ꓲ-ꓓꓲ-ꓬ ꓗꓪ ꓧꓳꓽ ꓛꓱ ꓙꓱ ꓡꓯ ꓘꓳ ꓗꓷ ꓟ ꓑꓶꓸ ꓓꓴ ꓡ ꓞꓳ 13 ꓣꓳ ꓫꓵꓳ

Wednesday, November 01, 2023

ꓲ-ꓓꓲ-ꓬ ꓗꓴꓷꓼ ꓐꓶꓻ ꓓꓳ ꓖꓴ ꓟꓶꓸ ꓗꓪ ꓧꓳꓽ ꓛꓱ ꓠꓬꓲꓽ ꓒ ꓙꓱ ꓡꓯ ꓘꓳ ꓡꓰ ꓟ ꓑꓶꓸ ꓓꓴ ꓡ ꓞꓳ 13 ꓣꓳ ꓫꓵꓻ ꓢꓲ 50 ꓣꓳ ꓛꓲ ꓠꓻ ꓓꓴ ꓓꓴ ꓡꓰꓳ꓾ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓡꓰ 10 ꓦ 30 ꓠꓬꓲ ꓕꓯ ꓐꓯ ꓑꓶ ꓔ ꓡꓳ=

10 ꓦ 29 ꓠꓬꓲ ꓕꓯ ꓯ-ꓓ-ꓣ ꓐ-ꓣ-ꓓꓯꓸꓼ ꓗꓴꓷꓼ ꓫꓴ ꓗꓪ ꓟ ꓮ-ꓡꓯ-ꓟꓯ-ꓓ ꓐꓰ ꓗꓯ-ꓔ-ꓗꓯꓸꓼ-ꓑ-ꓡꓯ ꓡꓳ ꓒꓱ ꓠꓬꓲꓽ ꓟ ꓠꓬꓲꓽ ꓗꓴꓸ ꓚꓸꓼ ꓗꓪ ꓑ ꓫꓬ ꓐꓴ ꓔꓯ ꓕꓳꓽ ꓔ ꓟ ꓧꓳꓽ ꓛꓱ ꓕꓲ ꓟ ꓮ ꓘꓶꓸ ꓕꓶꓸ ꓠ ꓙꓰˍ ꓟ ꓗꓪ ꓐꓰ ꓧꓳꓽ ꓛꓱ ꓠꓬꓲꓽ ꓢꓶꓽ ꓙꓱ ꓡꓯ ꓘꓳ ꓡꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓡꓱ ꓙꓱ ꓡꓯ ꓘꓳˍ ꓟ ꓗꓪ ꓑ ꓫꓬ 13 ꓣꓳ ꓫꓵꓻ ꓢꓲ 50 ꓣꓳ ꓛꓲ ꓠꓻ ꓓꓴ ꓓꓴ ꓡꓰ ꓟ ꓥ ꓡꓳ= ꓬꓰ ꓙ ꓢꓴ ꓜꓴꓻ ꓐꓴˍ ꓟꓲ ꓬꓰ ꓙˍ ꓟ ꓟꓬꓱꓽ ꓔꓯ ꓝꓸ ꓢꓲ ꓬꓰ ꓔꓬ ꓡꓳ꓾ ꓐꓰ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰ ꓐꓯˍ ꓡꓳ=

ꓲ-ꓓꓲ-ꓬ ꓗꓴꓷꓼ ꓠꓬ ꓟꓲ ꓠꓯ ꓗꓪ ꓧꓳꓽ ꓛꓱ ꓙ ꓖꓴ ꓟꓽ ꓓ ꓟꓬꓽˍ ꓟ ꓗꓴꓷꓼ ꓥ ꓢꓲ꓾ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓙꓳꓺ ꓓꓴ ꓔꓳꓹ ꓜꓳꓽ ꓪ ꓢꓲ ꓠꓬꓲ꓾ 1981 ꓘꓳꓼ ꓕꓯˍ ꓟꓲ ꓐꓲ-ꓦ ꓗꓴꓷꓼ ꓫꓴ ꓗꓪ ꓙꓳˍ ꓟ ꓓꓽ ꓖꓴꓽ (ꓖꓳꓽ ꓙꓱꓻ) ꓕꓲ ꓟ ꓗꓪ ꓗꓳꓸ ꓙ ꓙꓰ ꓔꓬ ꓕꓯ ꓧꓳꓽ ꓛꓱ ꓠꓬ ꓙꓻ ꓖꓴ ꓥꓳꓽ ꓡꓰ ꓟ ꓑꓶꓸ ꓓꓴ ꓑ ꓫꓬꓼ 800 ꓣꓳ ꓛꓲ ꓫꓵꓻ ꓗꓷ ꓟ ꓥ ꓡꓳ=

ꓢꓲꓽ ꓒ ꓠ-ꓣꓯ-ꓓ-ꓣ ꓟꓳ-ꓓꓲ ꓥˍ ꓟꓲ ꓫꓵꓽ ꓪꓴ ꓕꓱ ꓟ ꓗꓪ ꓫꓵꓻ ꓢꓴ ꓐꓴ꓾ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓐꓱ ꓶ ꓐ ꓡˍ ꓕꓲ ꓒꓳꓹ ꓗꓪ ꓐꓰ ꓬꓰ ꓙ ꓔꓬ ꓡꓳ꓾ ꓐꓰ ꓬꓲ ꓮꓚꓚꓳꓴꓠꓔ ꓗꓪ ꓐꓳ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=