ꓲ‐ꓓꓲ‐ꓬ ꓗꓴꓷꓼ ꓗꓪ ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟ. ꓖꓶ ꓢꓴ ꓗ‐ꓔꓳ‐ꓡꓲ ꓔꓲꓺ ꓟ ꓕꓲ ꓣꓳ ʼ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰ ꓟ

ꓲ‐ꓓꓲ‐ꓬ ꓗꓴꓷꓼ ꓗꓪ  ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟ. ꓖꓶ ꓢꓴ ꓗ‐ꓔꓳ‐ꓡꓲ ꓔꓲꓺ ꓟ ꓕꓲ ꓣꓳ ʼ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰ ꓟ

6 ꓦ ꓟ 24 ꓠꓬꓲ 2023 ꓘꓳꓼ ꓕꓯ ꓲ‐ꓓꓲ‐ꓬ ꓗꓴꓷꓼ ꓗꓪ ꓐꓰ ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟ. ꓖꓶ ꓟ ꓗꓪ ꓐꓰ ꓗꓴꓷꓼ ꓙꓵꓽ ꓢꓴ ꓢꓲꓺ ꓒ ꓐꓴ ꓡꓰ ꓡꓯ ꓫꓴ ꓖꓶ ꓟ ꓡꓯ ꓫꓴ ꓪ ꓔ ꓟ ꓗ‐ꓔꓳ‐ꓡꓲ ꓔꓲꓺ ꓟ ꓬꓲ ꓞꓲꓼ (86) ꓘꓳꓼ ꓠꓬ ꓢꓲꓺ ꓒ ꓠꓯ ꓗꓪ ꓬꓯꓼ ꓟꓶ ꓡꓰꓳ ꓐꓰ ꓐꓯ ꓔ ꓡꓳ꓿ ꓕꓱ ꓔꓲꓺ ꓟ ꓟꓬꓱꓺ ꓠꓬ ꓔꓲꓺ ꓟ Mooney ꓥ ꓡꓳ꓿ ꓔꓲꓺ ꓟ ꓠꓬ ꓲꓣꓮꓠꓡꓮꓠꓓ ꓗꓴꓷꓼ ꓐꓣꓮꓬ ꓡꓳ ꓒꓱ ꓗꓪ 1936 ꓘꓳꓼ 7 ꓦ ꓟ 21 ꓠꓬꓲ ꓕꓯ ꓦꓵꓻ ꓗꓷ ꓟ ꓥ ꓡꓳ꓿

ꓬꓲ ꓞꓲꓲꓼ 13 ꓘꓳꓼ ꓙꓳˍ ꓕꓯ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓪꓴ‐ꓢ ꓡꓰ ꓘꓴˍ ꓟ ꓟꓶ ꓡꓰ ꓗ. ꓠꓯ ꓔꓲꓺ ꓒ ꓒꓬꓱꓼ ꓢꓳꓻ ꓦꓲꓻ ꓗꓪ ꓙꓰ ꓡꓰꓳ꓿ 1979 ꓘꓳꓼ ꓕꓯ ꓲ‐ꓓꓲ‐ꓬ ꓗꓴꓷꓼ ꓗ‐ꓡ‐ꓗ‐ꓔ ꓡꓳ ꓒꓱ ꓗꓪ ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟ. ꓖꓶ ꓟ ꓢꓳꓻ ꓦꓲꓻ ꓗꓪ ꓟ, ꓟ ꓟ. ꓖꓶ ꓗꓷꓳ꓿

ꓔꓲꓺ ꓟ ꓟꓳꓳꓠꓰꓬ ꓠꓬ ꓲ‐ꓓꓲ‐ꓬ ꓗꓴꓷꓼ ꓗꓪ ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓐꓴ ꓐꓰ ꓙꓻ ꓖꓴ ꓗꓪ ꓔꓬ ꓟ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓣꓴ ꓪ ꓡꓰ ꓠ, ꓟ ꓮ ꓟꓬ, ꓢꓯꓼ ꓕꓵꓼ ꓗꓷꓳ꓿ ꓕꓱ ꓡꓱ ꓐꓰ ꓓ ꓪꓴ. ꓕꓯ ꓔꓲꓺ ꓟ ꓡꓰ ꓢꓯꓼ ꓕꓵꓼ ꓟ ꓗꓪ ꓐꓰ ꓫ. ꓢꓴ ꓟꓶ ꓢꓴ ꓤ ꓠꓱ ꓤ ꓐꓴ (45000) ꓣꓳ ꓔꓯ ꓕꓳ ꓶ ꓟ. ꓖꓶ ꓗꓷꓳ꓿ ꓝꓮꓲ ꓔꓲꓺ ꓟ ꓠꓬ ꓙꓻ ꓖꓴ ꓙ ꓐ ꓗꓪ ꓔꓬ ꓟ ꓤ ꓠꓱ ꓤ ꓐꓴ ꓔꓯ ꓔꓬ ꓔꓶ. ꓐꓰ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓦꓲꓻ ꓔꓯ ꓫꓬ, ꓖꓶ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓔꓯ ꓟ. ꓖꓶ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓔꓲꓺ ꓟ ꓟꓳꓳꓠꓰꓬ ꓠꓬ ꓫ. ꓢꓴ ꓟꓷꓼ ꓢꓴ ꓤ ꓠꓱ ꓤ ꓐꓴ ꓔꓯ ꓗꓴꓷꓼ ꓙꓵꓽ ꓢꓴ ꓐꓴ ꓒꓴ ꓔ ꓟ ꓢꓳꓻ ꓦꓲꓻ ꓗꓪ ꓢꓳꓻ ꓣꓴ ꓪ ꓡꓰ ꓠ, ꓟ ꓮ ꓘꓶ. ꓢꓯꓼ ꓕꓵꓼ ꓖꓶ ꓗꓷ ꓢꓲ ꓠꓬꓲ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓒꓴ ꓔ ꓟ ꓢꓷ. ꓠꓲ, ꓢꓳꓻ ꓦꓲꓻ ꓗꓪ ꓢꓳ ꓣꓴ ꓪ ꓡꓰ ꓠ, ꓟ ꓮ ꓟꓬ, ꓬꓰ ꓙ ꓗꓷꓳ꓿ ꓝꓮꓲ ꓔꓲꓺ ꓟ ꓟꓳꓳꓠꓰꓬ ꓡꓰ ꓢꓯꓼ ꓕꓵꓼ ꓟ ꓪꓴ. ꓠꓬꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟꓽ ꓢꓳꓻ ꓪ ꓢꓴ ꓤ ꓠꓱ ꓤ (350000) ꓣꓳ ꓐꓰ ꓚꓳꓡꓡꓮꓖꓰ ꓢꓳꓻ ꓣꓴ ꓠ, ꓟ ꓫ. ꓔꓬ ꓟ ꓢꓳꓻ ꓤ ꓐꓴ ꓔꓯ ꓕꓳ ꓶ ꓟ. ꓐ ꓡ ꓠ, ꓟ ꓟ. ꓒ ꓟ. ꓟ (7000) ꓣꓳ ꓔꓯ ꓥ ꓟꓲ ꓟ. ꓖꓶ ꓗꓷ ꓟ ꓥ ꓡꓳ꓿

ꓕꓱ ꓡꓰ ꓫ. ꓢꓴ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓟ. ꓖꓶ ꓟ ꓪꓴ. ꓠꓬꓲ 2007 ꓘꓳꓼ ꓕꓯ ꓲ‐ꓓꓲ‐ꓬ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓡꓯ ꓫꓴꓻ ꓓꓽ ꓔꓯ ꓥ ꓟꓲ ꓔꓲꓺ ꓟ ꓔꓯ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓡꓯ ꓫꓴꓻ ꓠꓬ ꓲ‐ꓓꓲ‐ꓬ ꓗꓴꓷꓼ ꓗꓪ ꓮ ꓟꓬ, ꓪꓴꓽ ꓓꓲ ꓡꓰ ꓟ ꓡꓯ ꓫꓴꓻ ꓗꓪ ꓐꓰ ꓕꓲ ꓟ ꓥ ꓡꓳ ꓐꓰ (Catholic News Agency) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿