓡꓯꓽ ꓘꓳ ꓠ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓧꓳꓽ ꓔꓯꓹ ꓙꓰ ꓗꓷ ꓟ ꓥ ꓡꓳ=ꓢꓲꓽ ꓫꓬꓹ ꓟ ꓦ ꓪꓴ-ꓢ ꓡꓰꓽ ꓪꓴ-ꓢ ꓟꓬꓱꓽ ꓟꓯˍ ꓟ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚˍ ꓟ ꓟꓬꓱꓽ ꓔꓯ ꓪꓴꓸ ꓔꓴꓺ ꓖꓶꓽ ꓢꓴ꓾ꓬꓰ ꓖꓶꓽ ꓢꓴ ꓾ ꓙ ꓖꓴ ꓧꓳꓽ ꓟꓳꓸ ꓖꓶꓽ ꓢꓴ ꓥ ꓡꓳ= ꓢꓲꓽ ꓫꓬꓹ ꓟ ꓦ ꓟꓽ ꓙꓳ ꓠꓬ ꓘꓴ-ꓜꓲ-ꓞꓳ ꓟꓬꓱꓽ ꓐꓬꓱꓽ ꓘꓶꓽˍ ꓟꓲ ꓟꓽ ꓙꓳ=ꓢꓲꓽ ꓫꓬꓹ ꓟ ꓦ ꓐꓰ ꓟꓽ ꓥ ꓠꓬ ꓘꓴ-ꓜꓲ-ꓞꓳ ꓟꓬꓱꓽ ꓐꓬꓱꓽ ꓘꓶꓽ ꓠꓬ ꓬꓲꓸ ꓓꓳꓽ ꓡꓰ ꓐꓰ ꓗꓷ ꓡꓰˍ ꓥꓳ=

ꓢꓲꓽ ꓫꓬꓹ ꓟ ꓦ ꓠꓴ ꓔꓯ ꓣꓱꓽˍ ꓕꓯ ꓠꓽ ꓡꓳꓹ ꓬꓰ ꓟ ꓚꓲ ꓛꓬꓽ ꓤꓶꓻ ꓔꓯ ꓡꓳꓺ ꓗꓷ  ꓝꓲ ꓢꓲ ꓤꓶꓻ ꓫꓵꓼ ꓔꓯ ꓪꓴꓸ ꓔꓴ ꓝꓲˍ ꓥꓳ= ꓠꓱꓸ ꓐꓯꓼ ꓕꓲꓽ ꓖ ꓗꓪ ꓧꓳꓽ ꓙꓰˍ ꓥꓳ=ꓢꓲꓽ ꓫꓬ ꓐꓯ ꓘꓶꓽ ꓔꓯ ꓠꓲꓹ ꓪꓴꓽ ꓪꓴꓽ ꓡꓰꓽ ꓢꓷꓸ ꓙ ꓟꓳ ꓙ ꓥꓳ= ꓠꓴ ꓢꓯꓼ ꓟꓬꓻ ꓔꓯ ꓔꓲꓺ ꓖꓶꓽ ꓗꓷˍ ꓗꓪ ꓛꓲ ꓠꓴ ꓔꓯ ꓣꓱꓽˍ ꓥꓳ=ꓢꓲꓽ ꓫꓬꓹ ꓟ ꓦ ꓡꓰ ꓣꓱꓽˍ ꓟ ꓔꓯ ꓟꓶ ꓢꓴ ꓠꓬ ꓬꓰ-ꓢꓴ ꓗꓸ ꓠꓯꓸ ꓛꓳ ꓢꓴ ꓾ ꓬꓰ-ꓢꓴ ꓢꓲꓺ ꓒꓽ ꓓꓳꓽ ꓔꓯ ꓚꓺ ꓒꓬꓱꓻ ꓢꓴ꓾ ꓢꓲꓺ ꓒꓽ ꓬꓰ-ꓢꓴ ꓓꓳꓽ ꓔꓯ ꓚꓺ ꓒꓬꓱꓻˍ ꓟ ꓗꓪ ꓠꓲꓹ ꓒꓴ ꓒꓴ ꓡꓰꓽ ꓬꓰ ꓢꓴ ꓒꓬꓱꓼ ꓡˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓽ ꓫꓬꓹ ꓟ ꓦ ꓬꓲꓸ ꓣꓱꓽˍ ꓟ ꓟꓶ ꓠꓹ ꓟ ꓐꓱ ꓶ ꓪꓽ ꓘꓴ ꓡꓯ꓾ ꓐꓰ ꓚꓺ ꓟꓸ ꓖꓶꓽ ꓗꓷꓳ=

Credit to Vatican News

https://bit.ly/2prp9dg 

Add new comment

16 + 3 =

Please wait while the page is loading