ꓲ-ꓓꓳ-ꓠꓲꓹ-ꓫꓸ ꓮ ꓔꓳꓸ ꓪꓽ ꓙꓵꓽ ꓐꓶꓽ ꓗꓷ ꓢꓲ ꓡ ꓞꓳ 12ꓹ000 ꓣꓳ ꓟꓽ ꓛꓲ ꓔꓯ ꓶꓽ ꓤ Cꓵꓸ ꓙꓰ ꓝꓲ ꓪ ꓡꓰ ꓟ ꓓꓳꓽ

Wednesday, May 01, 2024

ꓲ-ꓓꓳ-ꓠꓲꓹ-ꓫꓸ ꓗꓴꓷꓼ ꓣꓴꓮꓠꓖ ꓮ ꓔꓳꓸ ꓪꓽ ꓙꓵꓽ ꓠꓬ 2024 ꓘꓳꓼ 4 ꓦ 30 ꓠꓬꓲ꓾ ꓮ ꓟꓰ ꓕꓯ ꓐꓶꓽ ꓗꓷ ꓢꓲ ꓪ ꓙꓵꓽ ꓗꓪ ꓐꓰ ꓮ ꓔꓳꓸ ꓬꓲꓻ ꓓꓳꓻ ꓡ ꓢꓲ ꓠꓬꓲ ꓟꓲꓽ ꓙꓰꓼ ꓬEꓽ (ꓟꓲꓽ ꓐꓬꓱꓽ ꓜꓰꓽˍ) ꓟ ꓒꓬꓱꓼ ꓡ ꓗꓷ ꓢꓲ ꓠꓬꓲ꓾ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓙꓳꓺ ꓗꓽ ꓖꓶ ꓗꓷ ꓠꓬ꓾ ꓬꓲꓻ ꓗꓳ ꓡꓳ ꓟꓵꓽ ꓒ ꓕꓲ ꓗꓪ ꓔꓬ ꓢꓴ 12ꓹ000 ꓣꓳ ꓟꓽ ꓞꓲ ꓔꓯ ꓚꓵꓸ JE FI ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓬꓲꓻ ꓡꓴꓽ ꓐꓱ ꓠꓯ ꓬꓲꓻ ꓘꓴꓽ ꓗꓪ ꓮ ꓔꓳꓸ ꓪ ꓙꓵꓽ ꓗꓪ ꓐꓰ ꓐꓶꓽ ꓡ ꓟ ꓗꓪ ꓐꓰ ꓬꓲꓻ ꓙꓬ ꓘꓴꓽ ꓗꓪ ꓓꓵꓽ ꓙꓰ ꓟ ꓑꓶꓸ ꓓꓴ ꓢꓴ-ꓠ-ꓟꓲ ꓒꓬꓱꓼ ꓡ ꓗꓴꓸˍ ꓡꓳ ꓐꓰ ꓔꓮꓡꓴꓡꓮꓠꓓꓮꓠꓖ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓬ ꓢꓴ ꓐꓴ ꓔꓯ ꓙꓳꓺ ꓗꓽ ꓖꓶ ꓔ ꓡꓳ=

4 ꓦ ꓘꓴꓽ ꓗꓪ ꓮ ꓔꓳꓸ ꓪ ꓙꓵꓽ ꓐꓶꓽˍ ꓟ ꓠꓬ ꓟꓽ ꓠꓽ ꓠꓽ ꓒꓬꓱꓼ ꓡ ꓗꓷ ꓢꓲ꓾ ꓑ ꓫꓬ ꓮ ꓟꓬꓹ ꓣꓳ ꓔꓯ ꓶꓽ ꓤ ꓗꓪ ꓚꓵꓸ ꓖꓶ ꓗꓷ ꓢꓲ ꓟ-ꓠ-ꓓꓳ-ꓫꓲ ꓮ ꓔꓳꓸ ꓐꓬꓱꓻ ꓦꓲ ꓜꓶꓽ ꓖꓴ ꓔꓯ ꓥˍ ꓟꓲ ꓚꓵꓸ ꓗꓷ ꓪ ꓡꓰꓳ= ꓖꓳ ꓡꓱ ꓮ ꓔꓳꓸ ꓪ ꓙꓵꓽ ꓐꓶꓽ ꓗꓷ ꓟ ꓪꓴꓸ ꓠꓬꓲ ꓡ ꓞꓳ ꓔꓬ ꓦꓲꓻ ꓕꓲ ꓐꓱ ꓐꓬ ꓡꓰꓳ=

ꓮ ꓟꓶ ꓕꓲ ꓧꓪꓹ ꓐꓶꓽˍ ꓟ ꓗꓪ ꓮ ꓔꓳꓸ ꓟꓴꓽ ꓘꓴꓽ ꓠꓬ ꓡꓳ-ꓔ 3ꓸ1 ꓕꓷꓹ ꓗꓪ ꓛꓲ ꓛꓲꓺ ꓬꓰ ꓢꓲ꓾ ꓤꓰꓻ ꓞꓹ ꓟ ꓑ ꓫꓬ ꓐꓴ ꓠꓬ ꓮ ꓔꓳꓸ ꓪꓽ ꓙꓵꓽ ꓐꓰ 7 ꓗꓲ-ꓡꓳ-ꓟI-T ꓗꓶꓹ ꓶꓽˍ ꓟ ꓗꓪ ꓚꓵꓸ ꓙꓰ ꓠꓹ ꓟ ꓐꓯ ꓗꓷ ꓢꓲ꓾ ꓮ ꓔꓳꓸ ꓪꓽ ꓙꓵꓽ ꓐꓶꓽˍ ꓟ ꓫꓵꓽ ꓪꓴ ꓝꓮꓲ ꓕꓲ ꓧꓪꓹ ꓟꓲ ꓒꓬꓱꓼ ꓡ ꓗꓴꓸˍ ꓡꓳ ꓐꓰ ꓙꓳꓺ ꓗꓽ ꓖꓶ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=