ꓲ-ꓓꓲ-ꓬ ꓗꓴꓷꓼ ꓡꓯꓼ ꓫꓴ ꓖꓶ ꓑꓮꓲꓽ ꓕꓲ ꓟ ꓗꓪ ꓡ ꓢꓴ ꓐꓴ ꓞꓺ ꓢꓯꓼ ꓟꓶꓸ ꓡꓰ ꓢꓲ 11 ꓣꓳ ꓫꓵꓳ

ꓲ-ꓓꓲ-ꓬ ꓗꓴꓷꓼ ꓡꓯꓼ ꓫꓴ ꓖꓶ ꓑꓮꓲꓽ ꓕꓲ ꓟ ꓗꓪ ꓡ ꓢꓴ ꓐꓴ ꓞꓺ ꓢꓯꓼ ꓟꓶꓸ ꓡꓰ ꓢꓲ 11 ꓣꓳ ꓫꓵꓳ (Photo AFP)

Wednesday, April 19, 2023

ꓲ-ꓓꓲ-ꓬ ꓗꓪ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓬꓰˍ ꓟ ꓡꓯꓼ ꓫꓴ ꓖꓶ ꓑꓮꓲꓽ ꓕꓲ ꓟ ꓗꓪ ꓑ ꓫꓬ 10 ꓫꓬꓹ ꓣꓳ ꓛꓲꓺ ꓓꓯ ꓡ ꓟ ꓥ ꓢꓲ꓾ ꓑ ꓫꓬ ꓐꓴ ꓠꓬ ꓟꓶꓽ ꓞ ꓣꓳˍ ꓟ ꓠꓯꓸꓼ ꓗꓪ ꓬꓲ ꓙꓵꓹ ꓟꓶ ꓤ ꓡꓳꓸ ꓠꓬꓹ ꓔꓬ ꓪˍ ꓟ ꓑꓶꓸ ꓓꓴ ꓟꓶꓽ ꓞꓺ ꓢꓯꓼ ꓟꓶꓸ ꓡꓰ ꓢꓲ ꓠꓬꓲ ꓞꓳ ꓤ 11 ꓣꓳ ꓫꓵꓻ ꓗꓷ ꓟ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓑꓶ ꓔ ꓡꓳ=

ꓞꓺ ꓢꓯꓼ 38°C ꓗꓪ ꓛꓲꓺ ꓟꓴ ꓓꓯ ꓡ ꓔꓬ ꓟ ꓬꓲ ꓙꓵꓹ ꓥ ꓟ ꓑꓶꓸ ꓓꓴ ꓑꓮꓲꓽ ꓖꓳ ꓟ ꓗꓪ ꓡ ꓢꓴ 20 ꓣꓳ ꓔꓯ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓙꓰ ꓪ ꓡꓰ ꓢꓲ꓾ 300 ꓣꓳ ꓛꓲꓺ ꓠꓬ ꓠꓻ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓑꓮꓲꓽ ꓖꓳ ꓟ ꓗꓪ ꓗꓴꓷꓼ ꓫꓴ ꓙꓵꓽ ꓢꓲꓽ ꓒ ꓮ-ꓟꓲ-ꓫꓬꓽ ꓐꓰ ꓮ-ꓜꓴ-ꓬ ꓙꓵꓽ ꓪ ꓙꓳ ꓢꓴ ꓐꓴˍ ꓟꓲ ꓔꓹ ꓗꓷ ꓟ ꓥ ꓢꓲ꓾ ꓟꓶ ꓞꓺ ꓮ ꓘꓶꓸ ꓞˍ ꓟ ꓗꓪ ꓠꓲꓹ ꓟ ꓟꓽ ꓙꓬ ꓙꓬ ꓦꓴꓻ ꓠꓬꓹ ꓖꓶ ꓡ ꓟ ꓑ ꓫꓬ ꓐꓴ ꓔꓯˍ ꓟꓲ ꓫꓸ ꓟꓳ ꓘꓶꓽ ꓫꓸ ꓕꓱ ꓗꓷꓳ=

ꓮ ꓟꓶ ꓟ ꓫꓵꓽ ꓪꓴ ꓘꓴꓽ ꓗꓪ ꓫꓵꓻ ꓢꓴ ꓐꓴ ꓬꓲ ꓪ ꓕꓲ ꓦꓲ ꓢꓴ ꓔꓯ ꓢꓯꓼ ꓟꓬ ꓒꓵꓽ ꓐꓶꓻ ꓖꓶ ꓓꓴ ꓥ ꓢꓲ꓾ ꓕꓲ ꓐꓱ ꓠꓬ ꓟꓶꓽ ꓞꓺ ꓮ ꓘꓶꓸ ꓞˍ ꓟ ꓗꓪ ꓡꓳꓸ ꓠꓬꓹ ꓔꓬ ꓝꓲˍ ꓟ ꓔꓯ ꓝꓴꓲꓸ ꓓꓰꓺ ꓢꓴˍ ꓟꓲ ꓙꓳˍ ꓡꓳ=

ꓲ-ꓓꓲ-ꓬ ꓠꓬ 2010 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ ꓞꓺ ꓢꓯꓼ ꓑꓶꓸ ꓓꓴ ꓞꓳ ꓤ 6500 ꓣꓳ ꓟꓽ ꓞꓲꓺ ꓫꓵꓻ ꓗꓷ ꓟ ꓥ ꓢꓲ ꓠꓬꓲ꓾ ꓗꓳꓸ ꓗꓷ ꓟ ꓕꓲ ꓘꓳꓼ ꓗꓪˍ ꓟꓲ ꓕꓲ ꓗꓴꓷꓼ ꓡꓱꓸꓼ ꓗꓪ ꓟ ꓡꓳ ꓒꓱ ꓮ ꓟꓬꓹ ꓗꓪ ꓞꓺ ꓢꓯꓼ ꓮ ꓘꓶꓸ ꓟꓴ ꓓꓯ ꓡ ꓗꓷ ꓟ ꓥ ꓡꓳ=